03/08/2026
ଅଗଷ୍ଟ ୧୦ରେ ମୋଦୀ ସରକାରଙ୍କ ଶ୍ରମିକ, କୃଷକ ଓ ଜନବିରୋଧୀ ନୀତି ବିରୋଧରେ ରାଜ୍ୟବ୍ୟାପୀ ଆନ୍ଦୋଳନ
ଭୁବନେଶ୍ୱର, ତା. ୦୩.୦୮.୨୦୨୬ :
🔴ମୋଦୀ ସରକାରଙ୍କ ୧୨ ବର୍ଷର ଶାସନକାଳରେ ଶ୍ରମିକ, କୃଷକ, କ୍ଷେତମଜଦୁର ଏବଂ ସାଧାରଣ ଜନତାଙ୍କ ଜୀବନ ଓ ଜୀବିକା ଉପରେ ଅଭୂତପୂର୍ବ ଆକ୍ରମଣ ହୋଇଛି। ଲଗାତାର ଦରବୃଦ୍ଧି, ବେକାରୀ, ଅର୍ଥନୈତିକ ସଙ୍କଟ, ଶ୍ରମ ଅଧିକାରର କ୍ଷୁର୍ଣ୍ଣ, ସରକାରୀ କ୍ଷେତ୍ରର ବେସରକାରୀକରଣ, ସାମାଜିକ ସୁରକ୍ଷାରୁ ବଞ୍ଚିତ କରିବା, ସମ୍ବିଧାନ ଓ ଗଣତନ୍ତ୍ର ଉପରେ ଆକ୍ରମଣ ଏବଂ ସାମ୍ପ୍ରଦାୟିକ ବିଭାଜନର ରାଜନୀତି ବିରୋଧରେ ଆସନ୍ତା ୧୦ ଅଗଷ୍ଟ ୨୦୨୬ ତାରିଖରେ ସାରା ଦେଶରେ ଆୟୋଜିତ ହେବାକୁ ଥିବା ଦେଶବ୍ୟାପୀ ଆନ୍ଦୋଳନକୁ ଓଡ଼ିଶାରେ ବ୍ୟାପକ ଭାବେ ସଫଳ କରିବାକୁ ଆଜି ନିଷ୍ପତ୍ତି ନିଆଯାଇଛି।
🔴ଏହି ଅବସରରେ ଭୁବନେଶ୍ୱର ସମେତ ରାଜ୍ୟର ସମସ୍ତ ଜିଲ୍ଲାରେ ଶ୍ରମିକ, କୃଷକ ଓ କ୍ଷେତମଜଦୁରଙ୍କ ସମାବେଶ, ବିକ୍ଷୋଭ, ପ୍ରତିବାଦ ଓ ଜନଆନ୍ଦୋଳନ କାର୍ଯ୍ୟକ୍ରମ ଆୟୋଜନ କରାଯିବ। ଏହି ନିଷ୍ପତ୍ତି ଆଜି ଭୁବନେଶ୍ୱରସ୍ଥିତ ଇଣ୍ଡିଆନ୍ ନ୍ୟାସନାଲ୍ ଟ୍ରେଡ୍ ୟୁନିଅନ୍ କଂଗ୍ରେସ (INTUC) ରାଜ୍ୟ କାର୍ଯ୍ୟାଳୟରେ ଅନୁଷ୍ଠିତ କେନ୍ଦ୍ରୀୟ ଶ୍ରମିକ ସଂଗଠନମାନଙ୍କ ଏବଂ ସଂଯୁକ୍ତ କିଷାନ ମୋର୍ଚ୍ଚା (SKM) ର ମିଳିତ ବୈଠକରେ ନିଆଯାଇଛି।
🔴ବୈଠକରେ କୁହାଯାଇଥିଲା ଯେ, ଶ୍ରମ ସଂହିତା ମାଧ୍ୟମରେ ୧୨ ଘଣ୍ଟିଆ କାର୍ଯ୍ୟଦିବସ ପ୍ରଚଳନ, ଓଭରଟାଇମ୍ ପାଇଁ ଦୁଇଗୁଣା ମଜୁରୀରୁ ବଞ୍ଚିତ କରିବା, ଠିକା ପ୍ରଥାର ବ୍ୟାପକ ବିସ୍ତାର, ସ୍ଥାୟୀ ଚାକିରିର ଅବସାନ, ଛଟେଇ ବୃଦ୍ଧି ଏବଂ ଶ୍ରମିକମାନଙ୍କ ସାମାଜିକ ସୁରକ୍ଷା ଅଧିକାରକୁ କ୍ଷୁଣ୍ଣ କରିବା ଭଳି ପଦକ୍ଷେପ ଦେଶର ଶ୍ରମିକ ବର୍ଗ ପାଇଁ ଘାତକ ସାବ୍ୟସ୍ତ ହୋଇଛି।
🔴ସେହିପରି, ଆମେରିକା ସହିତ କେନ୍ଦ୍ର ସରକାରଙ୍କ ପ୍ରସ୍ତାବିତ କୃଷି ବାଣିଜ୍ୟ ଚୁକ୍ତି ଏବଂ କୃଷି କ୍ଷେତ୍ରରେ ଆଣିବାକୁ ଉଦ୍ୟମ କରାଯାଉଥିବା ନୂତନ ଆଇନ ଓ ନୀତିଗୁଡ଼ିକ ଭାରତୀୟ କୃଷକ, ବିଶେଷକରି କ୍ଷୁଦ୍ର ଓ ନାମମାତ୍ର ଚାଷୀଙ୍କ ସ୍ୱାର୍ଥ ବିରୋଧୀ ବୋଲି ବୈଠକରେ ମତ ପ୍ରକାଶ ପାଇଥିଲା। ଏହି ପଦକ୍ଷେପଗୁଡ଼ିକ କୃଷକଙ୍କ ବିହନ ଉପରେ ଅଧିକାର, କୃଷି ଗବେଷଣା, ବୈଜ୍ଞାନିକ ନବସୃଷ୍ଟି ଏବଂ ଦେଶୀୟ କୃଷିର ବିକାଶକୁ ଦୁର୍ବଳ କରିବାର ଆଶଙ୍କା ସୃଷ୍ଟି କରୁଛି।
🔴ବୈଠକଟି ସଂଯୁକ୍ତ କିଷାନ ମୋର୍ଚ୍ଚା (SKM) ପକ୍ଷରୁ ସାଥୀ ସୁରେଶ ପାଣିଗ୍ରାହୀ ଏବଂ ଇଣ୍ଡିଆନ୍ ନ୍ୟାସନାଲ୍ ଟ୍ରେଡ୍ ୟୁନିଅନ୍ କଂଗ୍ରେସ (INTUC) ପକ୍ଷରୁ ଶ୍ରୀମତୀ ପ୍ରଣତୀ ମିଶ୍ରଙ୍କ ସଭାପତିତ୍ୱରେ ଅନୁଷ୍ଠିତ ହୋଇଥିଲା। ବୈଠକ ଆରମ୍ଭ ପୂର୍ବରୁ ସେଣ୍ଟର ଅଫ୍ ଇଣ୍ଡିଆନ୍ ଟ୍ରେଡ୍ ୟୁନିଅନ୍ସ (CITU) ର ସାଧାରଣ ସମ୍ପାଦକ କମ୍ରେଡ ବିଷ୍ଣୁ ମହାନ୍ତିଙ୍କ ବିୟୋଗରେ ଗଭୀର ଶୋକ ପ୍ରକାଶ କରାଯିବା ସହ ତାଙ୍କ ସ୍ମୃତିରେ ଶ୍ରଦ୍ଧାଞ୍ଜଳି ଜ୍ଞାପନ କରାଯାଇଥିଲା।
🔴ବୈଠକରେ ଇଣ୍ଡିଆନ୍ ନ୍ୟାସନାଲ୍ ଟ୍ରେଡ୍ ୟୁନିଅନ୍ କଂଗ୍ରେସ (INTUC) ପକ୍ଷରୁ ଅକ୍ଷୟ ତ୍ରିପାଠୀ, ଅଲ୍ ଇଣ୍ଡିଆ ଟ୍ରେଡ୍ ୟୁନିଅନ୍ କଂଗ୍ରେସ (AITUC) ପକ୍ଷରୁ ବିଜୟ ଜେନା, ହିନ୍ଦ ମଜଦୁର ସଭା (HMS) ପକ୍ଷରୁ ବି. ଏନ୍. ମହାପାତ୍ର, ସେଣ୍ଟର ଅଫ୍ ଇଣ୍ଡିଆନ୍ ଟ୍ରେଡ୍ ୟୁନିଅନ୍ସ (CITU) ପକ୍ଷରୁ ଉଲ୍ଲାସ ନାୟକ ଓ ଦୁଷ୍ମନ୍ତ କୁମାର ଦାସ, ଅଲ୍ ଇଣ୍ଡିଆ ୟୁନାଇଟେଡ୍ ଟ୍ରେଡ୍ ୟୁନିଅନ୍ ସେଣ୍ଟର (AIUTUC) ପକ୍ଷରୁ ନିରଞ୍ଜନ ମହାନ୍ତି, ଅଲ୍ ଇଣ୍ଡିଆ ସେଣ୍ଟ୍ରାଲ୍ କାଉନ୍ସିଲ୍ ଅଫ୍ ଟ୍ରେଡ୍ ୟୁନିଅନ୍ସ (AICCTU) ପକ୍ଷରୁ ମହେନ୍ଦ୍ର ପରିଡ଼ା, ଟ୍ରେଡ୍ ୟୁନିଅନ୍ କୋ-ଅର୍ଡିନେସନ୍ ସେଣ୍ଟର (TUCC) ପକ୍ଷରୁ ଜ୍ୟୋତି ରଞ୍ଜନ ମହାପାତ୍ର ଏବଂ ଲେବର ପ୍ରୋଗ୍ରେସିଭ୍ ଫେଡେରେସନ୍ (LPF) ପକ୍ଷରୁ ମାୟାଧର ନାୟକ ଉପସ୍ଥିତ ଥିଲେ।
🔴ସେହିପରି ସଂଯୁକ୍ତ କିଷାନ ମୋର୍ଚ୍ଚା (SKM) ଅନ୍ତର୍ଗତ ଅଲ୍ ଇଣ୍ଡିଆ କିଷାନ୍ ସଭା ଆଇ ପକ୍ଷରୁ କ୍ଷରୋଧ ସିଂହଦେଓ, ଇନସାଫ ପକ୍ଷରୁ ନରେନ୍ଦ୍ର ମହାନ୍ତି, ଅଲ୍ ଇଣ୍ଡିଆ କିଷାନ ଖେତ ମଜଦୁର ସଂଗଠନ ପକ୍ଷରୁ ସନ୍ତୋଷ ରଥ, ଅଲ୍ ଇଣ୍ଡିଆ କିଷାନ ମହାସଭା ପକ୍ଷରୁ ବଂଶୀଧର ପରିଡା, ଅଲ୍ ଇଣ୍ଡିଆ କ୍ଷେତ ମଜଦୂର କିଶାନ ସଭାବାସୁଦେବ ଦାସ, ଅଲ୍ ଇଣ୍ଡିଆ କ୍ରାନ୍ତିକାରୀ କୃଷକ ସଭା ପକ୍ଷରୁ ଶଙ୍କର ଇନିକିଲାବ ପ୍ରମୁଖ ନେତୃବୃନ୍ଦ ଯୋଗଦେଇଥିଲେ।
🔴ବୈଠକରେ ସମସ୍ତ ସଂଗଠନର ପ୍ରତିନିଧିମାନେ ରାଜ୍ୟର ଶ୍ରମିକ, କୃଷକ, କ୍ଷେତମଜଦୁର ଓ ସାଧାରଣ ଜନସାଧାରଣଙ୍କୁ ଆସନ୍ତା ୧୦ ଅଗଷ୍ଟର ଦେଶବ୍ୟାପୀ ଆନ୍ଦୋଳନକୁ ସର୍ବାତ୍ମକ ଭାବେ ସଫଳ କରିବା ପାଇଁ ଆହ୍ୱାନ ଜଣାଇଥିଲେ।
ସୁରେଶ ପାଣିଗ୍ରାହୀ
ସଂଯୁକ୍ତ କିଷାନ ମୋର୍ଚ୍ଚା, ଓଡ଼ିଶା
ଏବଂ
ମହେନ୍ଦ୍ର ପରିଡ଼ା
କେନ୍ଦ୍ରୀୟ ଶ୍ରମିକ ସଂଗଠନମାନଙ୍କ ମିଳିତ ମଞ୍ଚ, ଓଡ଼ିଶା ତରଫ ରୁ
