Info Dahod GoG

04/10/2026

અડાલજની વાવને રાણી રૂડીબાઈની વાવ તરીકે પણ ઓળખવામાં આવે છે. આ વાવ પ્રેમ, બલિદાન અને અદ્ભુત સ્થાપત્યકળાનું પ્રતિક છે.

04/10/2026

દાહોદ ઘટક–૪ના રેંટિયા–૨ આંગણવાડી કેન્દ્ર ખાતે “આંગણ ઉત્સવ” કાર્યક્રમ યોજાયો
૦૦૦
દાહોદ ઘટક–૪ અંતર્ગત આવેલ રેંટિયા–૨ આંગણવાડી કેન્દ્ર ખાતે “આંગણ ઉત્સવ” કાર્યક્રમનું આયોજન કરવામાં આવ્યું હતું. આ પ્રસંગે સાંસદશ્રી જસવંતસિંહ ભાભોર, ધારાસભ્યશ્રી કનૈયાલાલ કિશોરી તથા જિલ્લા પ્રોગ્રામ ઓફિસરશ્રી ડો. સુધીર જોશી ઉપસ્થિત રહી કાર્યક્રમની શોભા વધારી હતી.

કાર્યક્રમ દરમિયાન આંગણવાડી કેન્દ્ર ખાતે બાળકો માટે આયોજિત વિવિધ શૈક્ષણિક, સર્જનાત્મક અને પોષણલક્ષી પ્રવૃત્તિઓનું નિરીક્ષણ કરવામાં આવ્યું હતું તેમજ બાળકો સાથે સંવાદ કરી તેમનો ઉત્સાહ વધારવામાં આવ્યો હતો.

આ પ્રસંગે ૩૦ આંગણવાડી કાર્યકર બહેનો તથા ૩૦ તેડાગર બહેનો, એમ કુલ ૬૦ બહેનોનું સાંસદશ્રી જસવંતસિંહ ભાભોર સાહેબ દ્વારા શાલ ઓઢાડી સન્માન કરવામાં આવ્યું હતું. આ સન્માન દ્વારા આંગણવાડી કાર્યકરો તથા તેડાગર બહેનોની સેવાભાવનાને બિરદાવવામાં આવી હતી.

કાર્યક્રમમાં દાહોદ ઘટક–૪ના સીડીપીઓશ્રી રીટાબેન ભાભોર, મુખ્ય સેવિકા શ્રી જીજ્ઞાસાબેન પટેલ, NNM શ્રી પ્રદીપભાઈ રાઠોડ તથા બ્લોક ન્યુટ્રિશન મેનેજર શ્રી પ્રિયાંશુ બારીઆ ઉપસ્થિત રહ્યા હતા.

આંગણ ઉત્સવ કાર્યક્રમને સફળ બનાવવા માટે દાહોદ ઘટક–૪ના આંગણવાડી કાર્યકરો, તેડાગર બહેનો તથા સમગ્ર સ્ટાફ દ્વારા સુંદર આયોજન અને વ્યવસ્થા કરવામાં આવી હતી.
૦૦૦

04/10/2026

ગઈ કાલની ક્વિઝનો સાચો જવાબ...

04/10/2026

આજનો શબ્દ

03/10/2026

03/10/2026

લીમખેડા તાલુકાના કથોળિયા ખાતે ‘સેવાસેતુ કાર્યક્રમ ૨.૧’ યોજાયો, ગ્રામજનોને સ્થળ પર જ વિવિધ સરકારી સેવાઓનો લાભ મળ્યો
૦૦૦
દાહોદ,
ગુજરાત સરકાર દ્વારા રાજ્યના નાગરિકો સુધી સરકારી યોજનાઓના લાભો ઘરઆંગણે પહોંચાડવાના ઉદ્દેશ્યથી લીમખેડા તાલુકા વહીવટી તંત્ર દ્વારા કથોલિયા મુખ્ય પ્રાથમિક શાળા ખાતે ‘સેવાસેતુ કાર્યક્રમ ૨.૧’ નું ભવ્ય આયોજન કરવામાં આવ્યું હતું. આ કાર્યક્રમમાં કથોલિયા, પોલીસીમાળ, ટૂંટાઘાટી, વલુંડી, ખડદા, ચાટકી, જાદા ખેરિયા, કંબોઈ અને ચિલાકોટા ગામના અરજદારોએ મોટી સંખ્યામાં ઉપસ્થિત રહી સેવાઓનો લાભ લીધો હતો.

આ કાર્યક્રમમાં લાભાર્થીઓને સરકારી લાભોનું વિતરણ કરાયું હતું, ઉપરાંત આધારકાર્ડ નોંધણી અને સુધારા, રેશનકાર્ડ ઈ-કેવાયસી, ઈ-ધરા અને એટીવીટી શાખાને લગતા દાખલાઓ જેવાં કે જાતિ અને આવકના પ્રમાણપત્રો સ્થળ પર જ ઇશ્યૂ કરવામાં આવ્યા હતા. આ ઉપરાંત સમાજ સુરક્ષા શાખાની યોજનાઓ (વૃદ્ધ તથા વિધવા સહાય), પી.એમ. કિસાન સન્માન નિધિ ઈ-કેવાયસી, આરોગ્ય સેવાઓ, બસ પાસ અને નમોશ્રી યોજના સહિતની વિવિધ કામગીરી હાથ ધરવામાં આવી હતી.

તાલુકા વહીવટી તંત્રના આ પ્રજાભિમુખ અભિગમથી ગ્રામજનોના સરકારી કામો સરળતાથી અને સ્થળ પર જ ઉકેલાતા સ્થાનિક લોકોમાં ભારે સંતોષની લાગણી જોવા મળી હતી.
૦૦૦

03/10/2026

‘નશાબંધી સપ્તાહ - ૨૦૨૬’ અંતર્ગત નશાબંધી અને આબકારી અધિક્ષક કચેરી, દાહોદ દ્વારા લીમખેડાની નાની વાવ પ્રાથમિક શાળા ખાતે નશાબંધી અને વ્યસનમુક્તિ જાગૃતિ કાર્યક્રમ યોજાયો
૦૦૦
દાહોદ
સામાજિક જાગૃતિ લાવવાના અને સ્વસ્થ સમાજ નિર્માણના ઉદ્દેશ્ય સાથે દાહોદ જિલ્લાના લીમખેડા તાલુકા સ્થિત નાની વાવ પ્રાથમિક શાળા ખાતે ‘નશાબંધી સપ્તાહ - ૨૦૨૬’ અંતર્ગત નશાબંધી જાગૃતિ કાર્યક્રમનું આયોજન કરવામાં આવ્યું હતું. નશાબંધી અને આબકારી અધિક્ષક કચેરી, દાહોદ દ્વારા આયોજિત આ ‘નશાબંધી અને વ્યસનમુક્તિ’ જાગૃતિ કાર્યક્રમમાં શાળાના વિદ્યાર્થીઓ, શિક્ષકગણ તેમજ ગ્રામજનો મળીને આશરે ૩૫૦ જેટલા લોકો ઉત્સાહભેર જોડાયા હતા.

કાર્યક્રમ દરમિયાન ઉપસ્થિત વક્તાઓએ નશાના લીધે થતા શારીરિક, માનસિક અને આર્થિક દુષ્પરિણામો વિશે ગ્રામજનો અને વિદ્યાર્થીઓને સરળ ભાષામાં માર્ગદર્શન પૂરું પાડ્યું હતું. બાળકોમાં નાનપણથી જ વ્યસનમુક્તિ પ્રત્યે સંસ્કાર સીંચાય તે હેતુથી એક ચિત્ર સ્પર્ધાનું પણ આયોજન કરવામાં આવ્યું હતું, જેમાં વિદ્યાર્થીઓએ ઉત્સાહપૂર્વક ભાગ લઈ પોતાની કળા દ્વારા વ્યસનમુક્તિનો સચોટ સંદેશ વહેતો કર્યો હતો.

કાર્યક્રમના સમાપન સમયે ઉપસ્થિત તમામ ૩૫૦ સહભાગીઓએ પોતાના જીવનમાં ક્યારેય નશો ન કરવા અને સમાજમાંથી નશાની બદીને જડમૂળથી દૂર કરવા માટેના દ્રઢ સંકલ્પ સાથે સામૂહિક પ્રતિજ્ઞા લીધી હતી. ગ્રામીણ વિસ્તારમાં વ્યસનમુક્તિનો વ્યાપક સંદેશ પહોંચાડવા માટેનો આ પ્રશંસનીય પ્રયાસ ખૂબ સફળ રહ્યો હતો.
૦૦૦

03/10/2026

છાબ તળાવ, દાહોદ ખાતે પ્રાકૃતિક ખેતી પેદાશ વેચાણ કેન્દ્રનું ધારાસભ્યશ્રી કનૈયાલાલ કિશોરીના હસ્તે લોકાર્પણ
0
દાહોદ જિલ્લાના ખેડૂતોને પ્રાકૃતિક ખેતી તરફ પ્રોત્સાહિત કરવા તેમજ પ્રાકૃતિક ખેતીથી ઉત્પાદિત ખેત પેદાશોને યોગ્ય બજાર અને ગ્રાહકો સુધી સીધી પહોંચ મળી રહે તે હેતુસર છાબ તળાવ, દાહોદ ખાતે ધારાસભ્યશ્રી કનૈયાલાલ કિશોરીના હસ્તે પ્રાકૃતિક ખેતી પેદાશ વેચાણ કેન્દ્રનું લોકાર્પણ કરવામાં આવ્યું હતું.

આ વેચાણ કેન્દ્રના માધ્યમથી સ્થાનિક ખેડૂતો દ્વારા પ્રાકૃતિક પદ્ધતિથી ઉત્પાદિત અનાજ, કઠોળ, શાકભાજી, ફળો તથા અન્ય ખેત પેદાશોનું સીધું વેચાણ કરી શકાશે. જેના પરિણામે ખેડૂતોને તેમના ઉત્પાદનનું યોગ્ય વળતર મળવાની સાથે નાગરિકોને પણ ગુણવત્તાસભર અને પ્રાકૃતિક ખેત પેદાશો સરળતાથી ઉપલબ્ધ થશે.

કાર્યક્રમ દરમિયાન ઉપસ્થિત મહાનુભાવોએ ખેડૂતોને પ્રાકૃતિક ખેતી અપનાવવા, રાસાયણિક ખાતરો અને દવાઓનો ઉપયોગ ઘટાડવા તથા જમીનની ફળદ્રુપતા જાળવવા અનુરોધ કર્યો હતો. સાથે જ પ્રાકૃતિક ખેતીથી ઉત્પાદિત પેદાશોના વેચાણ માટે આવા કેન્દ્રો ખેડૂતો માટે મહત્વપૂર્ણ સાબિત થશે તેમ જણાવ્યું હતું.

આ પ્રસંગે સંબંધિત વિભાગના અધિકારીઓ, કર્મચારીઓ, પ્રાકૃતિક ખેતી સાથે સંકળાયેલા ખેડૂતો તથા સ્થાનિક આગેવાનો ઉપસ્થિત રહ્યા હતા.
00

03/10/2026

રેંટિયા ગામે સેવાસેતુ ૨.૧ ગ્રામ્ય કાર્યક્રમ અંતર્ગત પશુ આરોગ્ય મેળો યોજાયો
0
દાહોદ, તા. ૩ ઓક્ટોબર, ૨૦૨૬: દાહોદ તાલુકાના રેંટિયા ગામે આજે સેવાસેતુ ૨.૧ ગ્રામ્ય કાર્યક્રમ અંતર્ગત પશુ આરોગ્ય મેળા કેમ્પનું આયોજન કરવામાં આવ્યું હતું.

પશુપાલકોને તેમના પશુઓના આરોગ્ય અંગે જરૂરી સારવાર અને માર્ગદર્શન સ્થાનિક સ્તરે મળી રહે તે હેતુથી યોજાયેલા આ કેમ્પનું ઉદ્ઘાટન સાંસદશ્રી જશવંતસિંહ ભાભોર તથા ધારાસભ્યશ્રી કનૈયાલાલ કિશોરીના હસ્તે કરવામાં આવ્યું હતું.

આ પ્રસંગે સાંસદશ્રી અને ધારાસભ્યશ્રીએ પશુપાલકો સાથે સંવાદ કરી પશુ આરોગ્યની જાળવણી તેમજ પશુપાલન ક્ષેત્રે ઉપલબ્ધ સરકારી સેવાઓ અને યોજનાઓનો લાભ લેવા અંગે માર્ગદર્શન આપ્યું હતું.

કાર્યક્રમમાં પ્રાંત અધિકારીશ્રી દાહોદ, મામલતદારશ્રી દાહોદ, તાલુકા વિકાસ અધિકારીશ્રી દાહોદ, રેંટિયા ગામના સરપંચશ્રી સહિત વિવિધ વિભાગોના અધિકારી-કર્મચારીઓ, પદાધિકારીઓ અને ગ્રામજનો ઉપસ્થિત રહ્યા હતા.

સેવાસેતુ ૨.૧ ગ્રામ્ય કાર્યક્રમ અંતર્ગત યોજાયેલા આ પશુ આરોગ્ય મેળાથી રેંટિયા તથા આસપાસના વિસ્તારના પશુપાલકોને પશુ આરોગ્ય સંબંધિત સેવાઓનો લાભ સ્થાનિક સ્તરે મળી રહ્યો છે.
00

03/10/2026

નળવાઈ-3 આંગણવાડી કેન્દ્ર ખાતે ધામધૂમપૂર્વક ‘આંગણ મિલન’ સેવા કાર્યક્રમ યોજાયો
0
દાહોદ માં ગરબાડા તાલુકાની ગરબાડા ઘટક-1 હેઠળ આવતી નળવાઈ-3 આંગણવાડી કેન્દ્ર ખાતે દાહોદ જિલ્લા પંચાયતના ઉપપ્રમુખશ્રી વિજયભાઈ અમલીયારશ્રી તથા ઘટક-1ના બાળ વિકાસ યોજના અધિકારીશ્રીની ઉપસ્થિતિમાં ધામધૂમપૂર્વક ‘આંગણ મિલન’ સેવા કાર્યક્રમ યોજાયો હતો.

કાર્યક્રમ દરમિયાન આંગણવાડી કેન્દ્રના લાભાર્થીઓને **THR (ટેક હોમ રેશન)**નું વિતરણ કરવામાં આવ્યું હતું. આંગણવાડી કેન્દ્ર ખાતે સેવાભાવી કામગીરી કરનાર આંગણવાડી કાર્યકર બહેનો, તેડાગર બહેનો તેમજ આશા વર્કર બહેનોને પ્રમાણપત્ર અને શાલ અર્પણ કરી સન્માનિત કરવામાં આવ્યા હતા.

આ ઉપરાંત કાર્યક્રમમાં ઉપસ્થિત બાળકોને કેળા તથા લાડુનું વિતરણ કરી તેમના આનંદમાં વધારો કરવામાં આવ્યો હતો. કાર્યક્રમ થકી આંગણવાડી કેન્દ્ર સાથે સંકળાયેલા બાળકો, લાભાર્થીઓ તથા મહિલાઓમાં ઉત્સાહ અને આનંદનો માહોલ જોવા મળ્યો હતો.

આંગણવાડી કેન્દ્રો દ્વારા બાળકોના પોષણ, આરોગ્ય અને સર્વાંગી વિકાસ માટે કરવામાં આવતી વિવિધ સેવાઓ અંગે પણ ઉપસ્થિત લાભાર્થીઓને માર્ગદર્શન આપવામાં આવ્યું હતું.
00