31/03/2026
सोलोंथाया बयनिख्रुइबो गोहोगोरा हाथियार जायखौ नोंथाङा मुलुगखौ सोलायनो थाखाय बाहायनो हायो - नेल्सन मन्डेला।
31 मार्च, "फरायसा सान”
थावनि: माज-जाखिलि, 31 मार्च, 2026
गिबियावनो माज-जाखिली दख'रा बर' फरायसा आफादनि जानानै आफादारि गाहाम हामलायथि बावहरग्रोबाय। माज-जाखिलि दख'रा बर' फरायसा आफादनि बान्जायनायाव दख'रा आफादनिनो सिङाव थानाय सिमलापारा गेजेर फरायसालियाव दिनै 31 मार्च, 2026 अक्ट', बड' फा उपेन्द्र नाथ ब्रह्मनि 70 थि गोथार जोनोम सान आरो गोथार जोनोम सानजों लोब्बा लाखिनानै बिथांनि सान्थौ आरो सानस्त्रिखौ गोजोर खालामनाय थांखिजों "फरायसा सान" फालिनाय बुब्लि। दिनैनि मेलखौ सामलायदोंमोन दख'रा आफादनिनो आफादगिरि मुस्रि भुपेस खाख'लारी जों गाहाइ नेहाथारि बिथाङा।
गाहाइ आलासि महरै ग'वालपारा जिल्ला दुलाराय बर' फरायसा आफादनि बारग' आफादगिरि लोगोसे दानि बोसोनगिरि मुस्रि सन्तोस हाजोवारिजों लोगोसे, लोगो बुंथिगिरि मुस्रि खनिन पाटगिरि, मावख' नेहाथारि मुस्रि पंकज हाजोवारि, दिपचरन बसुमतारी, बारग' आफादगिरि ग'वालपारा जिल्ला बर' थुनलाइ आफाद, माज-जाखिली दालाइ बर' थुनलाइ आफादनि आफादगिरि मुस्रि जनमेजय मचाहरी, दख'रा बर' फरायसा आफादनि गासै दैदेनगिरि जों लोगोसे गामिनि गासै मानगोनां फुंखा सुबुंफोर, गामिनि गासै फरायसा फरायसुलिफोराबो बाहागो लायो आरो मेलखौ जाफुंसार खालामो।
बड' फानि रुंसारि गोजोन जिउमानि थाखाय आनान ग'साइनियाव आर'ज गाबहरबाय। बड' फानि सान्थौ आरो सानस्त्रिखौ गोजोर खालामनानै बिथाङा दिन्थिलांनाय लामाखौ संदाननानै बर' माहारिबादखौ बिथा खालामनानै हारिनि सोलोंथाइ, राव-थुनलाइ, बिजों, हारिमु, बिगियानारि समाजबाद, समाज-रांखान्थि आरो सोदोमस्त्रिखौ जौगाखांहोनानै हारिखौ गेरेमसा माहारि गायसननायाव बयखौबो बिबान लानानै खामानि मावनो थाखाय माज-जाखिलि दख'रा बर' फरायसा आफादनिफ्राय खावलाय हरबाय। मिजिंथियो फरायसा सान फालिनायनि गेजेरजों हारियाव गोजोन, खौसेथि आरो दावगाथाइया गोजोर जागोन।
माज-जाखिलि दख'रा बर' फरायसा आफादा अराय थांनानै थाथों
जै बर' माहारिनि जै, एबसुनि जिउआ अराय गोलाव जाथों।