Warangal Police Commissionerate

10/10/2026

09/10/2026

ప్రజాసేవే పోలీసుల పరమ ధ్యేయం - వరంగల్ సీపీ ఎన్. శ్వేతా ఐపీఎస్
వార్షిక తనిఖీలో భాగంగా, ముల్కనూరు పోలీస్ స్టేషన్‌ను శుక్రవారం తనిఖీ చేసిన వరంగల్ పోలీస్ కమిషనర్ ఎన్. శ్వేతా, ఐపీఎస్. ఎస్సై ఎమ్.రాజు ఆధ్వర్యంలో పోలీసు సిబ్బంది గౌరవ వందనం సమర్పించారు.
ఈ సందర్భంగా పోలీస్ స్టేషన్‌లోని వివిధ రికార్డులు, కేసుల దర్యాప్తు పురోగతి, పెండింగ్ కేసులు, స్టేషన్ పరిసరాలు, సిబ్బంది విధుల నిర్వహణ తదితర అంశాలను కమిషనర్ గారు క్షుణ్ణంగా పరిశీలించారు. పోలీసు అధికారులు, సిబ్బందితో సమావేశం నిర్వహించి, గ్రామీణ ప్రాంత ప్రజలు చిన్న చిన్న సమస్యలకు కూడా పోలీసులనే ఆశ్రయిస్తారని అలాంటి సమయంలో వారికి సరైన న్యాయం చేసి వారి మెప్పును పొందాలని, ప్రజలకు సేవ చేయటం పోలీసులకు దక్కిన గౌరవమని, ప్రజాసేవే పోలీసుల పరమ ధ్యేయం అని తెలిపారు. ప్రజలతో మర్యాదగా వ్యవహరిస్తూ వారి సమస్యలను సత్వరమే పరిష్కరించేలా పనిచేయాలని సీపీ సూచించారు. అనంతరము కమిషనర్ స్టేషన్ ఆవరణలో మామిడి మొక్కను నాటారు.
ఈ కార్యక్రమంలో సెంట్రల్ జోన్ డీసీపీ దార కవిత, కాజీపేట ఏసీపీ పింగిలి ప్రశాంత్ రెడ్డి, ఎల్కతుర్తి సి ఐ కె శ్రీను, ముల్కనూరు ఎస్సై ఎమ్. రాజు తో పాటు పోలీసు సిబ్బంది పాల్గొన్నారు.

09/10/2026

యువత ఆన్లైన్ మోసాల బారిన పడొద్దు – వరంగల్ సీపీ. ఎన్. శ్వేత, IPS

- భావోద్వేగాలను అదుపులో ఉంచుకుంటూ, మన సంస్కృతి మరియు విలువలను కాపాడుకుందాం.
- మంచి చెడుల మధ్య తేడాను గుర్తిస్తూ, బాధ్యతాయుతంగా ముందుకు సాగుదాం.
- కుటుంబ సభ్యులందరికీ సైబర్ నేరాల పట్ల అవగాహన కల్పించండి.
డిజిటల్ యుగంలో సైబర్ నేరాల పట్ల ప్రతి ఒక్కరూ అప్రమత్తంగా ఉండాలని, ముఖ్యంగా యువత సోషల్ మీడియాలో అపరిచిత వ్యక్తులతో పరిచయాలు పెంచుకొని తమ విలువైన భవిష్యత్తును ప్రమాదంలోకి నెట్టుకోవద్దని వరంగల్ పోలీస్ కమిషనర్ ఎన్. శ్వేత, ఐపీఎస్ సూచించారు.
అక్టోబర్ నెలను *జాతీయ సైబర్ సెక్యూరిటీ అవగాహన నెల (National Cybersecurity Awareness Month – NCSAM)*గా నిర్వహించే కార్యక్రమంలో భాగంగా శుక్రవారం భీమారంలోని SVS కళాశాల ఆడిటోరియంలో వివిధ కళాశాలలకు చెందిన విద్యార్థులతో అవగాహన సమావేశం నిర్వహించారు. ఈ కార్యక్రమానికి వరంగల్ పోలీస్ కమిషనర్ ఎన్. శ్వేత, IPS ముఖ్య అతిథిగా హాజరై విద్యార్థులను ఉద్దేశించి ప్రసంగించారు.
ఈ సందర్భంగా సీపీ మాట్లాడుతూ, భవిష్యత్తులో దేశ అభివృద్ధిలో కీలక పాత్ర పోషించబోయే వ్యక్తులు మీరేనని, ప్రస్తుతం మీరు ఉన్న వయస్సు జీవితానికి అత్యంత కీలకమైన దశ అని పేర్కొన్నారు. ఈ దశలోనే ప్రతి ఒక్కరూ అవసరమైన అవగాహనను పెంపొందించుకోవాలని, పాటించే విలువలు, అలవాట్లు భవిష్యత్తులో బాధ్యతాయుతమైన పౌరులుగా ఎదగడానికి దోహదపడతాయని తెలిపారు.
ప్రస్తుతం సైబర్ నేరగాళ్లు వివిధ మార్గాల్లో ప్రజలను మోసం చేస్తున్నారని, ముఖ్యంగా యువత సోషల్ మీడియాలో పరిచయమయ్యే అపరిచిత వ్యక్తులను గుడ్డిగా నమ్మకూడదని సూచించారు. కొందరు సైబర్ నేరగాళ్లు భావోద్వేగాలను ఆసరాగా చేసుకొని వ్యక్తిగత వివరాలు, ఫొటోలు, ఇతర సమాచారాన్ని సేకరించి బాధితులను బ్లాక్‌మెయిల్ చేసే అవకాశం ఉందని హెచ్చరించారు. అందువల్ల ఆన్‌లైన్‌లో పరిచయమైన వ్యక్తులతో వ్యక్తిగత సమాచారాన్ని పంచుకోవద్దని, మంచి చెడుల మధ్య వ్యత్యాసాన్ని గుర్తించి ఆలోచనాత్మకంగా నిర్ణయాలు తీసుకోవాలని సూచించారు.
అదేవిధంగా, సైబర్ నేరాల పట్ల అవగాహన పెంపొందించుకోవడంతో పాటు తమ కుటుంబ సభ్యులకు కూడా అవగాహన కల్పించాలని విద్యార్థులకు పిలుపునిచ్చారు. రానున్న దసరా సెలవులను సద్వినియోగం చేసుకొని తల్లిదండ్రులు, కుటుంబ సభ్యులు, బంధువులకు సైబర్ నేరాలపై అవగాహన కల్పించాలని సూచించారు. ప్రతి ఒక్కరూ డిజిటల్ భద్రతా నియమాలను పాటిస్తూ సైబర్ నేరాల నివారణలో భాగస్వాములు కావాలని తెలిపారు.
ఈ కార్యక్రమంలో సెంట్రల్ జోన్ డీసీపీ ధార కవిత, హనుమకొండ ఏసీపీ నరసింహారావు, సైబర్ క్రైమ్ ఏసీపీ వెంకటరమణ, కేయూసీ ఇన్‌స్పెక్టర్ రవికుమార్, సైబర్ క్రైమ్ ఇన్‌స్పెక్టర్ అశోక్, సైబర్ క్రైమ్ ఎస్‌ఐ శివకుమార్, SVS కళాశాల అధ్యాపకులు, వివిధ కళాశాలలకు చెందిన విద్యార్థులు పాల్గొన్నారు.

08/10/2026

పోలీస్ శాఖ ప్రతిష్ఠ గస్తీ విధులు నిర్వహించే సిబ్బంది పనితీరుపైనే ఆధారపడి ఉంటుంది- వరంగల్ సీపీ ఎన్. శ్వేతా, ఐపీఎస్

వార్షిక తనిఖీలో భాగంగా హనుమకొండ పోలీస్ స్టేషన్‌ను తనిఖీ చేసిన వరంగల్ పోలీస్ కమిషనర్ ఎన్. శ్వేతా ఐపీఎస్.
సెంట్రల్ జోన్ డీసీపీ ధార కవిత పూల మొక్కను అందజేసి సాదరంగా స్వాగతం పలికారు. అనంతరం ఎస్సై సతీష్ ఆధ్వర్యంలో పోలీసు సిబ్బంది గౌరవ వందనం సమర్పించారు.
ఈ సందర్భంగా పోలీస్ స్టేషన్‌లోని వివిధ రికార్డులు, కేసుల దర్యాప్తు పురోగతి, పెండింగ్ కేసులు, స్టేషన్ పరిసరాలు, సిబ్బంది విధుల నిర్వహణ తదితర అంశాలను కమిషనర్ గారు క్షుణ్ణంగా పరిశీలించారు. పోలీసు అధికారులు, సిబ్బందితో సమావేశం నిర్వహించి “పోలీస్ శాఖ ప్రతిష్ఠ అనేది గస్తీ విధులు నిర్వహించే సిబ్బంది పనితీరుపైనే ఆధారపడి ఉంటుందని. గస్తీ సిబ్బంది నిరంతరం అప్రమత్తంగా ఉంటూ, ప్రజల భద్రతకు భరోసా కల్పిస్తూ విధులు నిర్వహించినప్పుడే పోలీస్ శాఖపై ప్రజల్లో విశ్వాసం పెరుగుతుందని. సిబ్బంది సమర్థవంతమైన విధుల నిర్వహణతో పోలీస్ శాఖ ప్రతిష్ఠ మరింత పెరుగుతుందని” అని తెలిపారు. ప్రతి పోలీస్ సిబ్బంది తమకు అప్పగించిన విధులను అంకితభావంతో, క్రమశిక్షణతో నిర్వహించాలని, ప్రజలతో మర్యాదగా వ్యవహరిస్తూ వారి సమస్యలను సత్వరమే పరిష్కరించేలా పనిచేయాలని సీపీ సూచించారు.
నిత్యం విదుల్లో బిజీగా ఉండే పోలీసులు వారి ఆరోగ్యం పట్ల శ్రద్ధ వహించాలని, ప్రతిరోజూ క్రమం తప్పకుండా వ్యాయామం చేయాలని, పోలీసు సిబ్బంది వ్యక్తిగత క్రమశిక్షణతో పాటు ఆర్థిక క్రమశిక్షణకు అలవాటు పడినప్పుడే కుటుంబ భవిష్యత్తు బాగుంటుందని హితవు పలికారు.
అనంతరము పోలీస్ స్టేషన్ ఆవరణలో మామిడి మొక్కను నాటారు.
ఈ కార్యక్రమంలో సెంట్రల్ జోన్ డీసీపీ దారా కవిత, హనుమకొండ ఏసీపీ నరసింహారావు, ఇన్‌స్పెక్టర్ శివకుమార్, ఎస్సై సతీష్‌తో పాటు పోలీసు సిబ్బంది పాల్గొన్నారు.

08/10/2026

సైబర్ నేరాల నియంత్రణలో వరంగల్ కమిషనరేట్ ప్రత్యేక చర్యలు

సైబర్ నేరాల నియంత్రణ, బాధితులకు సత్వర సహాయం, మోసపోయిన నగదు రికవరీ, నేరస్థుల గుర్తింపు మరియు ప్రజల్లో సైబర్ అవగాహన కల్పించడంలో వరంగల్ కమిషనరేట్ పోలీసులు సమర్థవంతమైన చర్యలు చేపడుతున్నారు. ఇందులో భాగంగా సైబర్ నేరాలకు సంబంధించిన నెలవారీ పనితీరు నివేదికలను ఇకపై ప్రతి నెలా మీడియా ద్వారా విడుదల చేయనున్నట్లు వరంగల్ పోలీస్ కమిషనర్ తెలిపారు.
NCRP:
01-01-2026 నుండి 30-09-2026 వరకు, NCRP ద్వారా మొత్తం 3,952 ఫిర్యాదులు అందగా, వాటిలో 1155 ఫిర్యాదులు పరిష్కరించబడ్డాయి. అదేవిధంగా, 105 కేసులను గుర్తించి, 174 మంది నిందితులను అరెస్టు చేశారు. మిగిలిన ఫిర్యాదులపై తదుపరి చర్యలు కొనసాగుతున్నాయి.
NCRP గణాంకాల ప్రకారం, సైబర్ నేరాల కారణంగా బాధితులు సుమారు ₹20.66 కోట్లు నష్టపోగా అదేవిధంగా ₹5.23 కోట్లు బాధితులకు తిరిగి అందించబడ్డాయి.
Samanvaya:
Samanvaya ద్వారా పోలీస్ స్టేషన్లకు పంపిన 983 అభ్యర్థనల్లో 866 పూర్తయ్యాయి.
GRM:
ప్రజలు బ్యాంకింగ్ సంబంధిత సమస్యలపై GRM పోర్టల్ ద్వారా మొత్తం 104 ఫిర్యాదులు నమోదు చేయగా, వాటిలో 83 ఫిర్యాదులు పరిష్కరించబడ్డాయి.
MRM:
ప్రజలు బ్యాంకింగ్ సంబంధిత సమస్యలపై MRM ద్వారా మొత్తం 789 అభ్యర్థనలు నమోదు చేయగా, వాటిలో 615 అభ్యర్థనలు పరిష్కరించబడ్డాయి. ఈ ప్రక్రియ ద్వారా ₹21.44 లక్షలు బాధితులకు తిరిగి అందించబడ్డాయి.

ACCUSED PROFILING:
సైబర్ నేరస్థుల గుర్తింపు కోసం నిర్వహించిన Accused Profilingలో 116 అభ్యర్థనలను 100% పూర్తి చేశారు.

Cyber Crime Awareness Programmes:
ప్రజల్లో సైబర్ భద్రతపై అవగాహన పెంచేందుకు జూన్, జూలై, ఆగస్టు 2026 లో మొత్తం 286 అవగాహన కార్యక్రమాలు నిర్వహించారు.

సెప్టెంబర్ 2026లో వరంగల్ కమిషనరేట్ పరిధిలో NCRP ద్వారా 483 సైబర్ ఫిర్యాదులు అందగా, 95 ఫిర్యాదులు పరిష్కరించబడి, 10 FIRలు నమోదు చేయబడ్డాయి. MRM ద్వారా 285 అభ్యర్థనలు అందగా, బాధితుల నగదుకు సంబంధించి మొత్తం ₹50.87 లక్షలు Restorable Amountగా గుర్తించగా, ₹49.56 లక్షలు బాధితులకు పునరుద్ధరించబడ్డాయి. అదేవిధంగా, సైబర్ నేరాలకు పాల్పడిన 34 మంది నిందితులను వరంగల్ పోలీసులు అరెస్ట్ చేశారు.
సైబర్ మోసానికి గురైన వెంటనే 1930కు కాల్ చేసి, National Cyber Crime Reporting Portal ద్వారా ఫిర్యాదు చేయాలని వరంగల్ కమీషనర్ గారు ప్రజలకు విజ్ఞప్తి చేసారు . సత్వర ఫిర్యాదు ద్వారా మోసపోయిన నగదును నిలుపుదల చేసి బాధితులకు తిరిగి అందించే అవకాశం పెరుగుతుంది.
“అప్రమత్తంగా ఉండండి – సైబర్ నేరాల నుంచి సురక్షితంగా ఉండండి.”
“Stay Alert – Stay Safe Online.”

07/10/2026

సైబర్ మోసాలపై అప్రమత్తంగా ఉండాలి – వరంగల్ సీపీ ఎన్. శ్వేత IPS

-“ఆగండి… ఆలోచించండి… అడుగువేయండి”
-సైబర్ క్రైమ్ అవేర్‌నెస్ పోస్టర్ల ఆవిష్కరణ.

తెలంగాణ సైబర్ సెక్యూరిటీ బ్యూరో ఆధ్వర్యంలో ఈ అక్టోబర్ నెలను సైబర్ మోసాలపై అవగాహన కల్పించే నెల గా ప్రకటించి, అవగాహన కార్యక్రమాలు నిర్వహిస్తున్న నేపథ్యంలో, ప్రజలు సైబర్ నేరాల పట్ల అప్రమత్తంగా ఉండాలని వరంగల్ పోలీస్ కమిషనర్ ఎన్.శ్వేత సూచించారు.

ఫోన్ కాల్స్, SMSలు, WhatsApp మెసేజ్‌లు, ఈ-మెయిల్స్ లేదా అనుమానాస్పద లింకులు వచ్చినప్పుడు “ఆగండి… ఆలోచించండి… ధృవీకరించండి” అనే విధానాన్ని పాటించాలని తెలిపారు.

KYC, బ్యాంక్ ఖాతా బ్లాక్, లాటరీ, ఉద్యోగ అవకాశాలు, పెట్టుబడులపై భారీ లాభాలు వంటి పేర్లతో వచ్చే మోసపూరిత కాల్స్, సందేశాలను నమ్మవద్దని సూచించారు. ఆన్‌లైన్ షాపింగ్‌లో భారీ డిస్కౌంట్లు, అతి తక్కువ ధరల పేరుతో వచ్చే నకిలీ వెబ్‌సైట్ల పట్ల జాగ్రత్తగా ఉండాలని, కొనుగోలు చేసే ముందు వెబ్‌సైట్ URL, విక్రేత వివరాలను ధృవీకరించుకోవాలని తెలిపారు.

OTP, UPI PIN, ATM/డెబిట్ కార్డు లాంటి వివరాలు, CVV, PIN, పాస్‌వర్డ్‌లు ఎవరితోనూ పంచుకోరాదని, అనుమానాస్పద లింకులపై క్లిక్ చేయకూడదని స్పష్టం చేశారు. అత్యవసరంగా డబ్బును పంపాలని ఒత్తిడి చేసే వ్యక్తులను నమ్మవద్దని సూచించారు. సైబర్ మోసానికి గురైన వెంటనే 1930 కు కాల్ చేసి, cybercrime.gov.in లో ఆన్లైన్ ద్వారా ఫిర్యాదు చేయాలని తెలిపారు.

ఈ సందర్భంగా సైబర్ నేరాలపై ప్రజల్లో అవగాహన కల్పించే సైబర్ క్రైమ్ అవేర్‌నెస్ పోస్టర్లను వరంగల్ పోలీస్ కమిషనర్ ఎన్.శ్వేత ఆవిష్కరించారు.

ఈ కార్యక్రమంలో అడిషనల్ డీసీపీ (అడ్మినిస్ట్రేషన్) రాయల ప్రభాకర్ రావు, సైబర్ క్రైమ్ ఇన్స్పెక్టర్ అశోక్ కుమార్ మరియు కమిషనరేట్ AO లు పాల్గొన్నారు.

06/10/2026

పోలీస్ స్పోర్ట్స్ మీట్ లో పతకాలు సాదించిన పోలీసు క్రీడాకారులను అబినందించిన-వరంగల్ సీపీ ఎన్.శ్వేతా, ఐపీఎస్

హైదరాబాద్ లోని తెలంగాణ పోలీస్ అకాడమీలో సెప్టెంబర్ 27 నుంచి 30 వరకు నిర్వహంచిన 5వ తెలంగాణ పోలీస్ స్పోర్ట్స్ మీట్ లో వరంగల్ పోలీస్ కమిషనరేట్ లో విధులు నిర్వహిస్తున్న 12 మంది పోలీసు క్రీడాకారులు ప్రతిభ కనబరిచారు.

బ్యాడ్మింటన్ ఆటలో ఒక బంగారు పతకము, మూడు బ్రాంజ్ మెడల్స్, టేబుల్ టెన్నిస్ ఆటోలో ఐదు బ్రాంజ్ మెడల్స్, లాండ్ టెన్నిస్ ఆటలో ఒక బ్రాంజ్, ఒక సిల్వర్ మరియు రెండు బ్రాండ్ మొత్తము 12 పథకాలు సాధించారు. పతకాలు సాధించిన ఎ ఆర్ అడిషనల్ డి.సి.పి.వి.శ్రీనివాస్, ఎసిపి.మధుసూదన్, ఎఆర్ ఎసిపి. లు పి.అనంతయ్య, కె. నాగయ్య, ఎసిపి.పి.నర్సయ్య, ఎస్సై. ఎ.సురేష్, మహిళా ఎఎస్సై ఇ.జమునారాణి, మహిళా హెడ్ కానిస్టేబుల్ యన్.స్వర్ణలత, హెడ్ కానిస్టేబుల్ లు యస్.ఓదెలు, శ్రీరాములు, కానిస్టేబుల్ లు కె.వేణుచారి, పి.తులసీదాస్ లు వరంగల్ పోలీస్ కమిషనర్ ను మర్యాదపూర్వకంగా కలిశారు.

వారు సాధించిన పతకాలను పరిశీలంచిన కమిషనర్ క్రీడాకారులను అభినందించి వారి ప్రతిభను ప్రశంసించారు. పోలీసు విధులను సమర్దవంతంగా నిర్వహంచడంతో పాటు క్రీడల్లోనూ ప్రతిభ కనబరిచి పోలీస్ శాఖకు పేరు తీసుకురావడం అభినందనీయమని పేర్కొన్నారు. విధి నిర్వహణతో పాటు శారీరక దారుఢ్యం, క్రీడా నైపుణ్యాలను పెంపొందించుకోవాలని సిబ్బందికి సూచించారు. భవిష్యతు్తలో మరిన్ని క్రీడా పోటీల్లో పాల్గొని ఉన్నత విజయాలు సాధించాలని క్రీడాకారులను ప్రోత్సహంచారు.

06/10/2026

గిన్నీస్ బుక్ ఆఫ్ వరల్డ్ రికార్డు లో చోటు సాధించిన కరాటే మాస్టర్ ధామేర శంకర్‌కు సీపీ ఎన్.శ్వేత, ఐపీఎస్ అభినందనలు

వరల్డ్ కరాటే మాస్టర్స్ అసోసియేషన్ ఆధ్వర్యంలో , ఆగస్టు 16వ తేదీన చెన్నైలో నిర్వహించిన కరాటే పోటీల్లో నిరవధికంగా ఆరు గంటల పాటు కరాటే ప్రదర్శన నిర్వహించి గిన్నీస్ బుక్ ఆఫ్ వరల్డ్ రికార్డులో చోటు సంపాదించిన హనుమకొండ నయీమ్ నగర్ ప్రాంతానికి చెందిన కరాటే మాస్టర్ ధామేర శంకర్ ను వరంగల్ పోలీస్ కమిషనర్ ఎన్. శ్వేత ఐపీఎస్ అభినందించారు.

ఈ సందర్భంగా సీపీ శ్వేత మాట్లాడుతూ, కఠోర సాధన, పట్టుదలతో అంతర్జాతీయ స్థాయిలో ప్రతిభ కనబరిచి గిన్నీస్ వరల్డ్ రికార్డు సాధించడం అభినందనీయమని అన్నారు. ధామేరా శంకర్ సాధించిన ఈ ఘనత, తెలంగాణ రాష్ట్రానికి గర్వకారణమని పేర్కొన్నారు.

06/10/2026

బతుకమ్మ, దసరా ఉత్సవాలకై సమన్వయంతో పటిష్ట ఏర్పాట్లు – వరంగల్ సీపీ ఎన్.శ్వేతా, ఐపీఎస్.

వరంగల్ ఉర్సుగుట్టలోని రంగలీలా మైదానంలో ఈ నెల 10 నుండి 20 వ తేదీ వరకు నిర్వహించనున్న బతుకమ్మ, దసరా ఉత్సవాల ఏర్పాట్లపై మంగళవారం వరంగల్ జిల్లా కలెక్టర్ సత్య శారద ఆధ్వర్యంలో దసరా ఉత్సవ కమిటీ వారు నిర్వహించిన సన్నాహక సమావేశానికి వరంగల్ పోలీస్ కమిషనర్ ఎన్.శ్వేతా, ఐపీఎస్ హాజరయ్యారు.

ఈ సందర్భంగా కమిషనర్ మాట్లాడుతూ, ఉత్సవాలను ప్రశాంత వాతావరణంలో విజయవంతంగా నిర్వహించేందుకు అన్ని శాఖల అధికారులు పరస్పర సమన్వయంతో పనిచేయాలని సూచించారు. శాంతిభద్రతల పరిరక్షణకు పోలీస్ శాఖ పటిష్టమైన భద్రతా ప్రణాళికతో ముందుకు సాగుతుందని, ఎలాంటి అవాంఛనీయ సంఘటనలు చోటుచేసుకోకుండా ముందస్తు చర్యలు చేపడతామని తెలిపారు.

ఉత్సవాలకు పెద్ద సంఖ్యలో ప్రజలు హాజరయ్యే అవకాశం ఉన్నందున భద్రత, ట్రాఫిక్ నియంత్రణ, పారిశుధ్యం, మౌలిక వసతులు, ప్రజలకు అవసరమైన సౌకర్యాలు తదితర అంశాలపై సంబంధిత శాఖలు ప్రత్యేక దృష్టి సారించాలని సీపీ సూచించారు. ప్రతి శాఖ తమకు అప్పగించిన బాధ్యతలను సమర్థవంతంగా నిర్వర్తిస్తూ, ఇతర శాఖలతో నిరంతరం సమన్వయం చేసుకోవాలని కోరారు.

ఈ సమావేశంలో వరంగల్ తూర్పు ఎమ్మెల్యే కొండా సురేఖ, వరంగల్ జిల్లా కలెక్టర్ సత్య శారద, మున్సిపల్ కమిషనర్ వెంకన్నతో పాటు వివిధ శాఖల ఉన్నతాధికారులు, అధికారులు, దసరా ఉత్సవ కమిటీ సభ్యులు పాల్గొన్నారు.