29/10/2026
**സോപ്പുപയോഗിച്ച് കൈകഴുകൽ രോഗപ്രതിരോധത്തിന് ഏറ്റവും ലളിതമായ മാർഗം
**
രോഗപ്രതിരോധത്തിന് സോപ്പുപയോഗിച്ച് കൈകഴുകുന്ന ശീലം ജീവിതത്തിന്റെ ഭാഗമാക്കണമെന്ന് ആരോഗ്യവകുപ്പ്.
രോഗങ്ങൾ തടയുന്നതിനുള്ള ലളിതവും ഫലപ്രദവും ചെലവുകുറഞ്ഞതുമായ മാർഗമാണ് സോപ്പുപയോഗിച്ചുള്ള കൈകഴുകൽ എന്ന സന്ദേശം ജനങ്ങളിലെത്തിക്കുന്നതിന്റെ ഭാഗമായി ആഗോള കൈകഴുകൽ ദിനാചരണത്തിന്റെ ജില്ലാതല ഉദ്ഘാടനം വണ്ടൻമേട്ടിൽ സംഘടിപ്പിച്ചു.
ജില്ലാ മെഡിക്കൽ ഓഫീസ് (ആരോഗ്യം), ആരോഗ്യ കേരളം ഇടുക്കി, വണ്ടൻമേട് സാമൂഹികാരോഗ്യ കേന്ദ്രം, സെന്റ് ആന്റണീസ് ഹൈസ്കൂൾ വണ്ടൻമേട് എന്നിവയുടെ സംയുക്താഭിമുഖ്യത്തിലാണ് പരിപാടി സംഘടിപ്പിച്ചത്.
വണ്ടൻമേട് ഗ്രാമപഞ്ചായത്ത് പ്രസിഡന്റ് സൂസൻ ജേക്കബിന്റെ അധ്യക്ഷതയിൽ ചേർന്ന ചടങ്ങ് കട്ടപ്പന ബ്ലോക്ക് പഞ്ചായത്ത് പ്രസിഡന്റ് കെ. ബാലസിംഗ് ഉദ്ഘാടനം ചെയ്തു. ജില്ലാ സർവൈലൻസ് ഓഫീസർ ഡോ. ജോബിൻ ജി. ജോസഫ് കൈകഴുകലിന്റെ പ്രാധാന്യം, ശരിയായ കൈകഴുകൽ രീതി, കൈകഴുകേണ്ട സാഹചര്യങ്ങൾ എന്നിവയെക്കുറിച്ച് വിഷയാവതരണം നടത്തി. വണ്ടൻമേട് സാമൂഹികാരോഗ്യ കേന്ദ്രം മെഡിക്കൽ ഓഫീസർ ഡോ. അനുമോൾ കെ. ബെന്നി സ്വാഗതം ആശംസിച്ചു.
കട്ടപ്പന ബ്ലോക്ക് പഞ്ചായത്ത് വൈസ് പ്രസിഡന്റ് കൈകഴുകലിന്റെ പ്രാധാന്യം ഉൾക്കൊള്ളുന്ന പ്രതിജ്ഞ കുട്ടികൾക്ക് ചൊല്ലിക്കൊടുത്തു. സെന്റ് ആന്റണീസ് സ്കൂൾ മാനേജർ സിസ്റ്റർ സ്റ്റെല്ല SABS ദിനാചരണ സന്ദേശം നൽകി. ഉപ്പുതറ സാമൂഹികാരോഗ്യ കേന്ദ്രം മെഡിക്കൽ ഓഫീസർ ഡോ. മിനി മോഹൻ ബോധവൽക്കരണ ക്ലാസ് നയിച്ചു.
കൈകഴുകലിന്റെ വിവിധ ഘട്ടങ്ങൾ കോർത്തിണക്കി സെന്റ് ആന്റണീസ് സ്കൂൾ വിദ്യാർത്ഥികളും വണ്ടൻമേട് സാമൂഹികാരോഗ്യ കേന്ദ്രത്തിലെ ജീവനക്കാരും ചേർന്ന് അവതരിപ്പിച്ച ഫ്ലാഷ് മോബ് പരിപാടിയുടെ പ്രധാനപ്രധാന ആകർഷണമായി.
സെന്റ് ആന്റണീസ് ഹൈസ്കൂൾ ഹെഡ്മിസ്ട്രസ് കൊച്ചുറാണി, ജില്ലാ മെഡിക്കൽ ഓഫീസ് (ആരോഗ്യം) ടെക്നിക്കൽ അസിസ്റ്റന്റ് ഷിജു ടി.കെ., ഡെപ്യൂട്ടി ജില്ലാ എഡ്യൂക്കേഷൻ ആൻഡ് മീഡിയ ഓഫീസർ ഷൈലാഭായി വി.ആർ., ഉപ്പുതറ സാമൂഹികാരോഗ്യ കേന്ദ്രം ഹെൽത്ത് സൂപ്പർവൈസർ ജെയ്സൺ സി. ജോൺ, വണ്ടൻമേട് ഹെൽത്ത് ഇൻസ്പെക്ടർ ഉപാസ് ഡബ്ല്യു. മിറാൻഡ, ആരോഗ്യ കേരളം ജൂനിയർ കൺസൾട്ടന്റ് ജിജിൽ മാത്യു തുടങ്ങിയവർ ചടങ്ങിൽ പങ്കെടുത്തു. വണ്ടൻമേട് സാമൂഹികാരോഗ്യ കേന്ദ്രത്തിലെ ജീവനക്കാരും സ്കൂളിലെ അധ്യാപകരും അനധ്യാപകരും വിദ്യാർത്ഥികളും ദിനാചരണത്തിൽ പങ്കാളികളായി.
