Collector Idukki

23/09/2026

ജില്ലാതല പട്ടയമേള നാളെ, ബഹു. റവന്യൂ വകുപ്പ് മന്ത്രി ശ്രീ. എ.പി അനില്‍കുമാര്‍ ഉദ്ഘാടനം ചെയ്യും

ഇടുക്കി ജില്ലാതല പട്ടയമേളയുടെ ഉദ്ഘാടനം നാളെ(സെപ്റ്റംബര്‍ 24) ബഹു. റവന്യൂ മന്ത്രി ശ്രീ. എ.പി അനില്‍ കുമാര്‍ നിര്‍വഹിക്കും. ചെറുതോണി പഞ്ചായത്ത് ടൗണ്‍ഹാളില്‍ രാവിലെ 10.30ന് നടക്കുന്ന പട്ടയമേളയില്‍ ശ്രീ. റോയ് കെ. പൗലോസ് എം.എല്‍.എ അധ്യക്ഷത വഹിക്കും. ഗവ. ചീഫ് വിപ്പ് ശ്രീ. അപു ജോണ്‍ ജോസഫ്, അഡ്വ. ഡീന്‍ കുര്യാക്കോസ് എം.പി, എം.എല്‍എമാരായ അഡ്വ. സേനാപതി വേണു, അഡ്വ. സിറിയക് തോമസ്, ശ്രീ.എഫ് രാജ, ജില്ലാ പഞ്ചായത്ത് പ്രസിഡന്റ് ശ്രീമതി. ഷീല സ്റ്റീഫന്‍, തുടങ്ങിയവര്‍ പങ്കെടുക്കും.
സംസ്ഥാന സര്‍ക്കാരിന്റെ നൂറുദിന കര്‍മപദ്ധതിയുടെ ഭാഗമായാണ് റവന്യൂവകുപ്പ് ജില്ലയില്‍ പട്ടയ വിതരണം സംഘടിപ്പിക്കുന്നത്. വിവിധ ഭൂമി പതിവ് ചട്ടങ്ങള്‍ പ്രകാരമുള്ള പട്ടയങ്ങള്‍, വനാവകാശ രേഖകള്‍ എന്നിവ ചടങ്ങില്‍ വിതരണം ചെയ്യും. പട്ടയമേളയിലേക്ക് എല്ലാ പ്രിയപ്പെട്ടവരെയും സഹർഷം സ്വാഗതം ചെയ്യുന്നു.

16/09/2026

ഇടുക്കി ജില്ലാ കളക്ടറേറ്റിൽ ഇന്റേൺഷിപ് അവസരം. District Collector's Internship Program രണ്ടാം ബാച്ചിലേക്ക് അപേക്ഷകൾ ക്ഷണിക്കുന്നു. ജില്ലാതല ഭരണ സംവിധാനങ്ങളെയും പൊതുനയങ്ങളെയും അടുത്തറിയാനും പ്രവർത്തിക്കുവാനും അവസരമൊരുക്കുന്നു. അപേക്ഷകൾ ക്ഷണിക്കുന്ന അവസാന തിയതി: 29/09/26.

12/09/2026

സത്രം എയർ സ്ട്രിപ്പ് നിർമ്മാണം വേഗം പൂർത്തിയാക്കുന്നതിന് വിവിധ വകുപ്പുകളുടെ സംയുക്ത യോഗo കൂടി പരിശോധന നടത്തി. യോഗത്തിൽ എയർ സ്ട്രിപ്പിന്റ നിർമ്മാണം വേഗത്തിൽ പൂർത്തിയാക്കാൻ തീരുമാനിച്ചു. വനം വകുപ്പിൽ നിന്നും എയർ സ്ട്രിപ്പിന്റെ നിർമ്മാണത്തിന് കൂടുതൽ ആവശ്യമായ 6.5 ഏക്കർ വസ്തു ലഭ്യമാക്കുന്നതിന് വേണ്ട നടപടിക്രമങ്ങൾ സ്വീകരിക്കുവാൻ തീരുമാനിച്ചു. യോഗത്തിൽ ബഹു. പീരുമേട് എം. എൽ. എ. സിറിയക് തോമസ്, ഡി.എഫ്. ഒ. കോട്ടയം, EE PWD Buildings, പീരുമേട് തഹസിൽദാർ, NCC ലെയിസൻ ഓഫീസർ, വില്ലേജ് ഓഫീസർ തുടങ്ങിയവർ പങ്കെടുത്തു.

10/09/2026

02/09/2026

ജില്ലാ ശുചിത്വ മിഷൻ ഇടുക്കി- ഹരിത ഓണം 2026 വിവര വിജ്ഞാന വ്യാപന പ്രവർത്തനങ്ങളുടെ ഭാഗമായി ഹരിത കർമ്മ സേന ടീമുകൾക്കായി സംഘടിപ്പിച്ച പൂക്കള മത്സരം വലിയ ആവേശത്തോടെയാണ് ജില്ലയിലെ ഹരിത കർമ്മ സേനകൾ സ്വീകരിച്ചത് എന്നറിയുന്നതിൽ സന്തോഷം. അജൈവ പാഴ്‌വസ്തുക്കളും റീസൈക്കിൾഡ് വസ്തുക്കളും മാത്രം ഉപയോഗിച്ചു നിർമ്മിക്കുന്ന പൂക്കളത്തിൽ "വരവായി വൃത്തിയുടെ ചക്രവർത്തി ഈ ഓണം ഹരിത ഓണം " എന്ന സന്ദേശം , പൂക്കളത്തിന്റെ ഡിസൈനിലെ വ്യത്യസ്തത, മനോഹാരിത , എന്നിവയും പരിഗണിച്ചാണ് മൂല്യനിർണയം നടത്തിയത്. പേപ്പർ, പ്ലാസ്റ്റിക്ക് , കുപ്പികൾ,കുപ്പിയുടെ അടപ്പുകൾ, പഴയ തുണി , മുത്തുകൾ , തെർമോകോൾ തുടങ്ങി ഹരിത കർമ്മ സേന എം. സി. എഫുകളിൽ ശേഖരിച്ചു വച്ച വിവിധ തരം അജൈവ പാഴ്‌വസ്തുക്കൾ ഉപയോഗിച്ചാണ് വ്യത്യസ്തങ്ങളായ ഡിസൈനുകളിൽ പൂക്കളങ്ങൾ ഒരുക്കിയത് .

മാലിന്യത്തിൽ നിന്നും കലാസൃഷ്ടി എന്നതിന് ഉത്തമ ഉദാഹരണങ്ങളായി ഓരോ പൂക്കളവും.

മണിക്കൂറുകൾ നീണ്ട പരിശ്രമത്തിലൂടെയാണ് ഹരിത കർമ്മസേന ടീമുകൾ വർണ്ണാഭമായ പൂക്കളങ്ങൾ തീർത്തത് . മാവേലിയും, റെഡ്യൂസ് റീയൂസ് റീസൈക്കിൾ ആശയങ്ങളും , ശുചിത്വ മിഷന്റെ ലോഗോയായ കാക്കയും ചൂലും , കേരളത്തിന്റെ സ്വന്തം ഹരിത കർമ്മ സേനയും, 2026 ലെ ഖര മാലിന്യ പരിപാലന ചട്ടം പ്രകാരമുള്ള നാലു തരം ബിന്നുകളുമെല്ലാം പൂക്കളത്തിന്റെ ഭാഗമായി.
ഈ അവസരത്തിൽ ഏറെ സന്തോഷത്തോടെയാണ് പൂക്കള മത്സര വിജയികളെ പ്രഖ്യാപിക്കുന്നത്

ഒന്നാം സ്ഥാനം - ഹരിത കർമ്മ സേന ടീം ചക്കുപള്ളം പഞ്ചായത്ത്(പതിനായിരം രൂപയും ഫലകവും)

രണ്ടാം സ്ഥാനം - ഹരിത കർമ്മ സേന ടീം കുമിളി ഗ്രാമ പഞ്ചായത്ത് (ഏഴായിരം രൂപയും ഫലകവും)

മൂന്നാം സ്ഥാനം - ഹരിത കർമ്മ സേന ടീം,കട്ടപ്പന നഗരസഭ (അയ്യായിരം രൂപയും ഫലകവും)

പ്രോത്സാഹന സമ്മാനം – അറക്കുളം, ഏലപ്പാറ, നെടുങ്കണ്ടം ഗ്രാമപഞ്ചായത്തുകളിലെ ഹരിത കർമ്മ സേന ടീമുകൾ.

വിജയികൾക്ക് ഹൃദയം നിറഞ്ഞ അനുമോദനങ്ങൾ
പൂക്കളത്തിന്റെ പിന്നിൽ പ്രവർത്തിച്ച എല്ലാ ഹരിത കർമ്മ സേന അംഗങ്ങൾക്കും അവർക്കു ആവശ്യമായ പിന്തുണ നൽകിയ തദ്ദേശ സ്ഥാപനങ്ങൾക്കും ജില്ലാ ഭരണകൂടത്തിന്റെയും ശുചിത്വമിഷന്റെയും ആശംസകൾ അറിയിക്കുന്നു

25/08/2026

ഏവർക്കും ഹൃദ്യമായ ഓണാശംസകൾ 🥰❤️

22/08/2026

ഓണാഘോഷത്തിന്റെ ഭാഗമായി ഇടുക്കി കളക്ടറേറ്റിൽ ജീവനക്കാരോടൊപ്പം ഓണാഘോഷത്തിൽ പങ്കുചേർന്നു. ഒപ്പം വിവിധ ഓണാഘോഷപരിപാടികളിൽ പങ്കെടുത്തവർക്കുള്ള സമ്മാനങ്ങളും വിതരണം ചെയ്തു.

18/08/2026

വരവായ് വൃത്തിയുടെ ചക്രവർത്തി
ഈ ഓണം ഹരിത ഓണം

ഹരിത ഓണം ലോഗോ പ്രകാശനം
ഹരിത ഓണം ജില്ലാ തല ലോഗോ പ്രകാശനം ജില്ലാകളക്ടറുടെ ചേമ്പറിൽ സംഘടിപ്പിച്ചു. ഇടുക്കി നിയോജകമണ്ഡലം എം. എൽ. എ ശ്രീ. റോയ്. കെ. പൗലോസ്, ജില്ലാ കളക്ടർ ഡോ. ദിനേശൻ ചെറുവാട്ട് ഐ. എ. എസ് എന്നിവർ ചേർന്ന് ലോഗോ പ്രകാശനം നിർവ്വഹിച്ചു . ജില്ലാ ശുചിത്വ മിഷൻ കോ ഓർഡിനേറ്റർ ശ്രീ ഭാഗ്യരാജ് കെ. ആർ, ഡി. റ്റി. പി. സി. സെക്രട്ടറി ശ്രീ ജിതീഷ് ജോസ് എന്നിവർ സന്നിഹിതരായിരുന്നു .
സമൃദ്ധിയുടെയും സ്നേഹത്തിന്റെയും ഒത്തൊരുമയുടെയും സന്ദേശം വിളിച്ചോതി വന്നെത്തുന്ന ഓണക്കാലത്തെ പരിസ്ഥിതി സൗഹൃദമായി വരവേൽക്കാം . മഴ മാറി, മനവും മാനവും ഒരുപോലെ തെളിഞ്ഞിരിക്കുന്നു. പുത്തൻ പ്രതീക്ഷകളും സ്വപ്നങ്ങളും നെയ്തുകൊണ്ട് വന്നെത്തുന്ന ഓണനാളുകളെ നമുക്ക് വൃത്തിയോടെയും ശുചിത്വബോധത്തോടെയും വരവേൽക്കാം.മാവേലി തമ്പുരാനെ വരവേൽക്കാൻ നമ്മുടെ വീടും പരിസരവും മാത്രമല്ല, നാടും നഗരവും തെരുവുകളും പൊതുസ്ഥലങ്ങളും ജലാശയങ്ങളും എല്ലാം വൃത്തിയാക്കാം . ഈ ഓണം ആക്കാം.. ആഘോഷങ്ങളും അലങ്കാരങ്ങളും പരിസ്ഥിതി സൗഹൃദമാക്കാം. നിരോധിത പ്ലാസ്റ്റിക്കുകൾ, ഡിസ്പോസബിൾ ഗ്ലാസുകൾ, പാത്രങ്ങൾ, പ്ലാസ്റ്റിക് കവറുകൾ, പ്ലാസ്റ്റിക് കൊടി തോരണങ്ങൾ ഒറ്റത്തവണ ഉപയോഗിക്കുന്ന പേപ്പർ പ്ലേറ്റുകൾ പേപ്പർ വാഴയില എന്നിവ പൂർണ്ണമായും ഒഴിവാക്കി, പകരം വാഴയില, സ്റ്റീൽ പാത്രങ്ങൾ, തുണിസഞ്ചികൾ, പൂക്കൾ , കുരുത്തോല എന്നിങ്ങനെ പരിസ്ഥിതി സൗഹൃദ വസ്തുക്കളുടെ ഉപയോഗം ശീലമാക്കാം . സദ്യയും ഓണക്കളികളും മത്സരങ്ങളും എല്ലാം മാലിന്യ രഹിതമാക്കാം . മാലിന്യങ്ങളെ ഉറവിടത്തിൽ തന്നെ തരം തിരിക്കാം ഭക്ഷണാവശിഷ്ടങ്ങൾ കമ്പോസ്റ്റാക്കാം. അജൈവ മാലിന്യങ്ങൾ ശാസ്ത്രീയ സംസ്കരണത്തിന് കൈമാറാം . Suchitwa Mission- ന്റെ മാർഗ്ഗനിർദ്ദേശങ്ങൾ പിന്തുടരാം.കേരളക്കരയുടെ ദേശീയോത്സവമായ ഓണത്തെ മാലിന്യരഹിതമായി, പ്രകൃതിക്ക് ദോഷം വരുത്താതെ ആഘോഷിക്കാൻ നമുക്കെല്ലാവർക്കും ഒരുമിച്ച് പ്രതിജ്ഞയെടുക്കാം. പൊതുജനങ്ങളും സന്നദ്ധ സംഘടനകളും ക്ലബുകളും സാംസ്കാരിക സാമുദായിക സംഘടനകളും സ്ഥാപനങ്ങളും ഓണാഘോഷ പരിപാടികളിൽ പൂർണ്ണമായും ഹരിത ചട്ടം കർശനമായി പാലിച്ച് ഹരിത ഓണം ക്യാമ്പയിൻ പ്രവർത്തനങ്ങളിൽ പങ്കാളികളാകണമെന്നു അഭ്യർത്ഥിക്കുന്നതിനൊപ്പം ഏവർക്കും സന്തോഷവും സമൃദ്ധിയും നിറഞ്ഞ ഓണവും ആശംസിക്കുന്നു

# വരവായ് വൃത്തിയുടെ ചക്രവർത്തി ഈ ഓണം ഹരിത ഓണം
#ഹരിത ഓണം 2026
# എം. എൽ. എ ഇടുക്കി
#ജില്ലാ കളക്ടർ ഇടുക്കി
#ജില്ലാ ശുചിത്വ മിഷൻ ഇടുക്കി

15/08/2026

ഇടുക്കി ജില്ലാ ആസ്ഥാനത്ത് നടന്ന വർണാഭമായ സ്വാതന്ത്ര്യ ദിനാഘോഷ ചടങ്ങിൽ ബഹു. ഭക്ഷ്യ പൊതുവിതരണ വകുപ്പ് മന്ത്രി ശ്രീ. അനൂപ് ജേക്കബ് അവർകൾ പതാക ഉയർത്തി അഭിവാദ്യം സ്വീകരിച്ചു.

15/08/2026

ഏവർക്കും ഹൃദ്യമായ സ്വാതന്ത്രദിനാശംസകൾ