06/09/2026
শিক্ষাৰ বিপ্লৱ — আমাৰ জাতিৰ ভৱিষ্যতৰ সংকল্প
শিক্ষাই হৈছে এখন জাতিক আগুৱাই লৈ যোৱাৰ অন্যতম শক্তিশালী অস্ত্ৰ। আজিৰ বিজ্ঞান, প্ৰযুক্তি আৰু কৃত্ৰিম বুদ্ধিমত্তাৰ যুগত কোনো জাতিয়ে যদি উন্নতিৰ শিখৰত উপনীত হ’ব বিচাৰে, তেন্তে সেই জাতিয়ে সমাজত গুণগত, আধুনিক, বিজ্ঞানভিত্তিক আৰু জীৱনমুখী শিক্ষাৰ এক নতুন বিপ্লৱ সৃষ্টি কৰিব লাগিব।
আমাৰ সমাজখন আজিও বিভিন্ন সামাজিক, অৰ্থনৈতিক আৰু শৈক্ষিক সমস্যাৰে জৰ্জৰিত। দীৰ্ঘদিন ধৰি চলি অহা পিছপৰা অৱস্থা আৰু বিভিন্ন স্বাৰ্থৰ ৰাজনীতিয়ে আমাৰ সমাজৰ অগ্ৰগতিত বাধা সৃষ্টি কৰিছে। এই সকলো বাধাৰ পৰা মুক্ত হৈ এখন আত্মনিৰ্ভৰ, মৰ্যাদাপূৰ্ণ, সচেতন আৰু শক্তিশালী সমাজ তথা জাতি গঢ়ি তোলাৰ আটাইতকৈ স্থায়ী আৰু ফলপ্ৰসূ পথ হৈছে শিক্ষা।
সেয়ে আমি আজিৰ পৰা অহা ৩০টা বছৰক শিক্ষাৰ ৰূপান্তৰৰ এক দীঘলীয়া যাত্ৰা হিচাপে গ্ৰহণ কৰিব লাগিব। আমাৰ লক্ষ্য হ’ব লাগিব—এটা প্ৰজন্মৰ পিছত আন এটা প্ৰজন্মক গুণগত শিক্ষাৰে শিক্ষিত কৰি দেশ-বিদেশৰ বিভিন্ন ক্ষেত্ৰত প্ৰতিষ্ঠিত কৰা।
আমি এনে এক প্ৰজন্ম গঢ়ি তুলিব লাগিব, যাৰ মাজৰ পৰা চিভিল ছাৰ্ভিচ বিষয়া, অভিযন্তা, চিকিৎসক, শিক্ষক, অধ্যাপক, বিজ্ঞানী, গৱেষক, প্ৰযুক্তিবিদ, উদ্যোগী আৰু প্ৰতিষ্ঠিত ব্যৱসায়ী ওলাই আহিব। আমাৰ ল’ৰা-ছোৱালীয়ে কেৱল চাকৰি বিচৰা নহয়, বৰং চাকৰি সৃষ্টি কৰা দক্ষ উদ্যোগী আৰু নিয়োগদাতা হিচাপেও নিজকে প্ৰতিষ্ঠিত কৰিব লাগিব।
আমাৰ সন্তানসকলে এদিন মহাকাশ বিজ্ঞান, চন্দ্ৰ অভিযান, NASA-ৰ দৰে আন্তঃৰাষ্ট্ৰীয় মহাকাশ গৱেষণা প্ৰতিষ্ঠান আৰু বিশ্বৰ আগশাৰীৰ বিজ্ঞান-প্ৰযুক্তিৰ ক্ষেত্ৰত নিজৰ প্ৰতিভা আৰু যোগ্যতাৰ পৰিচয় দিব লাগিব।
যেতিয়া আমাৰ সন্তানসকলে বিশ্বৰ বিভিন্ন প্ৰান্তত নিজৰ জ্ঞান, যোগ্যতা আৰু কৰ্মদক্ষতাৰ জৰিয়তে সফলতা অৰ্জন কৰিব, তেতিয়াহে আমাৰ সমাজ তথা জাতিৰ প্ৰতি থকা হীনমন্যতা, অৱহেলা আৰু নেতিবাচক ধাৰণা সলনি হ’ব। জ্ঞান, দক্ষতা আৰু যোগ্যতাই হ’ব আমাৰ আত্মমৰ্যাদাৰ আটাইতকৈ শক্তিশালী পৰিচয়।
শিক্ষাৰ লগতে আমি আমাৰ সন্তানসকলক বহুভাষিক দক্ষতা অৰ্জন কৰাব লাগিব। নিজৰ মাতৃভাষাৰ প্ৰতি গভীৰ সন্মান, ভালপোৱা আৰু দখল থকাৰ লগতে হিন্দী আৰু ইংৰাজী ভাষাত সাবলীলভাৱে কথা ক’ব, লিখিব আৰু যোগাযোগ কৰিব পৰা দক্ষতা গঢ়ি তুলিব লাগিব।
বিশেষকৈ ইংৰাজী ভাষাৰ আন্তঃৰাষ্ট্ৰীয় যোগাযোগ দক্ষতা বৃদ্ধি কৰিব লাগিব, যাতে আমাৰ যুৱক-যুৱতীসকলে দেশৰ বাহিৰতো বিভিন্ন ক্ষেত্ৰত আত্মবিশ্বাসেৰে কাম কৰিব পাৰে। আনকি কোনোবাই শ্ৰমিক হিচাপে কাম কৰিলেও তেওঁ দক্ষ, প্ৰশিক্ষিত আৰু অধিক উৎপাদনশীল কৰ্মী হিচাপে উন্নত দেশসমূহত সন্মানজনকভাৱে কাম কৰিব পৰা যোগ্যতা অৰ্জন কৰিব লাগিব।
আজিৰ পৃথিৱী কেৱল পৰম্পৰাগত কিতাপৰ শিক্ষাত সীমাবদ্ধ নহয়। কম্পিউটাৰ, ইণ্টাৰনেট, ৰবটিক্স, ডাটা ছায়েন্স, অটোমেচন আৰু Artificial Intelligence (AI)-এ ইতিমধ্যে আমাৰ জীৱন আৰু কৰ্মক্ষেত্ৰত ব্যাপক পৰিৱৰ্তন আনিছে।
সেয়ে আমাৰ সন্তানসকলে কেৱল কম্পিউটাৰ চলাব জনাই নহয়, AI-ৰ সৈতে সহাৱস্থান কৰি, ইয়াক সঠিক আৰু সৃষ্টিশীলভাৱে ব্যৱহাৰ কৰি আৰু নতুন প্ৰযুক্তিৰ সৈতে নিজকে খাপ খুৱাই কাম কৰিব পৰা দক্ষতা লাভ কৰিব লাগিব।
কিন্তু কেৱল ডিগ্ৰী আৰু চাকৰিয়েই এই শিক্ষাৰ সম্পূৰ্ণ উদ্দেশ্য নহয়। এজন প্ৰকৃত শিক্ষিত মানুহ সৎ, দায়িত্বশীল, শৃংখলাবদ্ধ, মানৱীয়, সহনশীল আৰু সমাজৰ প্ৰতি দায়বদ্ধ হ’ব লাগিব।
সেয়ে আমাৰ শিক্ষা ব্যৱস্থাত নৈতিক শিক্ষা, সামাজিক মূল্যবোধ, দেশপ্ৰেম, পৰিৱেশ সচেতনতা, নেতৃত্বৰ গুণ, শৃংখলা, সহমৰ্মিতা, সততা আৰু মানৱীয় মূল্যবোধকো সমান গুৰুত্ব দিব লাগিব।
আমি সংকল্প লৈছো শিক্ষাৰ জৰিয়তে সমাজৰ দীৰ্ঘম্যাদী উন্নয়নৰ লক্ষ্যৰে নিজৰ কামসমূহ অধিক সুসংগঠিত আৰু পৰিকল্পিতভাৱে আগুৱাই লৈ যাব লাগিব।
আমাৰ লক্ষ্য কেৱল এখন বিদ্যালয় নিৰ্মাণ কৰা নহয়; আমাৰ লক্ষ্য হৈছে এটা শিক্ষিত, দক্ষ, নৈতিক, আত্মনিৰ্ভৰ, বিজ্ঞানমনস্ক আৰু বিশ্বমানৰ প্ৰজন্ম গঢ়ি তোলা।
আমি বিচাৰোঁ—
আমাৰ সন্তান পঢ়িব,
আমাৰ সন্তান দক্ষ হ’ব,
আমাৰ সন্তান বিশ্বৰ সৈতে প্ৰতিযোগিতা কৰিব,
আমাৰ সন্তান বিজ্ঞান আৰু প্ৰযুক্তিৰ ক্ষেত্ৰত আগবাঢ়িব,
আমাৰ সন্তান নেতৃত্ব দিব,
আমাৰ সন্তান চাকৰি বিচৰাৰ লগতে চাকৰি সৃষ্টি কৰিব,
আৰু আমাৰ সমাজ শিক্ষাৰ শক্তিৰে আত্মনিৰ্ভৰ, সচেতন আৰু মৰ্যাদাপূৰ্ণ হৈ উঠিব।
অহা ৩০ বছৰ হওক শিক্ষাৰ বিপ্লৱৰ ৩০ বছৰ।
শিক্ষাই হওক আমাৰ শক্তি,
জ্ঞানেই হওক আমাৰ পৰিচয়,
দক্ষতাই হওক আমাৰ আত্মনিৰ্ভৰশীলতাৰ ভিত্তি,
আৰু শিক্ষিত প্ৰজন্মই হওক আমাৰ ভৱিষ্যৎ।
Aminul Hoque
