14/03/2026
ജിസിഡഎ യുടെ സീവേജ് ട്രീട്മെന്റ് പ്ലാൻറ് പൂർണ ശേഷിയിലേക്ക് : ശ്രീ ചന്ദ്രൻ പിള്ള ഉദ്ഘാടനം ചെയ്തു
മാലിന്യ സംസ്‍കരണം ഓരോ വ്യക്തികളുടെയും സ്ഥാപനങ്ങളുടെയും ഉത്തരവാദിത്വമാണെന്ന അനിവാര്യത ചർച്ച ചെയ്യപ്പെടുന്ന കാലഘട്ടത്തിലാണ് നാം ജീവിക്കുന്നത്. പ്രതിദിനം സംസ്കരിക്കപ്പെടേണ്ട മാലിന്യത്തിന്റെ അളവ് വർദ്ധിച്ചു വരുന്ന സാഹചര്യത്തിൽ ജിസിഡിഎ ഉടമസ്ഥതയിൽ കലൂർ ജവഹർ ലാൽ നെഹ്റു സ്റ്റേഡിയത്തിൽ 750 KLD കപ്പാസിറ്റിയിൽ നിർമിച്ചിട്ടുള്ള സ്വീവേജ് ട്രീറ്റ്മെന്റ് പ്ലാന്റ് (STP) പൂർണ്ണ പ്രവർത്തന കപ്പാസിറ്റിയിൽ മാലിന്യം സംസ്കരിക്കുന്നതിനായി സജ്ജമാക്കി . ജിസിഡിഎ ചെയർമാൻ ശ്രീ കെ ചന്ദ്രൻ പിള്ള ഉദ്ഘാടനം കർമ്മം നിർവഹിച്ച ഈ ചടങ്ങിൽ, കൊച്ചി കോർപറേഷൻ ആരോഗ്യ കാര്യ സ്റ്റാന്റിംഗ് കമ്മിറ്റി ചെയർപേഴ്സൺ ശ്രീമതി സീന ടീച്ചർ അധ്യക്ഷത വഹിച്ചു. ജിസിഡിഎ എക്സിക്യൂട്ടീവ് കമ്മിറ്റി അംഗം ശ്രീ എ ബി സാബു സ്വാഗതവും ജിസിഡിഎ എക്സിക്യൂട്ടീവ് എഞ്ചിനീയർ ശ്രീ ഗോപകുമാർ പദ്ധതി അവതരണവും നടത്തി. ജില്ലാ ശുചിത്യ മിഷൻ കോർഡിനേറ്റർ ദോ ശീതൾ ജി മോഹൻ കെ എ എസ്, പൊല്യൂഷൻ കണ്ട്രോൾ ബോർഡ് ചീഫ് എൻവയോൺമെന്റൽ എഞ്ചിനീയർ ശ്രീ ബാബുരാജൻ എന്നിവർ ആശംസയും ജിസിഡിഎ സെക്രട്ടറി ശ്രീമതി ശാരി എം വി നന്ദിയും അർപ്പിച്ചു . ഈ സീവേജ് ട്രീട്മെൻറ് പ്ലാന്റിന്റെ നടത്തിപ്പ് കരാർ ഏറ്റെടുത്ത മെറ്റകാഫ് വാട്ടർ സൊല്യൂഷൻസ് ഭാരവാഹികളെ ചടങ്ങിൽ ഉപഹാരം നൽകി ആദരിച്ചു.
സ്റ്റേഡിയത്തിൽ നിന്നുള്ള സ്വീവേജ് മാത്രം സംസ്കരിക്കുന്നതിനായി സജ്ജമാക്കിയ STP യുടെ 20% ശേഷി മാത്രമേ മുൻപ് ഉപയോഗിച്ചിരുന്നുള്ളൂ. എന്നാൽ കൊച്ചിയിലെ മാലിന്യ സംസ്കരണ വിഷയത്തിൽ ദേശീയ ഹരിത ട്രിബ്യൂണലിൽ കൊച്ചിൻ കോർപ്പറേഷനെയും ജിസിഡിഎ യെയും കക്ഷി ചേർത്ത് വന്ന കേസിൽ കോർപ്പറേഷനിലെ മാലിന്യ സംസ്കരണ വിഷയത്തിൽ ജിസിഡിഎ യുടെ ഇടപെടൽ ആവശ്യമെന്ന ട്രിബ്യൂണലിന്റെ നിരീക്ഷണത്തെ തുടർന്നാണ് പുറമെ നിന്നുള്ള സ്വീവേജ് മാലിന്യം സംസ്കരിക്കുന്ന വിധേയ പ്ലാന്റിന്റെ പൂർണ്ണ ശേഷി ഉപയോഗിക്കാൻ ജിസിഡിഎ തീരുമാനിച്ചത്.
നിലവിൽ സള്ളേജ് അഥവാ ഗ്രേ വാട്ടർ മാത്രമാണ് പ്ലാന്റിൽ ട്രീറ്റ്‌ ചെയ്യാൻ ഉദ്ദേശിക്കുന്നത്. അതായത് കിച്ചൻ, ബാത്ത് എന്നിങ്ങനെയുള്ള മലിനജലം. നിലവിൽ നമുക്ക് ചുറ്റും ഒഴുകുന്ന മാലിന്യത്തിന്റെ തോത് ശരിയായ സംസ്കരണ സംവിധാനം വഴി കുറക്കാനും അതുവഴി ആരോഗ്യപ്രശ്നങ്ങൾ ഒഴിവാക്കാനും നമ്മുടെ കുഞ്ഞുമക്കൾ ഉൾപ്പെടുന്ന അടുത്ത തലമുറക്ക് ഇവിടം അതിജീവനം സുഖമമാക്കാനും വേണ്ടി സമീപവാസികൾ ഉൾപ്പടെ എല്ലാജനങ്ങളുടെയും പങ്കാളിത്തം അനിവാര്യമെന്ന് ക്യാമ്പയിൻ വഴി ജിസിഡിഎ ജനങ്ങളെ ബോധ്യപ്പെടുത്തും.
ജില്ലാ കളക്ടറുടെ നേതൃത്വത്തിൽ മലിനീകരണ നിയന്ത്രണ ബോർഡ്, ശുചിത്വ മിഷൻ, കോർപ്പറേഷൻ സെക്രട്ടറി, ജിസിഡിഎ സെക്രട്ടറി, വാട്ടർ അതോറിറ്റി, യൂണിവേഴ്സിറ്റി പ്രൊഫസർ എന്നിവർ ഉൾപ്പെട്ട ടെക്നികൽ കമ്മിറ്റി വിശദമായ പ്രൊപ്പോസൽ അംഗീകരിക്കുകയും ശേഷം സർക്കാരിന്റെ അനുമതി ലഭ്യമാക്കി പിപിപി മോഡലിലാണ് പ്ലാന്റിന്റെ പൂർണ്ണ ശേഷി ഉപയോഗപ്രദമാക്കുന്നത്.
റിപ്പോർട്ടുകൾ പ്രകാരം, നിലവിൽ കൊച്ചിയിൽ രൂപപ്പെടുന്ന സ്വീവേജ് മാലിന്യത്തിന്റെ അളവ് 82 MLD അഥവാ 82 മില്യൺ ലിറ്റർ പ്രതിദിനം. അതായത് 8.2 കോടി ലിറ്റർ പ്രതിദിനം എന്ന കണക്കെയാണിത്. സ്വീവേജ് മാലിന്യമെന്നാൽ ടോയ്ലറ്റ്, കിച്ചൺ, ബാത്ത് എന്നിങ്ങനെ ദ്രവരൂപത്തിലുള്ള മലിനജലം. നിലവിൽ 3 മുതൽ 6 ശതമാനം വരെ സ്വീവേജ് മാലിന്യം സംസ്കരിക്കാനുള്ള പ്ലാന്റ് സംവിധാനങ്ങൾ മാത്രമേ നമുക്കുള്ളൂ. അവശേഷിക്കുന്ന 90-95% ദ്രവമാലിന്യം നമുക്ക് ചുറ്റുമുള്ള ജലാശയങ്ങളിൽ ഒഴുകി ചേരുകയാണ് . അനുദിനം വർദ്ധിച്ചു വരുന്ന ഈ മാലിന്യം ഭാവിയിൽ ഭീകരമായ പ്രത്യാഘാതങ്ങൾ സൃഷ്ടിക്കുമെന്നുറപ്പാണ്. കൂടുതൽ സ്വീവേജ് ട്രീറ്റ്മെന്റ് പ്ലാന്റുകൾ നിർമിച്ചു കൊണ്ട് മാലിന്യത്തിനെതിരെയുള്ള ആരോഗ്യ, തദ്ദേശ സംവിധാനങ്ങളുടെ പോരാട്ടത്തിൽ ഭാഗമാകുകയാണ് ഇതിലൂടെ ജിസിഡിഎ.
