Kollam City Police

08/10/2026

🚨 ബൈക്കിൽ കറങ്ങി നടന്ന് സ്ത്രീകൾക്കും കുട്ടികൾക്കും നേരെ നഗ്നതാ പ്രദർശനം; പ്രതി അറസ്റ്റിൽ

ചാത്തന്നൂർ–പാരിപ്പള്ളി മേഖലയിൽ ബൈക്കിൽ കറങ്ങി നടന്ന് സ്ത്രീകളും കുട്ടികളും നിൽക്കുന്ന സ്ഥലങ്ങളിലെത്തി നഗ്നതാ പ്രദർശനം നടത്തിയ പ്രതിയെ പാരിപ്പള്ളി പോലീസ് അറസ്റ്റ് ചെയ്തു.

ചിറക്കര കുളത്തൂർക്കോണം ചരുവിള പുത്തൻവീട്ടിൽ അനൂപ് (40) ആണ് അറസ്റ്റിലായത്. നിലവിൽ കല്ലുവാതുക്കൽ നടക്കൽ ഭാഗത്തെ കോച്ചിംഗ് സെന്ററിന് സമീപം വാടകയ്ക്ക് താമസിച്ചുവരികയായിരുന്നു.

തിങ്കളാഴ്ച രാവിലെ സമാനമായ രീതിയിൽ ലൈംഗിക വൈകൃതം പ്രകടിപ്പിച്ചതിനെ തുടർന്ന് ലഭിച്ച പരാതിയിൽ പാരിപ്പള്ളി പോലീസ് നടത്തിയ അന്വേഷണത്തിലാണ് പ്രതിയെ കണ്ടെത്തി അറസ്റ്റ് ചെയ്തത്.

സമാനമായ കുറ്റകൃത്യത്തിന് ചാത്തന്നൂർ പോലീസ് സ്റ്റേഷനിലും പ്രതിക്കെതിരെ കേസ് നിലവിലുണ്ട്. സ്ത്രീകളെ ശല്യം ചെയ്തതിനും പാരിപ്പള്ളി പോലീസ് സ്റ്റേഷനിൽ മുമ്പ് കേസ് രജിസ്റ്റർ ചെയ്തിട്ടുണ്ട്. കൂടാതെ 2024-ലും 2026-ലും മോഷണക്കുറ്റങ്ങളിൽ ഉൾപ്പെട്ടതിനെ തുടർന്നും പാരിപ്പള്ളി പോലീസ് സ്റ്റേഷനിൽ കേസുകൾ നിലവിലുണ്ട്.

പാരിപ്പള്ളി എസ്.എച്ച്.ഒ ആശ വി. രേഖയുടെ നേതൃത്വത്തിൽ എസ്.ഐ മനു, സി.പി.ഒമാരായ നൗഫൽ, സബിത്ത്, രഞ്ജിത്ത് എന്നിവരടങ്ങിയ പോലീസ് സംഘമാണ് പ്രതിയെ അറസ്റ്റ് ചെയ്തത്.

07/10/2026

അഞ്ചാലുംമൂട് സി.ഐ രാജേഷിൻറെ നിർദ്ദേശപ്രകാരം SHO വിഷ്ണു സജീവ്, SI സാൻറെ അഗസ്റ്റിൻ എന്നിവരുടെ നേതൃത്വത്തിൽ ASI ഷിഹാബുദ്ദീൻ SCPO മാരായ ഷാജി, മനോജ് CPO അഭിജിത്ത് എന്നിവരടങ്ങിയ പോലീസ് സംഘത്തിൻറെ സമയോചിതമായ ഇടപെടൽ ആണ് രണ്ട് വിലപ്പെട്ട ജീവനുകൾ രക്ഷപെടുത്താൻ സഹായകമായത്.

News Courtesy: Mathrubhumi

07/10/2026

ടൂവീലർ ഉപയോഗത്തെച്ചൊല്ലി തർക്കം; സുഹൃത്തിനെ കുത്തിക്കൊലപ്പെടുത്തിയ കേസിൽ പ്രതി അറസ്റ്റിൽ

ടൂവീലർ ഉപയോഗിച്ചതുമായി ബന്ധപ്പെട്ട തർക്കത്തെ തുടർന്ന് സുഹൃത്തിനെ കത്തി ഉപയോഗിച്ച് കുത്തിക്കൊലപ്പെടുത്തിയ കേസിൽ പ്രതിയെ ചവറ പോലീസ് അറസ്റ്റ് ചെയ്തു. ചവറ കുറുവിലക്കാട് സ്വദേശിയായ കാരി എന്ന ശിവരാജ് (39) ആണ് പിടിയിലായത്. ഇയാളുടെ സുഹൃത്തും കുറുവിലക്കാട് സ്വദേശിയുമായ മുഹമ്മദ് ബിലാലിനെ ആണ് ഇയാൾ കുത്തി കൊലപ്പെടുത്തിയത്. ശനിയാഴ്ച രാത്രി 11.30 മണിയോടെ ഒരുമിച്ചിരുന്ന് മദ്യപിക്കുന്നതിനിടയിൽ മുഹമ്മദ് ബിലാലും ശിവരാജും തമ്മിൽ ടൂവീലർ ഉപയോഗിച്ചതുമായി ബന്ധപ്പെട്ട് തർക്കം ഉണ്ടാവുകയും പ്രകോപിതനായ ശിവരാജ് കൈവശം കരുതിയിരുന്ന കത്തി ഉപയോഗിച്ച് ബിലാലിനെ കുത്തുകയുമായിരുന്നു. ഗുരുതരമായി പരിക്കേറ്റ ബിലാലിനെ ആദ്യം നീണ്ടകര താലൂക്ക് ആശുപത്രിയിലും തുടർന്ന് കൊല്ലം ജില്ലാ ആശുപത്രിയിലും എത്തിച്ച് ചികിത്സ നൽകിയെങ്കിലും ഞായറാഴ്ച പുലർച്ചയോടെ മരിച്ചു. വിവരം അറിഞ്ഞ ഉടൻ സ്ഥലത്ത് എത്തിയ ചവറ പോലീസ് പ്രതിയെ ഉടൻ അറസ്റ്റ് ചെയ്യുകയായിരുന്നു. കരുനാഗപ്പള്ളി എ.സി.പി വിനോദ് കുമാറിന്റെ നിർദ്ദേശപ്രകാരം ജില്ലാ നൈറ്റ് പട്രോളിംഗ് സംഘാംങ്ങളായ കൊല്ലം വെസ്റ്റ് സി.ഐ വിപിൻ, എസ്.സി.പി.ഓ സുജിത്ത് എന്നിവരും ചവറ സർക്കിൾ ഇൻസ്‌പെക്ടർ ശിവലാലിന്റെ നേതൃത്വത്തിൽ ചവറ എസ്.എച്ച്.ഓ സിജോ, എ.എസ്.ഐ രാജീവ് കുമാർ, എസ്.സി.പി.ഓ ശ്രീരാജ്, സി.പി.ഓ മാരായ ബൈജു, അരുൺഘോഷ് എന്നിവരും ഉൾപ്പെട്ട സംഘമാണ് പ്രതിയെ പിടികൂടിയത്.

04/10/2026

ആദരാഞ്ജലികൾ

03/10/2026

14.060 ഗ്രാം എം.ഡി.എം.എയുമായി യുവാവ് പിടിയിൽ

ഓപ്പറേഷൻ തൂഫാന്റെ ഭാഗമായി കൊല്ലം സിറ്റി ഡാൻസാഫും കണ്ണനല്ലൂർ പോലീസും സംയുക്തമായി നടത്തിയ പരിശോധനയിൽ 14.060 ഗ്രാം എം.ഡി.എം.എയുമായി യുവാവ് പിടിയിൽ. നെടുമ്പന കുളപ്പാടം പാറവിള വീട്ടിൽ ചിക്കു എന്ന അലിഫ് നിസ്സാർ (29) ആണ് അറസ്റ്റിലായത്.കണ്ണനല്ലൂർ, കുളപ്പാടം, കൊട്ടിയം മേഖലകളിൽ വിൽപ്പന നടത്തുന്നതിനായി സൂക്ഷിച്ചിരുന്ന ഏകദേശം ഒരു ലക്ഷം രൂപ വിലവരുന്ന എം.ഡി.എം.എയാണ് പിടികൂടിയത്. ചാത്തന്നൂർ എ.സി.പി രാകേഷിന്റെ നിർദ്ദേശപ്രകാരം ഡാൻസാഫ് എസ്.ഐ മാരായ സായിസേൻ, ഗോപകുമാർ എന്നിവരുടെ നേതൃത്വത്തിലുള്ള സംഘവും കണ്ണനല്ലൂർ എസ്.എച്ച്.ഓ അഭിഷേകിന്റെ നേതൃത്വത്തിൽ എസ്.ഐ മാരായ സുനിൽ പി.ആർ, അനിൽകുമാർ, എസ്.സി.പി.ഓ ഷൈജു സി.പി.ഓ സിജോ എന്നിവരടങ്ങിയ സംഘവും ചേർന്നാണ് പ്രതിയെ പിടികൂടിയത്. ലഹരിമരുന്നുകളുടെ ഉറവിടവും വിതരണശൃംഖലയും കണ്ടെത്തുന്നതിനും ലഭ്യത നിയന്ത്രിക്കുന്നതിനുമായി കൊല്ലം സിറ്റി ഡാൻസാഫിന്റെ നേതൃത്വത്തിൽ പരിശോധനകളും രഹസ്യാന്വേഷണവും ശക്തമായി തുടരുകയാണ്. ലഹരിമരുന്നുമായി ബന്ധപ്പെട്ട വിവരങ്ങൾ പൊതുജനങ്ങൾ പോലീസിനെ അറിയിക്കണമെന്ന് കൊല്ലം സിറ്റി പോലീസ് കമ്മീഷണർ ഹേമലത എം. ഐ.പി.എസ് അറിയിച്ചു.

02/10/2026

01/10/2026

സുഹൃത്തിനെ തലക്കടിച്ചു കൊലപ്പെടുത്തിയ കേസിൽ പ്രതിക്ക് ജീവപര്യന്തം കഠിനതടവും ഒരു ലക്ഷം രൂപ പിഴയും വിധിച്ചു! ⚖️

കൊല്ലം ഫോർത്ത് അഡീഷണൽ സെഷൻസ് കോടതി ജഡ്ജി സി.എം. സീമയാണ് വിധി പ്രസ്താവിച്ചത്.

📌 കേസിന്റെ ചുരുക്കം:

പ്രതി: ജ്യോതികുമാർ (53), കല്ലുംതാഴം, കിളികല്ലൂർ.

ഇര: സനിൽ കുമാർ (49), വടക്കുംഭാഗം.

സംഭവം: 2020 സെപ്റ്റംബർ 13-ന് രാത്രി. മദ്യം വാങ്ങിയ പൈസയെ ചൊല്ലിയുള്ള തർക്കത്തിനിടയിൽ ബുള്ളറ്റ് മോട്ടോർ സൈക്കിളിന്റെ ക്രാഷ് ഗാർഡ് ഉപയോഗിച്ച് തലയ്ക്ക് അടിച്ച് കൊലപ്പെടുത്തുകയായിരുന്നു.

ശിക്ഷ: ജീവപര്യന്തം കഠിനതടവും 1,00,000 രൂപ പിഴയും (പിഴ അടച്ചില്ലെങ്കിൽ 6 മാസം കൂടി തടവ്).

🔍 നിർണ്ണായകമായ തെളിവുകൾ:
ദൃക്‌സാക്ഷികൾ ഇല്ലാതിരുന്ന കേസിൽ സാഹചര്യ തെളിവുകളും ശാസ്ത്രീയ തെളിവുകളുമാണ് കേസിൽ നിർണ്ണായകമായത്. അടിപിടിക്കിടെ പ്രതിയുടെ നെറ്റിയിലേറ്റ പരിക്കിനെക്കുറിച്ച് നീണ്ടകര ഫൗണ്ടേഷൻ ആശുപത്രിയിലെ ഡോക്ടറോട് പറഞ്ഞതും, അത് വൂണ്ട് സർട്ടിഫിക്കറ്റിൽ രേഖപ്പെടുത്തിയതുമാണ് പ്രതിയുടെ സംഭവസ്ഥലത്തെ സാന്നിധ്യവും വിരോധവും ഉറപ്പാക്കുന്നതിൽ പ്രധാന തെളിവായി മാറിയത്.

29/09/2026

കേരള പോലീസ് കെ9 സ്‌ക്വാഡിലെ ഹണ്ടറിന് വിട- ഔദ്യോഗിക ബഹുമതികളോടെ സംസ്‌കാരം

കേരള പോലീസ് K9 ഡോഗ് സ്‌ക്വാഡിലെ അംഗവും നിരവധി സങ്കീർണ്ണമായ കുറ്റകൃത്യങ്ങൾ തെളിയിക്കുന്നതിൽ നിർണ്ണായക പങ്കുവഹിക്കുകയും ചെയ്ത ഹണ്ടർ എന്ന ലാബ്രഡോർ റിട്രീവർ ഇനത്തിൽപെട്ട ഡോഗ് ക്യാൻസർ രോഗത്തിന് ചികിൽസയിലിരിക്കെ 28.09.2026 രാവിലെ അന്തരിച്ചു. എട്ട് വയസ്സായിരുന്നു. കൊല്ലം സിറ്റി പോലീസ് ഡോഗ് സ്‌ക്വാഡിന്റെ അഭിമാനമായിരുന്ന ഹണ്ടറിന്റെ വിയോഗത്തിൽ കേരള പോലീസ് സേന ആദരാഞ്ജലികൾ അർപ്പിച്ചു. കേവലം മൂന്ന് മാസം പ്രായമുള്ളപ്പോഴാണ് ഹണ്ടർ പോലീസ് സേനയുടെ ഭാഗമാകുന്നത്. തൃശൂർ പോലീസ് അക്കാദമിയിലെ വിദഗ്ദ്ധ പരിശീലനത്തിന് ശേഷം ലഹരി വസ്തുക്കളുടെ ഉറവിടം കണ്ടെത്തുന്നതിൽ (Narcotic Detection Dog) ഹണ്ടർ അസാധാരണമായ മികവ് പുലർത്തിയിരുന്നു. സേവനകാലയളവിൽ നിരവധി രാസലഹരി വസ്തുക്കൾ കണ്ടെത്താൻ പോലീസിനെ സഹായിച്ചിട്ടുണ്ട്. 2018 മുതൽ 2021 വരെയുള്ള കാലയളവിലെ മികച്ച സേവനത്തിന് സംസ്ഥാന പോലീസ് മേധാവിയുടെ കെ9 മെഡൽ ലഭിച്ച ഹണ്ടറിനെ പോലീസ് ഉദ്യോഗസ്ഥരുടെയും ഡോഗ് ഹാൻഡ്ലർമാരുടെയും സാന്നിധ്യത്തിൽ പൂർണ്ണ ഔദ്യോഗിക ബഹുമതികളോടെയാണ് സംസ്‌കരിച്ചത്. സംസ്ഥാന കെ9 സ്‌ക്വാഡിന്റെ ചുമതല വഹിക്കുന്ന ഐ.ആർ ബറ്റാലിയൻ കമാണ്ടന്റ്‌റിന് വേണ്ടി കെ.എ.പി മൂന്നാ ബറ്റാലിയൻ അസിസ്റ്റന്റ് കമാണ്ടന്റ് വിനോദ് റീത്ത് സമർപ്പിക്കുകയും കൊല്ലം സിറ്റി പോലീസ് മേധാവിക്ക് വേണ്ടി ജില്ലാ ക്രൈം ബ്രാഞ്ച് എ.സി.പി രാജേഷ് കുമാർ റീത്ത് സമർപ്പിക്കുകയും ചെയ്യ്തു. കൂടാതെ കൊല്ലം സിറ്റി എ.ആർ ക്യാമ്പ് ഇൻസ്‌പെക്ടർ ജയചന്ദ്രൻപിള്ള, കെ9 സ്‌ക്വാഡിന്റെ ചുമതല വഹിക്കുന്ന വെറ്റിനറി ഡോക്ടർ ബിനോദ് എന്നിവരും റീത്ത് സമർപ്പിച്ചു. ഡി.സി.ആർ.ബി എസിപി സുരേഷ് ഉപചാരം അർപ്പിച്ചു. ദീർഘകാലം ജനങ്ങളുടെ സൂരക്ഷയ്ക്കായി വിശ്വസ്തതയോടെ സേവനമനുഷ്ഠിച്ച ഹണ്ടറിന്റെ വേർപാട് കേരള പോലീസ് സേനക്ക് തന്നെ തീരാ നഷ്ടമാണ്.

28/09/2026

🖤 ആദരാഞ്ജലികൾ 🖤

കൊല്ലം സിറ്റി കെ-9 സ്ക്വാഡിലെ ഡോഗ് നമ്പർ 326 – ഹണ്ടർ
(Labrador Retriever | Male | Narcotic Sniffer)

കൊല്ലം സിറ്റി കെ-9 സ്ക്വാഡിന്റെ അഭിമാനമായിരുന്ന ഹണ്ടർ, ക്യാൻസർ രോഗത്തിന് ചികിത്സയിലിരിക്കെ 2026 സെപ്റ്റംബർ 28-ന് രാവിലെ 08.20 മണിക്ക് മരണപ്പെട്ടു.

24/09/2026

ശക്തികുളങ്ങര ഹാർബറിൽ 52-കാരനെ കുത്തിക്കൊലപ്പെടുത്താൻ ശ്രമം; പ്രതി അറസ്റ്റിൽ

കൊല്ലം ശക്തികുളങ്ങര ഹാർബറിൽ മുൻവിരോധത്തെ തുടർന്ന് 52-കാരനെ കത്തികൊണ്ട് കുത്തിക്കൊലപ്പെടുത്താൻ ശ്രമിച്ച കേസിൽ പ്രതി അറസ്റ്റിലായി. ശക്തികുളങ്ങര കാവനാട് കന്നിമേൽച്ചേരി കള്ളാട്ട് വടക്കേത്തറ വീട്ടിൽ ബിജു (56) ആണ് ശക്തികുളങ്ങര പോലീസിന്റെ പിടിയിലായത്. സെപ്റ്റംബർ 22ന് പുലർച്ചെ 12.30-ഓടെ ശക്തികുളങ്ങര ഹാർബറിൽ വച്ച് മുൻവിരോധത്തെ തുടർന്ന് 52-കാരനും പ്രതിയും തമ്മിൽ വാക്കുതർക്കമുണ്ടാവുകയും തുടർന്ന് പ്രതി കൈവശമുണ്ടായിരുന്ന കത്തി ഉപയോഗിച്ച് ഇയാളെ കുത്തിക്കൊലപ്പെടുത്താൻ ശ്രമിക്കുകയുമായിരുന്നു. ആക്രമണത്തിൽ 52-കാരന് ശരീരത്തിന്റെ വിവിധ ഭാഗങ്ങളിൽ നിരവധി പരിക്കുകൾ സംഭവിച്ചു. സംഭവവിവരമറിഞ്ഞ് അന്വേഷണം ആരംഭിച്ച ശക്തികുളങ്ങര പോലീസ് മണിക്കൂറുകൾക്കുള്ളിൽ പ്രതിയെ പിടികൂടുകയായിരുന്നു. കൊല്ലം വെസ്റ്റ് സർക്കിൾ ഇൻസ്‌പെക്ടർ വിപിന്റെ നിർദ്ദേശാനുസരണം ശക്തികുളങ്ങര എസ്.എച്ച്.ഒ അനീഷ് കുമാറിന്റെ നേതൃത്വത്തിൽ എ.എസ്.ഐ മാരായ ശ്രീകുമാർ, സുമാഭായി, എസ്.സി.പി.ഒ സതീഷ്, സി.പി.ഓ കിഷോർമോൻ എന്നിവരടങ്ങിയ പോലീസ് സംഘമാണ് പ്രതിയെ പിടികൂടിയത്