Kurnool Municipal Corporation

04/10/2026

03/10/2026

కల్లూరు సమస్యలకు హ్యామ్ మహర్దశ

• పాణ్యం ఎమ్మెల్యే గౌరు చరితారెడ్డి, కమిషనర్ చల్లా ఓబులేసు
• 16 వార్డుల అభివృద్ధికి రూ.116 కోట్లు

కర్నూలు నగరపాలక సంస్థ పరిధిలోని కల్లూరు అర్బన్‌ 16 వార్డుల్లో ఏళ్లుగా అపరిష్కృతంగా ఉన్న మౌలిక వసతుల సమస్యలకు హైబ్రిడ్ యాన్యూటీ మోడల్‌ (హ్యామ్‌) ద్వారా శాశ్వత పరిష్కారం లభించనుందని పాణ్యం శాసనసభ్యురాలు గౌరు చరితారెడ్డి, నగరపాలక సంస్థ కమిషనర్ చల్లా ఓబులేసు తెలిపారు. శనివారం స్థానిక ఎస్‌బీఐ ఎంప్లాయీస్‌ కాలనీలోని నగరపాలక సమావేశ భవనంలో ఇంజనీరింగ్‌ అధికారులు, వార్డుల నాయకులతో ఎమ్మెల్యే, కమిషనర్‌ సమావేశం నిర్వహించి హ్యామ్‌ మోడల్‌లో చేపట్టాల్సిన పనుల ప్రాధాన్యతపై సమీక్షించారు.

హ్యామ్‌ మోడల్‌లో చేపట్టనున్న పనులను ఎలాంటి జాప్యం లేకుండా వెంటనే ప్రారంభించి, నిర్దేశిత గడువులోపు నాణ్యతా ప్రమాణాలతో పూర్తి చేయాలని ఎమ్మెల్యే అధికారులను ఆదేశించారు. అదేవిధంగా వీధి దీపాల మరమ్మతులు, పారిశుద్ధ్యం, తాగునీటి సరఫరా మెరుగుదలకు ప్రత్యేక శ్రద్ధ చూపాలని ఎమ్మెల్యే సూచించారు.

ఈ సందర్భంగా ఎమ్మెల్యే మాట్లాడుతూ.. రాష్ట్రంలోని నగరాలు, పట్టణాల్లో ఏళ్ల తరబడి పరిష్కారానికి నోచుకోని దీర్ఘకాలిక సమస్యలకు శాశ్వత పరిష్కారం చూపే లక్ష్యంతో ముఖ్యమంత్రి చంద్రబాబు నాయుడు హ్యామ్‌ మోడల్‌ ద్వారా రూ.11,359 కోట్లతో పట్టణ మౌలిక వసతుల అభివృద్ధికి శ్రీకారం చుట్టారని తెలిపారు. రాష్ట్రవ్యాప్తంగా 123 మున్సిపాలిటీలు, మున్సిపల్‌ కార్పొరేషన్ల పరిధిలో రూ. 11,359 కోట్లతో విలువైన పనులు చేపడుతున్నట్లు తెలిపారు. ఇందులో కల్లూరు అర్బన్‌ 16 వార్డులకు రూ.116 కోట్లు మంజూరయ్యాయని పేర్కొన్నారు. రూ.96.50 కోట్లతో 62.80 కిలోమీటర్ల మేర రహదారులు, రూ.13.70 కోట్లతో 14 పార్కులు, రూ.5.80 కోట్లతో 8.50 కిలోమీటర్ల మేర సెంట్రల్‌ మీడియన్‌ పనులు చేపట్టనున్నట్లు వివరించారు.

కమిషనర్‌ మాట్లాడుతూ.. నగరంలో విస్తరిత ప్రాంతాల ప్రజలకు హ్యామ్‌ మోడల్‌ ఒక వరం లాంటిదని తెలిపారు. కర్నూలు నగరంలోని మూడు నియోజకవర్గాల పరిధిలో ఉన్న పాత 52 వార్డుల్లో మొత్తం రూ.150 కోట్లతో అభివృద్ధి పనులకు శ్రీకారం చుట్టనున్నట్లు పేర్కొన్నారు. ఇందులో రూ.115.80 కోట్లతో 76.99 కిలోమీటర్ల మేర రహదారులు, రూ.26.90 కోట్లతో 38 పార్కులు, రూ.7.30 కోట్లతో 9.75 కిలోమీటర్ల మేర సెంట్రల్‌ మీడియన్‌ అభివృద్ధి పనులు చేపట్టనున్నట్లు తెలిపారు.

రాష్ట్రవ్యాప్తంగా హ్యామ్‌ మోడల్‌లో రహదారులు, పార్కులు, సెంట్రల్‌ మీడియన్లు, వీధి దీపాలు, డ్రైనేజీ తదితర పట్టణ మౌలిక వసతుల పనులు పెద్ద ఎత్తున చేపడుతున్నారని, ఈ పనుల ద్వారా పట్టణ ప్రజలకు మెరుగైన మౌలిక వసతులు అందుబాటులోకి రానున్నాయని కమిషనర్ తెలిపారు.

కార్యక్రమంలో ఆంధ్రప్రదేశ్ విశ్వబ్రాహ్మణ కార్పొరేషన్ చైర్మన్ కె.పార్వతమ్మ, డైరెక్టర్ కె.శ్రీనివాసరావు, ఎస్‌ఈ రమణమూర్తి, ఎంఈ మనోహర్‌రెడ్డి, డీఈఈలు పవన్‌కుమార్‌రెడ్డి, నరేష్‌, క్రిష్ణలత, హేమలత, శ్రీనివాసన్‌, ఏఈలు జనార్ధన్‌, ప్రవీణ్‌కుమార్‌రెడ్డి, ఖాసింవలి, షేక్షవలి, వరుణ్‌, విజయరాజు, తదితరులు పాల్గొన్నారు.

02/10/2026

మహాత్మా.. ప్రపంచానికి అహింసా మార్గదర్శి

• నగరపాలక సంస్థ కమిషనర్ చల్లా ఓబులేసు

ప్రపంచానికి అహింసా మార్గాన్ని చూపిన మహాత్మా గాంధీ త్యాగం చిరస్మరణీయమని, ఆయన దేశానికి చేసిన సేవలను, స్వాతంత్ర్య సాధన కోసం ఆయన సాగించిన పోరాటం మర్చిపోలేనిదని నగరపాలక సంస్థ కమిషనర్ చల్లా ఓబులేసు అన్నారు. మహాత్మా గాంధీ 157వ జయంతి సందర్భంగా శుక్రవారం వెంకటరమణ కాలనీలోని నగరపాలక కార్యాలయంలో గాంధీజీ చిత్రపటానికి అధికారులు, సిబ్బందితో కలిసి కమిషనర్ చల్లా ఓబులేసు పూలమాలలు వేసి ఘనంగా నివాళులర్పించారు.

ఈ సందర్భంగా కమిషనర్ మాట్లాడుతూ.. మహాత్మా గాంధీ సత్యం, అహింస, శాంతి, సేవా భావాలతో ప్రపంచానికి ఆదర్శంగా నిలిచారని అన్నారు. అహింసా మార్గం ద్వారా సమాజంలో మార్పు తీసుకురావచ్చని నిరూపించిన మహనీయుడని పేర్కొన్నారు. గాంధీజీ ఆశయాలను ప్రతి ఒక్కరూ ఆచరించాలని సూచించారు.

ఈ కార్యక్రమంలో డిప్యూటీ కమిషనర్ సతీష్ కుమార్ రెడ్డి, ఏసిపి నాగరాజు, మేనేజర్ జునైద్, ఆర్వోలు వాజిద్, మంజూర్ బాష, క్రిస్టోఫర్, సూపరింటెండెంట్లు సుబ్బన్న, రామకృష్ణ, సిబ్బంది జి.ఎం. శ్రీకాంత్, ఎం.రవికుమార్, సిబ్బంది తదితరులు పాల్గొన్నారు.

01/10/2026

పరిశుభ్రతలో ప్రతి ఒక్కరు భాగస్వాములు కావాలి

• ప్రజలకు మంత్రి టి.జీ. భరత్ పిలుపు
• సంకల్ బాగ్ వద్ద ‘ఒక రోజు – ఒక గంట – ఒకే తాటిపై’ కార్యక్రమం

నగరంలో పరిశుభ్రతను కాపాడుకోవడం ప్రతి ఒక్కరి బాధ్యత అని, పరిసరాల స్వచ్ఛతలో ప్రతి ఒక్కరూ భాగస్వామ్యం కావాలని రాష్ట్ర పరిశ్రమలు, వాణిజ్యం, ఫుడ్ ప్రాసెసింగ్ శాఖ మంత్రి టి.జీ. భరత్ పిలుపునిచ్చారు. గురువారం సంకల్ బాగ్ తుంగభద్ర నది ఒడ్డున స్వచ్ఛతా హి సేవా–2026లో భాగంగా “ఒక రోజు – ఒక గంట – ఒకే తాటిపై” (ఏక్ దిన్ – ఏక్ ఘంటా – ఏక్ సాథ్) కార్యక్రమాన్ని నిర్వహించారు. నగరపాలక సంస్థ కమిషనర్ చల్లా ఓబులేసుతో కలిసి మంత్రి టి.జీ. భరత్ చీపురు పట్టుకుని పరిసరాలను స్వయంగా పరిశుభ్రం చేశారు.

ఈ సందర్భంగా మంత్రి మాట్లాడుతూ.. పరిశుభ్రత కేవలం పారిశుద్ధ్య సిబ్బంది బాధ్యత మాత్రమే కాదని, ప్రతి పౌరుడు భాగస్వామిగా మారినప్పుడే పరిశుభ్రమైన నగరం సాధ్యమవుతుందని అన్నారు. మన వీధి, మన ప్రాంతం, మన నగరాన్ని పరిశుభ్రంగా ఉంచుకోవడం ప్రతి ఒక్కరి బాధ్యతగా భావించాలని సూచించారు. విద్యార్థులు, స్వచ్ఛంద సంస్థలు ప్రజల్లో పరిశుభ్రతపై అవగాహన కల్పించేందుకు ముందుకు రావాలని కోరారు. పరిశుభ్రతపై ప్రధానమంత్రి నరేంద్ర మోదీ ప్రత్యేక శ్రద్ధ తీసుకుంటున్నారని, ముఖ్యమంత్రి చంద్రబాబు నాయుడు సైతం పరిశుభ్రతకు అత్యంత ప్రాధాన్యత ఇస్తున్నారని తెలిపారు. కర్నూలును పరిశుభ్రమైన నగరంగా తీర్చిదిద్దేందుకు ప్రజల సహకారం అవసరమన్నారు.

కమిషనర్ చల్లా ఓబులేసు మాట్లాడుతూ.. నగరాన్ని పరిశుభ్రంగా ఉంచేందుకు నగరపాలక సంస్థ ప్రత్యేక దృష్టి సారించి, పలు కార్యక్రమాలను చేపడుతోందన్నారు. అయితే ప్రజల భాగస్వామ్యం సైతం ఎంతో కీలకమని, ప్రజల సహకారంతో పారిశుద్ధ్య కార్యక్రమాలను మరింత సమర్థవంతంగా ముందుకు తీసుకెళ్లవచ్చని తెలిపారు. పారిశుద్ధ్య పనుల నిర్వహణపై ప్రతి నెల ప్రజల సంతృప్తి మెరుగుపడుతుందని పేర్కొన్నారు. ప్రతి ఒక్కరూ చెత్తను బహిరంగ ప్రదేశాల్లో వేయకుండా, తడి–పొడి చెత్తను వేర్వేరుగా అందించి పారిశుద్ధ్య సిబ్బందికి సహకరించాలని సూచించారు. ప్రజలు తమ పరిసరాలను పరిశుభ్రంగా ఉంచుకోవడంతో పాటు ఇతరులకు కూడా పరిశుభ్రతపై అవగాహన కల్పించాలని కోరారు. “మన నగరం – మన బాధ్యత” అనే భావనతో ప్రతి ఒక్కరూ భాగస్వాములై కర్నూలును పరిశుభ్రమైన నగరంగా తీర్చిదిద్దేందుకు సహకరించాలని పిలుపునిచ్చారు.

ఈ కార్యక్రమంలో ప్రజారోగ్య అధికారి డాక్టర్ ఎం. రఘు, ఎంఈ మనోహర్ రెడ్డి, డిఈఈ పవన్ కుమార్ రెడ్డి, ఏఈ వైష్ణవి, సానిటరీ ఇన్‌స్పెక్టర్ మల్లికార్జున, స్వచ్ఛ సర్వేక్షన్ కోఆర్డినేటర్ శ్రీనివాస్, సిబ్బంది, విద్యార్థులు, తదితరులు పాల్గొన్నారు.

30/09/2026

పలు అభివృద్ధి పనులకు శంకుస్థాపన

• రాష్ట్ర పరిశ్రమలు, వాణిజ్యం, ఫుడ్ ప్రాసెసింగ్ శాఖ మంత్రి టి.జి. భరత్
• రూ.4.47 కోట్లతో పలు అభివృద్ధి పనులు శంకుస్థాపన

కర్నూలు నగరంలో పలు అభివృద్ధి పనులకు పరిశ్రమలు, వాణిజ్యం, ఫుడ్ ప్రాసెసింగ్ శాఖ మంత్రి టి.జి. భరత్ బుధవారం శంకుస్థాపన చేశారు. 15వ ఆర్థిక సంఘం నిధులతో 17వ వార్డు చాణక్యపురి కాలనీలో రూ.2.86 కోట్లతో 1000 కిలోలీటర్ల సామర్థ్యం కలిగిన ఓవర్‌హెడ్ వాటర్ ట్యాంక్ నిర్మాణం, చాణక్యపురి కాలనీ నుంచి లక్ష్మీ గార్డెన్స్ మీదుగా జోహరాపురం మెయిన్ రోడ్డు వరకు 160 మి.మీ. హెచ్‌డీపీఈ పైప్‌లైన్ ఏర్పాటు, జోహరాపురంలో వివిధ ప్రాంతాల్లో 160 మి.మీ., 110 మి.మీ. హెచ్‌డీపీఈ పైప్‌లైన్లు, సంప్ నుంచి కె.సి. కెనాల్ బ్రిడ్జి వరకు 315 మి.మీ. హెచ్‌డీపీఈ పైప్‌లైన్ ఏర్పాటు పనులకు చాణక్యపురి కాలనీలో పూజలు నిర్వహించి పైలాన్‌ను ఆవిష్కరించారు.

అదేవిధంగా ఎన్‌క్యాప్ నిధులతో రూ.82 లక్షల విలువైన పనులకు కర్నూలు మెడికల్ కాలేజ్ సమీపంలో శంకుస్థాపన చేశారు. అమీలియా ఆసుపత్రి నుంచి ఉల్చాల జంక్షన్ వరకు పేవ్‌మెంట్ విస్తరణ, మెడికల్ కాలేజ్ గేట్ నుంచి షాషా మసీదు వరకు కాలిబాట నిర్మాణం, సుంకేసుల రోడ్డులో హిందూ శ్మశానవాటిక నుంచి విజయనగర్ కాలనీ వరకు పేవ్‌మెంట్ విస్తరణ పనులు చేపట్టనున్నారు. మొత్తం రూ.4.47 కోట్ల విలువైన అభివృద్ధి పనులకు శంకుస్థాపన జరిగింది.

ఈ సందర్భంగా మంత్రి మాట్లాడుతూ.. కర్నూలు నగరంలో ప్రజలకు అవసరమైన మౌలిక వసతులను మెరుగుపరిచేందుకు ప్రభుత్వం పలు అభివృద్ధి పనులను చేపడుతోందని మంత్రి టి.జి. భరత్ తెలిపారు. తాగునీటి సౌకర్యం, రహదారులు, కాలిబాటలు, పైప్‌లైన్ వ్యవస్థను అభివృద్ధి చేయడం ద్వారా ప్రజలకు మెరుగైన సౌకర్యాలు కల్పించేందుకు చర్యలు తీసుకుంటున్నామని తెలిపారు.

కార్యక్రమంలో నగరపాలక సంస్థ కమిషనర్ చల్లా ఓబులేసు, సూపరింటెండెంట్ ఇంజనీర్ రమణమూర్తి, మున్సిపల్ హెల్త్ ఆఫీసర్ డాక్టర్ రఘు, ఎగ్జిక్యూటివ్ ఇంజనీర్ మనోహర్ రెడ్డి, మాజీ కార్పొరేటర్లు పరమేష్ యాదవ్, గున్న మార్క్, రామాంజనేయులు, పద్మలత రెడ్డి, నాయకులు అబ్బాస్ తదితరులు పాల్గొన్నారు.

30/09/2026

పారిశుద్ధ్య కార్మికుల సంక్షేమానికి పెద్దపీట

• నగరపాలక సంస్థ కమిషనర్ చల్లా ఓబులేసు
• సఫాయి మిత్రల భద్రత, సంక్షేమ కార్యక్రమం
• మెడికవర్ ఆస్పత్రి సహకారంతో వైద్య పరీక్షలు

నగరపాలక సంస్థలో పనిచేస్తున్న పారిశుద్ధ్య కార్మికుల సంక్షేమానికి అధిక ప్రాధాన్యత ఇస్తున్నట్లు నగరపాలక సంస్థ కమిషనర్ చల్లా ఓబులేసు పేర్కొన్నారు. బుధవారం స్థానిక ఎస్బీఐ ఎంప్లాయీస్ కాలనీలోని నగరపాలక సంస్థ సమావేశ భవనంలో స్వచ్ఛత హి సేవ కార్యక్రమంలో భాగంగా సఫాయి మిత్రల భద్రత, సంక్షేమ కార్యక్రమాన్ని నిర్వహించారు.

ఈ సందర్భంగా కమిషనర్ మాట్లాడుతూ.. పారిశుద్ధ్య కార్మికుల సంక్షేమానికి అధిక ప్రాధాన్యత ఇస్తున్నామని, కార్మికులకు అవసరమైన పనిముట్లు, హెల్త్ కిట్లు సమకూర్చామని తెలిపారు. అంతేకాకుండా వివిధ ప్రైవేట్ ఆస్పత్రుల సహకారంతో కార్మికులకు వైద్య పరీక్షలు నిర్వహించినట్లు పేర్కొన్నారు. ప్రజల ఆరోగ్యం కోసం తమ ఆరోగ్యాన్ని పణంగా పెట్టి పనిచేస్తున్న పారిశుద్ధ్య కార్మికుల శ్రమ వెలకట్టలేనిదని అన్నారు.

ఈ కార్యక్రమంలో భాగంగా మెడికవర్ ఆస్పత్రి సహకారంతో పారిశుద్ధ్య కార్మికులకు బీపీ, జీఆర్‌బీఎస్, ఈసీజీ, పీఎఫ్‌టీ, 2డీ ఎకో, కంటి, దంత వైద్య పరీక్షలు నిర్వహించారు.

ఈ కార్యక్రమంలో ప్రజారోగ్య అధికారి డాక్టర్ ఎం. రఘు, శానిటరీ సూపర్‌వైజర్ రమేష్ బాబు, ఇన్‌స్పెక్టర్లు, మెడికవర్ ఆస్పత్రి జీఎం వై. మహేశ్వర్ రెడ్డి, ఏజీఎం ఎస్. ఖాదర్ బాషా, పల్మనాలజీ వైద్యులు డాక్టర్ వినోద్ ఆచారి, న్యూరో ఫిజీషియన్ డాక్టర్ రఘునందిని, గైనకాలజీ వైద్యులు డాక్టర్ నిఖిల, ఆర్థోపెడిక్ వైద్యులు డాక్టర్ మంజునాథ్, మెడికల్ క్యాంప్ కోఆర్డినేటర్లు బాలన్న, బాల మద్దిలేటి, శేషు నాయుడు, కొండారెడ్డి, తదితరులు పాల్గొన్నారు.

30/09/2026

ఎన్నికలను ప్రశాంతంగా నిర్వహిద్దాం

• అడిషనల్ ఎలక్షన్ అథారిటీ, కమిషనర్ చల్లా ఓబులేసు
• పోలీసులకు తుది పోలింగ్ కేంద్రాల జాబితా అందజేత
• 3 కేటగిరీలుగా విభజించి వివరాలు అందజేయాలని ఆదేశం

త్వరలో జరగనున్న నగరపాలక సంస్థ సాధారణ ఎన్నికలను ప్రశాంతంగా నిర్వహిద్దామని, అందుకు అవసరమైన చర్యలను ఇప్పటి నుంచే చేపట్టాలని అడిషనల్ ఎలక్షన్ అథారిటీ, నగరపాలక సంస్థ కమిషనర్ చల్లా ఓబులేసు పోలీసు అధికారులను ఆదేశించారు. బుధవారం కౌన్సిల్ హాల్లో డీఎస్పీ కె.వి. రాఘవేంద్రతో పాటు నగర పరిధిలోని సీఐలు, ఎస్‌ఐలతో ఆయన సమావేశమయ్యారు.

ఇటీవల విడుదల చేసిన తుది పోలింగ్ కేంద్రాల జాబితాను పోలీసు అధికారులకు అందజేశారు. పోలింగ్ కేంద్రాలను సాధారణ, సమస్యాత్మక, అత్యంత సమస్యాత్మకంగా మూడు కేటగిరీలుగా విభజించి వివరాలను అందజేయాలని సూచించారు. ఆయా వివరాలను ఎన్నికల సంఘానికి పంపిస్తామన్నారు.

ఈ సందర్భంగా కమిషనర్ మాట్లాడుతూ.. నగరంలో 487 పోలింగ్ కేంద్రాల పరిధిలో 4,79,861 మంది ఓటర్లు ఉన్నారని తెలిపారు. ఎన్నికలు ప్రశాంతంగా, పారదర్శకంగా జరిగేలా అన్ని శాఖలు సమన్వయంతో పనిచేయాలని సూచించారు. పోలింగ్ కేంద్రాల వారీగా భద్రతా ఏర్పాట్లను ముందుగానే పరిశీలించి, అవసరమైన చర్యలు చేపట్టాలని తెలిపారు. అన్ని పోలింగ్ కేంద్రాల్లో సీసీ కెమెరాలు, ర్యాంపులు, విద్యుత్ దీపాలు తదితర అవసరమైన సౌకర్యాలు కల్పిస్తామని తెలిపారు. ప్రశాంతంగా ఎన్నికల నిర్వహణకు పోలీసు శాఖ తరఫున అవసరమైన అన్ని చర్యలు చేపట్టాలని సూచించారు.

సమావేశంలో సీఐలు చంద్రబాబు నాయుడు, పి. శేషయ్య, బి.వి. విక్రమసింహా, జి. మారుతి శంకర్, ఎస్‌ఐలు మోహన్ కిషన్ రెడ్డి, యస్. నాగరాజు, తదితరులు పాల్గొన్నారు.

30/09/2026

వంతెనల పరిసరాల్లో పరిశుభ్రతకు రక్షణ

• నగరపాలక సంస్థ కమిషనర్ చల్లా ఓబులేసు
• రూ.52 లక్షలతో వంతెనల వద్ద రక్షణ వలయాలు

నగరంలో నదులపై ఉన్న వంతెనల పరిసరాల్లో పరిశుభ్రతను కాపాడేందుకు పటిష్టమైన చర్యలు చేపడుతున్నామని, వంతెనల వద్ద ప్రజలు చెత్త వేయకుండా, అపరిశుభ్రతకు తావులేకుండా రక్షణ వలయాలను ఏర్పాటు చేస్తున్నట్లు నగరపాలక సంస్థ కమిషనర్ చల్లా ఓబులేసు తెలిపారు. బుధవారం ఆనంద్ టాకీస్ వద్ద హంద్రీ నదిపై ఏర్పాటు చేస్తున్న రక్షణ వలయాన్ని కమిషనర్ పరిశీలించారు.

ఈ సందర్భంగా కమిషనర్ మాట్లాడుతూ.. నగరంలోని ఆనంద్ టాకీస్ సమీపంలో, రాజ్ విహార్, జొహరాపురం ప్రాంతాల్లో హంద్రీ నదిపై, అశోక్ నగర్, కేవీ కళాశాల ప్రాంతాల్లో కేసీ కెనాల్‌పై ఉన్న వంతెనలకు రూ.52 లక్షలతో రక్షణ వలయాలను ఏర్పాటు చేస్తున్నట్లు తెలిపారు. ఈ రక్షణ వలయాల ఏర్పాటుతో నదులు, కాలువలు పరిశుభ్రంగా ఉండటంతో పాటు వంతెనల వద్ద ప్రమాదాల నివారణకు దోహదపడుతుందని పేర్కొన్నారు.

అదేవిధంగా సెట్కూరు కార్యాలయం వద్ద ఉన్న అన్న క్యాంటీన్‌ను ఆకస్మిక తనిఖీ చేశారు. కెవి‌ఆర్ కళాశాల, స్టాంటన్‌పురం, జొహరపురం ప్రాంతాల్లో గుర్రపు డెక్క తొలగింపు పనులను పరిశీలించారు.

కార్యక్రమంలో డీఈఈ కృష్ణలత, ఏఈ మహేష్, తదితరులు పాల్గొన్నారు.

28/09/2026

గుర్రపు డెక్క తొలగింపు ముమ్మరం

• నగరపాలక సంస్థ కమిషనర్ చల్లా ఓబులేసు
• హైడ్రాలిక్ ఎక్స్కవేటర్‌తో తొలగింపు పనులు
• వంతెనల వద్ద పేరుకుపోకుండా చర్యలు
• వినాయక ఘాట్‌, జోహరాపురం వద్ద కమిషనర్ పరిశీలన

నగర పరిధిలోని కేసీ కెనాల్‌లో నీటి ప్రవాహంతో గుర్రపు డెక్క కొట్టుకుపోకుండా ఒకేచోట పేరుకుపోతున్న ప్రాంతాల్లో వాటిని తొలగించేందుకు చర్యలను ముమ్మరంగా చేపడుతున్నట్లు నగరపాలక సంస్థ కమిషనర్ చల్లా ఓబులేసు తెలిపారు. సోమవారం ఆయన వినాయక ఘాట్‌, జోహరాపురం వంతెన ప్రాంతాల్లో జరుగుతున్న గుర్రపు డెక్క తొలగింపు పనులను పరిశీలించారు. వంతెనల పిల్లర్ల వద్ద గుర్రపు డెక్క పెద్దమొత్తంలో పేరుకుపోకుండా హైడ్రాలిక్ ఎక్స్కవేటర్ సహాయంతో తొలగిస్తున్నట్లు కమిషనర్ తెలిపారు. కార్యక్రమంలో ఎస్ఈ రమణమూర్తి, డిఈఈ పవన్ కుమార్ రెడ్డి, వెహికల్ ఇంచార్జీ కురుబ మధుబాబు, సానిటరీ సూపర్వైజర్ రమేష్ బాబు, ఇంస్పెక్టర్ ఫరూక్, తదితరులు పాల్గొన్నారు.