02/10/2026
కర్నూల్ నగర ప్రజలకు రైల్వే సౌకర్యాలు కల్పించకపోతే భవిష్యత్తులో పెద్ద పోరాటం చేస్తాం
రైల్వే అధికారులకు సిపిఎం హెచ్చరిక
కర్నూల్ నగర ప్రజలకు రైల్వే సౌకర్యాలు కల్పించకపోతే భవిష్యత్తులో పోరాటాన్ని ఉధృతం చేస్తామని సిపిఎం పార్టీ జిల్లా కార్యదర్శి డి. గౌస్ దేశాయ్ రైల్వే అధికారులను హెచ్చరించారు.
ఈరోజు సిపిఎం పార్టీ నగర కమిటీ ఆధ్వర్యంలో కర్నూల్ నుండి మచిలీపట్నం వెళ్లే రైలును రెగ్యులర్ ట్రైన్‌గా మార్చాలని, కర్నూల్ నుండి బయలుదేరే సమయాన్ని ఉదయం కాకుండా సాయంత్రానికి మార్చాలని కోరుతూ నిరసన కార్యక్రమం నిర్వహించారు.
ఈ సందర్భంగా సిపిఎం పార్టీ ఓల్డ్ సిటీ కార్యదర్శి ఎం. రాజశేఖర్ అధ్యక్షతన జరిగిన కార్యక్రమంలో గౌస్ దేశాయ్ మాట్లాడుతూ...
గత డిసెంబర్‌లో సుదీర్ఘ కాలం పాటు పోరాటం చేసిన ఫలితంగా కర్నూల్–మచిలీపట్నం రైలు సౌకర్యం కల్పించిన రైల్వే అధికారులకు సిపిఎం ధన్యవాదాలు తెలిపారు. కానీ ప్రస్తుతం ఆ రైలు సమయం కర్నూల్ ప్రజలకు ఏమాత్రం ఉపయోగపడడం లేదని, “ప్లేట్లో అన్నం పెట్టి చేతులు కట్టేసినట్టు” ఉందని ఘాటుగా విమర్శించారు.
కర్నూల్ నుండి ఉదయం 9:45కు బయలుదేరితే విజయవాడకు వెళ్లిన ప్రజలు రాత్రి ఎక్కడ ఉండాలో అధికారులు సమాధానం చెప్పాలని నిలదీశారు. గతంలో ఈ రైలు సాయంత్రం బయలుదేరి ఉదయానికి విజయవాడ చేరేది. ఇప్పుడు 13 గంటలు ప్రయాణం చేయాల్సి వస్తోందని సమయం కుదించాలని డిమాండ్ చేశారు.
మంత్రి టీ.జీ. భరత్ అనుచరులు “మా మంత్రి రైలు తెప్పించాడు” అని సోషల్ మీడియాలో చెబుతున్నారు. అలా తెచ్చిన వాడైతే కర్నూల్ ప్రజలకు ఉపయోగపడేలా ఎందుకు చేయలేదో సమాధానం చెప్పాలని ప్రశ్నించారు.
కాచిగూడ–గుంటూరు ఎక్స్‌ప్రెస్‌ను విజయవాడ వరకు పొడిగించాలని, హైదరాబాద్–ముంబై రైలును కర్నూల్ నుండి వెళ్లేలా చర్యలు తీసుకోవాలని కూడా డిమాండ్ చేశారు.
లేకపోతే సిపిఎం పార్టీ రాబోయే రోజుల్లో పెద్ద ఎత్తున పోరాటం చేస్తుందని, అవసరమైతే రైళ్లను కూడా దిగ్బంధనం చేస్తామని హెచ్చరించారు. దానికి బాధ్యులు కేంద్ర, రాష్ట్ర ప్రభుత్వాలు, రైల్వే అధికారులే అవుతారని స్పష్టం చేశారు.
ఈ కార్యక్రమంలో సిపిఎం జిల్లా నాయకులు జి. రామకృష్ణ, టి. రాముడు, విజయ్, నగేష్, అరుణమ్మ, సుధాకరప్ప, రామకృష్ణ, ఏసు, అబ్దుల్ దేశాయ్ తదితరులు పాల్గొన్నారు.
#కర్నూల్ #రైల్వే #సిపిఎం #కర్నూల్_రైలు #మచిలీపట్నం_ట్రైన్ #విజయవాడ #రైల్వే_సౌకర్యాలు
