Vidhyaposhini Mannarmala

03/10/2026

മണ്ണാർമല വിദ്യാപോഷിണി ഗ്രന്ഥാലയത്തിൽ ‘കൂട്ടിക്കൂട്ടം’ ബാലോത്സവം സംഘടിപ്പിച്ചു

മണ്ണാർമല: മണ്ണാർമല വിദ്യാപോഷിണി ഗ്രന്ഥാലയത്തിന്റെ ആഭിമുഖ്യത്തിൽ കുട്ടികൾക്കായി സംഘടിപ്പിച്ച ഏകദിന ബാലോത്സവം ‘കൂട്ടിക്കൂട്ടം’ സമാപിച്ചു. വെട്ടത്തൂർ ഗ്രാമപഞ്ചായത്ത് സി.ഡി.എസ്. ചെയർപേഴ്സൺ റഫീഖ ബഷീർ പരിപാടി ഉദ്ഘാടനം ചെയ്തു. ബാലവേദി പ്രസിഡന്റ് നന്ദിത പി.വി. അധ്യക്ഷത വഹിച്ച ചടങ്ങിൽ വിദ്യാപോഷിണി ഗ്രന്ഥാലയം സെക്രട്ടറി ഫിറോസ് കാരാടൻ സ്വാഗതം പറഞ്ഞു.

എഴുത്തുകാരനും സിനിമാപ്രവർത്തകനുമായ എം. കുഞ്ഞാപ്പ ക്യാമ്പ് നയിച്ചു. കുട്ടികളുടെ വിവിധ ക്യാമ്പുകളിലും ഉത്സവങ്ങളിലും സംഘാടകനായി ഈ രംഗത്ത് 40 വർഷം പൂർത്തിയാക്കിയ അദ്ദേഹത്തെ ചടങ്ങിൽ ഉപഹാരം നൽകി ആദരിച്ചു.

യോഗത്തിൽ ലിഷിത സുഭാഷ്, എം. ജയപ്രഭ, അനിത എൻ.പി., ഷീബ എം. എന്നിവർ സംസാരിച്ചു. ബാലവേദി സെക്രട്ടറി ആർദ്ര നന്ദി രേഖപ്പെടുത്തി. മുഹ്‌യുദ്ധീൻ ബാബു കെ, ഷിഫാനത് കെ., ഹസീന എ., മുഫീദ പി., ഖൈറുന്നീസ വി. എന്നിവർ പരിപാടികൾക്ക് നേതൃത്വം നൽകി. കളികളും ചിരിയും കഥകളുമായി നടന്ന ക്യാമ്പിൽ നിരവധി കുട്ടികൾ പങ്കെടുത്തു.

02/10/2026

പ്രിയപ്പെട്ടവരേ,

കളിച്ചും ചിരിച്ചും കഥകൾ പറഞ്ഞും കുട്ടികളുടെ സർഗാത്മകതയ്ക്കും ഭാവനയ്ക്കും നിറം പകരുന്ന “കുട്ടിക്കൂട്ടം” ഏകദിന ബാലോത്സവം 2026 ഒക്ടോബർ 3-ന് വിദ്യാപോഷിണി ഗ്രന്ഥാലയത്തിൽ സംഘടിപ്പിക്കുന്നു.

പ്രശസ്ത എഴുത്തുകാരനും ആർട്ടിസ്റ്റും ചലച്ചിത്ര പ്രവർത്തകനുമായ എം. കുഞ്ഞാപ്പ കുട്ടിക്കൂട്ടത്തിന് നേതൃത്വം നൽകുന്നു. ബാലരമ, ബാലഭൂമി, തത്തമ്മ, യുറീക്ക, മലർവാടി തുടങ്ങിയ പ്രസിദ്ധീകരണങ്ങളിലൂടെ കുട്ടികൾക്ക് സുപരിചിതനായ അദ്ദേഹം 2022-ലെ മുണ്ടൂർ കൃഷ്ണൻകുട്ടി സ്മാരക ചെറുകഥാ പുരസ്കാരം ഉൾപ്പെടെ അംഗീകാരങ്ങളും അർഹനായിട്ടുണ്ട്.

ഒക്ടോബർ 3-ന് വിദ്യാപോഷിണി ഗ്രന്ഥാലയത്തിൽ നടക്കുന്ന കുട്ടിക്കൂട്ടത്തിലേക്ക് എല്ലാ കുട്ടികളെയും സ്നേഹപൂർവം സ്വാഗതം ചെയ്യുന്നു.

പ്രസിഡന്റ് | സെക്രട്ടറി
വിദ്യാപോഷിണി ഗ്രന്ഥാലയം, മണ്ണാർമല

02/10/2026

01/10/2026

പ്രിയമുള്ളവരേ,

ഒക്ടോബർ 1 — വയോജന ദിനം ❤️

വിദ്യാപോഷിണി ഗ്രന്ഥാലയം, മണ്ണാർമലയുടെ ആഭിമുഖ്യത്തിൽ ഇന്ന് വൈകീട്ട് 4.30ന്, പാട്ടും സൗഹൃദവും ഓർമ്മകളും ഒരു കപ്പ് കട്ടൻചായയും ഒത്തുചേരുന്ന “കട്ടനും പാട്ടും” കലാപരിപാടി സംഘടിപ്പിക്കുന്നു. 🎶☕

നമ്മുടെ നാട്ടിലെ മുഴുവൻ വയോജനങ്ങളെയും ഈ സ്നേഹസംഗമത്തിലേക്ക് ഹൃദയപൂർവ്വം സ്വാഗതം ചെയ്യുന്നു. 🌿

വിദ്യാപോഷിണി ഗ്രന്ഥാലയം
മണ്ണാർമല

#കട്ടനുംപാട്ടും #വയോജനദിനം #വിദ്യാപോഷിണിഗ്രന്ഥാലയം #മണ്ണാർമല

26/09/2026

📚 ഗാന്ധിജയന്തി ക്വിസ് മത്സരം

പ്രിയപ്പെട്ടവരെ,

വിദ്യാപോഷിണി ഗ്രന്ഥാലയത്തിൻ്റെ ആഭിമുഖ്യത്തിൽ LP, UP, ഹൈസ്കൂൾ വിദ്യാർത്ഥികൾക്കായി ഗാന്ധിജയന്തി ക്വിസ് മത്സരം സംഘടിപ്പിക്കുന്നു.

📅 27-09-2026, ഞായർ
⏰ ഉച്ചയ്ക്ക് 2.00 മണിക്ക്
📍 വിദ്യാപോഷിണി ഗ്രന്ഥാലയം, മണ്ണാർമല

എല്ലാ വിദ്യാർത്ഥികളെയും മത്സരത്തിലേക്ക് ഹാർദ്ദമായി സ്വാഗതം ചെയ്യുന്നു. 🌿

പ്രസിഡന്റ് | സെക്രട്ടറി
വിദ്യാപോഷിണി ഗ്രന്ഥാലയം

04/09/2026

വിദ്യാ പോഷിണി ഗ്രന്ഥാലയം നടപ്പാക്കുന്ന താങ്ങും തണലും- പാലിയേറ്റീവ് കെയർ പദ്ധതിയുടെ ഭാഗമായി ഉദ്ഘാടനം ചെയ്യപ്പെട്ട കോഴിശ്ശേരി അബ്‌ദുക്കാക്ക മെമ്മോറിയൽ ചാരിറ്റബിൾ ട്രസ്‌റ്റ് ഉദ്ഘാടനത്തിൻ്റെ പ്രസക്ത ഭാഗങ്ങൾ

31/08/2026

കോഴിശ്ശേരി അബ്‌ദുക്കാക്ക സ്‌മാരക ചാരിറ്റബിൾ ട്രസ്റ്റ് ഓഫീസ് ഉദ്ഘാടനവും അനുസ്മരണവും നടന്നു

പെരിന്തൽമണ്ണ: കിടപ്പുരോഗികളുടെ പരിചരണവും വിവിധ ജീവകാരുണ്യ പ്രവർത്തനങ്ങളും ലക്ഷ്യമിട്ട് മണ്ണാർമല വിദ്യാപോഷിണി ഗ്രന്ഥാലയത്തിന്റെ കീഴിൽ രൂപീകരിച്ച കോഴിശ്ശേരി അബ്‌ദുക്കാക്ക സ്‌മാരക ചാരിറ്റബിൾ ട്രസ്റ്റ് ഓഫീസിന്റെ ഉദ്ഘാടനവും അനുസ്മരണവും പീടികപ്പടിയിൽ നടന്നു. മുൻ നിയമസഭാ സ്പീക്കർ ശ്രീ. പി. ശ്രീരാമകൃഷ്‌ണൻ ചടങ്ങ് ഉദ്ഘാടനം ചെയ്തു.
മുൻ എം എൽ എ. ശ്രീ വി ശശികുമാർ മുഖ്യ പ്രഭാഷണം നടത്തി.

ഗ്രന്ഥാലയം പ്രസിഡന്റ് ശ്രീ. ജാഫർ കെ. ചടങ്ങിന് അധ്യക്ഷത വഹിച്ചു. വിദ്യാപോഷിണി ഗ്രന്ഥാലയം സെക്രട്ടറി ശ്രീ. ഫിറോസ് കെ. സ്വാഗതം ആശംസിച്ച ചടങ്ങിൽ ശ്രീ. ഇസ്‌മായിൽ കെ. ടി. അനുസ്‌മരണ പ്രഭാഷണം നിർവഹിച്ചു. ചടങ്ങിൽ പാലിയേറ്റീവ് പ്രവർത്തകരെ ഗ്രന്ഥാലയം എക്സിക്യൂട്ടീവ് അംഗം ശ്രീ അബ്ബാസ് മാസ്റ്റർ കെ പരിചയപ്പെടുത്തി.

പാലിയേറ്റീവ് - സന്നദ്ധ സേവന രംഗത്ത് മാതൃകാപരമായ പ്രവർത്തനം കാഴ്ചവെച്ച വിവിധ പ്രവർത്തകരെ ചടങ്ങിൽ ആദരിച്ചു. കൂടാതെ, രക്തദാന മികവിന് കേരള സർക്കാരിന്റെ പുരസ്കാരങ്ങളും ടാലന്റ് റെക്കോർഡ് ബുക്ക് നാഷണൽ റെക്കോർഡും നേടിയ പെരിന്തൽമണ്ണ പൂപ്പലം സ്വദേശി ശ്രീ. അബ്ദുൽ അസീസ് കണ്ണംതൊടിയെ ചടങ്ങിൽ പ്രത്യേകമായി ആദരിച്ചു.

വെട്ടത്തൂർ ഗ്രാമപഞ്ചായത്ത് മെമ്പർ ശ്രീമതി ജസീന റസാഖ് ഒ. പി., ചുങ്കം പാലിയേറ്റീവ് ക്ലിനിക്ക് പ്രതിനിധി ശ്രീ. സുബൈർ മാസ്റ്റർ, പെരിന്തൽമണ്ണ പാലിയേറ്റീവ് ക്ലിനിക്ക് പ്രതിനിധി ശ്രീ. കുറ്റിരി മാനുപ്പ, ശ്രീ. അബ്‌ദുള്ള ഫൈസി കോഴിശ്ശേരി, ശ്രീ പി സി ഷംസുദ്ദീൻ, ശ്രീ മൊയ്തുട്ടി മാസ്റ്റർ വെട്ടത്തൂർ , ഗ്രന്ഥാലയം ജോയിൻ്റ് സെക്രട്ടറി കല്ലിങ്ങൽ മുഹമ്മദ് എന്ന ഷാഫി മാസ്റ്റർ തുടങ്ങിയവർ ചടങ്ങിൽ ആശംസകൾ അർപ്പിച്ച് സംസാരിച്ചു. ചടങ്ങിൽ കൈപ്പള്ളി അബ്ദുല്ല, കക്കൂത്ത് മുഹമ്മദ് എന്ന കുഞ്ഞു തുടങ്ങിയവർ സംബന്ധിച്ചു.

വിദ്യാപോഷിണി ഗ്രന്ഥാലയം എക്‌സിക്യൂട്ടീവ് കമ്മിറ്റി അംഗം ശ്രീ. ഹൈദരാലി കെ. ചടങ്ങിന് നന്ദി പറഞ്ഞു.

30/08/2026

പ്രിയപ്പെട്ടവരെ,

നമ്മുടെ നാടിന്റെ രാഷ്ട്രീയ–സാമൂഹിക സേവന മേഖലകളിൽ മാതൃകാപരമായ പ്രവർത്തനങ്ങളിലൂടെ വ്യക്തിമുദ്ര പതിപ്പിച്ച സ. കോഴിശ്ശേരി അബ്‌ദുക്കാക്കയുടെ സ്മരണ നിലനിർത്തിക്കൊണ്ട്, അദ്ദേഹത്തിന്റെ സേവനമനോഭാവം പുതിയ കാലത്തേക്കും പകർന്നു നൽകുന്ന ഒരു സാന്ത്വന സംരംഭത്തിന് വിദ്യാപോഷിണി ഗ്രന്ഥാലയം തുടക്കം കുറിക്കുകയാണ്.

വേദനിക്കുന്നവർക്കൊപ്പം നിൽക്കാനും രോഗത്തിന്റെയും പ്രയാസങ്ങളുടെയും ഘട്ടങ്ങളിൽ കരുതലും ആശ്വാസവും പകരാനും ലക്ഷ്യമിട്ട് Pain & Palliative Care രംഗത്ത് പ്രവർത്തിക്കുന്ന

“താങ്ങും തണലും”

എന്ന സംരംഭത്തിന്റെ ഭാഗമായി

സ. കോഴിശ്ശേരി അബ്‌ദുക്കാക്ക സ്മാരക ചാരിറ്റബിൾ ട്രസ്റ്റ് ഓഫീസ്

31/08/2026 തിങ്കളാഴ്ച വൈകുന്നേരം 4.30-ന്
വിദ്യാപോഷിണി ഗ്രന്ഥാലയം, മണ്ണാർമലയിൽ പ്രവർത്തനമാരംഭിക്കുന്നു.

അബ്‌ദുക്കാക്ക ഉയർത്തിപ്പിടിച്ച മനുഷ്യസ്നേഹത്തിന്റെയും സാമൂഹിക പ്രതിബദ്ധതയുടെയും സേവനത്തിന്റെയും മൂല്യങ്ങൾ മുന്നോട്ടുകൊണ്ടുപോകുന്ന ഈ കൂട്ടായ്മയുടെ തുടക്കത്തിന് സാക്ഷിയാകാനും തുടർപ്രവർത്തനങ്ങളുടെ ഭാഗമാകാനും താങ്കളേയും കുടുംബത്തെയും ഹൃദയപൂർവ്വം ക്ഷണിക്കുന്നു.

സ്നേഹപൂർവ്വം,

പ്രസിഡന്റ് | സെക്രട്ടറി
വിദ്യാപോഷിണി ഗ്രന്ഥാലയം
മണ്ണാർമല

24/08/2026

.

*വിദ്യാപോഷിണി ഗ്രന്ഥാലയത്തിന്റെ “കാർണോരോണം 2026”: 150-ഓളം മുതിർന്ന പൗരന്മാർക്ക് ഓണക്കോടിയും ആദരവും നൽകി*

മണ്ണാർമല: പ്രദേശത്തെ മുതിർന്ന തലമുറയോടുള്ള ആദരവും സ്നേഹവും പ്രകടിപ്പിച്ചുകൊണ്ട് വിദ്യാപോഷിണി ഗ്രന്ഥാലയത്തിന്റെ ആഭിമുഖ്യത്തിൽ വയോജനങ്ങൾക്കായി സംഘടിപ്പിച്ച “കാർണോരോണം 2026” ഓണാഘോഷവും മുതിർന്നവരുടെ ഓണസംഗമവും ഏറെ ഹൃദ്യമായി. ഗ്രന്ഥാലയ അങ്കണത്തിൽ നടന്ന പ്രൗഢഗംഭീരമായ ചടങ്ങിൽ കാര്യവട്ടം വില്ലേജിലെ വിവിധ മേഖലകളിൽ വ്യക്തിമുദ്ര പതിപ്പിച്ച സമൂഹത്തിന് മാതൃകയായ 150-ഓളം മുതിർന്ന പൗരന്മാരെ പൊന്നാടയും ഓണക്കോടിയും നൽകി ആദരിച്ചു.

ഗ്രന്ഥാലയം പ്രസിഡന്റ് ശ്രീ. ജാഫർ കെ. കക്കൂത്ത് ചടങ്ങിൽ അധ്യക്ഷത വഹിച്ചു. സെക്രട്ടറി ശ്രീ. ഫിറോസ് കെ. സ്വാഗത പ്രസംഗം നടത്തി. പ്രസിദ്ധ കഥാകൃത്തും പ്രമുഖ പൊതുപ്രവർത്തകനുമായ ശ്രീ. പി.പി. വാസുദേവൻ പരിപാടി ഔദ്യോഗികമായി ഉദ്ഘാടനം ചെയ്തു. രണ്ട് ജനപ്രിയ ബെസ്റ്റ് സെല്ലർ പുസ്തകങ്ങളുടെ രചയിതാവ് കൂടിയായ അദ്ദേഹം, മുതിർന്ന തലമുറയുടെ അനുഭവസമ്പത്താണ് സമൂഹത്തിന്റെ ഏറ്റവും വലിയ കരുത്തെന്ന് ഉദ്ഘാടന പ്രസംഗത്തിൽ ഓർമ്മിപ്പിച്ചു. വാർദ്ധക്യകാലത്ത് വയോജനങ്ങൾക്ക് മാനസിക സന്തോഷവും ഒത്തുചേരലിനുള്ള അവസരങ്ങളും ഒരുക്കുന്നതിൽ വിദ്യാപോഷിണി ഗ്രന്ഥാലയം മാതൃകാപരമായ പ്രവർത്തനങ്ങളാണ് കാഴ്ചവെക്കുന്നതെന്നും അദ്ദേഹം കൂട്ടിച്ചേർത്തു.

ചടങ്ങിൽ പിഎച്ച്‌ഡി ബിരുദം കരസ്ഥമാക്കിയ ശ്രീ. റഷീദ് സി.പി.-യെ ചടങ്ങിൽ ഊഷ്മളമായി അനുമോദിച്ചു.

കേരള ഹെൽത്ത് യൂണിവേഴ്സിറ്റി സിൻഡിക്കേറ്റ് അംഗം ഡോ. അരുൺ പി.വി., ശ്രീ. മൊയ്തുട്ടി മാഷ് (ലൈബ്രറി കൗൺസിൽ), ശ്രീ. പി.സി. ഷംസുദ്ദീൻ, ശ്രീ. കല്ലിങ്ങൽ മുഹമ്മദ് തുടങ്ങിയ പ്രമുഖ വ്യക്തികളും സാംസ്കാരിക പ്രവർത്തകരും ചടങ്ങിൽ ആശംസകൾ നേർന്നു സംസാരിച്ചു. വിവിധ തുറകളിൽപെട്ട നാടിന്റെ പ്രിയപ്പെട്ട കാരണവന്മാർ പരിപാടിയിൽ സജീവമായി പങ്കെടുത്തു. വാർദ്ധക്യസഹജമായ ശാരീരിക ബുദ്ധിമുട്ടുകളും അസുഖങ്ങളും മറന്ന് പരസ്പരം സന്തോഷം പങ്കുവെക്കാനും പഴയകാല ഓർമ്മകൾ പുതുക്കാനുമായി ഒട്ടേറെ വയോജനങ്ങൾ ആവേശത്തോടെ സംഗമത്തിനെത്തിച്ചേർന്നു. ചടങ്ങിന് ശ്രീമതി ജയപ്രഭ നന്ദി രേഖപ്പെടുത്തി.

കഴിഞ്ഞ 10 വർഷമായി മുതിർന്ന പൗരന്മാർക്കായി പൂർണ്ണമായും സൗജന്യമായി വിനോദയാത്രകൾ ഗ്രന്ഥാലയം സംഘടിപ്പിച്ചുവരുന്നു. ഇതിന്റെ ഭാഗമായി കഴിഞ്ഞ മാസങ്ങളിൽ 200-ഓളം മുതിർന്ന പൗരന്മാരെ പങ്കെടുപ്പിച്ചുകൊണ്ട് വയനാട്ടിലേക്ക് അവിസ്മരണീയമായ വയോജന യാത്രയും വിജയകരമായി പൂർത്തിയാക്കിയിരുന്നു. മുൻവർഷങ്ങളിലും ഓണത്തോടനുബന്ധിച്ച് മുതിർന്ന പൗരന്മാർക്ക് ഓണക്കോടി നൽകി ആദരിക്കുന്ന ചടങ്ങ് ഗ്രന്ഥാലയം മുടക്കം കൂടാതെ സംഘടിപ്പിച്ചുപോരുന്നു. നിരവധി വയോജനങ്ങളും ഗ്രന്ഥാലയം പ്രവർത്തകരും നാട്ടുകാരും പങ്കെടുത്ത ചടങ്ങ് നാടിന്റെ സാംസ്കാരിക കൂട്ടായ്മ ഊട്ടിയുറപ്പിക്കുന്നതിനും മുതിർന്ന തലമുറയെ ചേർത്തുപിടിക്കുന്നതിനും സഹായകമാകട്ടെ!