Hardev Singh Kalyan

30/09/2026

ਕੌਮੀ ਇਨਸਾਫ਼ ਮੋਰਚੇ ਦਾ ਮਾਰਚ 02 ਅਕਤੂਬਰ ਨੂੰ ਗੁਰਦੁਆਰਾ ਸ੍ਰੀ ਫ਼ਤਹਿਗੜ੍ਹ ਸਾਹਿਬ ਤੋਂ ਅਰਦਾਸ ਕਰਕੇ ਚੱਲੇਗਾ, ਸਿੱਖ ਸੰਗਤ ਸਮੂਲੀਅਤ ਕਰੇ : ਮਾਨ

ਫ਼ਤਹਿਗੜ੍ਹ ਸਾਹਿਬ, 30 ਸਤੰਬਰ ( ) “ਜੋ ਸਿੱਖ ਕੌਮ ਨਾਲ ਸੰਬੰਧਤ 30-30, 35-35 ਸਾਲਾਂ ਤੋ ਹੁਕਮਰਾਨਾਂ ਨੇ ਜ਼ਬਰੀ ਸਿੱਖ ਕੈਦੀ ਬਣਾਕੇ ਰੱਖੇ ਹੋਏ ਹਨ ਅਤੇ ਜਿਨ੍ਹਾਂ ਦੀਆਂ ਸਜ਼ਾਵਾਂ ਪੂਰੀਆ ਹੋਣ ਉਪਰੰਤ ਵੀ ਉਨ੍ਹਾਂ ਨੂੰ ਰਿਹਾਅ ਨਹੀ ਕੀਤਾ ਜਾ ਰਿਹਾ । ਉਨ੍ਹਾਂ ਦੀ ਰਿਹਾਈ ਦੇ ਗੰਭੀਰ ਮੁੱਦੇ ਨੂੰ ਲੈਕੇ ਕੌਮੀ ਇਨਸਾਫ਼ ਮੋਰਚੇ ਦੀ ਸਮੁੱਚੀ ਟੀਮ ਵੱਲੋ ਗੁਰਦੁਆਰਾ ਸ੍ਰੀ ਫ਼ਤਹਿਗੜ੍ਹ ਸਾਹਿਬ ਤੋ ਮਿਤੀ 02 ਅਕਤੂਬਰ ਨੂੰ ਸਵੇਰੇ 10 ਵਜੇ ਅਰਦਾਸ ਕਰਨ ਉਪਰੰਤ ਮਾਰਚ ਸੁਰੂ ਕੀਤਾ ਜਾਵੇਗਾ । ਜੋ ਕਿ ਆਪਣੇ ਰੂਟ ਮੁਤਾਬਿਕ ਮਾਰਚ ਕਰਦਾ ਹੋਇਆ ਗੁਰਦੁਆਰਾ ਨਨਕਿਆਣਾ ਸਾਹਿਬ ਸੰਗਰੂਰ ਵਿਖੇ ਰਾਤ ਦਾ ਪੜਾਅ ਕਰੇਗਾ । ਇਸ ਲਈ ਨਵਾਂਸ਼ਹਿਰ, ਰੋਪੜ੍ਹ, ਚੰਡੀਗੜ੍ਹ, ਫਤਹਿਗੜ੍ਹ ਸਾਹਿਬ, ਮੋਹਾਲੀ, ਪਟਿਆਲਾ, ਲੁਧਿਆਣਾ, ਖੰਨਾ ਦੇ ਸ਼੍ਰੋਮਣੀ ਅਕਾਲੀ ਦਲ (ਅੰਮ੍ਰਿਤਸਰ) ਦੇ ਜਿ਼ਲ੍ਹਾ ਪ੍ਰਧਾਨਾਂ ਤੇ ਜਥੇਬੰਦੀ ਦੇ ਨਾਲ-ਨਾਲ ਸੰਗਤ ਨੂੰ ਇਸ ਵਿਚ ਹੁੰਮ ਹੁਮਾਕੇ ਪਹੁੰਚਣ ਦੀ ਅਪੀਲ ਕੀਤੀ ਜਾਂਦੀ ਹੈ ।”

ਇਹ ਅਪੀਲ ਸ. ਸਿਮਰਨਜੀਤ ਸਿੰਘ ਮਾਨ ਪ੍ਰਧਾਨ ਸ਼੍ਰੋਮਣੀ ਅਕਾਲੀ ਦਲ (ਅੰਮ੍ਰਿਤਸਰ) ਨੇ ਕੌਮੀ ਇਨਸਾਫ ਮੋਰਚੇ ਦੇ ਸੁਰੂ ਹੋਣ ਵਾਲੇ ਮਾਰਚ ਵਿਚ ਗੁਰਦੁਆਰਾ ਸ੍ਰੀ ਫਤਹਿਗੜ੍ਹ ਸਾਹਿਬ ਵਿਖੇ 02 ਅਕਤੂਬਰ ਨੂੰ 10 ਵਜੇ ਹੁੰਮ ਹੁਮਾਕੇ ਅਰਦਾਸ ਵਿਚ ਸਾਮਿਲ ਹੋਣ ਅਤੇ ਮਾਰਚ ਦੇ ਮਕਸਦ ਦੀ ਪੂਰਤੀ ਕਰਨ ਦੀ ਯੋਗਦਾਨ ਪਾਉਣ ਜੋਰਦਾਰ ਅਪੀਲ ਕੀਤੀ । ਉਨ੍ਹਾਂ ਕਿਹਾ ਕਿ ਦੂਸਰੇ ਦਿਨ ਮਿਤੀ 03 ਅਕਤੂਬਰ ਨੂੰ ਗੁਰਦੁਆਰਾ ਨਨਕਿਆਣਾ ਸਾਹਿਬ ਤੋ ਇਹ ਮਾਰਚ ਸੁਰੂ ਹੋਵੇਗਾ ਜਿਸ ਵਿਚ ਸੰਗਰੂਰ, ਬਰਨਾਲਾ, ਬਠਿੰਡਾ, ਮਾਨਸਾ, ਫਰੀਦਕੋਟ, ਮੋਗਾ ਜਿ਼ਲ੍ਹਿਆ ਦੇ ਪ੍ਰਧਾਨ ਤੇ ਜਥੇਬੰਦੀ ਤੇ ਸੰਗਤ ਸਮੂਲੀਅਤ ਕਰਨਗੇ । ਉਨ੍ਹਾਂ ਉਮੀਦ ਪ੍ਰਗਟ ਕੀਤੀ ਕਿ ਜਿਸ ਵੀ ਰੂਟ ਤੇ ਇਹ ਮਾਰਚ ਦਾਖਲ ਹੋਵੇਗਾ ਉਥੋ ਦੀਆਂ ਸੰਗਤਾਂ ਤੇ ਪਾਰਟੀ ਅਹੁਦੇਦਾਰ ਜੋਰਦਾਰ ਸਵਾਗਤ ਕਰਨ ਦੇ ਨਾਲ-ਨਾਲ ਇਸ ਮਾਰਚ ਵਿਚ ਸਾਮਿਲ ਹੋ ਕੇ ਸੈਟਰ ਤੇ ਪੰਜਾਬ ਦੇ ਹੁਕਮਰਾਨਾਂ ਵੱਲੋ ਸਿੱਖ ਬੰਦੀਆ ਨਾਲ ਕੀਤੀ ਜਾ ਰਹੀ ਜਿਆਦਤੀ ਵਿਰੁੱਧ ਬੁਲੰਦ ਨਾਅਰਿਆ ਨਾਲ ਰੋਸ ਪ੍ਰਗਟ ਕਰਨ ਵਿਚ ਯੋਗਦਾਨ ਪਾਉਣਗੇ ।

30/09/2026

29/09/2026

ਹਿੰਦੂਤਵ ਹੁਕਮਰਾਨ ਫਾਂਸੀਵਾਦ ਸੋਚ ਉਤੇ ਅਮਲ ਕਰਕੇ ਘੱਟ ਗਿਣਤੀ ਸਿੱਖ ਅਤੇ ਮੁਸਲਿਮ ਕੌਮ ਨਾਲ ਵੱਡੀ ਜਿਆਦਤੀ ਕਰ ਰਹੇ ਹਨ, ਜੋ ਖਤਮ ਹੋਣੀ ਚਾਹੀਦੀ ਹੈ : ਮਾਨ

ਫ਼ਤਹਿਗੜ੍ਹ ਸਾਹਿਬ, 29 ਸਤੰਬਰ ( ) “ਜਿਵੇ ਦੂਸਰੀ ਸੰਸਾਰ ਜੰਗ ਸਮੇ ਹਿਟਲਰ ਦੀ ਨਾਜੀ ਪਾਰਟੀ ਨੇ ਅਣਮਨੁੱਖੀ ਅਤੇ ਗੈਰ ਸਮਾਜਿਕ ਢੰਗਾਂ ਦੀ ਵਰਤੋ ਕਰਦੇ ਹੋਏ 60 ਲੱਖ ਯਹੂਦੀਆਂ ਨੂੰ ਗੈਂਸ ਚੈਬਰਾਂ ਵਿਚ ਪਾ ਕੇ ਸਾੜਦੇ ਹੋਏ ਵੱਡਾ ਜੁਲਮ ਕੀਤਾ ਸੀ, ਲੰਗੜੇ, ਲੂਲਿਆ ਅਤੇ ਜਿਪਸੀਆ ਨੂੰ ਵੀ ਖਤਮ ਕਰ ਦਿੱਤਾ ਸੀ, ਯਹੂਦੀਆ ਦਾ ਵੱਡੇ ਪੱਧਰ ਤੇ ਕਤਲੇਆਮ ਕੀਤਾ ਸੀ । ਉਨ੍ਹਾਂ ਦੇ ਧਾਰਮਿਕ ਸਥਾਂਨ ਸੈਨੋਗੋਜ ਨੂੰ ਤਬਾਹ ਕਰ ਦਿੱਤਾ ਸੀ ਅਤੇ ਇਹ ਵੀ ਐਲਾਨ ਕਰ ਦਿੱਤਾ ਸੀ ਕਿ ਯਹੂਦੀ ਲੋਕ ਅਤੇ ਦੂਸਰੇ ਜਰਮਨ ਦੇ ਨਾਗਰਿਕ ਨਹੀ ਹੋ ਸਕਦੇ । ਰੂਸ ਦੇ ਜੋ ਜੰਗੀ ਕੈਦੀ ਸਨ ਅਤੇ ਹੋਰ ਘੱਟ ਗਿਣਤੀ ਗੁਲਾਮਾਂ ਨੂੰ ਖਤਮ ਕਰ ਦਿੱਤਾ ਸੀ । ਉਸੇ ਤਰ੍ਹਾਂ ਹੁਣ ਹਿੰਦੂਤਵ ਹੁਕਮਰਾਨ ਮੁਸਲਮਾਨਾਂ ਦੀਆਂ ਮਸਜਿਦਾ ਅਤੇ ਉਨ੍ਹਾਂ ਦੀ ਸੱਭਿਅਤਾ ਅਤੇ ਯਾਦਗਰਾਂ ਨੂੰ ਜ਼ਬਰੀ ਖਤਮ ਕਰ ਰਹੇ ਹਨ । ਜਿਸਦੀ ਪ੍ਰਤੱਖ ਉਦਾਹਰਣ ਇਹ ਹੈ ਕਿ ਪਹਿਲਾ ਇਨ੍ਹਾਂ ਹੁਕਮਰਾਨਾਂ ਨੇ ਸਹਾਰਨਪੁਰ ਵਿਖੇ ਮਸਜਿਦ ਢਹਿ ਢੇਰੀ ਕੀਤੀ, ਹੁਣ ਉਜੈਨ ਵਿਖੇ ਇਹ ਧਾਰਮਿਕ ਤੇ ਸਮਾਜਿਕ ਗੁਨਾਹ ਕਰ ਰਹੇ ਹਨ । ਇਹ ਬੀਜੇਪੀ-ਆਰ.ਐਸ.ਐਸ ਨਾਲ ਸੰਬੰਧਤ ਲੋਕ ਫਾਸਿਸਟ ਬਣ ਚੁੱਕੇ ਹਨ । ਇਹ ਦੁੱਖ ਅਤੇ ਅਫਸੋਸ ਹੈ ਕਿ ਪਹਿਲੇ ਕਾਮਰੇਡ ਸੋਚ ਵਾਲੇ ਅਜਿਹੇ ਜ਼ਬਰ ਜੁਲਮਾਂ ਵਿਰੁੱਧ ਆਵਾਜ ਉਠਾਉਦੇ ਸਨ ਪਰ ਉਹ ਵੀ ਹੁਣ ਚੁੱਪ ਕਰ ਗਏ ਹਨ ਜੋ ਕਿ ਹੋਰ ਵੀ ਗੈਰ ਇਨਸਾਨੀ ਤੇ ਗੈਰ ਸਮਾਜਿਕ ਹਕੂਮਤੀ ਅਮਲਾਂ ਨੂੰ ਬੁੜਾਵਾ ਦੇਣ ਦਾ ਕਾਰਨ ਬਣ ਰਹੇ ਹਨ ।”

ਇਹ ਵਿਚਾਰ ਸ. ਸਿਮਰਨਜੀਤ ਸਿੰਘ ਮਾਨ ਪ੍ਰਧਾਨ ਸ਼੍ਰੋਮਣੀ ਅਕਾਲੀ ਦਲ (ਅੰਮ੍ਰਿਤਸਰ) ਨੇ ਮੌਜੂਦਾ ਇੰਡੀਆ ਦੀ ਬੀਜੇਪੀ-ਆਰ.ਐਸ.ਐਸ ਜਮਾਤਾਂ ਵੱਲੋ ਹਿਟਲਰ ਨਾਜੀਆ ਦੀ ਤਰ੍ਹਾਂ ਇੰਡੀਆ ਵਿਚ ਵੱਸਣ ਵਾਲੀਆ ਘੱਟ ਗਿਣਤੀ ਕੌਮਾਂ ਮੁਸਲਿਮ, ਸਿੱਖ, ਇਸਾਈਆ ਤੇ ਰੰਘਰੇਟਿਆ ਉਤੇ ਵੱਡੇ ਪੱਧਰ ਤੇ ਢਾਹੇ ਜਾ ਰਹੇ ਜ਼ਬਰ ਅਤੇ ਉਨ੍ਹਾਂ ਦੇ ਧਾਰਮਿਕ ਸਥਾਨਾਂ ਨੂੰ ਢਹਿ ਢੇਰੀ ਕਰਨ ਅਤੇ ਉਨ੍ਹਾਂ ਦੀ ਅਮੀਰ ਸੱਭਿਅਤਾ ਨੂੰ ਖਤਮ ਕਰਨ ਦੇ ਕੀਤੇ ਜਾ ਰਹੇ ਅਮਲਾਂ ਉਤੇ ਤਿੱਖਾ ਪ੍ਰਤੀਕਰਮ ਜਾਹਰ ਕਰਦੇ ਹੋਏ ਅਤੇ ਇਸ ਹੋ ਰਹੇ ਜ਼ਬਰ ਵਿਰੁੱਧ ਮੁਸਲਿਮ, ਇਸਾਈ, ਰੰਘਰੇਟਿਆ ਤੇ ਸਿੱਖ ਕੌਮ ਨੂੰ ਇਕ ਪਲੇਟਫਾਰਮ ਤੇ ਇਕੱਤਰ ਹੋਣ ਦੀ ਅਪੀਲ ਕਰਦੇ ਹੋਏ ਪ੍ਰਗਟ ਕੀਤੇ । ਉਨ੍ਹਾਂ ਕਿਹਾ ਕਿ 1984 ਵਿਚ ਪਹਿਲੇ ਇਨ੍ਹਾਂ ਹੁਕਮਰਾਨਾਂ ਨੇ ਸ੍ਰੀ ਦਰਬਾਰ ਸਾਹਿਬ, ਸ੍ਰੀ ਅਕਾਲ ਤਖਤ ਸਾਹਿਬ ਤੇ ਸਾਜਿਸ ਅਧੀਨ ਬਲਿਊ ਸਟਾਰ ਦਾ ਫ਼ੌਜੀ ਹਮਲਾ ਕਰਕੇ ਢਹਿ ਢੇਰੀ ਕੀਤੇ । ਸਾਡੀ ਸਿੱਖ ਰੈਫਰੈਸ ਲਾਈਬ੍ਰੇਰੀ ਅਤੇ ਤੋਸਾਖਾਨਾ ਵਿਚੋ ਕੀਮਤੀ ਕੌਮੀ ਇਤਿਹਾਸ, ਕੀਮਤੀ ਦੁਰਲੱਭ ਵਸਤਾਂ ਲੁੱਟਕੇ ਲੈ ਗਏ । ਦਸੰਬਰ 1992 ਵਿਚ ਇਨ੍ਹਾਂ ਸਭ ਹਿੰਦੂਤਵ ਜਮਾਤਾਂ ਨੇ ਇਕੱਤਰ ਹੋ ਕੇ ਮੁਸਲਿਮ ਕੌਮ ਦੀ ਬਾਬਰੀ ਮਸਜਿਦ ਨੂੰ ਢਹਿ ਢੇਰੀ ਕਰ ਦਿੱਤਾ ਅਤੇ ਉਥੇ ਜਬਰੀ ਆਪਣੀਆ ਅਦਾਲਤਾਂ ਤੇ ਜੱਜਾਂ ਦੇ ਸਹਾਰੇ ਰਾਮ ਮੰਦਰ ਉਸਾਰ ਦਿੱਤਾ । ਇਥੋ ਤੱਕ ਸਾਡੇ ਗੁਰੂਘਰਾਂ ਦੇ ਪ੍ਰਬੰਧ ਨਾਲ ਸੰਬੰਧਤ ਐਸ.ਜੀ.ਪੀ.ਸੀ ਦੀਆਂ ਬੀਤੇ 15 ਸਾਲਾਂ ਤੋ ਜਰਨਲ ਚੋਣਾਂ ਨਹੀ ਕਰਵਾਈਆ ਜਾ ਰਹੀਆ । ਬਲਕਿ ਸਾਡੇ ਗੁਰੂਘਰਾਂ ਤੇ ਤਖਤਾਂ ਦੇ ਪ੍ਰਬੰਧ ਵਿਚ ਜਬਰੀ ਗੈਰ ਸਿੱਖਾਂ ਨੂੰ ਦਾਖਲ ਕਰਕੇ ਸਾਡੇ ਪ੍ਰਬੰਧ ਨੂੰ ਤਹਿਸ-ਨਹਿਸ ਕਰਨ ਦੀਆਂ ਸਾਜਿਸਾਂ ਰਚੀਆ ਜਾ ਰਹੀਆ ਹਨ । ਇਸ ਜ਼ਬਰ ਦੀ ਬਦੌਲਤ ਹੀ ਅੱਜ ਕਸਮੀਰੀ ਮੁਸਲਮਾਨ ਆਪਣੀ ਯੂਟੀ ਬਣਾਈ ਕਸਮੀਰ ਸਟੇਟ ਨੂੰ ਆਜ਼ਾਦ ਸਟੇਟ ਦੇ ਤੌਰ ਤੇ ਮਾਨਤਾ ਦੇ ਕੇ ਉਨ੍ਹਾਂ ਦੇ ਵਿਧਾਨਿਕ ਤੇ ਸਮਾਜਿਕ ਹੱਕਾਂ ਨੂੰ ਪ੍ਰਦਾਨ ਕਰਨ ਦੀ ਮੰਗ ਕਰ ਰਹੇ ਹਨ । ਇਸੇ ਤਰ੍ਹਾਂ ਸਿੱਖ ਕੌਮ ਆਪਣੇ ਉਤੇ ਹੋਏ ਜਬਰ ਦੀ ਬਦੌਲਤ ਆਜਾਦ ਬਾਦਸਾਹੀ ਸਿੱਖ ਰਾਜ ਕਾਇਮ ਕਰਨ ਦੀ ਗੱਲ ਕਰ ਰਹੀ ਹੈ । ਇਥੇ ਇਹ ਵੀ ਵਰਣਨ ਕਰਨਾ ਜਰੂਰੀ ਹੈ ਕਿ ਸਿੱਖ ਕੌਮ ਲੰਮੇ ਸਮੇ ਤੋਂ ਸ੍ਰੀ ਕਰਤਾਰਪੁਰ ਸਾਹਿਬ ਦੇ ਬੰਦ ਕੀਤੇ ਗਏ ਲਾਂਘੇ ਨੂੰ ਖੁੱਲ੍ਹਵਾਉਣ ਦੇ ਨਾਲ-ਨਾਲ ਵਾਹਗਾ, ਅਟਾਰੀ, ਹੂਸੈਨੀਵਾਲਾ, ਸੁਲੇਮਾਨਕੀ ਸਰਹੱਦਾਂ ਜੋ ਪਾਕਿਸਤਾਨ ਨਾਲ ਲੱਗਦੀਆ ਹਨ, ਜਿਨ੍ਹਾਂ ਰਾਹੀ ਪੰਜਾਬ ਦਾ ਵਪਾਰੀ, ਜਿੰਮੀਦਾਰ ਆਪਣੀਆ ਉਤਪਾਦ ਵਸਤਾਂ ਤੇ ਫਸਲਾਂ ਨੂੰ ਅਰਬ ਮੁਲਕਾਂ ਰੂਸ ਤੇ ਮੱਧ ਏਸੀਆ ਤੱਕ ਵੇਚਕੇ ਆਪਣੀ ਆਰਥਿਕਤਾ ਨੂੰ ਮਜਬੂਤ ਕਰ ਸਕਦਾ ਹੈ । ਇਥੇ ਲੱਖਾਂ ਦੀ ਗਿਣਤੀ ਵਿਚ ਫੈਲੀ ਬੇਰੁਜਗਾਰੀ ਨੂੰ ਖਤਮ ਕਰ ਸਕਦਾ ਹੈ, ਉਸ ਨੂੰ ਇਹ ਹੁਕਮਰਾਨ ਮੰਦਭਾਵਨਾ ਅਧੀਨ ਨਹੀ ਖੋਲ੍ਹ ਰਹੇ । ਫਿਰ ਸਾਡੀ ਕਰਤਾਰਪੁਰ ਸਾਹਿਬ ਦੀ ਯਾਤਰਾ ਉਤੇ ਇਹ ਬਹਾਨਾ ਬਣਾਕੇ ਬੰਦ ਕਰ ਦਿੱਤੀ ਗਈ ਹੈ ਕਿ ਸਿੱਖਾਂ ਦੀ ਸੁਰੱਖਿਆ ਦਾ ਮਾਮਲਾ ਹੈ ਜਦੋਕਿ ਕਸਮੀਰ ਵਿਚ ਜੋ ਅਮਰਨਾਥ ਯਾਤਰਾ ਹੈ, ਜਿਥੇ ਸਭ ਤੋ ਵੱਧ ਇਨਸਾਨੀ ਖਤਰਾ ਹੈ ਉਹ ਯਾਤਰਾ ਖੁੱਲ੍ਹੀ ਰੱਖੀ ਹੋਈ ਹੈ । ਸਾਡੀਆ ਸਰਹੱਦਾਂ ਨਾ ਖੋਲ੍ਹਣ ਅਤੇ ਸਾਡੀਆ ਜਮੀਨਾਂ ਨੂੰ ਉਪਜਾਊ ਬਣਾਉਣ ਹਿੱਤ ਲੋੜੀਦਾ ਪਾਣੀ ਨਾ ਦੇਣ ਦੀ ਬਦੌਲਤ ਸਾਡੀਆ ਜਮੀਨਾਂ ਅਤੇ ਆਰਥਿਕਤਾ ਨੂੰ ਬਹੁਤ ਵੱਡੀ ਸੱਟ ਵੱਜੀ ਹੈ । ਇਸ ਲਈ ਜਿੰਨੀ ਜਲਦੀ ਹੋਵੇ ਸਾਡੀਆ ਸਰਹੱਦਾਂ ਖੋਲੀਆ ਜਾਣ ਜਿਸ ਨਾਲ ਪੰਜਾਬ ਦਾ ਵਪਾਰੀ, ਬਾਣੀਆ, ਜਿੰਮੀਦਾਰ ਦੀ ਆਰਥਿਕਤਾ ਮਜਬੂਤ ਹੋਵੇਗੀ । ਬੇਰੁਜਗਾਰੀ ਨੂੰ ਹੱਲ ਕਰਨ ਵਿਚ ਮਦਦ ਮਿਲੇਗੀ । ਟਰਾਸਪੋਰਟ ਕਿੱਤੇ ਵਿਚ ਵਾਧਾ ਹੋਵੇਗਾ । ਜੋ ਬੀਤੇ ਸਮੇ ਵਿਚ ਨਾਜੀਆ ਨੇ ਮਨੁੱਖਤਾ ਦਾ ਕਤਲੇਆਮ ਕੀਤਾ ਉਹ ਸਭ ਆਰੀਅਨ ਲੋਕ ਸਨ ਇਹ ਬੀਜੇਪੀ-ਆਰ.ਐਸ.ਐਸ ਹਿੰਦੂਤਵ ਹੁਕਮਰਾਨ ਉਨ੍ਹਾਂ ਦੀ ਹੀ ਜਾਬਰ ਔਲਾਦ ਹੈ ਅਤੇ ਇਹ ਨਸਲਵਾਦੀ ਲੋਕ ਹਨ ਜੋ ਮੰਨੂਸਮ੍ਰਿਤੀ ਦੀ ਜਾਤ-ਪਾਤ ਨੂੰ ਉਭਾਰਨ ਵਾਲੀ ਸੋਚ ਤੇ ਅਮਲ ਕਰਕੇ ਆਪਣੇ ਸਵਾਰਥੀ ਹਿੱਤਾ ਦੀ ਪੂਰਤੀ ਕਰ ਰਹੇ ਹਨ । ਹੁਣ ਵੰਦੇ ਮਾਤਰਮ ਜਾਂ ਜਨ-ਗਨ-ਮਨ ਦੇ ਗਾਇਨ ਰਾਹੀ ਸਾਡੇ ਸਿੱਖਾਂ ਉਤੇ ਜ਼ਬਰੀ ਥੋਪਣਾ ਚਾਹੁੰਦੇ ਸਨ ਜਿਸ ਨੂੰ ਸੁਪਰੀਮ ਕੋਰਟ ਨੇ ਆਪਣੇ ਫੈਸਲੇ ਰਾਹੀ ਰੋਕ ਲਗਾ ਦਿੱਤੀ ਹੈ ਜਿਸਦਾ ਅਸੀ ਸਵਾਗਤ ਕਰਦੇ ਹਾਂ । ਇਹ ਵੀ ਉਮੀਦ ਕਰਦੇ ਹਾਂ ਕਿ ਜੋ ਮੁਸਲਿਮ, ਸਿੱਖ, ਇਸਾਈ, ਰੰਘਰੇਟਿਆ ਨਾਲ ਹੁਕਮਰਾਨ ਗੈਰ ਵਿਧਾਨਿਕ ਤਰੀਕੇ ਜ਼ਬਰ ਤੇ ਨਸਲਕੁਸੀ ਕਰਦਾ ਆ ਰਿਹਾ ਹੈ ਉਸ ਤੋ ਤੋਬਾ ਕਰਕੇ ਇਨ੍ਹਾਂ ਸਭ ਵਰਗਾਂ ਕੌਮਾਂ ਨੂੰ ਆਜਾਦੀ ਨਾਲ ਜਿਊਣ, ਵਿਚਰਣ ਦਾ ਹੱਕ ਪ੍ਰਦਾਨ ਕਰਨਗੇ ।

26/09/2026

25/09/2026

ਸੁਪਰੀਮ ਕੋਰਟ ਨੇ ਵੰਦੇ-ਮਾਤਰਮ ਦੇ ਗੰਭੀਰ ਮੁੱਦੇ ਉਤੇ ਸਿੱਖ ਕੌਮ ਦੀ ਆਵਾਜ਼ ਜਰੂਰ ਸੁਣੀ, ਪਰ ਜੀਰੋਂ ਲਾਇਨ ਤੇ ਹੋਇਆ ਵਿਵਹਾਰ ਅਸਹਿ : ਮਾਨ

ਫ਼ਤਹਿਗੜ੍ਹ ਸਾਹਿਬ, 25 ਸਤੰਬਰ ( ) “ਸ਼੍ਰੋਮਣੀ ਅਕਾਲੀ ਦਲ (ਅੰਮ੍ਰਿਤਸਰ) ਦੇ ਐਕਟਿੰਗ ਪ੍ਰਧਾਨ ਸ. ਇਮਾਨ ਸਿੰਘ ਮਾਨ ਅਤੇ ਹੋਰ ਸੀਨੀਅਰ ਲੀਡਰਸਿਪ ਨੇ ਬਹੁਤ ਹੀ ਬਾਦਲੀਲ ਢੰਗ ਨਾਲ ਵੰਦੇ-ਮਾਤਰਮ ਨੂੰ ਹੁਕਮਰਾਨਾਂ ਵੱਲੋ ਜ਼ਬਰੀ ਘੱਟ ਗਿਣਤੀਆ ਤੇ ਲਾਗੂ ਕਰਨ ਵਿਰੁੱਧ ਕੀਤੇ ਗਏ ਪ੍ਰਚਾਰ ਤੇ ਪ੍ਰਸਾਰ ਦੀ ਬਦੌਲਤ ਸੁਪਰੀਮ ਕੋਰਟ ਆਫ ਇੰਡੀਆ ਨੇ ਬੇਸੱਕ ਸਾਡੀ ਸਿੱਖ ਕੌਮ ਦੀ ਆਵਾਜ ਨੂੰ ਸੁਣਿਆ ਹੈ, ਜਿਸਦਾ ਅਸੀ ਧੰਨਵਾਦ ਕਰਦੇ ਹਾਂ । ਪਰ ਜਿਹੜੇ ਸਾਡੇ ਜਥੇਦਾਰ ਸਾਹਿਬਾਨ ਦੀ ਅਗਵਾਈ ਹੇਠ ਇੰਡੀਆ-ਪਾਕਿ ਜੀਰੋਂ ਲਾਇਨ ਤੇ ਜਾ ਕੇ ਸ੍ਰੀ ਕਰਤਾਰਪੁਰ ਸਾਹਿਬ ਦੇ ਲਾਂਘੇ ਨੂੰ ਖੁਲਵਾਉਣ ਲਈ ਅਰਦਾਸ ਕਰਨੀ ਸੀ, ਜਿਸ ਨੂੰ ਹੁਕਮਰਾਨਾਂ ਅਤੇ ਫੋਰਸਾਂ ਨੇ ਗੈਰ ਜਮਹੂਰੀਅਤ ਢੰਗ ਨਾਲ ਰੋਕ ਕੇ ਸਾਡੇ ਜਥੇਦਾਰ ਸਾਹਿਬਾਨ ਦੀ ਵੱਡੀ ਸਖਸ਼ੀਅਤ ਅਤੇ ਸਿੱਖ ਕੌਮ ਦਾ ਜੋ ਅਪਮਾਨ ਕੀਤਾ ਹੈ, ਉਹ ਅਸਹਿ ਹੈ ਅਤੇ ਬਰਦਾਸਤਕਰਨ ਯੋਗ ਅਮਲ ਨਹੀ ਹੈ।”

ਇਹ ਵਿਚਾਰ ਸ. ਸਿਮਰਨਜੀਤ ਸਿੰਘ ਮਾਨ ਪ੍ਰਧਾਨ ਸ਼੍ਰੋਮਣੀ ਅਕਾਲੀ ਦਲ (ਅੰਮ੍ਰਿਤਸਰ) ਨੇ ਵੰਦੇ-ਮਾਤਰਮ ਦੇ ਹਿੰਦੂਤਵ ਗਾਇਨ ਨੂੰ ਜ਼ਬਰੀ ਘੱਟ ਗਿਣਤੀ ਸਿੱਖ ਕੌਮ ਜਾਂ ਹੋਰਾਂ ਕੌਮਾਂ ਉਤੇ ਲਾਗੂ ਕਰਨ ਉਤੇ ਸੁਪਰੀਮ ਕੋਰਟ ਵੱਲੋ ਸਹੀ ਢੰਗ ਨਾਲ ਘੱਟ ਗਿਣਤੀ ਕੌਮਾਂ ਦੀ ਸੁਣਵਾਈ ਕਰਨ ਤੇ ਇਸ ਵਿਸੇ ਤੇ ਵਿਚਾਰ ਦੇਣ ਦਾ ਸਵਾਗਤ ਕਰਦੇ ਹੋਏ ਅਤੇ ਸਰਹੱਦ ਉਤੇ ਸਾਡੇ ਸ੍ਰੀ ਅਕਾਲ ਤਖਤ ਸਾਹਿਬ ਦੇ ਜਥੇਦਾਰ ਸਾਹਿਬ ਦੀ ਅਗਵਾਈ ਹੇਠ ਸਿੱਖ ਕੌਮ ਨੂੰ ਅਰਦਾਸ ਕਰਨ ਤੋਂ ਨਾ ਜਾਣ ਦੇਣ ਦੇ ਕੀਤੇ ਗਏ ਦੁੱਖਦਾਇਕ ਅਮਲਾਂ ਤੇ ਦੁੱਖ ਜਾਹਰ ਕਰਦੇ ਹੋਏ ਪ੍ਰਗਟ ਕੀਤੇ । ਉਨ੍ਹਾਂ ਕਿਹਾ ਵਿਧਾਨ ਵਿਚ ਅਜਿਹਾ ਕੋਈ ਵਿਵਰਣ ਨਹੀ ਕਿ ਤੁਸੀਂ ਸਿੱਖਾਂ ਨੂੰ ਜਮਹੂਰੀਅਤ ਅਤੇ ਅਮਨਮਈ ਢੰਗ ਨਾਲ ਆਪਣੇ ਪ੍ਰੋਗਰਾਮ ਜਾਂ ਅਰਦਾਸ ਕਰਨ ਤੋ ਰੋਕੋ । ਇਥੋ ਤੱਕ 30-30 ਸਾਲਾਂ ਤੋ ਸਾਡੀ ਸਿੱਖ ਕੌਮ ਨਾਲ ਸੰਬੰਧਤ ਸਿੱਖ ਬੰਦੀਆਂ ਜੋ ਸਜਾਵਾਂ ਪੂਰੀਆ ਕਰ ਚੁੱਕੇ ਹਨ, ਉਨ੍ਹਾਂ ਨੂੰ ਰਿਹਾਅ ਨਹੀ ਕੀਤਾ ਜਾ ਰਿਹਾ । ਜਥੇਦਾਰ ਸਾਹਿਬ ਨੇ ਤਾਂ ਕੌਮੀ ਬਿਨ੍ਹਾਂ ਤੇ ਅਰਦਾਸ ਕਰਨੀ ਸੀ ਉਨ੍ਹਾਂ ਨੇ ਕੋਈ ਕਿਸੇ ਇੰਡੀਅਨ ਕਾਨੂੰਨ, ਨਿਯਮ ਦੀ ਉਲੰਘਣਾ ਨਹੀ ਸੀ ਕੀਤੀ । ਅਜਿਹੇ ਅਮਲ ਕਰਕੇ ਇੰਡੀਅਨ ਹੁਕਮਰਾਨ ਜਦੋ ਕੌਮਾਂਤਰੀ ਮੱਕਾ ਪੈਕਟ ਵਿਚ ਤੁਰਕੀ, ਪਾਕਿਸਤਾਨ, ਸਾਊਦੀ ਅਰਬ, ਚੀਨ ਅਤੇ ਬੰਗਲਾਦੇਸ ਵਿਚਕਾਰ ਘਿਰ ਚੁੱਕਿਆ ਹੈ, ਉਸ ਸਮੇ ਸਰਹੱਦਾਂ ਉਤੇ ਰਾਖੀ ਕਰਨ ਵਾਲੀ ਅਤੇ ਵੱਡੀਆ ਕੁਰਬਾਨੀਆ ਦੇਣ ਵਾਲੀ ਸਿੱਖ ਕੌਮ ਨਾਲ ਕੀਤਾ ਜਾ ਰਿਹਾ ਗੈਰ ਇਨਸਾਨੀ, ਗੈਰ ਕਾਨੂੰਨੀ ਵਿਵਹਾਰ ਕੀ ਠੀਕ ਹੈ ? ਦੂਸਰੇ ਪਾਸੇ ਜਦੋ ਚੀਨ ਨੇ ਬੰਦੂਕਾ ਤਾਣੀਆ ਹੋਈਆ ਹਨ ਅਤੇ ਜਿਸਨੇ 1962 ਵਿਚ ਇੰਡੀਆ ਦਾ 39,000 ਸਕੇਅਰ ਵਰਗ ਕਿਲੋਮੀਟਰ ਅਤੇ 2020 ਅਤੇ 2022 ਵਿਚ 8000 ਸਕੇਅਰ ਵਰਗ ਕਿਲੋਮੀਟਰ ਇਲਾਕਾ ਕਬਜਾ ਕੀਤਾ ਹੋਇਆ ਹੈ ਅਤੇ ਅਰੁਣਾਚਲ ਉਤੇ ਕੌਮਾਂਤਰੀ ਦਾਅਵਾ ਜਿਤਾ ਰਿਹਾ ਹੈ, ਉਸ ਸਮੇ ਸਿੱਖਾਂ ਨੂੰ ਸੈਟਰ ਵਿਚ ਗ੍ਰਹਿ, ਵਿੱਤ, ਰੱਖਿਆ, ਵਿਦੇਸ ਅਤੇ ਖੇਤੀਬਾੜੀ ਵਿਭਾਗਾਂ ਵਿਚੋ ਮਨਫੀ ਕਰ ਦੇਣ ਦੇ ਅਮਲ ਤਾਂ ਸਿੱਖ ਕੌਮ ਦੀ ਅਣਖ-ਗੈਰਤ ਨੂੰ ਡੂੰਘੀ ਠੇਸ ਪਹੁੰਚਾਉਣ ਵਾਲੇ ਹਨ । ਫਿਰ ਹਰਿਆਣਾ ਵਿਚ ਕਿਸਾਨਾਂ ਤੇ ਵੀ ਜਬਰ ਤੇ ਲਾਠੀਚਾਰਜ ਕੀਤਾ ਜਾ ਰਿਹਾ ਹੈ। ਸਕੂਲਾਂ ਵਿਚ ਅਧਿਆਪਕਾਂ ਦੀ ਮੁੱਖ ਜਿੰਮੇਵਾਰੀ ਬੱਚਿਆਂ ਨੂੰ ਤਾਲੀਮ ਪ੍ਰਦਾਨ ਕਰਨ ਤੋ ਹਟਾਕੇ ਉਨ੍ਹਾਂ ਨੂੰ ਐਸ.ਆਈ.ਆਰ. ਦੇ ਚੋਣ ਪ੍ਰਕਿਰਿਆ ਵਿਚ ਲਗਾਕੇ ਕੀ ਬੱਚਿਆਂ ਦੇ ਭਵਿੱਖ ਨਾਲ ਖਿਲਵਾੜ ਨਹੀ ਹੋ ਰਿਹਾ ? ਇਸੇ ਤਰ੍ਹਾਂ ਮੁੱਖ ਚੋਣ ਕਮਿਸਨਰ ਇੰਡੀਆ ਸ੍ਰੀ ਮੋਦੀ ਅਤੇ ਸ਼ਾਹ ਦਾ ਵਫਾਦਾਰ ਬੁਲਾਰਾ ਬਣਕੇ ਰਹਿ ਗਿਆ ਹੈ । ਅਜਿਹੇ ਮਾਹੌਲ ਵਿਚ ਇੰਡੀਆ ਵਿਚ ਜਾਂ ਕਿਸੇ ਸੂਬੇ ਵਿਚ ਨਿਰਪੱਖ ਚੋਣਾਂ ਦੀ ਉਮੀਦ ਕਿਵੇ ਕੀਤੀ ਜਾ ਸਕਦੀ ਹੈ ? ਘੱਟ ਗਿਣਤੀ ਕੌਮਾਂ ਨਾਲ ਸੰਬੰਧਤ ਸੂਬਿਆਂ ਵਿਚ ਹੁਕਮਰਾਨਾਂ ਦੇ ਕੀਤੇ ਜਾ ਰਹੇ ਵਿਤਕਰੇ, ਬੇਇਨਸਾਫ਼ੀਆਂ, ਜਬਰ ਤਾਂ ਸੂਬਿਆਂ ਤੇ ਮੁਲਕ ਵਿਚ ਦੰਗੇ-ਫਸਾਦ ਨੂੰ ਬੁੜਾਵਾ ਦੇਣ ਦੇ ਅਮਲ ਕਰ ਰਹੇ ਹਨ । ਜਿਸ ਨਾਲ ਇੰਡੀਆ ਦੀ ਜਮਹੂਰੀਅਤ ਅਤੇ ਅਮਨਮਈ ਮਾਹੌਲ ਨੂੰ ਕਿਵੇ ਸਹੀ ਰੱਖਿਆ ਜਾ ਸਕਦਾ ਹੈ ? ਇਸ ਲਈ ਇਹ ਜਰੂਰੀ ਹੈ ਕਿ ਸ੍ਰੀ ਮੋਦੀ ਅਤੇ ਸ਼ਾਹ ਵੱਲੋ ਅਤੇ ਉੱਚ ਅਫਸਰਸਾਹੀ ਵੱਲੋ ਜੋ ਸੈਟਰ ਦੇ ਹੁਕਮਰਾਨਾਂ ਦੀ ਰਖੇਲ ਬਣਕੇ ਇਥੋ ਦੇ ਨਿਵਾਸੀਆ ਵਿਰੋਧੀ ਅਮਲ ਹੋ ਰਹੇ ਹਨ, ਉਹ ਤੁਰੰਤ ਰੁਕਣੇ ਚਾਹੀਦੇ ਹਨ ਤਦ ਹੀ ਇਥੇ ਅਮਨ ਚੈਨ ਤੇ ਜਮਹੂਰੀਅਤ ਕਾਇਮ ਰਹਿ ਸਕੇਗੀ ਵਰਨਾ ਹਾਲਾਤ ਬੇਕਾਬੂ ਹੋ ਜਾਣਗੇ।

23/09/2026

ਮੌਜੂਦਾ ਐਸ.ਜੀ.ਪੀ.ਸੀ ਵਿਚ ਮਹੰਤ ਨਰੈਣੂ ਦੀ ਗੈਰ ਇਖਲਾਕੀ ਰੂਹਾਂ ਦੀ ਵੱਡੀ ਗਿਣਤੀ, ਜਰਨਲ ਚੋਣ ਹੀ ਇਸ ਸੰਸਥਾਂ ਦੇ ਗੰਦ ਨੂੰ ਸਾਫ ਕਰ ਸਕਦੀ ਹੈ : ਟਿਵਾਣਾ

ਫ਼ਤਹਿਗੜ੍ਹ ਸਾਹਿਬ, 23 ਸਤੰਬਰ ( ) “ਪੰਜਾਬੀ ਕਹਾਵਤ ਹੈ ਤਪੋ ਰਾਜ, ਰਾਜੋ ਨਰਕ ਦੇ ਆਧਾਰ ਅਨੁਸਾਰ ਜਦੋ ਕਿਸੇ ਨੂੰ ਲੰਮਾਂ ਸਮਾਂ ਰਾਜ ਭਾਗ ਕਰਨ ਜਾਂ ਕਿਸੇ ਸੰਸਥਾਂ ਦੇ ਅਹੁਦੇ ਉਤੇ ਕੰਮ ਕਰਨ ਦਾ ਮੌਕਾ ਮਿਲ ਜਾਵੇ ਤਾਂ ਅਹੁਦੇ ਦੀ ਸਿਆਸੀ, ਧਾਰਮਿਕ ਸ਼ਕਤੀ, ਸਾਧਨਾਂ ਅਤੇ ਧਨ-ਦੌਲਤਾਂ ਦੇ ਭੰਡਾਰ ਦੀ ਬਦੌਲਤ ਉਨ੍ਹਾਂ ਦੀ ਦੁਰਵਰਤੋ ਹੋਣ ਲੱਗ ਪੈਦੀ ਹੈ । ਜਿਥੋ ਤਪੋ ਰਾਜ, ਰਾਜੋ ਨਰਕ ਦੀ ਗੱਲ ਸੁਰੂ ਹੋ ਜਾਂਦੀ ਹੈ । ਇਹੀ ਕਾਰਨ ਹੈ ਕਿ ਸਿੱਖ ਕੌਮ ਦੀ ਧਾਰਮਿਕ ਸੰਸਥਾਂ ਐਸ.ਜੀ.ਪੀ.ਸੀ ਜਿਸਦੀਆਂ ਜਰਨਲ ਚੋਣਾਂ ਹੋਈਆ ਨੂੰ 15 ਸਾਲ ਤੋ ਉਪਰ ਦਾ ਸਮਾਂ ਹੋ ਗਿਆ ਹੈ, ਇਸ ਉਤੇ ਕਾਬਜ ਬਾਦਲ ਦਲੀਆ ਦੇ ਇਖਲਾਕ ਵਿਚ ਵੱਡੀਆ ਗਿਰਾਵਟਾਂ ਆ ਚੁੱਕੀਆ ਹਨ । ਇਹੀ ਵਜਹ ਹੈ ਕਿ ਵੱਡੀਆ ਕੁਰਬਾਨੀਆ ਉਪਰੰਤ ਹੋਦ ਵਿਚ ਆਈ ਇਸ ਮਹਾਨ ਧਾਰਮਿਕ ਸੰਸਥਾਂ ਦੇ ਨਿਯਮਾਂ, ਅਸੂਲਾਂ ਤੇ ਸਿੱਖੀ ਕਿਰਦਾਰ ਨੂੰ ਕਾਬਜ ਬਾਦਲ ਦਲੀਆ ਨੇ ਦਾਗੀ ਕਰਕੇ ਰੱਖ ਦਿੱਤਾ ਹੈ । ਜੇਕਰ ਇਸ ਸੰਸਥਾਂ ਵਿਚ ਹੋ ਰਹੇ ਵੱਡੇ ਘਪਲਿਆ, ਗੋਲਕਾਂ ਅਤੇ ਸਾਧਨਾਂ ਦੀ ਦੁਰਵਰਤੋ ਅਤੇ ਗੈਰ ਇਖਲਾਕੀ ਅਮਲਾਂ ਦੇ ਰਿਕਾਰਡ ਨੂੰ ਘੋਖਿਆ ਜਾਵੇ ਤਾਂ ਇਕ ਗੱਲ ਪ੍ਰਤੱਖ ਹੋ ਜਾਂਦੀ ਹੈ ਕਿ ਇਸ ਵਿਚ ਮਹੰਤ ਨਰੈਣੂ ਵਰਗਿਆ ਦੀ ਗੈਰ ਇਖਲਾਕੀ ਦਾਗੀ ਰੂਹਾਂ ਦੀ ਭਰਮਾਰ ਹੋ ਚੁੱਕੀ ਹੈ । ਜੋ ਸਿੱਖ ਕੌਮ ਦੇ ਉੱਚੇ ਸੁੱਚੇ ਇਖਲਾਕ ਨੂੰ ਅਤੇ ਮਹਾਨ ਰਵਾਇਤਾ ਨੂੰ ਦਾਗੀ ਕਰਨ ਦਾ ਮੁੱਖ ਕਾਰਨ ਬਣ ਰਹੀਆ ਹਨ । ਇਸਦਾ ਇਕੋ ਇਕ ਸਹੀ ਹੱਲ ਹੈ ਕਿ ਬੀਤੇ 15 ਸਾਲਾਂ ਤੋ ਇਸ ਸੰਸਥਾਂ ਦੀ ਸਾਜਸੀ ਢੰਗ ਨਾਲ ਰੋਕੀਆ ਜਾ ਰਹੀਆ ਜਰਨਲ ਚੋਣਾਂ ਨੂੰ ਤੁਰੰਤ ਕਰਵਾਉਣ ਲਈ ਸੈਟਰ ਸਰਕਾਰ ਤੇ ਦਬਾਅ ਪਾਇਆ ਜਾਵੇ । ਤਾਂ ਜੋ ਉੱਚੇ ਸੁੱਚੇ ਇਖਲਾਕ ਵਾਲੇ ਮੈਬਰ ਚੁਣਕੇ ਆ ਸਕਣ ਅਤੇ ਪ੍ਰਬੰਧ ਨੂੰ ਦਰੁਸਤ ਕਰ ਸਕਣ ।”

ਇਹ ਵਿਚਾਰ ਸ. ਇਕਬਾਲ ਸਿੰਘ ਟਿਵਾਣਾ ਮੁੱਖ ਬੁਲਾਰਾ ਸਿਆਸੀ ਤੇ ਮੀਡੀਆ ਸਲਾਹਕਾਰ ਸ਼੍ਰੋਮਣੀ ਅਕਾਲੀ ਦਲ (ਅੰਮ੍ਰਿਤਸਰ) ਨੇ ਬੀਤੇ ਲੰਮੇ ਸਮੇ ਤੋ ਅਤੇ ਬੀਤੇ ਕੁਝ ਦਿਨ ਪਹਿਲੇ ਤਖਤ ਸ੍ਰੀ ਕੇਸਗੜ੍ਹ ਸਾਹਿਬ ਦੇ ਮਹਾਨ ਸਥਾਂਨ ਤੇ ਹੁੰਦੀਆ ਆ ਰਹੀਆ ਗੈਰ ਇਖਲਾਕੀ ਅਤੇ ਗੈਰ ਸਮਾਜਿਕ ਕਾਰਵਾਈਆ ਉਤੇ ਤਿੱਖਾ ਪ੍ਰਤੀਕਰਮ ਜਾਹਰ ਕਰਦੇ ਹੋਏ ਅਤੇ ਇਸ ਸੰਸਥਾਂ ਦੇ ਉੱਚੇ ਸੁੱਚੇ ਵਿਕਾਰ ਨੂੰ ਕਾਇਮ ਰੱਖਣ ਲਈ ਤੁਰੰਤ ਐਸ.ਜੀ.ਪੀ.ਸੀ ਦੀਆਂ ਜਰਨਲ ਚੋਣਾਂ ਕਰਵਾਉਣ ਦੀ ਮੰਗ ਕਰਦੇ ਹੋਏ ਪ੍ਰਗਟ ਕੀਤੇ । ਉਨ੍ਹਾਂ ਇਸ ਗੱਲ ਤੇ ਦੁੱਖ ਜਾਹਰ ਕੀਤਾ ਕਿ ਐਸ.ਜੀ.ਪੀ.ਸੀ ਦੇ ਪ੍ਰਬੰਧ ਵਿਚ ਪੈਦਾ ਹੋ ਚੁੱਕੀਆ ਖਾਮੀਆ ਦਾ ਅੰਤ ਕਰਨ ਦੀ ਬਜਾਇ ਇਸਦੇ ਪ੍ਰਬੰਧਕ ਘਸੀਆ ਪਿੱਟੀਆ ਦਲੀਲਾਂ ਅਤੇ ਢੌਗ ਰਾਹੀ ਇਸ ਚੱਲ ਰਹੇ ਦਿਸ਼ਾਹੀਣ ਪ੍ਰਬੰਧ ਦੇ ਜਿੰਮੇਵਾਰ ਦੋਸੀ ਲੋਕਾਂ ਦੀ ਹਿਫਾਜਤ ਕਰਦੇ ਨਜਰ ਆ ਰਹੇ ਹਨ । ਕਹਿਣ ਤੋ ਭਾਵ ਹੈ ਕਿ ਬੀਤੇ ਸਮੇ ਦੇ ਵੱਡੇ ਘਪਲਿਆ, ਗੈਰ ਇਖਲਾਕੀ ਕਾਰਵਾਈਆ ਅਤੇ ਚਾਵਲਾ ਕਾਂਡ ਤੇ ਹੋਰ ਕਾਰਵਾਈਆ ਵਿਚ ਦੋਸੀਆ ਨੂੰ ਮੌਜੂਦਾ ਪ੍ਰਧਾਨ, ਅਗਜੈਕਟਿਵ ਮੈਬਰ ਤੇ ਅਹੁਦੇਦਾਰ ਦਾਗੀਆ ਨੂੰ ਬਚਾਉਣ ਵਿਚ ਕਿਉ ਮਸਰੂਫ ਹਨ । ਜੋ ਐਸ.ਜੀ.ਪੀ.ਸੀ ਦੇ ਪ੍ਰਧਾਨ ਕਹਿ ਰਹੇ ਹਨ ਕਿ ਮੈਨੂੰ ਤਖਤ ਕੇਸਗੜ੍ਹ ਸਾਹਿਬ ਦੀ ਹੋਈ ਘਟਨਾ ਬਾਰੇ ਕੋਈ ਜਾਣਕਾਰੀ ਨਹੀ, ਇਹ ਤਾਂ ਸਿੱਖ ਕੌਮ ਨੂੰ ਗੁੰਮਰਾਹ ਕਰਨ ਵਾਲੀ ਕਾਰਵਾਈ ਹੈ । ਕਿਉਂਕਿ ਜਦੋ ਇਕ ਬੀਬੀ ਨੂੰ ਐਸ.ਜੀ.ਪੀ.ਸੀ ਦੇ ਖਰਚੇ ਰਾਹੀ ਬਹਿਰੀਨ ਤੋ ਮੰਗਵਾਇਆ ਗਿਆ, ਉਹ ਬੀਬੀ ਬੀਤੇ 10-11 ਮਹੀਨਿਆ ਤੋ ਐਸ.ਜੀ.ਪੀ.ਸੀ ਦੀਆਂ ਰਿਹਾਇਸਾਂ ਵਿਚ ਰਹਿੰਦੀ ਹੀ ਨਹੀ ਆ ਰਹੀ ਬਲਕਿ ਉਸ ਨੂੰ ਸਭ ਤਰ੍ਹਾਂ ਦੀਆਂ ਸਹੂਲਤਾਂ ਕਾਰ, ਡਰਾਈਵਰ, ਸੇਵਾਦਾਰ ਜੋ ਦਿੱਤੇ ਹੋਏ ਹਨ, ਇਹ ਕਿਵੇ ਹੋ ਸਕਦਾ ਹੈ ਕਿ ਇਸਦੀ ਮੌਜੂਦਾ ਪ੍ਰਧਾਨ ਦੀ ਇਜਾਜਤ ਤੋ ਬਿਨ੍ਹਾਂ ਅਜਿਹਾ ਪ੍ਰਬੰਧ ਹੋਵੇ ? ਜਦੋ ਐਸ.ਜੀ.ਪੀ.ਸੀ ਦਾ ਸਮੁੱਚੇ ਪ੍ਰਬੰਧ ਦਾ ਤਾਣਾਬਾਣਾ ਦਾਗੀ ਤੇ ਖਿਲਰਿਆ ਪਿਆ ਹੈ ਅਤੇ ਇਸ ਪ੍ਰਬੰਧ ਉਤੇ ਕਾਬਜ ਦਿਸ਼ਾਹੀਣ ਗੈਰ ਇਖਲਾਕੀ ਲੋਕ ਕੌਮ ਅਤੇ ਕੌਮੀ ਸੰਸਥਾਵਾਂ ਦੀ ਬਦਨਾਮੀ ਦਾ ਕਾਰਨ ਬਣ ਰਹੇ ਹਨ, ਜਦੋ ਸਜਾਵਾਂ ਦੇਣ ਵਾਲੇ ਜਾਂ ਪ੍ਰਬੰਧ ਵਿਚ ਖਾਮੀਆ ਨੂੰ ਦੂਰ ਕਰਨ ਵਾਲੇ ਹੀ ਅਜਿਹੀਆ ਕਾਰਵਾਈਆ ਵਿਚ ਸਾਮਿਲ ਹੋ ਜਾਣ ਫਿਰ ਉਸਦਾ ਸੁਧਾਰ ਕੌਣ ਕਰੇਗਾ ?

ਅਜਿਹੇ ਹਾਲਾਤਾਂ ਵਿਚ ਤਾਂ ਸਿੱਖ ਕੌਮ ਨਾਲ ਸੰਬੰਧਤ ਦਾਰਸਨਿਕ, ਬੁੱਧੀਜੀਵੀ, ਚਿੰਤਕ ਸੱਜਣ ਅਤੇ ਵਿਦਵਾਨਾਂ ਦਾ ਇਹ ਕੌਮੀ, ਧਾਰਮਿਕ ਤੇ ਸਮਾਜਿਕ ਫਰਜ ਬਣ ਜਾਂਦਾ ਹੈ ਕਿ ਉਹ ਸ੍ਰੀ ਅਕਾਲ ਤਖਤ ਸਾਹਿਬ ਦੇ ਮਹਾਨ ਸਥਾਂਨ ਤੇ ਇਕ ਇਕੱਤਰਤਾ ਸੱਦਣ ਤੇ ਆਜਾਦ ਨਿਰਪੱਖਤਾ ਦੀ ਸੋਚ ਤੇ ਅਧਾਰਿਤ ਅਜਿਹੀਆ ਕਾਰਵਾਈਆ ਦੀ ਛਾਣਬੀਨ ਕਰਨ ਲਈ ਕਮੇਟੀ ਬਣਾਉਣ ਤਾਂ ਜੋ ਅਜਿਹੇ ਦੋਸ਼ੀਆਂ ਤੇ ਸੱਚ ਨੂੰ ਸਾਹਮਣੇ ਲਿਆਉਣ ਦੀ ਜਿੰਮੇਵਾਰੀ ਨਿਭਾਅ ਸਕਣ ਅਤੇ ਕੌਮੀ ਸ਼ਕਤੀ ਦੇ ਪ੍ਰਭਾਵ ਨੂੰ ਬੀਤੇ 15 ਸਾਲਾਂ ਤੋ ਐਸ.ਜੀ.ਪੀ.ਸੀ ਦੀਆਂ ਰੋਕੀਆ ਗਈਆ ਜਰਨਲ ਚੋਣਾਂ ਕਰਵਾਉਣ ਲਈ ਦਬਾਅ ਪਾ ਸਕਣ ਅਤੇ ਨਵੇ ਪ੍ਰਬੰਧ ਲਈ ਮਾਹੌਲ ਬਣਾ ਸਕਣ ।