23/09/2026
மயிலாடுதுறையில் புதிய எண்ணெய் கிணறுகளுக்கு அனுமதி கூடாது!
தமிழக அரசு பார்வையாளராக இல்லாமல் தனது அதிகாரத்தைப் பயன்படுத்தி திட்டத்தைத் தடுக்க வேண்டும்: DYFI
சென்னை, 23.09.2026
மயிலாடுதுறை கடற்பகுதியில் உள்ள PY-3 எண்ணெய் வயலில் புதிதாக 5 எண்ணெய் கிணறுகளைத் தோண்ட தனியார் நிறுவனம் அனுமதி கோரியுள்ள நிலையில், இத்திட்டத்திற்கு ஒன்றிய அரசு அனுமதி வழங்கக்கூடாது என்றும், அதேநேரத்தில் தமிழக அரசு வெறும் பார்வையாளராக இருந்துவிடாமல் தனக்குள்ள சட்டப்பூர்வ அதிகாரங்களைப் பயன்படுத்தி இத்திட்டத்தைத் தடுத்து நிறுத்த வேண்டும் என்றும் இந்திய ஜனநாயக வாலிபர் சங்கம் வலியுறுத்துகிறது.
மயிலாடுதுறை கடற்கரைக்கு அப்பால் சுமார் 81 சதுர கிலோமீட்டர் பரப்பளவில் அமைந்துள்ள PY-3 எண்ணெய் வயலில் மேலும் 5 எண்ணெய் மற்றும் எரிவாயு கிணறுகளை அமைக்க Hardy Exploration & Production (India) Inc. ஒன்றிய சுற்றுச்சூழல் அமைச்சகத்திடம் அனுமதி கோரியுள்ளது. இந்தத் திட்டம் கடல் சூழல் மற்றும் மீனவர்களின் வாழ்வாதாரம் குறித்து கடுமையான கவலைகளை ஏற்படுத்தியுள்ளது.
மிக முக்கியமாக, மயிலாடுதுறை மாவட்டம் தமிழ்நாட்டின் பாதுகாக்கப்பட்ட வேளாண் மண்டலத்தில் இடம்பெற்றுள்ளது. தமிழ்நாடு அரசு தனது அதிகாரப்பூர்வ ஆவணங்களிலேயே மயிலாடுதுறை மாவட்டத்தை பாதுகாக்கப்பட்ட வேளாண் மண்டலத்தில் இணைத்துள்ளது.
எனவே, “இது ஒன்றிய அரசின் அனுமதி தொடர்பான விவகாரம்” என்று தமிழக அரசு ஒதுங்கி நிற்க முடியாது. பாதுகாக்கப்பட்ட வேளாண் மண்டலத்தின் நோக்கத்திற்கும், காவிரி டெல்டாவின் வேளாண்மை மற்றும் மீன்வள வாழ்வாதாரத்திற்கும் எதிரான எந்த நடவடிக்கையாக இருந்தாலும் அதைத் தடுக்க தமிழக அரசு முன்வர வேண்டும்.
மேலும், இத்திட்டம் CRZ-IVA மண்டலத்தில் வருவதால் தமிழக அரசின் கடலோர மண்டல மேலாண்மை அமைப்பின் பங்களிப்பும் அவசியமாகிறது. இத்திட்டத்திற்கு தமிழ்நாடு கடலோர மண்டல மேலாண்மை ஆணையம் ஒப்புதல் அல்லது பரிந்துரை வழங்கக் கூடாது என சுற்றுச்சூழல் அமைப்புகளும் வலியுறுத்தியுள்ளன.
எனவே
1. மயிலாடுதுறை PY-3 பகுதியில் புதிதாக 5 எண்ணெய் கிணறுகள் அமைக்கும் திட்டத்திற்கு தமிழக அரசு எந்தவிதமான அனுமதியோ, பரிந்துரையோ வழங்கக்கூடாது.
2. தமிழ்நாடு கடலோர மண்டல மேலாண்மை ஆணையம் மூலம் இத்திட்டத்திற்கு எதிரான தெளிவான முடிவை தமிழக அரசு எடுக்க வேண்டும்.
3. மயிலாடுதுறை பாதுகாக்கப்பட்ட வேளாண் மண்டலத்தில் இடம்பெற்றுள்ளதை சுட்டிக்காட்டி, திட்டத்தை அனுமதிக்கக் கூடாது என ஒன்றிய அரசுக்கு தமிழக அரசு அதிகாரப்பூர்வமாகத் தெரிவிக்க வேண்டும்.
4. விவசாயிகள், மீனவர்கள் மற்றும் கடலோர மக்களின் வாழ்வாதாரத்தைப் பாதிக்கும் திட்டங்களுக்கு எதிராக தமிழக அரசு தனது சட்டப்பூர்வ அதிகாரத்தை முழுமையாகப் பயன்படுத்த வேண்டும்.
5. காவிரி டெல்டாவின் நிலம், நீர், கடல் மற்றும் வேளாண் வளங்களைப் பாதுகாப்பதற்கான ஒருங்கிணைந்த கொள்கையை தமிழக அரசு உறுதியாக நடைமுறைப்படுத்த வேண்டும்.
காவிரி டெல்டாவை பாதுகாக்கப்பட்ட வேளாண் மண்டலமாக அறிவித்துவிட்டு, அதே பகுதியில் வேளாண்மை மற்றும் மீன்வளத்திற்கு பாதிப்பை ஏற்படுத்தக்கூடிய திட்டங்கள் முன்னெடுக்கப்படுவதை தமிழக அரசு அனுமதிக்கக் கூடாது.
பாதுகாக்கப்பட்ட வேளாண் மண்டலம் என்பது வெறும் அரசாணையில் இருக்கும் பெயராக இருக்கக்கூடாது; அதன் நோக்கத்தை நடைமுறையில் பாதுகாப்பதற்கான அரசியல் மற்றும் நிர்வாக நடவடிக்கையாக அது அமைய வேண்டும்.
எனவே, தமிழக அரசு உடனடியாக தலையிட்டு PY-3 புதிய எண்ணெய் கிணறு திட்டத்திற்கு எதிராக தனது நிலைப்பாட்டை வெளிப்படையாக அறிவிக்க வேண்டும். ஒன்றிய அரசின் முடிவுக்காகக் காத்திருக்கும் பார்வையாளராக அல்லாமல், தமிழ்நாட்டின் நிலம், நீர், கடல் வளம் மற்றும் மக்களின் வாழ்வாதாரத்தைப் பாதுகாக்கும் அரசாக தமிழக அரசு செயல்பட வேண்டும் என வாலிபர் சங்கம் வலியுறுத்துகிறது.
செல்வராஜ்
மாநிலத் தலைவர்
எஸ்.கார்த்திக்
மாநிலச் செயலாளர்
