02/10/2026
સરદારધામ GPBO મહેસાણાની ત્રીજી વિંગ ‘ટેસ્લા’નું થયું ભવ્ય લોન્ચિંગ
સરદારધામ સંચાલિત ગ્લોબલ પાટીદાર બિઝનેસ ઓર્ગેનાઇઝેશન (GPBO)ના ઉપક્રમે મહેસાણા ખાતે GPBOની ત્રીજી વિંગ ‘ટેસ્લા’નું ભવ્ય લોન્ચિંગ ધ ગ્રાન્ડ તુલસી ખાતે યોજાયું હતું. આ કાર્યક્રમ સાથે GPBOની સમગ્ર સંસ્થાકીય વ્યવસ્થામાં 29મી વિંગનો પ્રારંભ થયો છે. કાર્યક્રમનો મુખ્ય ઉદ્દેશ યુવા ઉદ્યોગસાહસિકોને સંગઠિત કરી પરસ્પર બિઝનેસ નેટવર્કિંગ, વેપારવૃદ્ધિ, રોજગારી અને નવા વ્યવસાયિક અવસરોને પ્રોત્સાહન આપવાનો હતો. આ પ્રસંગે સરદારધામના પ્રમુખ સેવક શ્રી ગગજીભાઈ સુતરીયા વિશેષ ઉપસ્થિત રહ્યા હતા. તેમની સાથે ઉત્તર ઝોનના પ્રમુખ શ્રી આનંદભાઈ પટેલ, ઉત્તર ગુજરાતના પ્રોજેક્ટ ચેરમેન શ્રી એફ. સી. પટેલ, મંત્રી શ્રી મંગળભાઈ પટેલ અને સહમંત્રી શ્રી મહેશભાઈ પટેલ સહિતના મહાનુભાવો ઉપસ્થિત રહ્યા હતા. GPBOના સંગઠિત બિઝનેસ નેટવર્ક દ્વારા અત્યાર સુધીમાં કુલ ₹2,511 કરોડનો બિઝનેસ ટ્રેડ નોંધાયો છે, જે સંગઠનના સભ્યો વચ્ચેના પરસ્પર સહકાર, વિશ્વાસ અને વ્યવસાયિક જોડાણની દિશામાં નોંધપાત્ર સિદ્ધિ છે. મહેસાણા જિલ્લામાં હાલમાં બે વિંગ કાર્યરત છે. આ ત્રીજી વિંગ શરૂ કરીને મહેસાણા જિલ્લાના યુવાનો દ્વારા ₹500 કરોડના બિઝનેસ ટ્રેડનું લક્ષ્ય હાંસલ કરવાનો સંકલ્પ વ્યક્ત કરવામાં આવ્યો છે. GPBOનું નેટવર્ક ઉદ્યોગપતિઓ અને વેપારીઓને એક મંચ પર લાવી પરસ્પર વ્યવસાયિક તકોનું સર્જન કરવા, નવા સંબંધો વિકસાવવા અને સ્થાનિકથી લઈને રાષ્ટ્રીય સ્તર સુધી બિઝનેસનું વિસ્તરણ કરવા માટે કાર્યરત છે.
આ કાર્યક્રમ દરમિયાન ઉત્તર ગુજરાતમાં આકાર લઈ રહેલા સરદારધામના આગામી પ્રોજેક્ટની વિગતો પણ રજૂ કરવામાં આવી હતી. આ પ્રોજેક્ટનો મુખ્ય હેતુ યુવાનોને શિક્ષણ, સ્પર્ધાત્મક પરીક્ષાઓની તૈયારી, રહેઠાણ અને રમતગમત જેવી સુવિધાઓ ઉપલબ્ધ કરાવી તેમની કારકિર્દીના વિકાસ માટે સાનુકૂળ વાતાવરણ પૂરું પાડવાનો છે. પ્રોજેક્ટની મુખ્ય વિશેષતાઓમાં 400 દીકરા-દીકરીઓ માટે રહેઠાણની વ્યવસ્થા, GPSC અને UPSC સહિતની સ્પર્ધાત્મક પરીક્ષાઓ માટે આધુનિક તાલીમ કેન્દ્ર તેમજ રમતગમત અને ફિટનેસ માટેની સુવિધાઓનો સમાવેશ થાય છે. આ સમગ્ર પ્રોજેક્ટ એક વર્ષની અંદર પૂર્ણ કરવાનો સંકલ્પ વ્યક્ત કરવામાં આવ્યો છે. ‘ટેસ્લા' વિંગ લોન્ચિંગથી ઉત્તર ગુજરાતના યુવા ઉદ્યોગસાહસિકોને સંગઠિત થવા, પોતાના વ્યવસાયને નવી ઊંચાઈએ લઈ જવા અને એકબીજાના અનુભવ તથા સંસાધનોનો લાભ મેળવવા માટે નવું મંચ પ્રાપ્ત થયું છે. સરદારધામ અને GPBO દ્વારા બિઝનેસ નેટવર્કિંગની સાથે શિક્ષણ, કૌશલ્યવિકાસ અને યુવા સશક્તિકરણને જોડીને સમાજના સર્વાંગી વિકાસની દિશામાં પ્રયાસો કરવામાં આવી રહ્યા છે. આ આયોજનથી મહેસાણા સહિત સમગ્ર ઉત્તર ગુજરાતમાં વ્યવસાયિક જોડાણો મજબૂત બનવાની, રોજગારીની નવી તકો ઊભી થવાની અને યુવાનોને ઉદ્યોગસાહસિકતા તરફ પ્રેરણા મળવાની અપેક્ષા વ્યક્ત કરવામાં આવી હતી.
