21/10/2026
জনসংঘৰ পৰা ভাৰতীয় জনতা পাৰ্টিলৈ: এক অবিৰত আদৰ্শগত যাত্ৰা... 🪔 🪷
১৯৫১ চনৰ ২১ অক্টোবৰত পৰম শ্ৰদ্ধাৰ ড০ শ্যামাপ্ৰসাদ মুখাৰ্জীদেৱৰ দূৰদৰ্শী নেতৃত্বত ভাৰতীয় জনসংঘৰ প্ৰতিষ্ঠা হৈছিল। দেশ বিভাজনৰ কৰুণ পৰিণতি আৰু ভেটি হেৰুওৱা লোকসকলৰ সমস্যাৰে দেশ জৰ্জৰিত হৈ থকা এক কঠিন সময়ত জনসংঘৰ যাত্ৰা আৰম্ভ হৈছিল।
“এখন দেশত দুখন সংবিধান, দুখন পতাকা আৰু দুজন প্ৰধান নচলিব” — এই দৃঢ় হুংকাৰ দি কাশ্মীৰত প্ৰচলিত পাৰ্মিট ব্যৱস্থাৰ বিৰোধিতা কৰি ড° মুখাৰ্জীয়ে এক ঐতিহাসিক আন্দোলনৰ সূচনা কৰিছিল। দেশৰ ঐক্য আৰু অখণ্ডতাৰ বাবে তেওঁ নিজৰ প্ৰাণ আহুতি দিছিল।
ড° মুখাৰ্জীৰ পিছত পণ্ডিত দীনদয়াল উপাধ্যায়, অটল বিহাৰী বাজপেয়ী, লালকৃষ্ণ আদৱানী আৰু নানাজী দেশমুখৰ দৰে মহান নেতাসকলে একাত্ম মানৱবাদ আৰু ৰাষ্ট্ৰবাদৰ আদৰ্শৰে সংগঠনটোক নতুন শক্তি প্ৰদান কৰিছিল।
১৯৭৫ চনৰ জৰুৰীকালীন অৱস্থাৰ কঠিন দিনবোৰত জনসংঘই গণতন্ত্ৰ ৰক্ষাৰ বাবে অগ্ৰণী ভূমিকা পালন কৰিছিল। পৰৱৰ্তী সময়ত ১৯৮০ চনত জনতা পাৰ্টিৰ বিভাজনৰ পিছত ভাৰতীয় জনতা পাৰ্টিৰ গঠন হৈছিল।
প্ৰধানমন্ত্ৰী শ্ৰীযুত নৰেন্দ্ৰ মোদী ডাঙৰীয়াআৰু গৃহমন্ত্ৰী শ্ৰীযুত অমিত শ্বাহ ডাঙৰীয়াৰ নেতৃত্বত ২০১৯ চনত সংবিধানৰ ৩৭০নং অনুচ্ছেদ চিৰদিনৰ বাবে বিলুপ্ত কৰি ড° মুখাৰ্জীৰ সপোন বাস্তৱায়িত কৰা হয়।
‘ৰাষ্ট্ৰ প্ৰথম’, ‘অন্ত্যোদয়’ আৰু ‘একাত্ম মানৱবাদ’ৰ নীতিৰ ওপৰত প্ৰতিষ্ঠিত ৭৫ বছৰীয়া এই দীঘলীয়া আৰু গৌৰৱোজ্জ্বল যাত্ৰাই আজি দৰিদ্ৰ কল্যাণ, আয়ুষ্মান ভাৰত, প্ৰধানমন্ত্ৰী আৱাস যোজনা আৰু হৰ ঘৰ জলৰ দৰে আঁচনিৰ জৰিয়তে প্ৰতিগৰাকী নাগৰিকৰ জীৱনলৈ পোহৰ কঢ়িয়াই আনিছে।
ৰাষ্ট্ৰসেৱাৰ প্ৰতি সমৰ্পিত এই যাত্ৰা অবিৰতভাৱে অব্যাহত আছে! 🇮🇳