Zilla Parishad, Nandurbar

09/10/2026

मुख्य कार्यकारी अधिकारी नमन गोयल (भाप्रसे) यांची दुधाळे येथे भेट: सेवा संकल्प अभियानाचा घेतला आढावा!
दिनांक ८ ऑक्टोबर २०२६ रोजी सकाळी 10.00 वा. जिल्हा परिषदेचे मुख्य कार्यकारी अधिकारी नमन गोयल (भाप्रसे) यांनी नंदुरबार तालुक्यातील ग्रामपंचायत कार्यालय, दुधाळे, तसेच जिल्हा परिषद शाळा आणि अंगणवाडी केंद्र, दुधाळे येथे प्रत्यक्ष भेट देऊन सेवा संकल्प अभियानांतर्गत राबविण्यांत येत असलेल्या विविध उपक्रमांची माहिती घेतली.
या भेटीदरम्यान त्यांनी राज्यभरात राबविल्या जाणाऱ्या 'सेवा संकल्प अभियान' (१७ सप्टेंबर ते १७ ऑक्टोबर) अंतर्गत ग्रामपंचायत कार्यालय, जिल्हा परिषद शाळा व अंगणवाडी केंद्रांतर्गत राबविल्या जाणाऱ्या विविध उपक्रमांचा सविस्तर आढावा घेऊन अभियान यशस्वीपणे राबविण्याबाबत मार्गदर्शन केले.
भेटीतील प्रमुख मुद्दे व उपक्रम:
• परिसर स्वच्छता व आढावा: मुख्य कार्यकारी अधिकारी यांनी ग्रामपंचायत क्षेत्र, जिल्हा परिषद शाळा आणि अंगणवाडी परिसरातील स्वच्छतेची पाहणी केली. तसेच अभियान काळात ग्रामपंचायतीमार्फत हाती घेण्यात आलेल्या विविध उपक्रमांचा आढावा घेतला.
• शाळेत योगध्यान प्रात्यक्षिक: जिल्हा परिषद शाळा दुधाळे येथील पाहणीदरम्यान शालेय विद्यार्थ्यांनी उत्कृष्ट योगध्यान सादर केले. या प्रसंगी दैनंदिन जीवनात योगाचे व आरोग्याचे असलेले महत्त्व विद्यार्थ्यांना समजावून सांगण्यात आले.
• अंगणवाडी केंद्राची पाहणी: अंगणवाडी केंद्र दुधाळे येथे भेट देऊन बालकांचे प्राथमिक शिक्षण, पोषण आहार, खेळ, आणि वैयक्तिक स्वच्छता (Personal Hygiene) या बाबींची पाहणी करण्यात आली.
• मार्गदर्शक सूचना: १७ सप्टेंबर ते १७ ऑक्टोबर या कालावधीत निश्चित केलेले उर्वरित उपक्रम मुदतीत व प्रभावीपणे राबवण्याबाबत संबंधित अधिकाऱ्यांना आवश्यक त्या महत्त्वपूर्ण सूचना दिल्या.
याप्रसंगी ग्रामपंचायत दुधाळे येथील अधिकारी, पदाधिकारी, जिल्हा परिषद शाळेचे मुख्याध्यापक, शिक्षकवृंद, अंगणवाडी सेविका, मदतनीस उपस्थित होते.

08/10/2026

अंगणवाडी केंद्र बिलगाव आडीखुडीपाडा येथे ‘सेवा संकल्प’ कार्यक्रमांतर्गत माता-बाल आरोग्य व पोषणावर मार्गदर्शन संपन्न!
ग्रामीण भागातील महिला, माता आणि बालकांच्या आरोग्याचा दर्जा उंचावण्यासाठी तसेच आरोग्यविषयक जनजागृती करण्यासाठी अंगणवाडी केंद्र बिलगाव आडीखुडीपाडा येथे 'सेवा संकल्प' कार्यक्रमाचे यशस्वी आयोजन करण्यात आले. आरोग्य विभाग, अंगणवाडी विभाग आणि स्थानिक कार्यकर्त्यांच्या संयुक्त विद्यमाने हा उपक्रम उत्साही वातावरणात पार पडला.
या कार्यक्रमादरम्यान उपस्थित लाभार्थ्यांना माता व बाल आरोग्य, नियमित आरोग्य तपासणी, वेळेवर लसीकरण, संतुलित पोषण आहार, कुपोषण प्रतिबंध, वैयक्तिक स्वच्छता, संसर्गजन्य आजारांपासून बचाव आणि किशोरवयीन आरोग्य यांसारख्या अत्यंत महत्त्वाच्या विषयांवर सखोल मार्गदर्शन व समुपदेशन करण्यात आले. याशिवाय शासनाच्या विविध आरोग्यदायी योजनांची माहिती देऊन ग्रामस्थांमध्ये जागृती निर्माण करण्यात आली.
अंगणवाडी केंद्रामार्फत पुरवल्या जाणाऱ्या पोषण आहाराचा दैनंदिन जीवनात योग्य वापर कसा करावा, बालकांच्या शारीरिक व मानसिक वाढीचे नियमित निरीक्षण कसे ठेवावे आणि दैनंदिन आरोग्यविषयक काळजी कशी घ्यावी, याबद्दल उपस्थित महिला व पालकांना सविस्तर माहिती देण्यात आली.
ग्रामस्थांच्या उत्स्फूर्त प्रतिसादामुळे हा कार्यक्रम यशस्वी रित्या संपन्न झाला.

08/10/2026

सेवा संकल्प अभियानांतर्गत लहान शहादा येथे भव्य आरोग्य व नेत्र तपासणी शिबिर संपन्न; २०२ नागरिकांनी घेतला लाभ!
दि.06 ऑक्टोंबर 2026 रोजी 'सेवा संकल्प अभियाना'अंतर्गत प्राथमिक आरोग्य केंद्र, लहान शहादा येथे नुकतेच भव्य नेत्र तपासणी व मोफत आरोग्य शिबिराचे यशस्वी आयोजन करण्यात आले. या शिबिराचे औपचारिक उद्घाटन लहान शहादा ग्रामपंचायतीच्या सरपंच ममताबेन अशोक भिल यांच्या हस्ते उत्साहात पार पडले.
या आरोग्य शिबिरामध्ये विशेषतः गरोदर माता, स्तनदा माता आणि तीव्र कुपोषित (SAM) बालकांची सखोल आरोग्य तपासणी करून त्यांना वैद्यकीय सल्ला व उपचार देण्यात आले. शिबिरात एकूण ४१ नागरिकांनी नेत्र तपासणी करून घेतली, तर १६६ नागरिकांनी विविध आजारांवरील आरोग्य तपासणीचा प्रत्यक्ष लाभ घेतला. अशा प्रकारे एकूण २०२ ग्रामस्थांची मोफत तपासणी करण्यात आली.
हे शिबिर यशस्वी करण्यासाठी वैद्यकीय अधिकारी डॉ. विनोद नाईक, नेत्ररोग विभागाचे (नंदुरबार) डॉ. योगेश सोनवणे, डॉ. सतीश नांद्रे आणि डॉ. रुचिता चौधरी यांनी विशेष परिश्रम घेतले. याशिवाय प्राथमिक आरोग्य केंद्र आणि उपकेंद्रातील पीओ, एल.टी., एच.ए., एच.आय., एलएचव्ही, सीएचओ, एएनएम, एमपीडब्ल्यू, आशा गटप्रवर्तक, आशा सेविका, वाहनचालक व शिपाई यांच्यासह सर्व अधिकारी-कर्मचाऱ्यांच्या उपस्थितीत शिबिर सुरळीत व यशस्वीरीत्या संपन्न झाले.

08/10/2026

सेवा संकल्प अभियान-2026 अंतर्गत लोकसहभागातुन शाळा विकास - स्व.श्रीम. सुरेखा संजय छाजेड यांच्या प्रथम स्मृतीदिनानिमित्त जिल्हा परिषद कन्या शाळेस शैक्षणिक व क्रीडा साहित्य वितरण!
दि. ५ ऑक्टोंबर 2026 रोजी शहादा तालुक्यातील प्रकाशा येथील जिल्हा परिषद कन्या शाळेत स्व.श्रीम. सुरेखा संजय छाजेड यांच्या प्रथम स्मृतीदिनानिमित्त छाजेड परिवाराच्या वतीने विद्यार्थिनींच्या शैक्षणिक, क्रीडा व सर्वांगीण विकासाला चालना देणाऱ्या विविध साहित्याचे वितरण करण्यात आले. सेवाभाव पूर्ण वातावरणात कार्यक्रम संपन्न झाला.
स्व.श्रीम. सुरेखा छाजेड यांच्या स्मृती जपताना समाजोपयोगी उपक्रम राबविण्याचा आदर्श संजय छाजेड परिवाराने यानिमित्ताने समाजासमोर ठेवला. शाळेस ग्रंथालयासाठी कपाट, विविध प्रकारचे क्रीडा साहित्य, लेझीम, डंबेल्स, बॅडमिंटन साहित्य, चेंडू, दोरीउडी, रिंग, तसेच विद्यार्थिनींच्या शैक्षणिक गरजा लक्षात घेऊन चित्रकला वह्या, सचित्र बालमित्र, चार रेघी व दोन रेघी वह्या, पेन आदी शैक्षणिक साहित्य वितरीत करण्यांत आले.
यावेळी मान्यवरांच्या शुभहस्ते शालेय परिसरात पर्यावरण संवर्धनासाठी वटवृक्ष व पिंपळ या वृक्षांचे वृक्षारोपण (संरक्षण जाळीसह ) करण्यात आले. शिक्षणासोबत पर्यावरण संवर्धनाचा संदेश देणाऱ्या या उपक्रमाचे उपस्थितांनी विशेष कौतुक केले.
कार्यक्रमास श्री. संजय छाजेड, डॉ. विजय पटेल (डीआरडीओ शास्त्रज्ञ), अनिल छाजेड, संकेत छाजेड, महावीर छाजेड, के. डी. पाटील, आर. टी. पाटील, नरेंद्र पटेल, माधवभाई पाटील, गणेशभाई पाटील, मानकभाई चौधरी (अध्यक्ष, साने गुरुजी मित्र मंडळ, शहादा), अजितभाई साभद्रा, भरतभाई पाटील (अध्यक्ष, जायंट्स ग्रुप ऑफ शहादा), भूषण बाविस्कर, सतीश जव्हेरी, शरदभाई पाटील, विजय भावसार, श्रीमती सिद्धी छाजेड, श्रीमती आरती छाजेड, कु. ऐश्वर्या छाजेड यांच्यासह विविध क्षेत्रातील मान्यवर उपस्थित होते.
यावेळी रामचंद्र पाटील, माजी उपाध्यक्ष, जिल्हा परिषद नंदुरबार, नंदुभाई पाटील, सामाजिक कार्यकर्ता, सुनीलभाई पाटील उपस्थित होते. छाजेड परिवाराकडून शाळेतील स्वयंपाकीण सुमन सामुद्रे व बकुळा चव्हाण यांना भेट वस्तु देऊन त्यांच्या सेवेचा सन्मान करण्यात आला.
स्व. श्रीम. सुरेखा छाजेड यांच्या स्मृतीदिनानिमित्त करण्यात आलेल्या या उपक्रमातून ‘स्मृती जपताना समाजासाठी काहीतरी देणे’ हा सकारात्मक संदेश अधोरेखित झाला. छाजेड कुटूंबाचा हा सेवाभाव विद्यार्थिनींच्या शिक्षणाला, क्रीडा कौशल्याला आणि सर्जनशीलतेला बळ देणारी असुन लोकसहभागातुन शाळेच्या विकासासाठी निश्चितच प्रेरणादायी ठरणार आहे.

07/10/2026

नंदुरबार जिल्ह्यातील बालकांचे पोषण सुधारणा व सर्वांगीण विकासासाठी मा.जिल्हाधिकारी, मित्ताली सेठी, मुख्य कार्यकारी अधिकारी, नमन गोयल यांच्या मार्गदर्शनाखाली ब्रिटानिया न्यूट्रिशन फाउंडेशन (BNF), नंदुरबार महिला व बाल विकास विभाग, जिल्हा परिषद नंदुरबार तथा जिल्हा प्रशासन यांच्या संयुक्त विद्यमाने विशेष उपक्रम राबविला जात आहे.
'कुपोषणमुक्त भारत' हे ध्येय समोर ठेवून अंगणवाडी केंद्र, शाळा आणि समुदाय स्तरावर बहुआयामी उपक्रम हाती घेण्यात आले असुन या अभियानाचा एक भाग म्हणून, वित्तीय वर्ष २०२५–२६ मध्ये अक्कलकुवा आणि धडगाव तालुक्यातील ९ अंगणवाडी केंद्रांचा कायापालट करण्यात आला. अंगणवाड्यांचे नूतनीकरण करून लहान मुलांसाठी अधिक सुरक्षित, प्रसन्न आणि शैक्षणिकदृष्ट्या पोषक वातावरण निर्माण करण्यात आले आहे.
या यशस्वी उपक्रमाची व्याप्ती वाढवत, वित्तीय वर्ष २०२६–२७ मध्ये आणखी २० ते २५ अंगणवाडी केंद्रांचे नूतनीकरण करण्याचे नियोजन आहे.
नूतनीकरणाची प्रमुख वैशिष्ट्ये:
• बालस्नेही वातावरण: रंगीबेरंगी आणि आकर्षक चित्रांद्वारे बालकांसाठी आनंददायी शिक्षण आणि संगोपनाची सोय.
• सुरक्षितता आणि स्वच्छता: पिण्याच्या पाण्याचा आणि स्वच्छतेच्या सुविधांचा विस्तार.
• पोषण आणि आरोग्य सेवा: नियमित आरोग्य तपासणी आणि सकस आहाराच्या वितरणासाठी सक्षम पायाभूत सुविधा.
स्थानिक प्रशासन आणि महिला व बाल विकास विभागाच्या सक्रिय सहकार्यामुळे दुर्गम भागातील बालकांसाठी प्रारंभिक बालसंगोपन, शिक्षण आणि पोषण सेवा अधिक प्रभावीपणे पोहोचण्यास मदत होत आहे.

07/10/2026

प्राथमिक आरोग्य केंद्र प्रतापपूर येथे मुख्य कार्यकारी अधिकारी नमन गोयल (भाप्रसे) यांची प्रत्यक्ष भेट; सेवा सुविधांचा घेतला आढावा!
मुख्य कार्यकारी अधिकारी नमन गोयल (भाप्रसे) यांनी दिनांक ०५ ऑक्टोबर २०२६ रोजी तळोदा तालुक्यातील प्राथमिक आरोग्य केंद्र, प्रतापपूर येथे प्रत्यक्ष भेट देऊन पाहणी केली. या भेटीदरम्यान त्यांनी केंद्रामार्फत नागरिकांना पुरवण्यात येणाऱ्या विविध आरोग्य सेवा व सुविधांचा सविस्तर आढावा घेतला.
शेवटच्या घटकापर्यंत दर्जेदार आरोग्य सेवा पुरवण्याचे निर्देश.
आरोग्य केंद्राच्या पाहणीदरम्यान मुख्य कार्यकारी अधिकारी यांनी उपस्थित वैद्यकीय अधिकारी व आरोग्य कर्मचाऱ्यांना नागरिकांना वेळेवर व गुणवत्तापूर्ण आरोग्य सेवा देण्याबाबत महत्त्वपूर्ण सूचना केल्या. ग्रामीण व दुर्गम भागातील शेवटच्या घटकापर्यंत शासकीय आरोग्य सेवांचा लाभ सुलभतेने आणि गुणवत्तेसह पोहोचला पाहिजे, यावर त्यांनी विशेष भर दिला.
'सेवा संकल्प अभियान' उपक्रमांची माहिती घेतली.
या भेटीत 'सेवा संकल्प अभियान' अंतर्गत प्राथमिक आरोग्य केंद्र प्रतापपूर मार्फत राबवण्यात येणाऱ्या विविध उपक्रमांची सविस्तर माहिती घेतली. अभियानाची अंमलबजावणी अधिक प्रभावीपणे करून तळागाळातील जास्तीत जास्त रुग्णांपर्यंत आरोग्य सुविधा पोहोचवण्याचे निर्देश त्यांनी आरोग्य प्रशासनाला दिले.
भेटीतील प्रमुख मुद्दे:
• रुग्ण सेवा व सुविधा: औषध साठा, बाह्य रुग्ण विभाग (OPD) आणि आपत्कालीन सेवांची पाहणी.
• गुणवत्तापूर्ण आरोग्य: शेवटच्या घटकापर्यंत दर्जेदार व तत्पर आरोग्य सेवा पोहोचवण्यावर भर.
• सेवा संकल्प अभियान: अभियानांतर्गत राबवल्या जाणाऱ्या आरोग्य विषयक उपक्रमांचा प्रत्यक्ष आढावा.
• स्वच्छता व व्यवस्थापन: आरोग्य केंद्र परिसरातील स्वच्छता व रुग्णांच्या सोयी-सुविधांची तपासणी.

07/10/2026

सेवा संकल्प अभियानांतर्गत SBI RSETI नंदुरबार येथे ब्युटी पार्लर प्रशिक्षणार्थींचा प्रमाणपत्र वितरण सोहळा संपन्न!
ग्रामीण भागातील युवक-युवतींना स्वयंरोजगारासाठी सक्षम करण्याच्या उद्देशाने 'सेवा संकल्प अभियाना'अंतर्गत SBI RSETI (ग्रामीण स्वयंरोजगार प्रशिक्षण संस्था), नंदुरबार येथे नुकताच एक भव्य प्रमाणपत्र वितरण सोहळा पार पडला. या अंतर्गत, ब्युटी पार्लर प्रशिक्षण यशस्वीरीत्या पूर्ण केलेल्या विद्यार्थिनींना मान्यवरांच्या हस्ते प्रशिक्षण पूर्णत्वाचे प्रमाणपत्र देऊन सन्मानित करण्यात आले.
या महत्त्वपूर्ण कार्यक्रमास नंदुरबार जिल्हा परिषदेचे मुख्य कार्यकारी अधिकारी (IAS) मा.नमन गोयल हे प्रमुख पाहुणे म्हणून उपस्थित होते. त्यांच्यासोबत जिल्हा ग्रामीण विकास यंत्रणेचे प्रकल्प संचालक श्री. परमेश्वरजी राऊत, MSRLM चे जिल्हा अभियान व्यवस्थापक श्री. यशवंत ठाकूर आणि MSRLM चे जिल्हा व्यवस्थापक श्री. उमेश अहिराव यांनीही विशेष उपस्थिती नोंदविली.
प्रमाणपत्र वितरण करताना उपस्थित मान्यवरांनी सर्व प्रशिक्षणार्थींशी मनमोकळा संवाद साधला. कौशल्य विकासाच्या माध्यमातून स्वतःला सिद्ध करणे आणि आर्थिकदृष्ट्या स्वावलंबी होणे काळाची गरज असल्याचे त्यांनी स्पष्ट केले. RSETI कडून मिळालेल्या या दर्जेदार प्रशिक्षणाचा पुरेपूर फायदा घेत प्रत्येक प्रशिक्षणार्थीने स्वतःचा व्यवसाय सुरू करण्यासाठी निर्धाराने पाऊल पुढे टाकावे, असे प्रेरक आवाहन मान्यवरांनी यावेळी केले.
कार्यक्रमाच्या यशस्वी नियोजनासाठी SBI RSETI नंदुरबारचे संचालक श्री. प्रमोद शिंदे, फॅकल्टी श्री. गिरीधर बैसाणे, श्रीमती अश्विनी पाटील, श्री. विशाल पाटील, श्री. अक्षय तांबोळी, DST मॅडम, शिवणकाम प्रशिक्षिका श्रीमती समीना शेख, श्री. राजेंद्र पवार आणि श्री. संजय नाईक हे संस्थेचे सर्व प्रतिनिधी उपस्थित होते. या सोहळ्याला ब्युटी पार्लर आणि शिवणकाम प्रशिक्षणाच्या बॅचमधील विद्यार्थिनींनी मोठ्या संख्येने उपस्थिती लावली होती.
SBI RSETI च्या माध्यमातून सातत्याने राबवल्या जाणाऱ्या या उपक्रमांमुळे ग्रामीण भागातील तरुणांना नवी दिशा मिळत आहे. प्रशिक्षण पूर्ण करून प्रमाणपत्र प्राप्त करणाऱ्या या विद्यार्थिनींसाठी हा त्यांच्या पुढील व्यावसायिक वाटचालीतील एक महत्त्वाचा टप्पा असून, यातून त्यांना स्वतःचा उद्योग उभारण्यासाठी लागणारा आत्मविश्वास आणि कौशल्य प्राप्त झाले आहे.

03/10/2026

🌿 सातपुड्याच्या पायवाटांवरून पोहोचला गांधीविचार ! ✨
डोंगर-दऱ्यांच्या कुशीत वसलेला अतिदुर्गम थेवापाणी पाडा आणि त्या पायवाटांवर गांधीजींच्या विचारांचा संदेश घेऊन चालणारे चिमुकले विद्यार्थी... 👣
२ ऑक्टोबर – गांधी जयंती व लालबहादूर शास्त्री जयंतीनिमित्त जिल्हा परिषद प्राथमिक शाळा, थेवापाणी (ता. तळोदा, जि. नंदुरबार) येथे ‘नमो सेवागाथा’ उपक्रम अत्यंत उत्साहपूर्ण व कृतीशील पद्धतीने पार पडला.
📍 उपक्रमाची खास वैशिष्ट्ये:
👣 शाळेच्या चार भिंतींपलीकडे गांधीविचार:
इयत्ता दुसरीतील चिमुकला श्याम एवश्या वळवी याने महात्मा गांधींची हुबेहूब वेशभूषा साकारली. हातात काठी आणि चेहऱ्यावर निरागस भाव असलेल्या या छोट्या ‘बापू’च्या नेतृत्वाखाली पाड्यातून स्वच्छता व जनजागृती रॅली काढण्यात आली.
“महात्मा गांधीजी की जय!” आणि “स्वच्छ भारत, सुंदर भारत!” च्या घोषणांनी सातपुड्याच्या शांत डोंगररांगा दुमदुमल्या. ग्रामस्थांनीही यात उत्स्फूर्त सहभाग नोंदवला.
🗣️ ‘बाल संवाद’ – चिमुकल्यांच्या शब्दांत गांधी विचार:
प्रतिमा पूजनानंतर उपशिक्षिका श्रीमती स्नेहल गुगळे यांनी गोष्टींतून गांधीजींचे जीवन, स्वच्छता, सत्य व अहिंसेचे महत्त्व पटवून दिले. विद्यार्थ्यांनी बाल संवादातून स्वतःच्या शब्दांत विचार मांडले.
🧹 ‘नमो सेवागाथा’ व श्रमदान:
मुख्याध्यापक श्री. चंद्रकांत सपकाळे यांनी श्रमप्रतिष्ठा आणि सेवेचे महत्त्व स्पष्ट केले. विद्यार्थी, शिक्षक व ग्रामस्थांनी एकत्र येत शाळा, रस्ता आणि पाण्याच्या जागेची स्वच्छता केली. तसेच प्रात्यक्षिकातून ओला व सुका कचरा यातील फरक समजून घेतला.
📜 स्वच्छता प्रतिज्ञा व संकल्प:
उपस्थित पालकांनी व विद्यार्थ्यांनी स्वच्छता प्रतिज्ञा घेतली. प्रत्येक विद्यार्थ्याने ‘एक विद्यार्थी, एक स्वच्छता संदेश’ दिला. शेवटी सर्वांनी “आपली शाळा, स्वच्छ शाळा, सुंदर शाळा” असा सामूहिक संकल्प केला.
✨ मार्गदर्शन व सहकार्य:
प्रतापपूर केंद्राच्या केंद्रप्रमुख श्रीमती रंजना निकुंभे मॅडम यांच्या मार्गदर्शनाखाली, मुख्याध्यापक श्री. चंद्रकांत सपकाळे, उपशिक्षिका श्रीमती स्नेहल गुगळे, शाळा व्यवस्थापन समिती अध्यक्ष शांताराम वळवी व सर्व ग्रामस्थांच्या सहकार्याने हा उपक्रम यशस्वी झाला.
"मनात सेवाभाव, हातात श्रमाची तयारी आणि पावलांत चालण्याची उमेद असेल, तर सातपुड्याच्या पायवाटाही विचारांची वाट बनतात!" 🏔️

03/10/2026