02/10/2026
ఓటు హక్కు హరించే కుట్రను అడ్డుకోవాలి
• జ్ఞానేష్‌కుమార్‌ను పదవి నుంచి తొలగించాలి
• ఒంగోలులో వామపక్షాల ఆధ్వర్యంలో ర్యాలీ
• ఎస్‌ఐఆర్‌ పేరుతో 13 కోట్ల ఓట్లు తొలగించారని నేతల ఆరోపణ
• ఓటర్ల జాబితా సవరణను రద్దు చేయాలని డిమాండ్
ఓటు హక్కు పరిరక్షణకు పారదర్శకమైన ఎన్నికల ప్రక్రియ అవసరమని, ఓటర్ల జాబితాల ప్రత్యేక సమగ్ర సవరణ (ఎస్‌ఐఆర్‌) పేరుతో అర్హులైన ఓటర్లకు అన్యాయం జరగకుండా చూడాలని వామపక్ష నాయకులు డిమాండ్ చేశారు.
ఓటర్ల జాబితాల నుంచి పెద్ద సంఖ్యలో పేర్లు తొలగించారంటూ వస్తున్న అభ్యంతరాలపై ఎన్నికల సంఘం బాధ్యత వహించాలని, ప్రధాన ఎన్నికల కమిషనర్ జ్ఞానేష్‌కుమార్‌ను పదవి నుంచి తొలగించాలని డిమాండ్ చేశారు .
జ్ఞానేష్‌కుమార్‌ను తొలగించే వరకు ఆందోళన కొనసాగుతుందని నేతలు హెచ్చరిక చేసారు.ఈ మేరకు శుక్రవారం ఒంగోలులో వామపక్ష పార్టీల ఆధ్వర్యంలో భారీ ర్యాలీ నిర్వహించారు. ప్రజాస్వామ్య హక్కులను పరిరక్షించాలంటూ నినదించారు.
సీపీఎం, సీపీఐ, సీపీఐ(ఎంఎల్‌),న్యూ డెమోక్రసీ పార్టీల ఆధ్వర్యంలో అద్దంకి బస్‌స్టాండ్‌ నుంచి ప్రారంభమైన ర్యాలీ బాపూజీ కాంప్లెక్స్‌ వద్ద మహాత్మా గాంధి విగ్రహానికి పూల మాల వేసి నివాళులు అర్పించారు. అనంతరం ర్యాలీ పాత మార్కెట్‌, మిరియాలపాలెం, చర్చి సెంటర్ మీదుగా ప్రకాశం భవన్‌ వరకు సాగింది. నాయకులు, కార్యకర్తలు పెద్ద సంఖ్యలో పాల్గొన్నారు. అనంతరం ప్రకాశం భవన్‌ వద్ద సిపిఎం జిల్లా కార్యదర్శి వర్గ సభ్యులు చీకటి శ్రీనివాస రావు సిపిఐ నాయకులు కొత్తకోట వెంకటేశ్వర్లు అధ్యక్షతన నిర్వహించిన కార్యక్రమంలో నాయకులు మాట్లాడుతూ ఓటర్ల జాబితా అనేది కేవలం పరిపాలనా రికార్డు కాదని, ప్రతి పౌరుడి ప్రజాస్వామ్య హక్కుకు ఆధారమని పేర్కొన్నారు.
ఓటు హక్కును కాపాడాల్సిన బాధ్యత ఈసీదే.....
సీపీఐ రాష్ట్ర కార్యదర్శివర్గ సభ్యులు జె. అజయ్‌కుమార్‌ మాట్లాడుతూ ఓటు హక్కు రాజ్యాంగం కల్పించిన ప్రాథమిక హక్కుల్లో కీలకమైనదని, అర్హులైన పౌరుల పేర్లు ఓటర్ల జాబితాలో లేకుండా పోతే ప్రజాస్వామ్య ప్రక్రియకు విఘాతం కలుగుతుందని అన్నారు. దేశవ్యాప్తంగా 13 కోట్లకు పైగా పేర్లు ముసాయిదా ఓటర్ల జాబితాల నుంచి తొలగించారనే అంశంపై తీవ్ర ఆందోళన వ్యక్తమవుతోందని తెలిపారు. ఆంధ్రప్రదేశ్‌లో 33 లక్షల మంది ఓటర్ల పేర్లు తొలగించారని, మరో 32 లక్షల మందికి నోటీసులు ఇచ్చారంటూ ఆయన పేర్కొన్నారు. ఈ వివరాలపై సమగ్ర పరిశీలన జరిపి, అర్హులైన ప్రతి ఒక్కరికీ ఓటు హక్కు కల్పించాలని డిమాండ్ చేశారు.ఎన్నికల సంఘం నిష్పక్షపాతంగా వ్యవహరించాల్సి ఉండగా, ఓటర్ల జాబితాల సవరణపై అనేక అనుమానాలు తలెత్తుతున్నాయని అజయ్‌కుమార్‌ విమర్శించారు. ఎన్నికల కమిషనర్ జ్ఞానేష్‌కుమార్‌ రాజీనామా చేయాలని, ఓటర్ల తొలగింపుపై బాధ్యతను నిర్ధారించాలని కోరారు. ఓటర్ల జాబితాల్లో తప్పులు సరిదిద్దుకునేందుకు ప్రజలకు తగిన అవకాశం కల్పించాలని, నోటీసులు అందుకున్నవారు కార్యాలయాల చుట్టూ తిరిగే పరిస్థితి లేకుండా చర్యలు తీసుకోవాలని అన్నారు.
ఎస్‌ఐఆర్‌ వెనుక రాజకీయ కుట్ర :
సీపీఎం జిల్లా కార్యదర్శి ఎస్‌కే మాబు మాట్లాడుతూ సాధారణంగా ఓటర్ల జాబితాల సవరణలో కొత్త ఓటర్లను చేర్చడం, మరణించినవారి పేర్లను తొలగించడం వంటి ప్రక్రియలు జరుగుతాయని తెలిపారు. అయితే ఎస్‌ఐఆర్‌ ప్రక్రియలో పెద్ద సంఖ్యలో పేర్లు తొలగించడంపై ప్రజల్లో ఆందోళన నెలకొందన్నారు. అర్హులైన ఓటర్లకు న్యాయం జరగాలంటే సవరణ ప్రక్రియ పారదర్శకంగా ఉండాలని స్పష్టం చేశారు.
కేంద్రంలోని బీజేపీ ప్రభుత్వం కార్పొరేట్‌ ప్రయోజనాలకు ప్రాధాన్యమిస్తూ, మత విభజన రాజకీయాలను ప్రోత్సహిస్తోందని ఆయన విమర్శించారు. ఎస్‌ఐఆర్‌ ప్రక్రియ పౌరసత్వానికి సంబంధించిన వివాదాలకు దారితీసే ప్రమాదం ఉందని ఆందోళన వ్యక్తం చేశారు. ఎన్నికల కమిషనర్ నియామక విధానం, ఓటర్ల జాబితాల సవరణలో అనుసరిస్తున్న పద్ధతులపై సమగ్ర విచారణ జరపాలని కోరారు. ఎన్నికల సంఘం స్వతంత్రతను కాపాడటంతోపాటు అర్హులైన ఓటర్లందరి పేర్లు జాబితాలో ఉండేలా చర్యలు తీసుకోవాలని డిమాండ్ చేశారు.
ఓటర్ల తొలగింపుపై ఎన్నికల కమిషన్‌లోని ఇతర కమిషనర్లు అభ్యంతరాలు వ్యక్తం చేశారంటూ వచ్చిన నివేదికలను కూడా మాబు ప్రస్తావించారు. ఈ పరిణామాల నేపథ్యంలో ఎన్నికల సంఘం తన నిర్ణయాలపై ప్రజలకు స్పష్టత ఇవ్వాల్సిన అవసరం ఉందన్నారు. ఎస్‌ఐఆర్‌ ప్రక్రియను నిలిపివేసి, ఓటర్ల జాబితాల్లో జరిగిన మార్పులపై విచారణ చేపట్టాలని కోరారు.
ఓటు లేకపోతే పౌరుడి గొంతు మూగబోతుంది:
సీపీఐ(ఎంఎల్‌) న్యూ డెమోక్రసీ జిల్లా నాయకులు ఆర్‌. మోహన్‌ మాట్లాడుతూ ఓటర్ల జాబితాల నుంచి పేర్లు తొలగించడం వల్ల అర్హులైన పౌరులు ఎన్నికల్లో తమ అభిప్రాయాన్ని వ్యక్తం చేసే అవకాశాన్ని కోల్పోయే ప్రమాదం ఉందన్నారు. 13 కోట్ల మంది ఓటర్ల పేర్లు తొలగించారన్న ఆరోపణలు ప్రజాస్వామ్య వ్యవస్థపై తీవ్రమైన ప్రశ్నలను లేవనెత్తుతున్నాయని పేర్కొన్నారు. ఎన్నికల సంఘం నిష్పక్షపాతంగా వ్యవహరించాల్సిన బాధ్యతను విస్మరించకూడదన్నారు.
బీహార్‌, పశ్చిమ బెంగాల్‌, తమిళనాడు, కేరళ తదితర రాష్ట్రాల్లో ఓటర్ల జాబితాల సవరణపై వివాదాలు తలెత్తిన అంశాలను ప్రస్తావిస్తూ, అర్హులైన ఓటర్లకు నష్టం కలగకుండా చూడాలని కోరారు. ఓటర్ల తొలగింపుపై వచ్చిన ఆరోపణలను విచారించి బాధ్యులపై చర్యలు తీసుకోవాలని, జ్ఞానేష్‌కుమార్‌ను పదవి నుంచి తొలగించాలని డిమాండ్ చేశారు.
నోటీసులతో ఓటర్లకు ఇబ్బందులు:
సీపీఐ(ఎంఎల్‌) నాయకురాలు ఎస్‌. లలితకుమారి మాట్లాడుతూ ఓటర్ల జాబితాలో తమ పేరు ఉందో లేదో తెలుసుకోవడానికి, తొలగించిన పేర్లను తిరిగి నమోదు చేయించుకోవడానికి ప్రజలు కార్యాలయాల చుట్టూ తిరగాల్సి వస్తోందని విమర్శించారు. అర్హత ఉన్నప్పటికీ ఓటు హక్కుపై అనిశ్చితి ఏర్పడటం ప్రజాస్వామ్య వ్యవస్థకు మంచిది కాదన్నారు.
సీపీఐ జిల్లా కార్యదర్శి ఆర్‌. వెంకట్రావు మాట్లాడుతూ ఓటు హక్కును పరిరక్షించడం ఎన్నికల సంఘం ప్రాథమిక బాధ్యతని పేర్కొన్నారు. ఓటర్ల జాబితాల సవరణలో ఎలాంటి అక్రమాలకు తావులేకుండా చూడాలని, అర్హులైన పౌరుల పేర్లు తొలగితే వాటిని తిరిగి చేర్చాలని డిమాండ్ చేశారు. ఎన్నికల ప్రక్రియపై ప్రజల్లో విశ్వాసం నిలబెట్టేందుకు పారదర్శకత, జవాబుదారీతనం అవసరమన్నారు.
సీపీఐ(ఎంఎల్‌) న్యూ డెమోక్రసీ రాష్ట్ర అధ్యక్షులు చిట్టిపాటి వెంకటేశ్వర్లు
సిపిఎం జిల్లా కార్యదర్శివర్గ సభ్యులు కంకణాల ఆంజనేయులు, యంరమేష్, జిల్లా కమిటీ సభ్యులు కాలం సుబ్బారావు, జి రమేష్, జె.జయంతి బాబు, బంకా సుబ్బారావు, యుఆదిలక్ష్మి, పి కల్పన, బి రఘురామ్, వి బాలకోటయ్య, కే.జీ మస్తాన్, ఎన్ వెంకటేశ్వర్లు, పల్లాపల్లి ఆంజనేయులు, జి శ్రీనివాసరావు, సిపిఐ నాయకులు టి ప్రభాకర్, ఇతర వామపక్ష నాయకులు పద్మ, ఎల్ రాజశేఖర్ వామపక్ష పార్టీల నాయకులు,
కార్యకర్తలు పాల్గొన్నారు. ఓటర్ల జాబితాల సవరణపై వచ్చిన అభ్యంతరాలను పరిష్కరించాలని, అర్హులైన ప్రతి పౌరుడికి ఓటు హక్కు కల్పించాలని, ఎన్నికల సంఘం స్వతంత్రతను కాపాడాలని నాయకులు డిమాండ్ చేశారు.
