District Police Palakkad

09/10/2026

കേരള സർക്കാരിൻെറ നേതൃത്വത്തിൽ സംസ്ഥാന വ്യാപകമായി നടപ്പിലാക്കുന്ന ലഹരിവിരുദ്ധ പ്രവർത്തനമായ "ഓപ്പറേഷൻ തൂഫാൻ: ദി നാർക്കോ ഹണ്ട്" രണ്ടാംഘട്ട പദ്ധതിയുടെ ഭാഗമായി കണ്ണാടി ഹയർ സെക്കൻഡറി സ്കൂൾ ഓഡിറ്റോറിയത്തിൽ വെച്ച് പാലക്കാട് ടൗൺ സൗത്ത് ജനമൈത്രി പോലീസിന്റെ ആഭിമുഖ്യത്തിൽ ലഹരിവിരുദ്ധ ബോധവൽക്കരണ പരിപാടിയും "ചൂരൽ" നാടക അവതരണവും സംഘടിപ്പിച്ചു. ലഹരി ഉപയോഗത്തിൻെറ ദൂഷ്യഫലങ്ങളെക്കുറിച്ചും യുവതലമുറ ലഹരിയിൽ നിന്ന് അകന്നുനിൽക്കേണ്ടതിൻെറ ആവശ്യകതയെക്കുറിച്ചും ബോധവൽക്കരണ പരിപാടി ശക്തമായ സന്ദേശം നൽകി.
ചടങ്ങിൽ ടൗൺ സൗത്ത് ജനമൈത്രി സി.ആർ.ഒ. അസിസ്റ്റന്റ് സബ് ഇൻസ്പെക്ടർ ശ്രീ. ശശി വി. പി., എ.എസ്.ഐ. ശ്രീമതി. സുഗുണ, സ്കൂൾ പ്രിൻസിപ്പൽ ശ്രീമതി. സുഷമ, എച്ച്.എം. ശ്രീമതി. ലിസി, സ്കൂൾ മാനേജ്മെൻ്റ് അംഗങ്ങൾ എന്നിവർ പങ്കെടുത്തു ആശംസകൾ അർപ്പിച്ചു സംസാരിച്ചു.
തുടർന്ന് പാലക്കാട് നാടകപ്പുരയുടെ ചേരാമംഗലം ചാമുണ്ണി രചനയും സംവിധാനവും നിർവഹിച്ച "ചൂരൽ" എന്ന നാടകം അരങ്ങേറി. മനുഷ്യരാശിയെ ഒന്നടങ്കം അനുദിനം കാർന്നുതിന്നുകൊണ്ടിരിക്കുന്ന ലഹരിമാഫിയക്കെതിരെ ശക്തമായ പ്രതിരോധം തീർക്കുന്നതായിരുന്നു നാടക അവതരണം.

08/10/2026

2026 ഏഷ്യൻ ഗെയിംസ് പുരുഷന്മാരുടെ ലോങ് ജമ്പിൽ വെള്ളിമെഡൽ നേടി രാജ്യത്തിൻെറയും നാടിൻെറയും അഭിമാനമായി മാറിയ അന്താരാഷ്ട്ര കായികതാരം ശ്രീശങ്കറിനെ പാലക്കാട് ജില്ലാ പോലീസ് ആദരിച്ചു.
2026 ഒക്ടോബർ 08-ന് വൈകുന്നേരം ശ്രീശങ്കറിൻെറ യാക്കരയിലുള്ള വസതിയിൽ വെച്ച് നടന്ന ലളിതമായ ചടങ്ങിൽ പാലക്കാട് ജില്ലാ പോലീസ് മേധാവി ശ്രീ. അബ്ദുൾ റഷി IPS ശ്രീശങ്കറിന് ഉപഹാരം നൽകി ആദരിച്ചു.
കായികരംഗത്ത് ശ്രീശങ്കർ കൈവരിച്ച മികച്ച നേട്ടം വരുംതലമുറയ്ക്ക് വലിയ പ്രചോദനമാണെന്ന് ജില്ലാ പോലീസ് മേധാവി ആശംസിച്ചു. ചടങ്ങിൽ അഡിഷണൽ എസ്.പി. ശ്രീ. സന്തോഷ് കുമാർ, ജില്ലാ സ്പെഷ്യൽ ബ്രാഞ്ച് DySP ശ്രീ.സന്തോഷ്കുമാർ.എം, DYSP C Branch ശ്രീ. രാജ്‌മോഹൻ പി.കെ, DYSP Narcotic Cell DYSP ശ്രീ .ബിജു കെ.എം എന്നിവരും ജില്ലാ പോലീസിലെ മറ്റ് ഉന്നത ഉദ്യോഗസ്ഥരും പങ്കെടുത്തു.

06/10/2026

അന്താരാഷ്ട്ര വയോജന ദിനാചരണത്തിൻെറ ഭാഗമായി പാടഗിരി ജനമൈത്രി പോലീസിൻെറ നേതൃത്വത്തിൽ പ്രദേശത്തെ നിരാലംബരും ഒറ്റയ്ക്ക് താമസിക്കുന്നതുമായ വയോജനങ്ങളെ നേരിൽ സന്ദർശിക്കുകയും ബോധവൽക്കരണവും, വസ്ത്രവിതരണവും നടത്തുകയും ചെയ്തു.
പാടഗിരി സ്റ്റേഷൻ ഹൗസ് ഓഫീസറുടെ (SHO) പ്രത്യേക നിർദ്ദേശപ്രകാരമാണ് ജനമൈത്രി സി.ആർ.ഒ മാരുടെയും ബീറ്റ് ഓഫീസർമാരുടെയും നേതൃത്വത്തിൽ ഈ കരുതൽ പദ്ധതി സംഘടിപ്പിച്ചത്.
വയോജനങ്ങളുടെ ക്ഷേമകാര്യങ്ങൾ അന്വേഷിച്ച പോലീസ് സംഘം, മുതിർന്ന പൗരന്മാരുടെ സംരക്ഷണവും ക്ഷേമവും ഉറപ്പാക്കുന്ന സീനിയർ സിറ്റിസൺ ആക്ടിനെക്കുറിച്ചും പോലീസ് നൽകുന്ന സുരക്ഷാ സേവനങ്ങളെക്കുറിച്ചും വയോജനങ്ങൾക്ക് വിശദീകരിച്ചു നൽകി. ചടങ്ങിൻെറ ഭാഗമായി സന്ദർശിച്ച വയോജനങ്ങൾക്കെല്ലാം മുണ്ടുകളും തോർത്തുകളും വിതരണം ചെയ്തു.
ഏകാന്തതയും പ്രയാസങ്ങളും അനുഭവിക്കുന്ന മുതിർന്ന പൗരന്മാർക്ക് താങ്ങും തണലുമാവുക, സമൂഹത്തിൽ അവർക്ക് അർഹമായ സുരക്ഷിതത്വവും ബഹുമാനവും ഉറപ്പാക്കുക എന്നീ ലക്ഷ്യങ്ങളോടെയാണ് പാടഗിരി പോലീസ് ഈ ദിനാചരണം സംഘടിപ്പിച്ചത്. ജനമൈത്രി പോലീസ് ഉദ്യോഗസ്ഥരും നാട്ടുകാരും പരിപാടിയിൽ പങ്കെടുത്തു.

05/10/2026

ഗാന്ധിജയന്തി ദിനത്തിൽ കോങ്ങാട് ലഹരിക്കെതിരെ ഒരുമിച്ചു . കളിയിലൂടെ, സൗഹൃദത്തിലൂടെ, ജാഗ്രതയിലൂടെ.
കേരളത്തെ മയക്കുമരുന്ന് വിമുക്തമാക്കുക എന്ന ലക്ഷ്യത്തോടെ ആഭ്യന്തര വകുപ്പ് നടപ്പിലാക്കിവരുന്ന ‘ഓപ്പറേഷൻ തൂഫാൻ – ദി നാർക്കോ ഹണ്ട്’ പദ്ധതിയുടെ സന്ദേശം ജനങ്ങളിലെത്തിക്കുന്നതിന്റെ ഭാഗമായി കോങ്ങാട് പോലീസ് സ്റ്റേഷനും കോങ്ങാട് മീഡിയാ കൂട്ടായ്മയും സംയുക്തമായി സംഘടിപ്പിച്ച സൗഹൃദ ഫുട്ബോൾ മത്സരം ആവേശകരമായി നടന്നു.
കോങ്ങാട് പോലീസ് സ്റ്റേഷൻ ടീമും കോങ്ങാട് മീഡിയാ കൂട്ടായ്മ ടീമും തമ്മിൽ നടന്ന മത്സരം ഒരു കായികമത്സരം മാത്രമായിരുന്നില്ല. ലഹരിക്കെതിരായ സാമൂഹിക പ്രതിബദ്ധതയുടെ ശക്തമായ പ്രഖ്യാപനം കൂടിയായിരുന്നു.
കളിക്കളത്തിൽ ഇരു ടീമുകളും വിജയം ലക്ഷ്യമിട്ട് പോരാടിയെങ്കിലും, കളിക്ക് പുറത്തേക്ക് ഇരുകൂട്ടരുടെയും ലക്ഷ്യം ഒന്നായിരുന്നു ലഹരിക്കെതിരെ സമൂഹത്തിന്റെ ജാഗ്രത ശക്തിപ്പെടുത്തുക.
യുവതലമുറയുടെ ലഹരി കായിക മൈതാനങ്ങൾ ആവട്ടെ എന്ന സന്ദേശവുമായി, സൗഹൃദവും ആരോഗ്യകരമായ ജീവിതവും തിരഞ്ഞെടുക്കാൻ യുവതലമുറയ്ക്ക് പ്രചോദനം നൽകുകയായിരുന്നു പരിപാടിയുടെ ലക്ഷ്യം.
പരിപാടി ബഹുമാനപ്പെട്ട കോങ്ങാട് എംഎൽഎയും മന്ത്രിയുമായ തുളസി ടീച്ചർ ഉദ്ഘാടനം ചെയ്തു. കോങ്ങാട് ടൗൺ വാർഡ് മെമ്പർ സി. കെ. ഹരിദാസ്, ബ്ലോക്ക് പഞ്ചായത്ത് കോങ്ങാട് ഡിവിഷൻ മെമ്പർ ശ്രീമതി ഷൈല, മുതിർന്ന മാധ്യമപ്രവർത്തകൻ എം. ബി. രാജേഷ് എന്നിവർ സന്നിഹിതരായി.
പോലീസും മാധ്യമപ്രവർത്തകരും ഒരേ ജേഴ്സിയണിഞ്ഞ്, ഒരേ സന്ദേശവുമായി കളിക്കളത്തിലിറങ്ങിയപ്പോൾ, അത് കോങ്ങാടിന്റെ സാമൂഹിക ഐക്യത്തിന്റെ മനോഹരമായ കാഴ്ചയായി മാറി.
ലഹരിക്കെതിരായ പോരാട്ടം പോലീസിന്റെ മാത്രം ഉത്തരവാദിത്വമല്ല.
അത് സമൂഹത്തിന്റെ കൂട്ടായ ഉത്തരവാദിത്വമാണ്.
കളിയിലൂടെ സൗഹൃദം വളർത്താം.
സൗഹൃദത്തിലൂടെ ജാഗ്രത വളർത്താം.
ജാഗ്രതയിലൂടെ ലഹരിയെ തോൽപ്പിക്കാം.
ലഹരിക്കെതിരെ ഒരു നാടായി ഒന്നിച്ച് നിൽക്കാം.
നാട് ഒന്നിക്കുമ്പോൾ, ലഹരിക്ക് ഇവിടെ ഇടമുണ്ടാകില്ല.

03/10/2026

ഓപ്പറേഷൻ തൂഫാൻെറ ഭാഗമായി പാലക്കാട് നോർത്ത് പോലീസും ജില്ലാ ലഹരി വിരുദ്ധ സ്ക്വാഡും (DANSAF) സംയുക്തമായി നടത്തിയ പരിശോധനയിൽ 5.594 കിലോഗ്രാം കഞ്ചാവുമായി യുവാവ് പിടിയിലായി. കോട്ടയം കറുകച്ചാൽ കങ്ങഴ കൊട്ടൻചിറ തകിടിയേൽ വീട്ടിൽ അബിൻ ടി.എസ് (Age.26) ആണ് പിടിയിലായത്.
02.10.2026 തീയ്യതി ഒലവക്കോട് റെയിൽവേ സ്റ്റേഷൻ പടിഞ്ഞാറു വശത്തുള്ള പാർസൽ ഓഫീസിന് മുൻവശത്തെ പാർക്കിംഗ് ഗ്രൗണ്ടിലേക്ക് പോകുന്ന വഴിയിൽ വെച്ചാണ് ഇയാളെ പോലീസ് സംഘം തടഞ്ഞുനിർത്തി പരിശോധിച്ചത്

02/10/2026

ലഹരിമുക്ത സമൂഹത്തിനായി ജനമൈത്രി പോലീസിൻെറ നേതൃത്വത്തിൽ നടപ്പിലാക്കുന്ന 'ഓപ്പറേഷൻ 2.0' പദ്ധതിയുടെ ഭാഗമായി കുട്ടികൾക്കായി 'തൂഫാൻ വാരിയേഴ്സ്' കൂട്ടായ്മ രൂപീകരിച്ചു. ഇതിൻെറ മുന്നോടിയായി കൊയ്യാമരക്കാട് മുതൽ ഹോസ്പിറ്റൽ ജംഗ്ഷൻ വരെ ലഹരിവിരുദ്ധ കൂട്ടയോട്ടം സംഘടിപ്പിച്ചു.
02/10/2026 തിയതി രാവിലെ 7:45-ന് നടന്ന പരിപാടി വാളയാർ ജനമൈത്രി പോലീസ് എ.എസ്.പി ആശാ ശർമ്മ IPS അവർകളുടെ നേതൃത്വത്തിലാണ് ഏകോപിപ്പിച്ചത്. പുതുശ്ശേരി ഗ്രാമപഞ്ചായത്ത് പ്രസിഡന്റ് ബിജോയ് കൂട്ടയോട്ടം ഫ്ലാഗ് ഓഫ് ചെയ്തു.
വിദ്യാർത്ഥികൾ, പോലീസുകാർ, സാമൂഹ്യപ്രവർത്തകർ എന്നിവരടങ്ങുന്ന 700 -ഓളം പേർ ലഹരിവിരുദ്ധ സന്ദേശമുയർത്തി കൂട്ടയോട്ടത്തിൽ അണിനിരന്നു. സർക്കിൾ ഇൻസ്‌പെക്ടർ രാജീവ് പങ്കെടുത്ത വിദ്യാർത്ഥികൾക്ക് ലഹരിവിരുദ്ധ പ്രതിജ്ഞ ചൊല്ലിക്കൊടുത്തു. തുടർന്ന് ലഹരിക്കെതിരെയുള്ള പോരാട്ടത്തിൽ പങ്കാളികളായ വിദ്യാർത്ഥികൾക്ക് എസ്.എച്ച്.ഓ ഹേമലത 'തൂഫാൻ വാരിയർ' ബാഡ്ജ് വിതരണം ചെയ്തു.
ലഹരി ഉപയോഗത്തിനെതിരെ വരും ദിവസങ്ങളിലും ശക്തമായ ബോധവൽക്കരണ പരിപാടികളും പ്രതിരോധ പ്രവർത്തനങ്ങളും വാളയാർ ജനമൈത്രി പോലീസിൻെറ നേതൃത്വത്തിൽ തുടരുമെന്ന് അധികൃതർ അറിയിച്ചു.

01/10/2026

28/09/2026

ലഹരിക്കെതിരെ കേരള പോലീസും തദ്ദേശ സ്വയംഭരണ വകുപ്പും സംയുക്തമായി സംഘടിപ്പിക്കുന്ന 'ഓപ്പറേഷൻ തൂഫാൻ' രണ്ടാം ഘട്ടത്തിൻെറ പാലക്കാട് നഗരസഭ തല ഉദ്ഘാടനം നഗരസഭ ചെയർമാൻ ശ്രീ. സ്മിതേഷ് പതാക ഉയർത്തി നിർവഹിച്ചു. ഉദ്ഘാടനത്തിന് ശേഷം ചടങ്ങിൽ പങ്കെടുത്തവർ ലഹരിവിരുദ്ധ പ്രതിജ്ഞയും എടുത്തു.
വേങ്ങരയിൽ നടന്ന 'തൂഫാൻ തദ്ദേശം' ജനകീയ പ്രതിരോധ നിരയുടെ സംസ്ഥാനതല ഉദ്ഘാടനം നഗരസഭ സെമിനാർ ഹാളിൽ തത്സമയം സംപ്രേഷണം ചെയ്തു. തുടർന്ന് ഓപ്പറേഷൻ തൂഫാൻ ഒന്നാം ഘട്ടം, രണ്ടാം ഘട്ടം എന്നിവയുടെ പ്രവർത്തനങ്ങളെക്കുറിച്ച് ടൗൺ സൗത്ത് ജനമൈത്രി സി.ആർ.ഒ (CRO) എ.എസ്.ഐ ശശി V.P വിശദമായ വിഷയാവതരണം നടത്തി.
ചടങ്ങിൽ പാലക്കാട് ജില്ലാ പോലീസ് മേധാവി ശ്രീ. അബ്ദുൾ റഷി IPS, സ്പെഷൽ ബ്രാഞ്ച് ഡിവൈ.എസ്.പി ശ്രീ.സന്തോഷ്കുമാർ എം, ഡി.സി.ആർ.ബി/നാർക്കോട്ടിക് സെൽ (I/C) ശ്രീ. വിശ്വംഭരൻ, ടൗൺ സൗത്ത് ഐ.എസ്.എച്ച്.ഒ ശ്രീ. അരുൺ കുമാർ, കൺട്രോൾ റൂം എസ്.ഐ ശ്രീ. വിനോദ്, ട്രാഫിക് എസ്.ഐ ശ്രീ. പത്മരാജ്, നഗരസഭ സെക്രട്ടറി ശ്രീമതി. ജസീത എന്നിവർ പങ്കെടുത്തു. നഗരസഭാ ജീവനക്കാർ, പോലീസ് ഉദ്യോഗസ്ഥർ, സ്കൂൾ വിദ്യാർത്ഥികൾ, പൊതുജനങ്ങൾ തുടങ്ങിയവരും ചടങ്ങിൽ അണിനിരന്നു.