08/10/2026
आकाशवाणी पुणे
प्रादेशिक वृत्त विभाग
प्रादेशिक बातमीपत्र
सकाळी 07 वाजून 10 मि.
दिनांक : 08.10.2026 वार : गुरुवार
1. जनतेचा विश्वास आणि कोट्यवधी कार्यकर्त्यांचा समर्पणभाव हीच आपली मोठी ऊर्जा असल्याची पंतप्रधान नरेंद्र मोदी यांची भावना
2. रिझर्व्ह बँकेनं रेपो दरात केली पाव टक्क्यांची वाढ
3. दुष्काळी परिस्थितीच्या पहाणीसाठी केंद्रीय पथक आजपासून राज्याच्या दौऱ्यावर आणि
4. गडचिरोली जिल्ह्याला नीती आयोगाच्या आकांक्षित जिल्हे कार्यक्रमांतर्गत एप्रिल ते जून या तिमाहीत प्रथम क्रमांक
पंतप्रधान
जनतेचा विश्वास आणि कोट्यवधी कार्यकर्त्यांचा समर्पणभाव हीच आपली मोठी ऊर्जा असल्याचं पंतप्रधान नरेंद्र मोदी यांनी म्हटलं आहे. मोदी यांनी गुजरातचे मुख्यमंत्री म्हणून शपथ घेतल्याला काल 25 वर्षे पूर्ण झाली. तेव्हापासून आधी राज्य सरकारचे आणि त्यानंतर केंद्र सरकारचे प्रमुख म्हणून ते गेली सलग 25 वर्षे कार्यरत आहेत. यानिमित्तानं काल नवी दिल्लीत झालेल्या विकसित भारत संकल्प सभेला संबोधित करताना पंतप्रधान बोलत होते. विकसित भारतासाठी केलेल्या विविध संकल्पाबाबत बोलताना ते म्हणाले.....
विकसित भारत का लक्ष्‍य, आत्‍मनिर्भर भारत का लक्ष्‍य, इकॉनोमी को टॉप थ्री में लाने का लक्ष्‍य, गरीबी के नामो-निशान को मिटा देने का लक्ष्‍य, राष्ट्र प्रिय इंडिया बनाने का लक्ष्‍य, हमें ऐसा भारत बनाना है, लक्ष्‍य ऐसा हो कि हर क्षेत्र में तिरंगा शान से लहराए।
सेवाज्योति
पंतप्रधान नरेंद्र मोदी यांच्या सार्वजनिक जीवनातील कारकिर्दीला 25 वर्ष पूर्ण झाल्यानिमित्त भाजपाच्या वतीनं देशभरात सेवा संकल्प अभियान, सेवा ज्योती यात्रा आणि विकसित भारत संकल्प सभांचं आयोजन करण्यात आलं होतं. मुंबईत मुख्यमंत्री देवेंद्र फडणवीस यांच्या उपस्थितीत काल विकसित भारत 2047 संकल्प सभा आणि सेवा ज्योती यात्रेचा प्रारंभ करण्यात आला. पुणे, नवी मुंबई, नाशिक, नागपूर, कोल्हापूर, सांगली, अहिल्यानगर, धुळे, जालना, बीड इथं सेवा ज्योती यात्रा, पदयात्रा, मशाल यात्रा, सभा, वृक्षारोपण आणि विविध कार्यक्रमांचं आयोजन करण्यात आलं होतं.
जनसेवा से देशसेवा
पंतप्रधान नरेंद्र मोदी यांनी जनसेवेतून राष्ट्रसेवेचा मंत्र आणि अविरत कटिबद्धता जोपासत सार्वजनिक सेवेची 25 वर्षे पूर्ण केली आहेत. या निमित्तानं 'जनसेवा से देशसेवा' या अभियाना अंतर्गत सुरू असलेल्या आमच्या विशेष मालिकेत आज ऐकुया 'अटल नवोन्मेष अभियाना' बाबत माहिती....
भारतात नवोन्मेषाची व्याप्ती वाढवण्यासाठी नीती आयोगाअंतर्गत 2016 मध्ये केंद्र सरकारनं 'अटल नवोन्मेष अभियान सुरू केलं. या अभियानाची रचना दोन स्तरांवर करण्यात आली. प्राथमिक स्तरावर अटल टिंकरिंग लॅबच्या माध्यमातून शाळांमध्ये 3D प्रिंटर्स, सेन्सर्स, रोबोटिक्स किट्स आणि इलेक्ट्रॉनिक्स साधने उपलब्ध करून देण्यात आली. आतापर्यंत 10 हजार अटल टिंकरिंग लॅब स्थापन करण्यात आल्या असून, त्यापैकी जवळपास 60 टक्के सरकारी शाळांमध्ये आणि निम्म्याहून अधिक ग्रामीण भागात आहेत. दुसऱ्या स्तरातील 72 अटल इन्क्युबेशन केंद्रं, स्टार्टअप्सना त्यांच्या उभारणीच्या काळात सहाय्य करतात. या केंद्रांनी आतापर्यंत हजारो उद्योगांना मदत केली असून, हजारो रोजगारांच्या संधीदेखील निर्माण केल्या आहेत.
मंत्रिमंडळानं विस्तारित कार्यक्षेत्रासह हे अभियान 2028 पर्यंतसुरू ठेवण्यास मान्यता दिली आहे. 2016 पर्यंत संशोधन आणि स्टार्टअपविषयक उपक्रम काही मोजक्या संस्था आणि महानगरांमध्येच केंद्रित होतं. त्यामुळे इतर भागांतील शालेय विद्यार्थ्यांना वैज्ञानिक प्रयोग करुन पाहण्याची संधी मर्यादित स्वरुपातच उपलब्ध होती. आता या अभियानानं देशभरातल्या लाखो विद्यार्थ्यांमध्ये संशोधन वृत्ती रुजवण्याचं काम केलं आहे. आकाशवाणी बातम्यांसाठी सुमेधा हर्षे, पुणे.
रेपोदर वाढ
रिझर्व्ह बँकेनं रेपो दरात काल पाव टक्क्यांची वाढ केली आहे. त्यामुळे आता रेपो दर साडेपाच टक्के झाला आहे. बँकेनं द्वैमासिक पतधोरणाचा आढावा काल जाहीर केला. फेब्रुवारी 2023नंतर रेपो दरात झालेली ही पहिलीच वाढ आहे. वाढती महागाई नियंत्रणात आणण्यासाठी तसंच जागतिक आणि भूराजकीय अनिश्चिततेचा सामना करण्यासाठी हा निर्णय घेण्यात आला आहे. चालू आर्थिक वर्षात देशाचा विकासदर 7 पूर्णांक 1 दशांश टक्के राहण्याचा अंदाज रिझर्व्ह बँकेनं व्यक्त केला आहे.
वायुसेना दिवस
94 वा भारतीय वायुसेना दिन आज साजरा केला जात आहे. 'भारतीय वायुसेना - अचूक, अभेद्य आणि नेमकी सेवा' अशी यंदाच्या वायू दल दिनाची मध्यवर्ती संकल्पना आहे. भारतीय वायु दल सतर्कता आणि दृढ निष्ठेने देशाचे रक्षण करण्यासाठी सदैव सज्ज असल्याचं वायु दल प्रमुख एअर चीफ मार्शल अमर प्रीत सिंग यांनी काल आकाशवाणीवरून दिलेल्या संदेशात म्हटलं आहे. गेल्या वर्षी 'ऑपरेशन सिंदूर'च्या माध्यमातून वायू दलाने एकात्मिक हवाई मोहिमांची निर्णायक ताकद पुन्हा एकदा अधोरेखित केली आणि देशाच्या सार्वभौमत्वाचे रक्षण करण्याची आपली क्षमता आणि सामर्थ्य सिद्ध केलं. असे गौरवोद्गार त्यांनी काढले.
कांदा दर
देशात वाजवी दरात कांद्याची पुरेशी उपलब्धता असल्याचं केंद्रीय ग्राहक व्यवहार, अन्न आणि सार्वजनिक पुरवठा मंत्रालयानं सांगितलं आहे. खरीप हंगामात कांद्याची जास्त क्षेत्रफळावर झालेली लागवड, चांगलं उत्पादन होण्यासाठी अनुकूल स्थिती, आणि कांद्याची बाजारपेठेत झालेली समाधानकारक आवक यामुळे बाजारपेठेची स्थिती अतिशय समाधानकारक झाली आहे. पुरवठ्यातील या सुधारणेमुळे कांद्याच्या दरात आधीच्या तुलनेत घसरण पाहायला मिळत आहे. महाराष्ट्रातील प्रमुख कांदा बाजारपेठांमध्ये देखील आवक चांगली झाली असून, 16 सप्टेंबरला कांद्याचा प्रति क्विंटल सुमारे 4 हजार 30 रुपये असलेला भाव जवळपास 13 टक्क्यांनी घसरून प्रति क्विंटल सुमारे 3 हजार 475 रुपयांवर आला आहे.
अमित शाह भेट
मुख्यमंत्री देवेंद्र फडणवीस यांनी काल नवी दिल्लीत केंद्रीय गृहमंत्री अमित शहा यांची भेट घेतली. यावेळी राज्यातल्या दुष्काळी परिस्थिती संदर्भात राज्य सरकारच्या वतीनं करण्यात येत असलेल्या उपाययोजनांची माहिती मुख्यमंत्र्यांनी शहा यांना दिली. राष्ट्रीय आपत्ति निवारण दलाच्या माध्यमातून महाराष्ट्राला अधिकाधिक मदत देण्यात यावी, अशी विनंती फडणवीस यांनी यावेळी केली. या भेटीनंतर त्यांनी पत्रकारांशी संवाद साधताना ते म्हणाले.....
मी विशेष विनंती अशी केली आहे, की एकूण सगळी दुष्काळाची परिस्थिती पाहता विशेष मदत आम्हाला केंद्र सरकारने करावी. माननीय गृहमंत्री मोहोदयांनीही सकारात्मकता दाखवली आहे, आणि नियमात बसवून जी जास्तीत जास्त मदत आपल्याला करता येईल ती केंद्र सरकार करेल अशा पद्धतीनं त्यांनी आश्वासित देखील केलेलं आहे.
दरम्यान, केंद्र सरकारचं पथक आजपासून 11 ऑक्टोबरपर्यंत राज्यातील दुष्काळी परिस्थितीची पाहणी करून अहवाल सादर करणार आहे.
मुख्यमंत्री
राज्य लोकसेवा आयोगाच्या परिक्षांसंदर्भात काल झालेल्या सुनावणीत, मुंबई उच्च न्यायालयानं विद्यार्थ्यांना आंदोलनाचा अधिकार असल्याचं स्पष्ट करत अभ्यासाकडे परतण्याचा सल्ला दिला; तर परीक्षा निष्पक्ष आणि पारदर्शक होतील, याची हमी देऊन विद्यार्थ्यांचा विश्वास संपादन करण्याचे निर्देश राज्य सरकारला दिले. भरती प्रक्रियेचा आराखडा तीन आठवड्यांत सादर करण्यासही न्यायालयानं सांगितलं आहे. दरम्यान, उच्च न्यायालयाच्या निर्देशानंतर पुण्यातल्या टिळक चौकातील एमपीएससी विद्यार्थ्यांचं आंदोलन स्थगित करण्यात आलं आहे. एमपीएससीच्या विद्यार्थ्यांच्या मागण्या योग्य असल्या तरी सध्या सुरू असलेल्या आंदोलनाचं स्वरूप पूर्णपणे राजकीय झालं असल्याचं मुख्यमंत्री देवेंद्र फडणवीस यांनी म्हटलं आहे. विद्यार्थ्यांशी संबंधित नसलेले मुद्दे आणि घोषणा आंदोलनात दिल्या जात असल्याचं त्यांनी सांगितलं.
आंदोलन
तर महाराष्ट्र लोकसेवा आयोगाचे अध्यक्ष विवेक भीमनवार यांच्या राजीनाम्याशिवाय आंदोलनातून माघार घेणार नाही, अशी भूमिका आमदार रोहित पवार यांनी काल पुण्यात माध्यमांशी बोलताना मांडली.
निती आयोग-गडचिरोली
गडचिरोली जिल्ह्यानं नीती आयोगाच्या आकांक्षित जिल्हे कार्यक्रमांतर्गत एप्रिल ते जून या तिमाहीच्या एकंदर डेल्टा श्रेणीमध्ये देशात प्रथम क्रमांक मिळवला आहे. कृषी आणि जलसंपदा क्षेत्रातही जिल्ह्यानं देशात अव्वल स्थान पटकावलं आहे. आरोग्य आणि पोषण, शिक्षण, कृषी आणि जलसंपदा, आर्थिक समावेशन आणि कौशल्य विकास तसंच मूलभूत पायाभूत सुविधा या पाच क्षेत्रांतील 48 निर्देशांकांमध्ये झालेल्या सुधारणांच्या आधारे ही श्रेणी निश्चित करण्यात आली आहे. या उल्लेखनीय कामगिरीबद्दल मुख्यमंत्री देवेंद्र फडणवीस आणि सहपालकमंत्री आशिष जयस्वाल यांनी जिल्हा प्रशासनाचं कौतुक केलं आहे.
स्फोटकं जप्त-गडचिरोली
महाराष्ट्र-छत्तीसगड सीमेवरील कोपर्शी जंगल परिसरात माओवाद्यांनी जमिनीत पुरून ठेवलेली 21 जिवंत काडतुसे, सात डिटोनेटर यासह इतर स्फोटक साहित्य गडचिरोली पोलिसांनी जप्त केलं. पोलीस अधीक्षक एम. रमेश यांच्या मार्गदर्शनाखाली काल विशेष अभियान पथक आणि बी. डी. डी. एस. पथकानं ही कारवाई केली.
जलतरणपटू-विक्रम
पुण्यातील लांब पल्ल्याची जलतरणपटू गीता मालुसरे हिने अवघ्या 96 दिवसांत इंग्लिश खादी, कॅटालिना चॅनेल आणि न्यूयॉर्कमधील 20 ब्रिजेस स्विम पूर्ण करून 'ओपन वॉटर स्विमिंग ट्रिपल क्राउन' पटकावला आहे. अवघ्या 96 दिवसांत ट्रिपल क्राउन मिळवणारी ती जगातील सहावी, आशियातील दुसरी आणि भारतातील पहिली महिला ठरली आहे.
क्रिकेट
भारतीय महिला क्रिकेट संघाच्या कर्णधारपदी स्मृती मंधाना हिची नियुक्ती झाली आहे. हरमनप्रीत कौरनं काल कर्णधारपदावरुन पायउतार होण्याचा निर्णय घेतल्यानंतर क्रिकेट नियामक मंडळानं मंधानाची निवड केली.
हवामान
मध्य महाराष्ट्रात तुरळक ठिकाणी आज पाऊस पडण्याची शक्यता हवामान विभागानं व्यक्त केली आहे. राज्यात इतरत्र हवामान कोरडं राहील असा अंदाज वर्तवण्यात आला आहे.
आकाशवाणी पुणे केंद्रावरचं प्रादेशिक बातमीपत्र संपलं. नमस्कार.
