13/11/2026
స్థానిక సంస్థల ఎన్నికల భద్రతపై ఏలూరు రేంజ్ ఐజీ సమీక్ష – దేవరపల్లి పోలీస్ స్టేషన్ వార్షిక తనిఖీ
స్థానిక సంస్థల ఎన్నికల నేపథ్యంలో ఈరోజు ఏలూరు రేంజ్ ఐజీ శ్రీ జి.వి.జి. అశోక్ కుమార్, ఐపీఎస్ గారు తూర్పుగోదావరి జిల్లా పోలీసు కార్యాలయాన్ని సందర్శించారు. ఈ సందర్భంగా తూర్పుగోదావరి జిల్లా ఎస్పీ శ్రీ డి. నరసింహ కిషోర్, ఐపీఎస్ గారు మరియు ఇతర పోలీసు అధికారులు ఐజీ గారికి పుష్పగుచ్ఛం అందించి స్వాగతం పలికారు. అనంతరం సాయుధ పోలీసు సిబ్బంది ఐజీ గారికి గౌరవ వందనం స్వీకరించారు.
స్థానిక సంస్థల ఎన్నికల భద్రతా ఏర్పాట్లపై సమీక్ష:
జిల్లా పోలీసు కార్యాలయ కాన్ఫరెన్స్ హాల్లో పోలీసు అధికారులతో ఐజీ గారు సమీక్ష సమావేశం నిర్వహించారు. ఇటీవల జరిగిన ఎంపీటీసీ (MPTC), జడ్పీటీసీ (ZPTC) ఎన్నికలను ఎటువంటి అవాంఛనీయ సంఘటనలు జరగకుండా ప్రశాంతంగా, విజయవంతంగా నిర్వహించినందుకు పోలీసు అధికారులు మరియు సిబ్బందిని ఆయన ప్రత్యేకంగా అభినందించారు. ఇదే స్ఫూర్తితో రాబోయే పంచాయతీ మరియు రాజమహేంద్రవరం మున్సిపల్ ఎన్నికలను కూడా సమర్థవంతంగా నిర్వహించాలని ఆదేశించారు.
స్థానిక సంస్థల ఎన్నికల నేపథ్యంలో చేపట్టిన భద్రతా ఏర్పాట్లు, శాంతిభద్రతల పరిరక్షణ మరియు ఎన్నికల విధుల నిర్వహణ తీరును ఐజీ గారు నిశితంగా పరిశీలించారు. ఎన్నికల ప్రక్రియ సజావుగా సాగేందుకు తీసుకోవాల్సిన జాగ్రత్తలపై జిల్లా అధికారులకు పలు కీలక సూచనలు చేశారు.
ఎన్నికల సమయంలో ఎలాంటి అవాంఛనీయ ఘటనలు చోటుచేసుకోకుండా సమస్యాత్మక గ్రామాలను ముందుగానే గుర్తించి పటిష్టమైన బందోబస్తు ఏర్పాటు చేయాలని, అవసరమైన ప్రాంతాల్లో డ్రోన్ నిఘా చేపట్టాలని సూచించారు. రౌడీషీటర్లు, అసాంఘిక శక్తులపై ముందస్తు బైండోవర్ చర్యలు తీసుకోవాలని ఆదేశించారు.
గ్రామస్థాయి ఇంటెలిజెన్స్ వ్యవస్థను బలోపేతం చేయడంతో పాటు, కుల, మత, రాజకీయ, ప్రాంతీయ విభేదాలను రెచ్చగొట్టే సామాజిక మాధ్యమ పోస్టులపై నిరంతర నిఘా ఉంచాలని ఆదేశించారు.
2. దేవరపల్లి పోలీస్ స్టేషన్ వార్షిక తనిఖీ:
అనంతరం జిల్లా ఎస్పీ శ్రీ డి. నరసింహ కిషోర్ గారితో కలిసి ఐజీ గారు దేవరపల్లి పోలీస్ స్టేషన్ను తనిఖీ చేసి రికార్డులు, కేసు డైరీలను పరిశీలించారు. ఈ సందర్భంగా అధికారులకు పలు దిశానిర్దేశాలు చేశారు:
• తీవ్ర నేరాలు & పోక్సో (POCSO) కేసులు: మహిళలు, చిన్నారులపై జరిగే నేరాలు, ముఖ్యంగా పోక్సో (POCSO) మరియు ఇతర తీవ్ర నేరాల (Grave Cases) దర్యాప్తులో అత్యంత నాణ్యత పాటించాలి. పకడ్బందీ సాక్ష్యాధారాలు సేకరించి, 'గుడ్ ట్రయల్ మానిటరింగ్' ద్వారా నేరస్థులకు న్యాయస్థానాల్లో కఠిన శిక్షలు పడేలా చర్యలు తీసుకోవాలి.
• లైవ్ ఇష్యూస్ (Live Issues) పరిష్కారం: గ్రామస్థాయిలో తలెత్తే వివాదాలు (Live Issues) ఎందుకు ఉత్పన్నమవుతున్నాయో మూలాలను విశ్లేషించి, అవి పెద్దవి కాకముందే శాంతియుతంగా పరిష్కరించేలా చర్యలు చేపట్టాలి.
• సీసీటీవీ కెమెరాల పర్యవేక్షణ: నేరాల నియంత్రణలో భాగంగా గ్రామాలు, కూడళ్లలో ఏర్పాటు చేసిన సీసీటీవీ కెమెరాల నియంత్రణ మరియు పర్యవేక్షణ నేరుగా పోలీస్ స్టేషన్ నుండి జరిగేలా చూడాలి.
• ప్రజలతో సత్సంబంధాలు: స్టేషన్కు వచ్చే ఫిర్యాదుదారులతో మర్యాదపూర్వకంగా ప్రవర్తించి, వారి సమస్యలకు సత్వర న్యాయం అందించాలని సూచించారు.
ఈ కార్యక్రమంలో అడిషనల్ ఎస్పీ (అడ్మిన్) శ్రీ పాటిల్ దేవరాజ్ మనీష్ ఐపీఎస్ గారు , సెంట్రల్ జోన్ ఏఎస్పీ శ్రీ తరుణ్ పహ్వా ఐపీఎస్ గారు , ఏఆర్ అడిషనల్ ఎస్పీ శ్రీ ఎల్. చెంచి రెడ్డి గారు , స్పెషల్ బ్రాంచ్ డీఎస్పీ శ్రీ బి. రామకృష్ణ గారు , జోనల్ డీఎస్పీలు, ఇన్స్పెక్టర్లు మరియు ఇతర పోలీసు అధికారులు పాల్గొన్నారు.