Luangpawn khua hi Lalbawnga Bawitlung leh a hote sah chhuah niin, k*m 1906 vel atang khan a awp a. Hetih hun lai hi British India in Mizoram min rawn awp hnu a ni tawh a.Lalbawnga chuan Sailo ni ve lo, lal a awm chu nuam ati chiah lo va, Vanphunga Sailo fapa (a hmei fa) Lalbuaia Sailo, Vanbawnga awm mek chu Luangpawn ah chuan lal a pe turin Vanphunga hnenah chuan a dil a.Lal, Vanphunga Sailo chuan Lalbawnga ngenna chu a uksak lawk lem lo a. Lalbawnga chuan tih tak zetin vawi hnih a dil leh hnu pawh chuan, Vanphunga chuan a dilna chu a la hlawhtlin tir lem lo va.Lalbawnga chuan a vawi thum nan Vanphunga chu a ngen leh ta a. A ngenna a hlawhtlin tir dawn loh chuan, Sihfa lal Thangkama pawhin Upa atana an sawm tho thu te sawiin, Luangpawna lal a awm ai chuan khaw danga Upa a awm a duh zawk thu leh, chumi khaw lamah chuan pem hial a duh thute a thlen ta a.Chuti taka a upa min thin, a fapa ang maia Tlang hran a chan tir Lalbawnga, Luangpawn dintuin a ngen takah chuan, Vanphunga chuan k*m 1912 khan a fapaLalbuaia Sailo chu Luangpawnah lalin a awm tir ta a. Tichuan Lalbawnga, Luangpawn dintu leh awptu, an lal hmasa pawh chu a pem ta lo a ni.Lalbawnga hi Khandaih lal Vanphunga Upa min a ni a, lal hian a duhsakin a ring hle a, a fapa ang maiin a duhsaka, Luangpawnah hian khua a din tir a, a awptir a ni. A chhan nia an sawi chu, khatih lai kha British lo luh tawh hnu a ni a. Lal ho rorel nikhuaah, Sailo ni ve lo ta chu, an en dan a dang deuha a hriat vang niin an ngai a ni.Lalbuaia Sailo awpna hnuaiah Lalbawnga pawh chu upa min a ni zui ta a. Rorel leh kawng hrang hranga lal tan rinawm takin hna a thawk zui a. Luangpawn khua chu In tam tak ni lo mahse, khaw nuam leh intodelh tak a ni zui ta zel a ni.
