08/10/2026
కదం తొక్కిన రైతన్నలు.. దద్దరిల్లిన ఎమ్మిగనూరు...
ఎర్రకోట రాజీవ్ రెడ్డి గారి నాయకత్వంలో మూడు మండలాల రైతులతో మహాధర్నా
నందవరం, గోనెగండ్ల, ఎమ్మిగనూరు మండలాలను తీవ్ర కరువు మండలాలుగా ప్రకటించాలని డిమాండ్
కరువు మండలాలుగా ప్రకటించాలి.. రైతులకు పంట బీమా అందించాలి.. నష్టపోయిన రైతులను ఆదుకోవాలి అంటూ ఎమ్మిగనూరు నియోజకవర్గ రైతులు కదం తొక్కారు
వైయస్ఆర్ కాంగ్రెస్ పార్టీ ఎమ్మిగనూరు నియోజకవర్గ ఇన్‌చార్జ్ శ్రీ ఎర్రకోట రాజీవ్ రెడ్డి గారి నాయకత్వంలో నందవరం, గోనెగండ్ల, ఎమ్మిగనూరు మండలాల రైతులతో కలిసి ఎమ్మిగనూరు పట్టణంలో భారీ మహాధర్నా నిర్వహించారు. మాజీ ఎమ్మెల్యే శ్రీ ఎర్రకోట చెన్నకేశవరెడ్డి గారి నివాసం దగ్గర నుండి రైతులతో కలిసి భారీ బైక్ ర్యాలీ ప్రారంభమైంది.
ర్యాలీ శివ సర్కిల్‌కు చేరుకున్న అనంతరం నాలుగు రోడ్ల కూడలిలో రైతులతో కలిసి రోడ్డుపై బైఠాయించి నిరసన తెలిపారు. రైతుల నినాదాలతో శివ సర్కిల్ దద్దరిల్లింది. మూడు మండలాలను వెంటనే తీవ్ర కరువు మండలాలుగా ప్రకటించాలి.. రైతులకు పంట బీమా అందించాలి.. రైతులను ఆదుకోవాలి అంటూ రైతులు పెద్ద ఎత్తున నినాదాలు చేశారు.
వర్షాభావంతో ఎండిపోయిన పంటలు.. తీవ్ర నష్టాల్లో రైతులు
శివ సర్కిల్ కూడలిలో రాష్ట్ర SEC సభ్యులు అయిన బనవాసి బసిరెడ్డి గారు మాట్లాడుతూ.. ఇటీవల రాష్ట్ర ప్రభుత్వం కరువు మండలాలను ప్రకటించినప్పటికీ ఎమ్మిగనూరు నియోజకవర్గ పరిధిలోని నందవరం, గోనెగండ్ల, ఎమ్మిగనూరు రూరల్ మండలాలు ఆ జాబితాలో చోటు చేసుకోలేదని తెలిపారు. ప్రారంభంలో కురిసిన వర్షాలను నమ్ముకుని రైతులు పంటలు సాగు చేశారని, అనంతరం సరైన వర్షాలు లేక పంటలు ఎండిపోయి తీవ్రంగా నష్టపోయారని పేర్కొన్నారు. సాగు కోసం పెట్టిన పెట్టుబడులు చేతికందక రైతులు ఆర్థిక ఇబ్బందుల్లో చిక్కుకున్నారని, కొందరు ఉపాధి కోసం ఇతర ప్రాంతాలకు వలస వెళ్లే పరిస్థితులు ఏర్పడ్డాయని తెలిపారు. ప్రస్తుతం అధికారిక వర్షపాతం గణాంకాల్లోనూ 2026 జూన్ 1 నుంచి అక్టోబర్ 7 వరకు కర్నూలు జిల్లాలో సాధారణ వర్షపాతంతో పోలిస్తే గణనీయమైన లోటు నమోదైనట్లు రాష్ట్ర ఆర్థిక, గణాంక శాఖ గణాంకాలు చూపిస్తున్నాయి.
పంట బీమాపై ఎమ్మెల్యే, అధికారులను రాజీవ్ రెడ్డి నిలదీత..
ఈ సందర్భంగా ఎర్రకోట రాజీవ్ రెడ్డి గారు స్థానిక ఎమ్మెల్యే బీవీ జయ నాగేశ్వరరెడ్డి గారిని ఉద్దేశించి తీవ్ర స్థాయిలో ప్రశ్నించారు. స్థానిక ఎమ్మెల్యే బీవీ జయ నాగేశ్వరరెడ్డి గారి , ప్రభుత్వ అధికారులు చెప్పిన మాటలను నమ్మి మా నియోజకవర్గంలోని రైతులు పంట బీమా కింద దాదాపు రూ.15 వేల కోట్ల రూపాయలు చెల్లించారని చెబుతున్నారు. మరి ఈరోజు అదే రైతుల పంటలు ఎండిపోయి రోడ్డెక్కితే బీవీ జయ నాగేశ్వరరెడ్డి గారు, ప్రభుత్వ అధికారులు ఏం సమాధానం చెబుతారు? రైతులు అడిగే ప్రశ్నలకు ఏం జవాబు చెబుతారు? పంట బీమా కోసం చెల్లించిన రైతులకు న్యాయం చేయకుండా ఇప్పుడు ఏ మొహం పెట్టుకుని రైతుల ముందుకు వెళ్తారు? అని రాజీవ్ రెడ్డి ప్రశ్నించారు. రైతులకు బీమా చెల్లించమని చెప్పడం మాత్రమే కాదు.. రైతులు నష్టపోయినప్పుడు వారికి బీమా పరిహారం అందేలా ప్రభుత్వంపై ఒత్తిడి తీసుకురావాల్సిన బాధ్యత స్థానిక ఎమ్మెల్యేగా బీవీ జయనాగేశ్వరరెడ్డి గారిపై ఉంది. రైతుల కష్టాలను ప్రభుత్వం దృష్టికి తీసుకెళ్లకుండా మౌనం వహిస్తే రైతుల తరఫున ప్రశ్నించాల్సింది ఎవరు?” అని నిలదీశారు.
ఎమ్మెల్యే బీవీ జయ నాగేశ్వరరెడ్డిపై తీవ్ర విమర్శలు..
రైతుల పక్షపాతిని అని చెప్పుకోవడం కాదు.. రైతు కష్టాల్లో ఉన్నప్పుడు వారి పక్షాన నిలబడాలి. ఎమ్మిగనూరు నియోజకవర్గంలోని మూడు మండలాల రైతులు కరువుతో అల్లాడుతుంటే స్థానిక ఎమ్మెల్యే బీవీ జయ నాగేశ్వరరెడ్డి గారికి రైతుల బాధలు కనిపించడం లేదా? అని రాజీవ్ రెడ్డి ప్రశ్నించారు. రైతులకు ఇన్సూరెన్స్‌లు కట్టాలని చెప్పిన మీరు.. ఇప్పుడు అదే రైతులు పంటలు నష్టపోయి రోడ్డెక్కితే ఎందుకు స్పందించడం లేదు? రైతులకు బీమా, నష్టపరిహారం అందేలా ప్రభుత్వాన్ని ఎందుకు నిలదీయడం లేదు? అని ప్రశ్నించారు. మాటల్లో రైతు పక్షపాతం చూపించడం కాదు.. రైతు కష్టాల్లో ఉన్నప్పుడు చేతల్లో అండగా నిలవాలి. ఎమ్మెల్యేగా మీ బాధ్యతను నిర్వర్తించి ఈ మూడు మండలాలను కరువు మండలాలుగా ప్రకటించేలా ప్రభుత్వంపై ఒత్తిడి తీసుకురావాలి అని రాజీవ్ రెడ్డి డిమాండ్ చేశారు.
జగన్ పాలనలో రైతులకు అండగా..
రైతు సంక్షేమంపై రాజీవ్ రెడ్డి గారు మాట్లాడుతూ.. వైయస్ జగన్ మోహన్ రెడ్డి గారి ప్రభుత్వ హయాంలో రైతు భరోసా, ఉచిత పంటల బీమా, ఇన్‌పుట్ సబ్సిడీ, రైతు భరోసా కేంద్రాల ద్వారా రైతులకు పలు విధాలుగా అండగా నిలిచారు. రైతు కష్టాల్లో ఉన్నప్పుడు ప్రభుత్వం భరోసాగా ఉండాలన్నదే అప్పటి విధానం అని పేర్కొన్నారు. వైయస్ఆర్ రైతు భరోసా, ఉచిత పంటల బీమా వంటి పథకాలు రాష్ట్ర ప్రభుత్వ అధికారిక పత్రాల్లోనూ నమోదయ్యాయి
ప్రస్తుతం కూడా అదే విధంగా కరువుతో నష్టపోయిన రైతులకు ప్రభుత్వం అండగా నిలవాలి. మూడు మండలాలను తీవ్ర కరువు మండలాలుగా ప్రకటించి రైతులకు బీమా, నష్టపరిహారం అందించాలి అని డిమాండ్ చేశారు
రైతులతో కలిసి ఎమ్మార్వో కార్యాలయానికి ర్యాలీ..
మహాధర్నా అనంతరం రైతులు, నాయకులు భారీ సంఖ్యలో ఎమ్మార్వో కార్యాలయానికి చేరుకున్నారు. డిప్యూటీ తహసీల్దార్‌ను కలిసి వినతిపత్రం అందజేశారు. నందవరం, గోనెగండ్ల, ఎమ్మిగనూరు మండలాల్లో నెలకొన్న కరువు పరిస్థితులను జిల్లా కలెక్టర్ గారి దృష్టికి వెంటనే తీసుకెళ్లాలని, మూడు మండలాలను తీవ్ర కరువు మండలాలుగా ప్రకటించేలా చర్యలు తీసుకోవాలని కోరారు. రైతులకు పంట బీమా, నష్టపరిహారం, ప్రభుత్వం ద్వారా అందాల్సిన సహాయాన్ని వెంటనే అందించాలని డిమాండ్ చేశారు
న్యాయం జరిగే వరకు పోరాటం కొనసాగుతుంది..
ఈ సందర్భంగా రాజీవ్ రెడ్డి గారు మాట్లాడుతూ..రైతులకు న్యాయం జరిగే వరకు ఈ పోరాటం ఆగదు. ప్రభుత్వం వెంటనే స్పందించాలి. మూడు మండలాలను తీవ్ర కరువు మండలాలుగా ప్రకటించాలి. పంటలు నష్టపోయిన రైతులకు బీమా, నష్టపరిహారం అందించాలి అని డిమాండ్ చేశారు. ప్రభుత్వం స్పందించకపోతే రైతులతో కలిసి జిల్లా కలెక్టర్ కార్యాలయాన్ని ముట్టడిస్తామని, అవసరమైతే స్థానిక ఎమ్మెల్యే బీవీ జయ నాగేశ్వరరెడ్డి గారి నివాసాన్ని ముట్టడించి రైతుల సమస్యను మరింత ఉధృతంగా ప్రభుత్వ దృష్టికి తీసుకెళ్తామని హెచ్చరించారు
ఈ కార్యక్రమంలో రాష్ట్ర, జిల్లా, నియోజకవర్గ, మండల స్థాయి వైయస్ఆర్ సీపీ నాయకులు, రైతు విభాగాల అధ్యక్షులు, వివిధ అనుబంధ విభాగాల అధ్యక్షులు, నాయకులు, కార్యకర్తలు, అభిమానులు, మూడు మండలాల రైతులు పెద్ద సంఖ్యలో పాల్గొని కార్యక్రమాన్ని విజయవంతం చేశారు.
