Regional Cancer Centre Thiruvananthapuram

Safe use of Antibiotics. Please be aware and spread the message

പ്രിയപ്പെട്ടവരേ

ഫെബ്രുവരി 23ന് മലയാള മനോരമ പത്രത്തിൽ പ്രസിദ്ധീകരിച്ച ഒരു വാർത്തയാണ് ഈ കുറിപ്പിനാധാരം. തിരുവനന്തപുരം ആർസിസിയിൽ ചികിത്സയിലുള്ള തിരുവനന്തപുരം സ്വദേശികളായ അമ്മയും മകനും ചികിത്സാ സഹായം തേടുന്നുവെന്നതായിരുന്നു വാർത്ത. എന്നാൽ ഈ വാർത്തയിൽ പറയുന്ന അമ്മയും മകനും ആർസിസിയിലെ രോഗികളല്ല. ചികിത്സാ സഹായം തേടുന്നതിന് അവർ നൽകിയിരിക്കുന്ന റിപ്പോർട്ടുകളത്രയും വ്യാജമായി ചമച്ചതാണ്. പ്രസ്തുത വാർത്തയിലൂടെ അവർ നിരവധിപേരിൽ നിന്നും പണംകൈപ്പറ്റിയെന്നാണ് അറിയാൻ കഴിഞ്ഞത്. ആശുപത്രിയിലേക്ക് നേരിട്ടും വാർത്തയുടെ നിജസ്ഥിതി അന്വേഷിച്ച് നിരവധി കോളുകളാണ് വരുന്നത്. പ്രമുഖ മാധ്യമ സ്ഥാപനമായിട്ടു കൂടി ഇത്തരമൊരു കാര്യത്തിൽ വേണ്ടത്ര ജാഗ്രത പുലർത്താനായില്ല എന്നത് നിർഭാഗ്യകരമാണ്. യഥാർത്ഥത്തിൽ സഹായമാവശ്യമുള്ളവരോട് പോലും പൊതുജനം മുഖം തിരിക്കാൻ ഇത്തരം പ്രവർത്തികൾ കാരണമാകും. പതിനെട്ട് വയസ്സിൽ താഴെയുള്ളവർക്ക് സംസ്ഥാന സർക്കാരിന്റെ ആരോഗ്യകിരണം പദ്ധതിയിൽ ഉൾപ്പെടുത്തി സൗജന്യ ചികിത്സയാണ് ആർസിസിയിൽ നൽകിവരുന്നത്. ഇത് സംബന്ധിച്ച് മെഡിക്കൽ കോളേജ് പൊലീസ് സ്റ്റേഷനിൽ പരാതി നൽകിയിട്ടുണ്ട്. ആർസിസിയിലെ രോഗികളുമായി ബന്ധപ്പെട്ട് ഇത്തരത്തിലുള്ള റിപ്പോർ‌ട്ടുകൾ നൽകുന്നതിന് മുൻപ് ആർസിസിയുമായി ബന്ധപ്പെടുകയോ ചികിത്സാ രേഖകൾ പരിശോധിച്ച് ഉറപ്പുവരുത്തുകയോ ചെയ്യണമെന്ന് അഭ്യർത്ഥിക്കുന്നു.
(കുറിപ്പിനാധാരമായ വാർത്ത ഒപ്പം ചേർക്കുന്നു)

Please utilize the facility

കേരളത്തിലെ ആശുപത്രി മാലിന്യങ്ങൾ ഉൾപ്പെടെ തിരുനെൽവേലിയിൽ കണ്ടെത്തിയതുമായി ബന്ധപ്പെട്ട സംഭവത്തിൽ തിരുവനന്തപുരം റീജിയണൽ കാൻസർ‌ സെന്ററിന്റെ പേരും ഉൾപ്പെട്ടതിൽ‌ ആശുപത്രിയുടെ ഭാഗത്തുനിന്നുള്ള വിശദീകരണം ഇതിനോടകം നൽകിയതാണ്. നിർഭാഗ്യകരമെന്ന് പറയട്ടെ മലയാള മനോരമ ഉൾപ്പെടെ കരാറിന്റെ മറവിൽ ആർ.സി.സിയിൽ നിന്നുള്ള ബയോമെഡിക്കൽ മാലിന്യങ്ങൾ സുനേജ് എക്കോ സിസ്റ്റംസ് ശേഖരിച്ചുവെന്ന് റിപ്പോർട്ട് ചെയ്യുന്നുണ്ട്. ഇത് തികച്ചും വസ്തുതാവിരുദ്ധമാണ്. കരാറനുസരിച്ച് അജൈവ മാലിന്യങ്ങൾ മാത്രമാണ് സുനേജ് എക്കോ സിസ്റ്റംസ് എന്ന കമ്പനിക്ക് ആർ.സി.സി കൈമാറുന്നത്. ഒരു തരത്തിലുമുള്ള ബയോമെഡിക്കൽ മാലിന്യങ്ങൾ സുനേജിന് ആർ.സി.സി നൽകുന്നില്ല. ബയോമെഡിക്കൽ മാലിന്യങ്ങൾ ഇന്ത്യൻ മെഡിക്കൽ അസോസിയേഷനു കീഴിലുള്ള IMAGE നാണ് നൽകുന്നത്. ഇതുമായി ബന്ധപ്പെട്ട പരിശോധനകളോടെല്ലാം ആർ.സി.സി പൂർണതോതിൽ സഹകരിച്ചിട്ടുണ്ട്. ഇതുമായി ബന്ധപ്പെട്ട് തെറ്റായ വിവരങ്ങൾ പ്രചരിപ്പിക്കരുതെന്ന് അഭ്യർത്ഥിക്കുന്നു.

Please note

RCC യിലേക്കുള്ള സംഭാവനകൾ അയക്കുന്നതിനായി
ഉള്ള Account details താഴെ പറയുന്നത് മാത്രമാണ്.
use the following account details for any donation to Rcc.

ആർ.സി.സിയിൽ ആദ്യ റോബോട്ടിക് ശസ്ത്രക്രിയ വിജയകരമായി നടന്നു.
കേരളത്തിൽ സർക്കാർ മേഖലയിലെ ആദ്യ റോബോട്ടിക് സർജറി ആർ.സി.സിയിൽ ബുധനാഴ്ച വിജയകരമായി നടന്നു. വൃക്കയിൽ കാൻസർ ബാധിച്ച രണ്ടു മധ്യവയസ്ക്കരായ രോഗികൾക്കാണ് ശസ്ത്രക്രിയ നടത്തിയത്. ഒരാളുടെ വൃക്ക പൂർണ്ണമായും മറ്റൊരാളുടെ വൃക്കയിൽ കാൻസർ ബാധിച്ച ഭാഗം മാത്രവും റോബോട്ടിക് സർജറി ഉപയോഗിച്ച് നീക്കം ചെയ്തു. രണ്ടു രോഗികളും സുഖം പ്രാപിച്ചു വരുന്നു.
വൻകിട സ്വകാര്യാശുപത്രികളിൽ വലിയ ചെലവുവേണ്ടിവരുന്ന റോബോട്ടിക് സർജറി അതിന്റെ മൂന്നിലൊന്നു ചെലവിലാണ് ആർ.സി.സിയിൽ നടത്തിയത്. സാധാരണക്കാരായ രോഗികളെ സംബന്ധിച്ചിടത്തോളം ഇത് വലിയ ആശ്വാസമാണ്.
അതിസങ്കീർണ്ണമായ ശസ്ത്രക്രിയകൾ കൂടുതൽ മികവോടെയും കൃത്യതയോടെയും നിർവഹിക്കാൻ സർജൻമാരെ പ്രാപ്തരാക്കുന്നതാണ് റോബോട്ടിക് സർജറി യൂണിറ്റ്. രോഗികൾക്ക് ശസ്ത്രക്രിയ മൂലമുള്ള രക്തനഷ്ടം, വേദന, അണുബാധ, ശസ്ത്രക്രിയമൂലമുള്ള മുറിവുകളുടെ വലുപ്പം, ആശുപത്രിവാസം എന്നിവ ഗണ്യമായി കുറയുകയും വേഗത്തിൽ സുഖം പ്രാപിക്കുകയും ചെയ്യും.
കഴിഞ്ഞമാസം 15 നാണ് മുഖ്യമന്ത്രി ഈ റോബോട്ടിക് ശസ്ത്രക്രിയ യൂണിറ്റിന്റെ ഔപചാരികമായ ഉദ്‌ഘാടനം നിർവഹിച്ചത്. സംസ്ഥാന സർക്കാരിന്റെ റീബിൽഡ് കേരള പദ്ധതിയിൽ നിന്നുള്ള ധനസഹായത്തോടെയാണ് ഈ യൂണിറ്റ് സജ്ജീകരിച്ചിട്ടുള്ളത്.
Da Vinci Xi System by Intuitive എന്ന ഏറ്റവും പുതിയ സാങ്കേതിക യൂണിറ്റാണ് ഇവിടെ സ്ഥാപിച്ചിട്ടുള്ളത്. ഇന്ന് ലോകവിപണിയിൽ ലഭ്യമായ ഏറ്റവും ആധുനികമായ സങ്കേതമാണിത്.
ആർ.സി.സി ഡയറക്ടർ ഡോ.രേഖ എ നായരുടെ നിർദ്ദേശമനുസരിച്ച് സർജിക്കൽ ഓങ്കോളജി വിഭാഗം മേധാവി ഡോ.ഷാജി തോമസിന്റെ നേതൃത്വത്തിൽ ഡോ.ശിവരഞ്ജിത്, ഡോ.ശ്രീവത്സൻ, ഡോ.അഖിൽ തോമസ് എന്നീ സർജൻമാർ, അനസ്തേഷ്യ വിഭാഗം മേധാവി ഡോ. മേരിതോമസ്, ഡോ. വിജിപിള്ള, സ്റ്റാഫ്‌നഴ്സുമാരായ ഇന്ദു, രശ്മി, രമ്യ, അഞ്ജലി, ബൈജുദീൻ, ഓപ്പറേഷൻ തിയേറ്റർ സാങ്കേതിക ടീമിലെ അംഗങ്ങളായ എബിൻ, സന്തോഷ്, കിരൺ, ബയോമെഡിക്കൽ എഞ്ചിനീയറിംഗ് വിഭാഗം, CSSD ജീവനക്കാർ എന്നിവർ ഉൾപ്പെട്ട ടീമാണ് ഈ ദൗത്യം നിർവഹിച്ചത്.
ഡയറക്ടർ

https://www.facebook.com/share/p/G92sJWaG5w5ufuEf/?mibextid=qi2Omg

സംസ്ഥാനത്ത് സര്‍ക്കാര്‍ മേഖലയില്‍ ആദ്യമായി റോബോട്ടിക് സര്‍ജറി സാധ്യമാക്കുന്നു. കാന്‍സര്‍ ചികിത്സയ്ക്കാണ് ആദ്യഘട്ടത്തില്‍ റോബോട്ടിക് സര്‍ജറി സജ്ജമാക്കുന്നത്. തിരുവനന്തപുരം ആര്‍.സി.സി.യിലും തലശേരി എം.സി.സി.യിലും റോബോട്ടിക് സര്‍ജറിക്കു വേണ്ടിയുള്ള ഉപകരണങ്ങള്‍ ലഭ്യമാക്കുന്നതിന് റീബിള്‍ഡ് കേരള ഇനിഷ്യേറ്റീവിലൂടെ കഴിഞ്ഞ വര്‍ഷമാണ് ഭരണാനുമതി നൽകിയത്. നൂതന സാങ്കേതിക വിദ്യകള്‍ ഉപയോഗപ്പെടുത്തി രോഗനിര്‍ണയവും ചികിത്സയും കൂടുതല്‍ സൂക്ഷ്മവും ഫലപ്രദവുമാക്കുന്നതിന്റെ ഭാഗമായാണ് ആര്‍.സി.സി.യിലും എം.സി.സി.യിലും റോബോട്ടിക് സര്‍ജറി സംവിധാനവും (60 കോടി), ഡിജിറ്റല്‍ പത്തോളജി മികവിന്റെ കേന്ദ്രങ്ങളും (18.87 കോടി) സജ്ജമാക്കുന്നത്.

ശസ്ത്രക്രിയാ വേളയില്‍ തന്നെ കാന്‍സര്‍ ബാധിത ഭാഗത്ത് കീമോതെറാപ്പി നല്‍കാന്‍ കഴിയുന്ന 1.32 കോടി രൂപ ചെലവഴിച്ചുള്ള ഹൈപെക് അഥവാ ഹൈപ്പര്‍ തെര്‍മിക് ഇന്‍ട്രാ പെരിറ്റോണിയല്‍ കീമോതെറാപ്പി ചികിത്സാ സംവിധാനവും ആര്‍.സി.സിയില്‍ സജ്ജമാക്കിയിട്ടുണ്ട്. രോഗീ സൗഹൃദമാക്കുന്നതിന്റെ ഭാഗമായാണ് പേഷ്യന്റ് വെല്‍ഫയര്‍ & സര്‍വീസ് ബ്ലോക്ക് സജ്ജമാക്കിയത്. ക്ലിനിക്കല്‍ ലാബിലെ പരിശോധനകള്‍ പൂര്‍ണമായും ഓട്ടോമേറ്റഡ് ആക്കുകയും അത് തത്സമയം നിരീക്ഷിക്കുകയും ചെയ്യാന്‍ സഹായിക്കുന്നതാണ് പുതിയ ക്ലിനിക്കല്‍ ലബോറട്ടറി ട്രാക്കിംഗ് സംവിധാനം. കേരളത്തില്‍ തന്നെ ആദ്യമായാണ് ഇത്തരമൊരു സാങ്കേതിക വിദ്യ ഉപയോഗപ്പെടുത്തുന്നത്. ഈ നൂതന പദ്ധതികളുടെ ഉദ്ഘാടനം ജനുവരി 15ന് രാവിലെ 11.30ന് ബഹു. മുഖ്യമന്ത്രി നിര്‍വഹിക്കും.