04/11/2026
🚢 വിഴിഞ്ഞം തുറമുഖത്ത് ആദ്യ ഇറക്കുമതി കണ്ടെയ്‌നർ എത്തി!
വിഴിഞ്ഞം ഇനി കയറ്റുമതിയുടെ കവാടം മാത്രമല്ല; ഇറക്കുമതി വ്യാപാരത്തിന്റെയും പുതിയ സാധ്യതകൾ തുറക്കുന്നു.
വിഴിഞ്ഞം അന്താരാഷ്ട്ര തുറമുഖത്തെത്തിയ ആദ്യ ഇൻബൗണ്ട് 40 അടി കണ്ടെയ്‌നറിൽ ചൈനയിലെ നിങ്ബോയിൽ നിന്ന് ഇറക്കുമതി ചെയ്ത വുഡ് പ്ലാസ്റ്റിക് കോമ്പോസിറ്റ് (WPC) ബോർഡുകളാണ് ഉണ്ടായിരുന്നത്.
തിരുവനന്തപുരം സ്വദേശികളായ യുവ സംരംഭകർ ആരംഭിച്ച Team Alteir Group ആണ് ഈ ചരക്ക് ഇറക്കുമതി ചെയ്തത്. ഗോകുൽ സുരേഷ്, അക്ഷയ് എം., ആദർശ് കെ. എസ്. എന്നിവരാണ് സംരംഭത്തിന് പിന്നിൽ.
ഈ ചരിത്രപരമായ ആദ്യ കണ്ടെയ്‌നറിന്റെ ഫോർവേഡിങ് ഏജന്റുമാർ തിരുവനന്തപുരം കേന്ദ്രീകരിച്ച് പ്രവർത്തിക്കുന്ന വനിതാ സംരംഭമായ BS2G Logistics & Ship Chandlers Pvt. Ltd. ആണ്. ഗൗരി ദേവാനന്ദും ഗ്രീഷ്മ ദേവാനന്ദുമാണ് ഈ സ്ഥാപനത്തിന് നേതൃത്വം നൽകുന്നത്.
വിഴിഞ്ഞം തുറക്കുന്നത് പുതിയ സംരംഭകത്വ സാധ്യതകൾ
തുറമുഖം വഴിയുള്ള ചരക്കുനീക്കം വലിയ കമ്പനികൾക്ക് മാത്രമല്ല, പ്രാദേശിക യുവ സംരംഭകർക്കും വനിതാ സംരംഭങ്ങൾക്കും പുതിയ അവസരങ്ങൾ സൃഷ്ടിക്കാമെന്നതിന്റെ ശ്രദ്ധേയമായ ഉദാഹരണമാണിത്.
ലോജിസ്റ്റിക്സ്, ഇറക്കുമതി-കയറ്റുമതി, വെയർഹൗസിങ്, ഷിപ്പിങ് സേവനങ്ങൾ തുടങ്ങി നിരവധി മേഖലകളിൽ തിരുവനന്തപുരത്ത് പുതിയ തൊഴിലവസരങ്ങൾക്കും ബിസിനസ് സംരംഭങ്ങൾക്കും വഴിയൊരുക്കാൻ വിഴിഞ്ഞത്തിന് കഴിയും.
വിഴിഞ്ഞത്തിന്റെ വളർച്ചയുടെ യഥാർത്ഥ നേട്ടം പ്രാദേശിക സംരംഭകരിലേക്കും തൊഴിലവസരങ്ങളിലേക്കും എത്തുമ്പോഴാണ്.
