CDIT Employees Organisation

24/09/2026

26/08/2026

തിരുവോണദിനാശംസകൾ...

സ്നേഹത്തിന്റെയും സന്തോഷത്തിന്റെയും സമൃദ്ധി യുടെയും ഐക്യത്തിന്റെയും സന്ദേശവുമായി വീണ്ടും ഒരു പൊന്നോണം ...

പൂക്കളത്തിന്റെ നിറവും ഓണക്കോടിയുടെ പുതുമയും പോലെ ഹൃദയത്തിലും പ്രതീക്ഷകളും സന്തോഷവും വിരിയട്ടെ....

എല്ലാവർക്കും ഹൃദയം നിറഞ്ഞ ഓണാശംസകൾ

19/08/2026

(പരമ്പര ഭാഗം 5)

*ഭീഷണികൾക്ക് മുന്നിൽ ഭയപ്പെടാത്ത ജനകീയ ചെറുത്തുനിൽപ്പ്:*

ഭീഷണിപ്പെടുത്തലുകളുടെ മുന്നിൽ കീഴടങ്ങാത്ത സി.ഇ.ഓ.

അധികാരത്തിന്റെ ഹുങ്കും, വ്യാജ ഇണ്ടാസുകളും കാട്ടി തങ്ങളെ നിശ്ശബ്ദരാക്കാമെന്ന് കരുതുന്നവർക്ക് മുന്നിൽ ഉറച്ച നിലപാടുകളോടെ പൊരുതുന്ന ഒരു ജനകീയ ചെറുത്തുനിൽപ്പാണ് ഇവിടെ രൂപപ്പെടുന്നത്. ഭീഷണികൾക്ക് മുന്നിൽ തലകുനിക്കില്ലെന്ന് പ്രഖ്യാപിക്കുന്ന സി.ഇ.ഓ.യുടെ നേതൃത്വത്തിൽ നടക്കുന്നത് ഒരു വ്യക്തിഗത പോരാട്ടമല്ല; മറിച്ചു സ്ഥാപനത്തിന്റെ നിലനിൽപ്പിനും പൊതുസമൂഹത്തിന്റെ നീതിക്കും വേണ്ടിയുള്ള വിട്ടുവീഴ്ചയില്ലാത്ത പോരാട്ടമാണ്.
കഴിഞ്ഞ പത്ത് വര്‍ഷമായി എല്ലാ ഭീഷണികളും, പ്രലോഭനങ്ങളും അവഗണിച്ച് ഈ ചെറുത്തുനില്പ് തുടരുന്ന സി-ഡിറ്റിലെ ഏക തൊഴിലാളി സംഘടനയാണ് സിഇഒ.

ഈ പ്രതിരോധവും ശബ്ദമുയർത്തലും യാതൊരുവിധ വ്യക്തിവൈരാഗ്യത്തിന്റെയും പേരിൽ നടക്കുന്നതല്ല. വ്യക്തവും ഗൗരവമേറിയതുമായ ലക്ഷ്യങ്ങളാണ് ഇതിന് പിന്നിലുള്ളത്:

*സ്ഥാപനങ്ങളുടെ സംരക്ഷണം:* തകർച്ചയുടെ വക്കിലെത്തിനിൽക്കുന്ന സ്ഥാപനങ്ങളെ വീണ്ടെടുക്കാനും അവയെ തകർച്ചയിൽ നിന്ന് സംരക്ഷിക്കാനുമുള്ള അതിജീവന പോരാട്ടം.

*പൊതുപണത്തിന്റെ സംരക്ഷണം:* അധ്വാനിക്കുന്ന അർഹതപ്പെട്ട മനുഷ്യരുടെ വിയർപ്പുതുള്ളികളായ പൊതുപണം കൊള്ളയടിക്കുന്നത് തടയാനുള്ള ശക്തമായ ഇടപെടൽ.

*അഴിമതിക്കെതിരെയുള്ള പോരാട്ടം:* വർഷങ്ങളായി സിസ്റ്റത്തിൽ വേരുറച്ചുപോയ അഴിമതികൾക്കും അനീതികൾക്കുമെതിരെയുള്ള വിട്ടുവീഴ്ചയില്ലാത്ത നിലപാട്.

*ദുർഭരണത്തിനെതിരെയുള്ള ചെറുത്തുനിൽപ്പ്:* ഭരണപരമായ കെടുകാര്യസ്ഥതയ്ക്കും, പണം കണ്ടമാനമുള്ള ധൂർത്തിനുമെതിരെ ഉയരുന്ന ശക്തമായ ശബ്ദം.

*സുതാര്യതയും ഉത്തരവാദിത്തവും:* സ്ഥാപനങ്ങളിൽ സുതാര്യതയും ജനാധിപത്യപരമായ ഭരണ ഉത്തരവാദിത്തവും ഉറപ്പുവരുത്താനുള്ള പോരാട്ടം.

*കണ്ണൂരിലെ ഓർമ്മകളും. വിട്ടുവീഴ്ചയില്ലാത്ത നിലപാടുകളും*

ജീവിതത്തിൽ പലപ്പോഴും പ്രതിസന്ധികളും, പരീക്ഷണങ്ങളും നിരയായി എത്താറുണ്ട്. കണ്ണൂരിലെ ആ രണ്ടു കൊല്ലക്കാലം അത്തരത്തിൽ വ്യക്തിപരമായും ആരോഗ്യപരമായും കടുത്ത സങ്കീർണ്ണതകൾ നിറഞ്ഞതായിരുന്നു. ഗുരുതരമായ ആരോഗ്യപ്രശ്നങ്ങൾ വേട്ടയാടിയപ്പോഴും, ന്യായമായി ലഭിക്കേണ്ട ആറു ലക്ഷത്തോളം രൂപയുടെ സാമ്പത്തിക ആനുകൂല്യങ്ങൾ നഷ്ടപ്പെട്ടപ്പോഴും തളരാൻ തയ്യാറായില്ല.

പലരും ഇത്തരം ഘട്ടങ്ങളിൽ സമ്മർദ്ദങ്ങൾക്ക് വഴങ്ങി സ്വാർത്ഥ താല്പര്യങ്ങൾക്കോ, താത്കാലിക ആശ്വാസങ്ങൾക്കോ വേണ്ടി ഒത്തുതീർപ്പുകൾക്ക് (Settlement) തുനിയാറുണ്ട്. എന്നാൽ സ്വന്തം തത്ത്വങ്ങളിലും, ശരികളിലും ഉറച്ചുനിന്നുകൊണ്ട്, ആനുകൂല്യങ്ങൾ നഷ്ടപ്പെട്ടാലും നിലപാടുകളിൽ യാതൊരു മാറ്റവുമില്ലാതെ മുന്നോട്ടുപോകാനാണ് തീരുമാനിച്ചത്. ഭീഷണികൾക്കോ, നഷ്ടങ്ങൾക്കോ മുന്നിൽ തലകുനിക്കാത്ത വിട്ടുവീഴ്ചയില്ലാത്ത നിലപാടാണ് ഏത് പ്രതീകൂല സാഹചര്യത്തിലും ശക്തിയായി നിലകൊള്ളുന്നത്.

അധികാരമുപയോഗിച്ച് വാ മൂടിക്കെട്ടാമെന്നത് വെറുമൊരു വ്യാമോഹം മാത്രമാണ്. അനീതിക്കെതിരായ ഈ ജനകീയ ചെറുത്തുനിൽപ്പും പോരാട്ടവും കൂടുതൽ ശക്തിയോടെ മുന്നോട്ടുപോകും. അഴിമതിക്കെതിരെ ശബ്ദിക്കാൻ ഭരിക്കുന്ന സർക്കാരിന്റെയും, പാർട്ടിയുടെയും, ജനപ്രതിനിധികളുടെയും പിന്തുണ ഉറപ്പാക്കിയിട്ടുണ്ട്, ഭീഷണിപ്പെടുത്തിയാൽ അടങ്ങിപ്പോകുന്ന ശബ്ദമല്ല ഇത്. ഈ ശബ്ദം ഇനിയും ഉറക്കെ ഉയർന്നുകൊണ്ടിരിക്കും!

18/08/2026

(പരമ്പര ഭാഗം 4)
ഇരട്ടത്താപ്പുകളും പഴയ നടപടികളുടെ കണ്ണാടിയും
സ്വാർത്ഥ താൽപ്പര്യങ്ങളും നഷ്ടപ്പെട്ട നീതിബോധവും

സ്വന്തം വീഴ്ചകളെയും, അധികാര ദുർവിനിയോഗങ്ങളെയും മറച്ചുവെച്ച്, തങ്ങൾക്ക് സൗകര്യപ്രദമായ രീതിയിൽ മാത്രം 'നിയമബോധത്തെയും' 'നീതിശാസ്ത്രത്തെയും' കൂട്ടുപിടിക്കുന്ന ഇരട്ടത്താപ്പുകൾ തിരിച്ചറിയാൻ പൊതുസമൂഹത്തിന് ഇന്ന് അധികം സമയം ആവശ്യമില്ല.

പഴയ നടപടികളുടെ കണ്ണാടിയും പ്രതികാര രാഷ്ട്രീയവും

മുൻപ് കോൺഗ്രസ് സംഘടനയിൽപ്പെട്ട ജീവനക്കാരെയും, ഉദ്യോഗസ്ഥരെയും യാതൊരു മാനദണ്ഡവുമില്ലാതെ, കേവലം പ്രതികാരബുദ്ധിയോടെ മാത്രം തലങ്ങും വിലങ്ങും സ്ഥലം മാറ്റിയ ഒരു ഭൂതകാലം ഇവിടെയുണ്ടായിരുന്നു. കുടുംബ ബന്ധങ്ങളോ, ആരോഗ്യസ്ഥിതിയോ, സേവന നിയമങ്ങളോ നോക്കാതെ ഭരണത്തിന്റെ സ്വാധീനം ഉപയോഗിച്ച് എതിർപക്ഷത്തുള്ള ജീവനക്കാരെ പീഡിപ്പിച്ചപ്പോൾ, അന്ന് ഈ പറയുന്ന നിയമബോധവും, നീതിയും എവിടെയായിരുന്നു ഒളിച്ചിരുന്നത്? അന്ന് സ്വന്തം കയ്യിലിരുന്ന അധികാരത്തിന്റെ കരുത്തിൽ നിയമത്തെ കാറ്റിൽപ്പറത്തിയവർ, ഇന്ന് പെട്ടെന്ന് നിയമത്തിന്റെയും ചട്ടങ്ങളുടെയും പുസ്തകം ഉയർത്തിപ്പിടിക്കുന്നത് തികഞ്ഞ വഞ്ചനയും തരംതാണ രാഷ്ട്രീയ നാടകവുമാണ്. മറ്റുള്ളവരെ ഉപദേശിക്കുന്നതിനും കുറ്റപ്പെടുത്തുന്നതിനും മുൻപ്, സ്വന്തം പഴയ നടപടികളുടെയും അധികാര ദുർവിനിയോഗങ്ങളുടെയും കണ്ണാടിയിൽ നോക്കി സ്വയം വിലയിരുത്താനുള്ള ആർജ്ജവമാണ് ഇത്തരക്കാർ ആദ്യം കാണിക്കേണ്ടത്.

സ്വാർത്ഥ താൽപ്പര്യങ്ങളും ഇരട്ടത്താപ്പും

സ്വന്തം പക്ഷത്തുള്ളവർക്കും അനുഭാവികൾക്കും നിയമവിരുദ്ധമായി ആനുകൂല്യങ്ങളും പ്രൊമോഷനുകളും തസ്തികകളും വാരിക്കോരി നൽകുമ്പോൾ മൗനം പാലിക്കുകയും, എന്നാൽ എതിർപക്ഷത്തുള്ളവരുടെയോ അർഹരായ സാധാരണക്കാരുടെയോ അർഹതപ്പെട്ട അവകാശങ്ങൾ നൽകുമ്പോൾ മാത്രം നിയമത്തിന്റെ കഠിനമായ വകുപ്പുകൾ തിരയുകയും ചെയ്യുന്ന പ്രവണതയാണ് ഇവിടെ നിലനിന്നിരുന്നത്. തങ്ങൾക്ക് അനുകൂലമാകുമ്പോൾ നിയമലംഘനങ്ങളെപ്പോലും ന്യായീകരിക്കുകയും, തങ്ങൾക്ക് എതിരാകുമ്പോൾ തത്വചിന്ത പറയുകയും ചെയ്യുന്ന ഈ ഭരണഘടനാ വിരുദ്ധ സമീപനമാണ്.

മാറുന്ന കാലവും ജനകീയ പ്രതിരോധവും

എന്നാൽ അത്തരം കടുംകൈകളും സ്വാർത്ഥ താൽപ്പര്യങ്ങളും ഇനി നടപ്പിലാകില്ല എന്ന് വ്യക്തമാക്കേണ്ട സമയം അതിക്രമിച്ചിരിക്കുന്നു. അന്ന് കാണിച്ച അനീതികൾക്കും കടുംകൈകൾക്കും ഉള്ള വ്യക്തമായ മറുപടിയാണ് ഇന്ന് നിയമപരമായും, ജനകീയമായും ഉയർന്നു വരുന്നത്. അർഹതപ്പെട്ട അവകാശങ്ങൾ സ്ഥാപിച്ചെടുക്കാനും, സ്ഥാപനങ്ങളിൽ സുതാര്യതയും നീതിയും ഉറപ്പുവരുത്താനും ജനങ്ങളും ജീവനക്കാരും ഒരുപോലെ സംഘടിക്കുമ്പോൾ, പഴയ ഇരട്ടത്താപ്പുകൾ കൊണ്ട് അതിനെ ചെറുക്കാമെന്നത് വെറും വ്യാമോഹം മാത്രമാണ്. നീതിയും നിയമവും എല്ലാവർക്കും ഒരുപോലെ ബാധകമാകുന്ന പുതിയൊരു സംസ്കാരമാണ് ഉയർന്നു വരുന്നത്.

തുടരും...

(CEO)

നാളെ: ഭീഷണികൾക്ക് മുന്നിൽ ഭയപ്പെടാത്ത ജനകീയ ചെറുത്തുനിൽപ്പ്

18/08/2026

(പരമ്പര ഭാഗം 3) വ്യക്തികളേക്കാൾ വലുതാണ് ജനകീയ സ്ഥാപനങ്ങൾ:

പൊതുസ്ഥാപനങ്ങളുടെ തകർച്ചയും വ്യക്തിപൂജയുടെ സംസ്കാരവും.

ഏതൊരു ജനാധിപത്യ സംവിധാനത്തിലും വ്യക്തികൾ താൽക്കാലികവും സ്ഥാപനങ്ങൾ ശാശ്വതവുമാണ്. വ്യക്തിഗത സ്വാധീനങ്ങൾക്കോ താല്പര്യങ്ങൾക്കോ അപ്പുറം നിയമവും ജനാധിപത്യ മൂല്യങ്ങളുമാണ് ഒരു പൊതുസ്ഥാപനത്തിന്റെ നിലനിൽപ്പിന് ആധാരം. എന്നാൽ, ഇതിന് വിപരീതമായി സ്ഥാപനങ്ങളെ വ്യക്തിപൂജയുടെയും സ്വന്തക്കാരുടെ താല്പര്യങ്ങളുടെയും കേന്ദ്രങ്ങളാക്കി മാറ്റുന്ന പ്രവണത പൊതുമേഖലയുടെ അടിത്തറയിളക്കുന്നു.

*വ്യക്തിപൂജയും സ്ഥാപനങ്ങളുടെ തകർച്ചയും*

ഒരു വ്യക്തിയെ കേന്ദ്രീകരിച്ച് ഒരു സ്ഥാപനം പ്രവർത്തിക്കാൻ തുടങ്ങുമ്പോൾ അവിടെ സുതാര്യതയും പ്രൊഫഷണലിസവും ഇല്ലാതാകുന്നു. "ഞാനില്ലെങ്കിൽ ഈ സ്ഥാപനം തകരും", "താനില്ലെങ്കിൽ ഈ ഡിവിഷന്റെ പ്രവർത്തനം നിലച്ചുപോകും" തുടങ്ങിയ ധാർഷ്ട്യങ്ങൾ ഉടലെടുക്കുന്നത് സ്ഥാപനപരമായ ഘടനകളെ വ്യക്തിഗത താത്പര്യങ്ങൾക്ക് വഴിമാറ്റിക്കൊടുക്കുമ്പോഴാണ്.

*സുതാര്യതയില്ലായ്മ:* സ്ഥാപനത്തിന്റെ ചട്ടങ്ങളും മാനദണ്ഡങ്ങളും കാറ്റിൽപ്പറത്തി വ്യക്തിഗത തീരുമാനങ്ങൾക്ക് പ്രാധാന്യം കൈവരുന്നു.

*പിൻഗാമികളുടെ അഭാവം:* ഒരു വ്യക്തിയെ മാത്രം ആശ്രയിച്ച് പദ്ധതികൾ നടത്തുമ്പോൾ, കഴിവുള്ള മറ്റ് ഉദ്യോഗസ്ഥർക്ക് അവസരങ്ങൾ നിഷേധിക്കപ്പെടുകയും 'റിസോഴ്സ് ബാക്കപ്പ്' ഇല്ലാതാവുകയും ചെയ്യുന്നു.

*ചോദ്യം ചെയ്യപ്പെടേണ്ട ധാർഷ്ട്യങ്ങളും, അനീതികളും*

പൊതുമേഖലാ സ്ഥാപനങ്ങളിൽ നടമാടുന്ന ഭരണപരമായ ക്രമക്കേടുകൾ പരിശോധിക്കപ്പെടേണ്ട സമയം അതിക്രമിച്ചിരിക്കുന്നു:

*നിയമവിരുദ്ധ നിയമനങ്ങൾ:* തസ്തികകൾ സൃഷ്ടിക്കാതെയും, യോഗ്യതാ മാനദണ്ഡങ്ങൾ പാലിക്കാതെയും ലക്ഷക്കണക്കിന് രൂപ ശമ്പളത്തിൽ നടത്തുന്ന നിയമനങ്ങൾക്ക് ഉത്തരവാദികളായവർ കണക്കുപറയേണ്ടതുണ്ട്.

*ഉത്തരവാദിത്തമില്ലായ്മ:* സ്ഥാപനത്തിന്റെ വളർച്ചയ്ക്കോ, വരുമാന വർദ്ധനവിനോ യാതൊരുവിധ സംഭാവനയും നൽകാതെ ഉയർന്ന ശമ്പളം മാത്രം കൈപ്പറ്റുന്നവരുടെ പ്രവർത്തനങ്ങൾ കൃത്യമായ പെർഫോമൻസ് ഓഡിറ്റിംഗിന് വിധേയമാക്കേണ്ടതുണ്ട്.

*യോഗ്യതകളും തസ്തികകളും:* ഒരു ശാസ്ത്രീയ പ്രബന്ധം (Journal) പോലും പ്രസിദ്ധീകരിക്കാത്തവർ "ശാസ്ത്രജ്ഞർ" എന്ന പേരിൽ വർഷങ്ങളായി പ്രമുഖ പദവികളിൽ തുടരുന്നത് അക്കാദമിക്-സാങ്കേതിക മേഖലകളോടുള്ള അനീതിയാണ്.

*മാറ്റത്തിന്റെ ആവശ്യം*

ഒരു ഉദ്യോഗസ്ഥനും നിയമത്തിന് മുകളിലല്ല. വ്യക്തികേന്ദ്രീകൃതമായ ഭരണ ശൈലി മാറി, വ്യവസ്ഥാപിതമായ ഭരണ സംവിധാനം വരേണ്ടതുണ്ട്. സ്ഥാപനങ്ങൾ വ്യക്തികളുടെ വ്യക്തിപരമായ സ്വത്തല്ല; മറിച്ച് പൊതുജനങ്ങളുടെ നികുതിപ്പണം കൊണ്ട് പ്രവർത്തിക്കുന്ന ജനകീയ സ്വത്താണ്. അഹങ്കാരത്തിന്റെയും വ്യക്തിപൂജയുടെയും സംസ്കാരം അവസാനിപ്പിച്ച് സ്ഥാപനപരമായ മൂല്യങ്ങൾ തിരിച്ചുപിടിക്കേണ്ടത് പൊതുമേഖലയുടെ നിലനിൽപ്പിന് അത്യാവശ്യമാണ്.

(സി.ഇ.ഒ)

തുടരും...

നാളെ: ഇരട്ടത്താപ്പുകളും, പഴയ നടപടികളുടെ കണ്ണാടിയും.

16/08/2026

(പരമ്പര ഭാഗം 2)
ചരിത്രത്തെ തിരുത്താനുള്ള ശ്രമങ്ങളും ശിലാഫലക രാഷ്ട്രീയവും

ശിലാഫലകങ്ങളിൽ മായാത്ത ചരിത്ര സത്യങ്ങൾ

ഒരു വികസന പദ്ധതിയുടെയോ കെട്ടിടത്തിന്റെയോ പ്രവർത്തനോദ്ഘാടനം പോലും രാഷ്ട്രീയ വിരോധത്തിന്റെ പേരിൽ അട്ടിമറിക്കാൻ ശ്രമിച്ചതുകൊണ്ട് എന്ത് നേട്ടമാണ് ഇക്കൂട്ടർ ഉണ്ടാക്കിയത്? കോൺഗ്രസ്–UDF മന്ത്രിമാരുടെ പേരുകൾ ശിലാഫലകത്തിൽ വരാതിരിക്കാൻ നടത്തിയ നീക്കങ്ങളിലൂടെ ചരിത്രം തിരുത്താൻ കഴിഞ്ഞുവോ? ഭരിക്കുന്ന കോൺഗ്രസ് നേതൃത്വത്തിന്റെ ഔദ്യോഗിക നിർദേശം പോലും കാറ്റിൽപ്പറത്തി, പത്തുവർഷത്തിലധിമായിട്ടും പണി പൂർത്തിയാകാത്ത കെട്ടിടത്തിലേക്ക് മെയ് 4-ന് പ്രവർത്തനങ്ങൾ ധൃതിപിടിച്ച് മാറ്റിയതുകൊണ്ട് ആർക്കാണ് നേട്ടമുണ്ടായത്?

# കെട്ടിടത്തിന് സ്ഥലം അനുവദിച്ചത് കോൺഗ്രസ് സർക്കാരാണ്.

# കെട്ടിടത്തിന് തറക്കല്ലിട്ടതും കോൺഗ്രസ് സർക്കാരാണ്.

# കെട്ടിടത്തിന്റെ പ്രവർത്തനോൽഘാടനം ചെയ്തതും കോൺഗ്രസ് സർക്കാർ തന്നെയാണ്.

പേരെഴുതിയ ശിലാഫലകങ്ങൾ എടുത്തുമാറ്റിയതുകൊണ്ടോ മറച്ചുവെച്ചതുകൊണ്ടോ ജനങ്ങളുടെ മനസ്സിൽ പതിഞ്ഞ ചരിത്രസത്യങ്ങൾ മായ്ച്ചുകളയാൻ കഴിയില്ല. കൊടിയേറ്റാൻ അറിയാമെങ്കിൽ, ആവേശത്തോടെ ഉത്സവം നടത്താനും ഈ പ്രസ്ഥാനത്തിന് കൃത്യമായി അറിയാം.

ഞാനില്ലെങ്കിൽ ഈ സ്ഥാപനം തകരും, പ്രോജക്റ്റുകൾ പൊളിയും' എന്ന് പ്രചരിപ്പിക്കുന്ന 'ചക്രവർത്തി സിൻഡ്രോം' ബാധിച്ച ചില ഉദ്യോഗസ്ഥർ ഇന്നും സി-ഡിറ്റിലുണ്ട്. ഇവർ സ്ഥാപനത്തിലോ, വകുപ്പ് തലപ്പത്തോ ഇല്ലാതിരുന്നപ്പോഴും പദ്ധതികൾ സുഗമമായും, ലാഭകരമായും മുന്നോട്ട് പോയിട്ടുണ്ടെന്നതാണ് യാഥാർത്ഥ്യം.

ഒരു പരിപാടിയോ, പദ്ധതിയോ നടക്കുമ്പോൾ "ഇന്ന വ്യക്തി തന്നെ വേണം" എന്ന തരത്തിലുള്ള സങ്കുചിതമായ വാശികൾക്കും, സ്വാർത്ഥതകൾക്കും ഇനി സ്ഥാനമില്ല. ആരുണ്ടെങ്കിലും ഇല്ലെങ്കിലും നടക്കേണ്ട കാര്യങ്ങൾ നിയമപരമായി നടക്കുക തന്നെ ചെയ്യും.

വിജയകരമായ പ്രൊജക്റ്റ്‌ മാനേജ്‌മെന്റിന്റെ അടിസ്ഥാന തത്വം റിസോഴ്സ് ബാക്കപ്പ് (Resource Backup) സംവിധാനമാണ്. പദ്ധതികൾ ഒരിക്കലും വ്യക്തികേന്ദ്രീകൃതമാകരുത്. ഏതെങ്കിലും ഒരു വ്യക്തിക്ക് അസൗകര്യമുണ്ടായാൽ തകരുന്നതാവരുത് സി-ഡിറ്റിലെ പ്രൊജക്ടുകൾ.

(CEO)

തുടരും...

നാളെ: വ്യക്തികളേക്കാൾ വലുതാണ് ജനകീയ സ്ഥാപനങ്ങൾ

15/08/2026

(പരമ്പര ഭാഗം 1)
അധികാരമാറ്റത്തിന്റെ ജനാധിപത്യപരമായ യാഥാർത്ഥ്യങ്ങൾ

മാറിയ കാലവും, മാറ്റം ഉൾക്കൊള്ളാൻ മടിക്കുന്ന അധികാരശക്തികളും

ഒരു ജനാധിപത്യ ഭരണക്രമത്തിൽ സർക്കാരുകളും ജനപ്രതിനിധികളും മാറുക എന്നത് സ്വാഭാവികവും നിയമപരവുമായ ഒരു പ്രക്രിയയാണ്. എന്നാൽ, ആ മാറ്റത്തിന്റെ ആഴവും, മാനങ്ങളും ഉൾക്കൊള്ളാൻ കഴിയാതെ, പഴയ അധികാര പ്രഭുത്വത്തിന്റെയും തങ്ങളുടെ മാത്രം താൽപ്പര്യങ്ങളുടെയും നിഴലിൽ ജീവിക്കുന്ന ചിലർക്കിടയിൽ ഇപ്പോഴും ഒരു തിരിച്ചറിവ് രൂപപ്പെട്ടിട്ടില്ല. "ഇത് പഴയ സർക്കാരല്ല... സർക്കാർ മാറി!" ആ കയ്പേറിയ യാഥാർത്ഥ്യം അംഗീകരിക്കാൻ ചിലർക്ക് വലിയ മനഃപ്രയാസങ്ങൾ ഉണ്ടാകാം; പക്ഷേ, അംഗീകരിക്കാതെ ഇനി മുൻപോട്ടു പോകാൻ മറ്റ് നിർവാഹങ്ങളൊന്നുമില്ല.

മന്ത്രി ഓഫീസുകളുടെയും ഭരണതലത്തിലെ കാര്യാലയങ്ങളുടെയും ഇടനാഴികളിൽ ഇരുട്ടിന്റെ മറപറ്റി, വെളുക്കെ ചിരിച്ച്, തലയിൽ മുണ്ടിട്ട് സ്വന്തം കഴിവ് തെളിയിക്കാൻ ശ്രമിക്കുന്നവർ ഒരു കാര്യം ഗൗരവത്തോടെ മനസ്സിലാക്കണം - കാലം മാറി, സർക്കാർ മാറി, അതിലുപരിയായി ഭരണനയവും മാറിപ്പോയിരിക്കുന്നു. സർക്കാർ സ്ഥാപനങ്ങളും പൊതുഖജനാവിൽ പ്രവർത്തിക്കുന്ന സംവിധാനങ്ങളും ഇനി ആരുടെയും കുടുംബസ്വത്തോ വ്യക്തിപരമായ എസ്റ്റേറ്റോ അല്ല. "ഞാനും, അപ്പനും, സുഭദ്രയും അംഗങ്ങളായി നടത്തുന്ന ഒരു സ്വകാര്യ ട്രസ്റ്റ്" പോലെ പൊതുസ്ഥാപനങ്ങളെ കൊണ്ടുനടക്കാൻ ഇനി ആരെയും അനുവദിക്കില്ല.

നിയമവും, ചട്ടവും, സുതാര്യതയും, ജനാധിപത്യപരമായ ഉത്തരവാദിത്തവും മാത്രമായിരിക്കും ഇനിമുതൽ ഭരണസംവിധാനത്തിന്റെ മുന്നോട്ടുള്ള ഏക മാനദണ്ഡം. അതിൽ വിട്ടുവീഴ്ചകൾക്ക് സ്ഥാനമില്ല.

(CEO)

തുടരും...

നാളെ : ചരിത്രത്തെ തിരുത്താനുള്ള ശ്രമങ്ങളും, ശിലാഫലക രാഷ്ട്രീയവും

15/08/2026

സ്വാതന്ത്ര്യ ദിനാശംസകൾ 🇮🇳

11/08/2026