AISF Keralam

21/09/2026

18/09/2026

സെപ്തംബർ 18
സ: വെളിയം ഭാർഗവൻ ദിനം

എ ഐ എസ് എഫ്

സിപിഐ മുൻ സംസ്ഥാന സെക്രട്ടറിയും സമർപ്പിതനായ കമ്മ്യൂണിസ്റ്റും മനുഷ്യസ്നേഹത്തിന്റെ ഉജ്ജ്വല മാതൃകയുമായ സഖാവ് വെളിയം ഭാർഗവന്റെ ഓർമ്മദിനമാണിന്ന്.
കാപട്യമോ കൃത്രിമത്വമോ കലരാത്ത, മനുഷ്യന്റെ ഹൃദയത്തെ ആഴത്തിൽ സ്പർശിക്കുന്ന സ്നേഹമായിരുന്നു സഖാവ് വെളിയം ഭാർഗവൻ.
നേതൃത്വം അധികാരത്തിന്റെ പ്രകടനമല്ലെന്നും, സഹപ്രവർത്തകരെ ചേർത്തുനിർത്തി മുന്നോട്ടുപോകുന്ന ഉത്തരവാദിത്തമാണെന്നും സഖാവ് തന്റെ ജീവിതത്തിലൂടെ തെളിയിച്ചു.
അധികാരത്തിന്റെ വഴികളിൽ സ്വന്തം ഇടം തേടാതെ, പാർട്ടിയെയും അതിന്റെ ആദർശങ്ങളെയും ജീവിതത്തിന്റെ കേന്ദ്രമാക്കി നടന്ന സഖാവ്.
വ്യക്തിപരമായ നേട്ടങ്ങളേക്കാൾ പ്രസ്ഥാനത്തിന്റെ നന്മയ്ക്കും പൊതുസമൂഹത്തിന്റെ താൽപര്യങ്ങൾക്കും പ്രാധാന്യം നൽകിയ ആ ജീവിതം ഇന്നും പൊതുപ്രവർത്തകർക്ക് വലിയൊരു രാഷ്ട്രീയ പാഠമാണ്.
സ്നേഹത്തെ ജീവിതമൂല്യമായി കാണുന്ന സാധാരണ മനുഷ്യർക്കും, കമ്മ്യൂണിസ്റ്റ് മൂല്യബോധം മുറുകെപ്പിടിച്ച് സാമൂഹിക മാറ്റത്തിനായി പോരാടുന്ന വിപ്ലവകാരികൾക്കും അദ്ദേഹത്തിന്റെ ജീവിതം എന്നും പ്രചോദനമാണ്.
സ്നേഹത്തിലൂടെ മനുഷ്യരെ ചേർത്തുനിർത്തിയ, കൂട്ടായ്മയിലൂടെ നേതൃത്വം നൽകിയ, മൂല്യങ്ങളിൽ വിട്ടുവീഴ്ച ചെയ്യാതെ ജീവിച്ച ആ ജീവിതത്തിന്റെ ഓർമ്മകൾ ഇന്നും നമ്മുടെ മുന്നോട്ടുള്ള പ്രയാണത്തിന് കരുത്തുപകരുന്നു.
സഖാവ് വെളിയം ഭാർഗവന്റെ ജ്വലിക്കുന്ന സ്മരണയ്ക്ക് മുന്നിൽ
ഒരു പിടി രക്തപുഷ്പങ്ങൾ.

16/09/2026

ക്യാമ്പസുകളെ ഭയത്തിന്റെ തടവറകളാക്കാനുള്ള നീക്കം ചെറുക്കും
ജനാധിപത്യത്തെ ചങ്ങലക്കിടാമെന്ന് കരുതേണ്ട; എഐഎസ്എഫ്

‘Students Code of Conduct’ എന്ന പേരിൽ കേരള സർവകലാശാല പുറത്തിറക്കിയിരിക്കുന്ന സർക്കുലർ വിദ്യാർത്ഥി രാഷ്ട്രീയത്തെയും സംഘടനാ പ്രവർത്തനങ്ങളെയും നിയന്ത്രിച്ച് ക്യാമ്പസുകളിലെ ജനാധിപത്യ ഇടം ചുരുക്കാനുള്ള നീക്കമാണെന്ന് എഐഎസ്എഫ് സംസ്ഥാന എക്സിക്യൂട്ടിവ് കുറ്റപ്പെടുത്തി. വിദ്യാർത്ഥി അവകാശങ്ങളെ കൂച്ചുവിലങ്ങിടുന്ന ഇത്തരം നടപടികൾ അംഗീകരിക്കാനാകില്ലെന്നും എ ഐ എസ് എഫ്.
സംഘടനാ പ്രവർത്തനങ്ങളുടെ പേരിൽ നടപടിയെടുക്കുമെന്ന ഭീഷണി ഉയർത്തി വിദ്യാർത്ഥികളെ നിശ്ശബ്ദരാക്കാനുള്ള ശ്രമമാണ് സർവകലാശാല നടത്തുന്നത്. അച്ചടക്കത്തിന്റെ മറവിൽ അവകാശങ്ങൾ കവർന്നെടുക്കാനും നിയന്ത്രണങ്ങളുടെ പേരിൽ വിയോജിപ്പിന്റെ നാവറുക്കാനും കഴിയില്ല. ജനാധിപത്യം ഭരണകൂടത്തിന്റെ അനുമതിയോടെ മാത്രം പ്രവർത്തിക്കേണ്ട സംവിധാനമല്ല.
ക്യാമ്പസുകൾ ഉത്തരവുകൾ അനുസരിച്ച് മാത്രം പ്രവർത്തിക്കുന്ന നിശ്ശബ്ദ ഇടങ്ങളല്ല. അറിവിനൊപ്പം ചോദ്യങ്ങളും സംവാദങ്ങളും വിയോജിപ്പുകളും പ്രതിഷേധങ്ങളും വളരുന്ന ജനാധിപത്യ വേദികളാണവ. വിദ്യാർത്ഥികൾക്ക് സംഘടിക്കാനും അഭിപ്രായം പ്രകടിപ്പിക്കാനും അനീതിക്കെതിരെ ശബ്ദമുയർത്താനുമുള്ള അവകാശം ഇല്ലാതാക്കുന്ന ഏത് ശ്രമവും ശക്തമായ പ്രതിരോധത്തെ നേരിടേണ്ടിവരും.
സർക്കുലറുകൾ ഇറക്കി വിദ്യാർത്ഥി രാഷ്ട്രീയത്തെ ഇല്ലാതാക്കാമെന്ന് ആരും വ്യാമോഹിക്കേണ്ട. ഭരണകൂടത്തിന്റെ ഭീഷണിക്ക് മുന്നിൽ വിദ്യാർത്ഥി ശബ്ദം മൗനമാകില്ല. നിയന്ത്രണങ്ങൾ ഏർപ്പെടുത്തുന്തോറും അവകാശങ്ങൾക്കായുള്ള പോരാട്ടം കൂടുതൽ ശക്തമാകുകയാണ് ചെയ്യുക
വിവാദ സർക്കുലർ സർവകലാശാല അടിയന്തരമായി പിൻവലിക്കണമെന്നും അല്ലാത്ത പക്ഷം ശക്തമായ പ്രക്ഷോഭങ്ങൾക്ക് നേതൃത്വം നൽകുമെന്നും എ ഐ എസ് എഫ് സംസ്ഥാന പ്രസിഡന്റ്‌ ബിബിൻ എബ്രഹാം, സെക്രട്ടറി എ അധിൻ എന്നിവർ പ്രസ്താവനയിൽ അറിയിച്ചു.

28/08/2026

ശ്രീനാരായണ ഗുരു
മനുഷ്യസമത്വത്തിന്റെ മഹത്തായ ശബ്ദം

എ ഐ എസ് എഫ്

പത്തൊമ്പതാം നൂറ്റാണ്ടിലെ കേരളം ജാതിവിവേചനവും ജന്മിത്താധിപത്യവും അന്ധവിശ്വാസങ്ങളും സാമൂഹിക അസമത്വങ്ങളും മനുഷ്യന്റെ സ്വാതന്ത്ര്യത്തെയും ആത്മാഭിമാനത്തെയും മുറിവേൽപ്പിച്ചിരുന്ന കാലമായിരുന്നു. മനുഷ്യന്റെ മൂല്യം ജനനത്താൽ നിർണയിക്കപ്പെടുന്ന ഒരു സാമൂഹിക വ്യവസ്ഥയ്ക്കെതിരെയാണ് ശ്രീനാരായണ ഗുരു തന്റെ ജീവിതംകൊണ്ട് പ്രതിരോധം തീർത്തത്.
ഗുരുവിന്റെ നവോത്ഥാന ദർശനം കേവലം ജാതിവിരുദ്ധമായ ഒരു സാമൂഹിക ഇടപെടൽ മാത്രമായിരുന്നില്ല; മനുഷ്യന്റെ അന്തസ്സിനെയും സ്വാതന്ത്ര്യത്തെയും കേന്ദ്രമാക്കിയ ഒരു താത്വിക നിലപാടായിരുന്നു. മനുഷ്യനെ മനുഷ്യനിൽ നിന്ന് വേർതിരിക്കുന്ന എല്ലാ കൃത്രിമ മതിലുകളെയും ചോദ്യം ചെയ്ത്, അറിവിലൂടെയും ആത്മബോധത്തിലൂടെയും സാമൂഹിക സംഘടനയിലൂടെയും മനുഷ്യനെ വിമോചനത്തിലേക്ക് നയിക്കുകയായിരുന്നു അദ്ദേഹത്തിന്റെ ലക്ഷ്യം.
“ഒരു ജാതി, ഒരു മതം, ഒരു ദൈവം മനുഷ്യന്” എന്ന സന്ദേശം മനുഷ്യരിലെ അടിസ്ഥാന ഏകത്വത്തെ ഉയർത്തിപ്പിടിക്കുന്ന ഒരു മാനവിക ദർശനമാണ്. ഇവിടെ ‘ജാതി’ ജനനത്തിന്റെ വേർതിരിവല്ല; മനുഷ്യന്റെ പൊതുവായ മാനവികതയാണ്. ‘മതം’ വിഭജനത്തിന്റെ മതിലല്ല; മനുഷ്യനെ നന്മയിലേക്കും ആത്മബോധത്തിലേക്കും നയിക്കുന്ന മൂല്യമാണ്. ‘ദൈവം’ പോലും മനുഷ്യനെ പരസ്പരം അകറ്റുന്ന അധികാരത്തിന്റെ പ്രതീകമല്ല, മറിച്ച് മനുഷ്യന്റെ ഉള്ളിലെ ഏകത്വത്തെ തിരിച്ചറിയാനുള്ള ആത്മീയ അന്വേഷണമാണ്.
ഗുരുവിന്റെ ചിന്തയിൽ സാമൂഹിക പരിഷ്കാരം എന്നത് പുറംലോകത്തിലെ ചില ആചാരങ്ങൾ മാറ്റുന്നതിൽ മാത്രം ഒതുങ്ങുന്നില്ല. മനുഷ്യന്റെ ചിന്താരീതിയിലും ആത്മബോധത്തിലും മാറ്റം സൃഷ്ടിക്കുകയാണ് യഥാർഥ നവോത്ഥാനം. അതുകൊണ്ടാണ് വിദ്യാഭ്യാസത്തിന് അദ്ദേഹം നൽകിയ പ്രാധാന്യം ഇത്രയും വലുതാകുന്നത്. അറിവ് മനുഷ്യനെ അന്ധവിശ്വാസത്തിൽനിന്നും അടിമത്തത്തിൽനിന്നും മോചിപ്പിക്കുകയും ആത്മാഭിമാനത്തോടെ സ്വന്തം ജീവിതത്തെ രൂപപ്പെടുത്താനുള്ള ശേഷി നൽകുകയും ചെയ്യുന്നു.
സമത്വം എന്നത് എല്ലാവരെയും ഒരേപോലെ കാണുക എന്നതിലുപരി, ഓരോ മനുഷ്യനും തുല്യമായ മാനവും അവകാശവും സ്വാതന്ത്ര്യവും അർഹിക്കുന്നുവെന്ന തിരിച്ചറിവാണ്. ഈ അർഥത്തിൽ ഗുരുവിന്റെ ദർശനം മനുഷ്യാവകാശത്തിന്റെയും സാമൂഹിക നീതിയുടെയും ആധുനിക ആശയങ്ങളുമായി ആഴത്തിൽ സംവദിക്കുന്നതാണ്.

28/08/2026

അയ്യങ്കാളി: നീതിയുടെ വഴിയിൽ കെടാത്തൊരു ഓർമ്മ

എ ഐ എസ് എഫ്

അടിച്ചമർത്തപ്പെട്ട മനുഷ്യന്റെ ആത്മാഭിമാനത്തിന് ചരിത്രത്തിൽ ശബ്ദം നൽകിയ പോരാളിയായിരുന്നു മഹാത്മാ അയ്യങ്കാളി.
അസമത്വത്തിന്റെ ഇരുട്ടിനെതിരെ അദ്ദേഹം ഉയർത്തിയ പോരാട്ടം മനുഷ്യന്റെ സ്വാതന്ത്ര്യത്തിന്റെയും സമത്വത്തിന്റെയും പ്രഖ്യാപനമായിരുന്നു.
അവകാശങ്ങൾ ആരുടെയും ഔദാര്യമല്ല, മനുഷ്യൻ ജനിക്കുന്നതോടൊപ്പം ലഭിക്കുന്ന അവകാശങ്ങളാണെന്ന് അദ്ദേഹം ജീവിതംകൊണ്ട് പഠിപ്പിച്ചു.
കാലം മാറിയാലും നീതിക്കായുള്ള പോരാട്ടത്തിന്റെ മൂല്യം മങ്ങുന്നില്ല; അയ്യങ്കാളിയുടെ ജീവിതം അതിന്റെ ഓർമ്മപ്പെടുത്തലാണ്.
മനുഷ്യനെ മനുഷ്യനായി കാണുന്നൊരു സമൂഹത്തിനായുള്ള അദ്ദേഹത്തിന്റെ സ്വപ്നം ഇന്നും നമ്മുടെ ഓർമ്മകൾക്ക് കരുത്തും പോരാട്ടങ്ങൾക്ക് വഴികാട്ടിയുമാകട്ടെ.