Kudumbashree

🔆സർഗ്ഗാത്മക പരിശീലനം ; കുടുംബശ്രീയും പ്ലേ പാഷ്യോ ചാരിറ്റബിള്‍ ട്രസ്റ്റും ധാരണയിലെത്തി✨
പരമ്പരാഗത പരിശീലന രീതികളില്‍ നിന്ന് മാറി കുടുംബശ്രീ ഭാരവാഹികള്‍, റിസോഴ്‌സ് പേഴ്‌സണ്‍മാര്‍, ജെന്‍ഡര്‍ പോയിന്റ് പേഴ്‌സണ്‍മാര്‍ തുടങ്ങിയവര്‍ക്ക് സര്‍ഗ്ഗാത്മക പരിശീലനം നല്‍കുന്നതിന് കുടുംബശ്രീയും തൃശൂർ ആസ്ഥാനമായുള്ള പ്ലേ പാഷ്യോ ചാരിറ്റബിള്‍ ട്രസ്റ്റും ധാരണയിലെത്തി. കുടുംബശ്രീ എക്‌സിക്യൂട്ടീവ് ഡയറക്ടര്‍ എച്ച്. ദിനേശന്‍ ഐ.എ.എസും പ്ലേ പാഷ്യോ ചാരിറ്റബിള്‍ ട്രസ്റ്റ് മാനേജിങ് ട്രസ്റ്റി
പ്രവീൺ നാരായണനും ഇത് സംബന്ധിച്ച ധാരണാപത്രം ഒപ്പിട്ടു.

സംസ്ഥാനത്തെ തെരഞ്ഞെടുത്ത ബ്ലോക്കുകളില്‍ ജെൻഡർ വികസനവുമായി ബന്ധപ്പെട്ട രണ്ട് ദിവസത്തെ പരിശീലനമാണ് ധാരണ പ്രകാരം പ്ലേ പാഷ്യോ നല്‍കുക. കാര്യശേഷി വികസനം, ലിംഗ സമത്വം, ലിംഗ നീതി, വ്യക്തി സ്വാതന്ത്ര്യം, സുരക്ഷ, ലഹരി വിരുദ്ധ ബോധവത്ക്കരണം എന്നീ മേഖലകളാണ് ഈ സര്‍ഗ്ഗാത്മക പരിശീലനം നല്‍കുന്നത്. പരിശീലനത്തില്‍ പങ്കെടുക്കുന്നവരുടെ നേതൃശേഷിയും ആത്മവിശ്വാസവും ആശയവിനിമയുവും സാമൂഹ്യ അവബോധവും പരിശീലനം വഴി വര്‍ദ്ധിപ്പിക്കും.

ജൂണ്‍ രണ്ടിന് കുടുംബശ്രീ സംസ്ഥാന മിഷന്‍ ഓഫീസില്‍ സംഘടിപ്പിച്ച ധാരണാപത്രം ഒപ്പിടല്‍ ചടങ്ങില്‍ കുടുംബശ്രീ അഡ്മിനിസ്‌ട്രേറ്റീവ് ഓഫീസര്‍ പ്രേം ചന്ദ് സി.പി, പ്രോഗ്രാം ഓഫീസര്‍ പ്രദീപ് കുമാര്‍ പി.എസ്, സ്റ്റേറ്റ് പ്രോഗ്രാം മാനേജര്‍ ജസ്റ്റിന്‍ മാത്യു, സ്‌റ്റേറ്റ് അസിസ്റ്റന്റ് പ്രോഗ്രാം മാനേജര്‍മാരായ തസ്‌നീം. എ, പ്രീത ജി. നായര്‍, കൃഷ്ണ കുമാരി. ആര്‍, ഓഫീസ് സെക്രട്ടറിയേറ്റ് സ്റ്റാഫ് അര്‍ജ്ജുന്‍ പ്രതാപ് ആര്‍.പി എന്നിവര്‍ പങ്കെടുത്തു.

#കുടുംബശ്രീ

🔆'കളിക്കൂട്ട'ങ്ങളിലൂടെ പുതുജീവന്‍ നേടി കുടുംബശ്രീ ബാലസഭകള്‍🔆
അല്‍ക്കൂട്ട മാതൃകയിലുള്ള കുട്ടികളുടെ സാമൂഹികാധിഷ്ഠിത സംഘടനാ സംവിധാനമായ കുടുംബശ്രീ ബാലസഭകള്‍ക്ക് ഈ അവധിക്കാലത്ത് 'കളിക്കൂട്ട'ത്തിലൂടെ പുതുജീവന്‍. കുട്ടികളുടെ സര്‍വ്വതോന്മുഖമായ വികാസത്തിന് രൂപീകരിച്ച കൂട്ടായ്മയായ ബാലസഭകള്‍ വ്യക്തിത്വ വളര്‍ച്ച, സാമൂഹിക ബോധം, സൃഷ്ടിപരമായ കഴിവുകള്‍, നേതൃത്വഗുണങ്ങള്‍ എന്നിവ വളര്‍ത്തുന്നതാണ് ലക്ഷ്യമിട്ടിരിക്കുന്നത്.

കേരളത്തിലെ മുഴുവന്‍ ഗ്രാമ, നഗര വാര്‍ഡുകളില്‍ ബാലസഭാ പ്രവര്‍ത്തനങ്ങള്‍ സജീവമാക്കുന്നതിനും പുതിയ ബാലസഭ രൂപീകരിക്കുന്നതിനും നിര്‍ജ്ജീവമായവയെ പുനരുജ്ജീവിപ്പിക്കുന്നതിനും വേണ്ടി ഈ മധ്യവേനല്‍ അവധിക്കാലത്താണ് കളിക്കൂട്ടം ക്യാമ്പയിന് തുടക്കമിട്ടത്. ഇത്തരത്തില്‍ രൂപീകരിച്ച ബാലസഭകളുള്‍പ്പെടെയുള്ള കുട്ടികളുടെ ഈ കൂട്ടായ്മകളെയെല്ലാം നാടിന്റെ പൊതുനന്മയ്ക്ക് ഉപകാരപ്പെടുന്ന തരത്തിലേക്ക് മാറ്റുക എന്നതാണ് കുടുംബശ്രീ ലക്ഷ്യമിടുന്നത്.

ഇന്ന് ലോകം നേരിടുന്ന ഏറ്റവും വലിയ ഭീഷണികളിലൊന്നായ ആഗോള താപനം, കാലാവസ്ഥാ വ്യതിയാനം എന്നീ പ്രതിസന്ധികള്‍ക്കുള്ള ശാസ്ത്രീയവും പ്രായോഗികവുമായ പരിഹാരമായ കാര്‍ബണ്‍ ന്യൂട്രല്‍ എന്ന ആശയത്തിനാണ് പ്രാധാന്യം നല്‍കിയിരിക്കുന്നത്. നാളെയുടെ പൗരന്മാരായ കുട്ടികള്‍ക്ക് പരിസ്ഥിതിയെ കുറിച്ച് അറിവ് നല്‍കുകയും അവരുടെ ജീവിതശൈലിയില്‍ മാറ്റംവരുത്തി ഒരു കാര്‍ബണ്‍ ന്യൂട്രല്‍ കേരളം കെട്ടിപ്പെടുക്കുന്നതിന് ബാലസഭകളെ പ്രാപ്തമാക്കുകയെന്നതും ഈ ക്യാമ്പയിന്റെ ലക്ഷ്യങ്ങളിലൊന്നായിരുന്നു.

#കുടുംബശ്രീ

🔆'റിഥ'ത്തിലൂടെ കുടുംബശ്രീയെ ആഴത്തിലറിയാന്‍ അവര്‍✨
പുതുതായി ചുമതലയേറ്റ കുടുംബശ്രീ സി.ഡി.എസ് ചെയര്‍പേഴ്‌സണ്‍മാരുടെ പ്രവര്‍ത്തന മികവും കാര്യശേഷിയും വര്‍ദ്ധിപ്പിക്കുകയെന്ന ലക്ഷ്യത്തോടെ സംഘടിപ്പിക്കുന്ന സംസ്ഥാനതല ത്രിദിന പരിശീലന പരിപാടി 'റിഥം 2026'ന് തുടക്കമായി. സംസ്ഥാനത്തെ മുഴുവന്‍ ജില്ലകളിലുമായി വിവിധ ബാച്ചുകളിലായി 1070 ചെയര്‍പേഴ്‌സണ്‍മാര്‍ക്കും പരിശീലനം നല്‍കാനാണ് കുടുംബശ്രീ ലക്ഷ്യമിട്ടിരിക്കുന്നത്.

സംസ്ഥാനതലത്തില്‍ പ്രത്യേക പരിശീലനം നേടിയ വിദഗ്ദ്ധരായ റിസോഴ്‌സ് പേഴ്‌സണ്‍മാരാണ് ജില്ലാതലത്തില്‍ ഈ പരിശീലന ക്ലാസ്സുകള്‍ക്ക് നേതൃത്വം നല്‍കുന്നത്. ജൂണ്‍ 15നകം എല്ലാ ജില്ലകളിലെയും പരിശീലന പരിപാടി പൂര്‍ത്തിയാക്കും. തൃശ്ശൂര്‍ ജില്ലയിലാണ് പരിശീലന പരിപാടിക്ക് തുടക്കമിട്ടത്. ഇന്നലെ ആരംഭിച്ച ആദ്യ ബാച്ച് പരിശീലനത്തില്‍ ജില്ലയിലെ 50 ചെയര്‍പേഴ്‌സണ്‍മാര്‍ പങ്കെടുക്കുന്നു. രണ്ടാം ബാച്ചില്‍ 52 പേരും പങ്കെടുക്കും. വരും ദിവസങ്ങളില്‍ മറ്റ് ജില്ലകളിലും റിഥം 2026 ആരംഭിക്കും.

പോസിറ്റീവ് മനോഭാവം, ആശയ വിനിമയ പാടവം, ഫിനാന്‍സ് മാനേജ്‌മെന്റ്, ഭരണ നിര്‍വ്വഹണം, കുടുംബശ്രീ ബൈലോ എന്നിങ്ങനെയുള്ള വിഷയങ്ങളിലാണ് പരിശീലനം.അതാത് ജില്ലകളിലെ അസിസ്റ്റന്റ് ജില്ലാ മിഷന്‍ കോര്‍ഡിനേറ്റര്‍മാര്‍, ജില്ലാ പ്രോഗ്രാം മാനേജര്‍മാര്‍ എന്നിവരുടെ നേതൃത്വത്തില്‍ പ്രത്യേക തീമാറ്റിക് അവതരണങ്ങളും ആസൂത്രണ ചര്‍ച്ചകളും സംഘടിപ്പിക്കും.

#കുടുംബശ്രീ