https://www.facebook.com/886602474530144/

DPRO Wanaparthy, ROOM NO. 29, IDOC WANAPARTHY, Wanaparthy (2026)

20/08/2026

08-08-2026
జూరాల ప్రాజెక్టు కు వరద ప్రవాహము మొదలైన వెంటనే 27 జూలై రోజు నుండి జూరాలపై ఆధారపడిన ఎత్తిపోతల పథకాలకు , నెట్టెంపాడు, భీమా, కోయిల్ సాగర్ పంపింగ్ ప్రారంభించబడింది. జూరాల కెనాల్స్ కు 29 వ తేదీ నీటి విడుదల చేయడం జరిగినది. వరద ప్రవాహము ఉన్నంతవరకు ఎటువంటి ఆటంకము లేకుండా నీటి విడుదల మరియు పంపింగ్ జరుగును.ఈరోజు వరకు జూరాల నుంచి నెట్టెంపాడు, భీమా, మరియు కోయిల్ సాగర్ ఎత్తిపోతల పథకాలకు 5.4 TMC పంపింగ్ చేయడం జరిగినది . నెట్టెంపాడు ప్రాజెక్టు లో 4 పంపులు 750 క్యూసెక్కుల సామర్థ్యం తో మొత్తం 3000 క్యూసెక్కులు ఎత్తిపోయవచ్చును. అయితే రేలంపాడు రిజర్వాయర్ లీకేజీ సమస్యవల్ల2 TMC మాత్రమే నిల్వ చేసుకునే అవకాశము కలదుమరియు గూడెం దొడ్డి రిజర్వాయ్ సామర్థ్యము కూడా 1 TMC మాత్రమే.అందువలన ఇక్కడ గత 5 సంవత్సరాలనుండి2 పంపులు మాత్రమే నడపడం జరుగుచున్నది.మొదట 2 పంపులు నడపడం జరిగినది. రిజర్వాయర్నిండినందువలన, నీటి విడుదలను అనుసరించి ఇప్పుడు ఒక పంపు నడుపబడుచున్నది.భీమా ప్రాజెక్టు స్టేజ్ 2 లో తిరుమలయపల్లి దగ్గర 3పంపులు 750 క్యూసెక్కుల సామర్థ్యం కలిగి ఉన్నాయి.వీటిలో 2 పంపులు వాడుకకు మరియు 1 స్టాండ్బై.2 పంపుల ద్వారా 1500 క్యూసెక్స్ పంపు చేయవచ్చు. అయితే శంకసముద్రం రిజర్వాయ్ పూర్తి కాక పోవడము వలన మరియు ఏనుకుంట కెపాసిటీ కేవలం 0.1 TMC ఉండడం వలనఇక్కడ కూడా 1 పంపు మాత్రమే మొదటినుండి నడపబడుచున్నది.స్టేజ్ 2 కొత్తకోట దగ్గర 318 క్యూసెక్కుల సామర్థ్యం గల 3 పంపులు కలవు. దీనిలో 1 పంపు స్టాండ్బై.2 పంపులు వాడుకకు కలవు.2 పంపులు నడపబడుచున్నవి. రిజర్వాయ్ సామర్థ్యము, మరియు నీటి నిల్వ, విడుదలను బట్టి పంపులు అవసరానికి తగినంత నడుపు తున్నాము రైతులు ఇక్కడ ముఖ్యముగా గమనించవలసిన విషయము ఏమనగా ఇప్పుడున్న వాతావరణ పరిస్థితుల్లో వరి సాగు చేయకుండా, ఆరుతడి పంటలు పండించుకోవలసిందిగా కోరుతున్నాము. రాబోయే రోజుల్లో నీటి విడుదల అనేది వరద ప్రవాహము పై ఆధారపడి ఉంటుంది. మనకు వాతావరణ శాఖ అంచనా ప్రకారం రాబోయే రోజుల్లో వర్షాలు కురిసే అవకాశాలు తక్కువగా ఉన్నాయని విషయం దృష్టిలో పెట్టుకోవాల్సినదిగా కోరుతున్నాము. నీటి విడుదల అనేది ముఖ్యముగా చెరువులు నింపుకోవడానికి మరియు త్రాగునీటి అవసరాలకు రాబోయే రోజుల్లో జాగ్రత్తపడాడానికి, పొదుపుగా వాడుకోవలసినదిగా కోరుతున్నాము.
మొహమ్మద్. రహీముద్దీన్- చీఫ్ ఇంజినీర్, వనపర్తి
సెల్ నెంబర్ -9989964419

20/08/2026

తేదీ: 07-08-2026
వనపర్తి జిల్లా

*ఎల్ నినో ప్రభావం నేపథ్యంలో రైతులు వరి పంటకు పోకుండా పంట మార్పిడి విధానాలను అనుసరించేలా ప్రోత్సహించాలి*

*ఆగస్టు 15న స్మార్ట్ రేషన్ కార్డుల పంపిణీకి ఏర్పాట్లు పూర్తి చేయాలి : జిల్లా కలెక్టర్ ఆదర్శ్ సురభి*

ఎల్‌నినో ప్రభావాన్ని దృష్టిలో ఉంచుకుని రైతులు పంట మార్పిడి విధానాలు పాటించి, వరి పంటకు పోకుండా ప్రత్యామ్నాయ పంటలు వేసే విధంగా చర్యలు తీసుకోవాలని జిల్లా కలెక్టర్ ఆదర్శ్ సురభి ఆదేశించారు.

రాష్ట్రంలో నెలకొన్న వాతావరణ పరిస్థితులు, సాగునీటి లభ్యత, పంటల సాగు, వన మహోత్సవం, స్మార్ట్ రేషన్ కార్డుల పంపిణీ తదితర అంశాలపై రాష్ట్ర నీటిపారుదల, పౌర సరఫరాల శాఖ మంత్రి ఉత్తమ్ కుమార్ రెడ్డి శుక్రవారం సహచర మంత్రులు వ్యవసాయ శాఖ మంత్రి తుమ్మల నాగేశ్వరరావు, ఎక్సైజ్, పర్యాటక శాఖ మంత్రి జూపల్లి కృష్ణారావు, రాష్ట్ర ప్రభుత్వ ప్రధాన కార్యదర్శి సంజయ్ జాజూతో కలిసి అన్ని జిల్లాల కలెక్టర్లతో హైదరాబాద్ నుండి వీడియో కాన్ఫరెన్స్ నిర్వహించారు.

ఈ వీడియో కాన్ఫరెన్స్ సమావేశానికి వనపర్తి జిల్లా కలెక్టరేట్లోని కాన్ఫరెన్స్ హాల్ నుండి జిల్లా కలెక్టర్ ఆదర్శ్ సురభి, అదనపు కలెక్టర్ స్థానిక సంస్థలు ఖీమ్య నాయక్, అదనపు కలెక్టర్ రెవెన్యూ వినోద్ కుమార్ తో కలిసి హాజరయ్యారు.

వీడియో కాన్ఫరెన్స్‌లో రాష్ట్ర పౌర సరఫరాల శాఖ మంత్రి ఉత్తమ్ కుమార్ రెడ్డి మాట్లాడుతూ, ఆగస్టు 15వ తేదీన రాష్ట్ర ముఖ్యమంత్రి ఎ. రేవంత్ రెడ్డి చేతుల మీదుగా రాష్ట్రవ్యాప్తంగా 1 కోటి 6 లక్షల స్మార్ట్ రేషన్ కార్డులను పంపిణీ చేయనున్నట్లు తెలిపారు. జిల్లాల్లో కూడా స్మార్ట్ రేషన్ కార్డుల పంపిణీకి అవసరమైన అన్ని ఏర్పాట్లు పూర్తి చేయాలని ఆదేశించారు. నీటి వనరులను అవసరాలకు అనుగుణంగా శాస్త్రీయంగా వినియోగించుకోవడంతో పాటు తాగునీటి సమస్యలు తలెత్తకుండా చర్యలు తీసుకోవాలని సూచించారు.

వ్యవసాయ శాఖ మంత్రి తుమ్మల నాగేశ్వరరావు మాట్లాడుతూ, ఎల్‌నినో ప్రభావాన్ని దృష్టిలో ఉంచుకుని రైతులు పంట మార్పిడి విధానాలు పాటించేలా వ్యవసాయ అధికారులు విస్తృత అవగాహన కల్పించాలని తెలిపారు. తక్కువ నీటితో సాగు చేయగల ప్రత్యామ్నాయ పంటలను ప్రోత్సహించాలని, భూగర్భ జలాల సంరక్షణకు చేపడుతున్న ఫామ్ పాండ్ల నిర్మాణాన్ని వేగవంతం చేయాలని ఆదేశించారు.

రాష్ట్ర ప్రభుత్వ ప్రధాన కార్యదర్శి సంజయ్ జాజు మాట్లాడుతూ, ఇరిగేషన్ అడ్వైజరీ సమావేశాలు నిర్వహించి రైతులకు ప్రాజెక్టుల్లో అందుబాటులో ఉన్న నీటి వివరాలు, సాగు ప్రణాళికలపై అవగాహన కల్పించాలని సూచించారు. ఈ సమావేశాల్లో ప్రజాప్రతినిధులు, రైతులు, సంబంధిత అధికారులు తప్పనిసరిగా పాల్గొనేలా చర్యలు తీసుకోవాలన్నారు. వన మహోత్సవం లక్ష్యాలను గడువులోగా పూర్తి చేయడంతో పాటు నాటిన మొక్కల జియో ట్యాగింగ్‌ను పూర్తి చేయాలని ఆదేశించారు. పంటల సాగు, వర్షపాతం, నీటి లభ్యతపై సమీక్ష నిర్వహించారు.

అనంతరం జిల్లా అధికారులతో కలెక్టర్ మాట్లాడుతూ ఆగస్టు 15న స్మార్ట్ రేషన్ కార్డుల పంపిణీ కార్యక్రమాన్ని నిర్వహించేందుకు అన్ని ఏర్పాట్లు చేయాలని సూచించారు. అలాగే, గ్రామ స్థాయిలో ఇరిగేషన్ అడ్వైజరీ సమావేశాలు నిర్వహించి, నీటి లభ్యతకు అనుగుణంగా పంటల సాగుపై రైతులకు విస్తృత అవగాహన కల్పించేందుకు సిద్ధం కావాలని సంబంధిత అధికారులను ఆదేశించారు.

సమావేశంలో జడ్పీ సీఈవో యాదయ్య, సిపిఓ హరికృష్ణ, నీటిపారుదల శాఖ ఎస్ ఈ చంద్రశేఖర్, ఇతర జిల్లా శాఖల అధికారులు తదితరులు పాల్గొన్నారు.

20/08/2026

తేదీ: 07-08-2026
వనపర్తి జిల్లా

*ఎల్ నినో కారణంగా జిల్లాలో రానున్న నీటి కొరతను దృష్టిలో ఉంచుకొని రైతులకు జిల్లా కలెక్టర్ ఆదర్శ్ సురభి కీలక సూచన*

*ఎల్ నినో ప్రభావం సాగునీటికి తీవ్రంగా కొరత ఏర్పడే అవకాశం*

*రైతులంతా ముందుచూపుతో వ్యవహరించి నీటి లభ్యతను దృష్టిలో ఉంచుకొని వరి పంట వేసుకోవద్దని సూచన*

*తక్కువ నీటితో పండే కందులు, వేరుశనగ, ఆముదం, ఆయిల్ పామ్ వంటి ప్రత్యామ్నాయ పంటల సాగుపై రైతులు దృష్టి సారించాలి : జిల్లా కలెక్టర్ ఆదర్శ్ సురభి*

ఎల్ నినో ప్రభావం కారణంగా జిల్లాలో రానున్న నెలల్లో నెలకొనే నీటి కొరతను దృష్టిలో ఉంచుకొని రైతులు వరి సాగుకు బదులుగా తక్కువ నీటితో పండే ప్రత్యామ్నాయ పంటలను సాగు చేయాలని జిల్లా కలెక్టర్ ఆదర్శ్ సురభి రైతులకు నేడొక ప్రకటన ద్వారా విజ్ఞప్తి చేశారు.

ఇటీవల జరిగిన ఎస్‌సీఐడబ్ల్యూఏఎం (SCIWAM) సమావేశంలో సాగు నీటి లభ్యతపై సంబంధిత నీటిపారుదల శాఖ అధికారులు తీసుకున్న నిర్ణయాలను ప్రజలకు తెలియజేస్తూ కలెక్టర్ కీలక సూచనలు చేశారు.

ప్రస్తుతం జూరాల ప్రాజెక్టు మరియు కల్వకుర్తి లిఫ్ట్ ఇరిగేషన్ పథకం (KLI)లో నీటి నిల్వలు తగినంతగా లేకపోవడంతో వచ్చే 15 రోజుల పాటు వ్యవసాయ అవసరాలకు నీటి విడుదల ఉండదని నీటిపారుదల శాఖ నిర్ణయం తీసుకున్నట్లు తెలిపారు. ప్రస్తుతం విడుదల చేస్తున్న నీరు సైతం కేవలం తాగునీటి అవసరాల దృష్ట్యా మాత్రమేనని, సాగు కోసం కాదని తెలిపారు. వరద ప్రవాహం తగ్గిన తర్వాత నీటి విడుదల ఆపివేయబడుతుందని తెలిపారు.

అదేవిధంగా, జిల్లాలో భూగర్భ జలాల పరిస్థితి కూడా ఆందోళనకరంగా ఉందని కలెక్టర్ పేర్కొన్నారు. గత ఏడాది జూలై నెలలో భూగర్భ జలాల మట్టం 5.3 మీటర్ల లోతులో ఉండగా, ఈ ఏడాది ఆగష్టు మిగిసే నాటికి అది 7.3 మీటర్ల లోతుకు పడిపోయే అవకాశాలు ఉన్నాయన్నారు. వర్షాభావ పరిస్థితులు కొనసాగితే రానున్న రోజుల్లో భూగర్భ జలాల మట్టం మరింత దిగజారే అవకాశం ఉందని హెచ్చరించారు.

ప్రాజెక్టుల్లో సైతం తగినంత నీటి నిల్వలు లేకపోతే విద్యుత్ ఉత్పత్తిపైనా ప్రభావం పడే అవకాశం ఉందని, భవిష్యత్తులో విద్యుత్ సరఫరా సమస్యలు కూడా తలెత్తే పరిస్థితి ఏర్పడవచ్చని కలెక్టర్ తెలిపారు.

ఈ పరిస్థితులను దృష్టిలో ఉంచుకొని రైతులు అధిక నీటి అవసరం ఉన్న వరి సాగును విరమించి, మినుములు, వేరుశెనగ, ఆముదం, కూరగాయలు, ఆయిల్ పామ్ తదితర తక్కువ నీటితో సాగు చేయగల ప్రత్యామ్నాయ పంటలను ఎంచుకోవాలని సూచించారు. ఇలా చేయడం ద్వారా తక్కువ నీటితోనే మెరుగైన దిగుబడులు సాధించడంతో పాటు రైతుల ఆదాయాన్ని కూడా పొందవచ్చని కలెక్టర్ పేర్కొన్నారు.

రైతులంతా ముందుచూపుతో వ్యవహరించి నీటి లభ్యతను దృష్టిలో ఉంచుకొని పంటల ఎంపిక చేసుకోవాలని జిల్లా కలెక్టర్ ఆదర్శ్ సురభి విజ్ఞప్తి చేశారు.

20/08/2026

తేదీ: 07-08-2026
వనపర్తి జిల్లా

*జిల్లా జనగణన హ్యాండ్‌బుక్‌ను అత్యంత ప్రామాణికంగా రూపొందించాలి – జిల్లా కలెక్టర్ ఆదర్శ్ సురభి*

జిల్లా జనగణన హ్యాండ్‌బుక్ (డీసీహెచ్‌బీ)ను అత్యంత ప్రామాణికంగా, నాణ్యతా ప్రమాణాలతో రూపొందించాలని జిల్లా కలెక్టర్ ఆదర్శ్ సురభి ఆదేశించారు.

శుక్రవారం హైదరాబాద్ నుంచి జిల్లా జనగణన హ్యాండ్‌బుక్ తయారీపై జనగణన సంచాలకులు భారతి హొలికేరి అన్ని జిల్లాల కలెక్టర్లతో వీడియో కాన్ఫరెన్స్ సమావేశం నిర్వహించి పలు సూచనలు చేశారు.

వనపర్తి జిల్లా కలెక్టర్ ఆదర్శ్ సురభి, అదనపు కలెక్టర్ స్థానిక సంస్థలు ఖీమ్య నాయక్ తో కలిసి కలెక్టరేట్ సమావేశ మందిరం నుంచి వీసీ లో పాల్గొన్నారు.

ఈ సందర్భంగా జనగణన సంచాలకులు మాట్లాడుతూ తెలంగాణ రాష్ట్రంలో ప్రతి జిల్లాకు ప్రత్యేక జిల్లా జనగణన హ్యాండ్‌బుక్ రూపొందిస్తున్నట్లు తెలిపారు. జిల్లా జనగణన హ్యాండ్‌బుక్‌లో జనాభా, సామాజిక, ఆర్థిక, పరిపాలనా, మౌలిక వసతులకు సంబంధించిన సమగ్ర సమాచారాన్ని పొందుపరుస్తామని చెప్పారు. భవిష్యత్ ప్రభుత్వ విధానాల రూపకల్పన, అభివృద్ధి ప్రణాళికలు, పరిశోధనలు, జనగణన విశ్లేషణలకు ఈ హ్యాండ్‌బుక్ కీలక ఆధార పత్రంగా ఉపయోగపడుతుందని పేర్కొన్నారు.

ప్రతి శాఖ నుంచి అవసరమైన సమాచారాన్ని సేకరించి, రెవెన్యూ గ్రామం, పట్టణ స్థాయి వరకు పూర్తి వివరాలు నమోదు చేయాలని ఆదేశించారు. 2025 డిసెంబర్ 31 నాటికి అందుబాటులో ఉన్న సౌకర్యాలు, మౌలిక వసతులు, శాఖల సమాచారాన్ని మాత్రమే పరిగణనలోకి తీసుకోవాలని సూచించారు. జిల్లా జనగణన హ్యాండ్‌బుక్‌లో పొందుపరిచే ప్రతి సమాచారం సంబంధిత శాఖల అధికారిక నమోదుల ఆధారంగా మాత్రమే ఉండాలని, సమాచారం సంపూర్ణంగా, ఖచ్చితంగా, ఏకరూపంగా ఉండేలా ప్రత్యేక శ్రద్ధ వహించాలని తెలిపారు.

ఆగస్టు 10 నుంచి సెప్టెంబర్ 8 వరకు సమాచార సేకరణ, పరస్పర పరిశీలన చేపట్టాలని, ప్రతి పట్టికను సంబంధిత శాఖాధికారి, జిల్లా జనగణన హ్యాండ్‌బుక్ విభాగం క్షుణ్ణంగా పరిశీలించాలని తెలిపారు. గణాంకాల్లో పొరపాట్లు, ఖాళీ వివరాలు, పునరావృత నమోదులు లేకుండా జాగ్రత్తలు తీసుకోవాలని సూచించారు.

జిల్లా కలెక్టర్ మాట్లాడుతూ జిల్లా జనగణన హ్యాండ్‌బుక్ (డీసీహెచ్‌బీ)ను అత్యంత ప్రామాణికంగా, నాణ్యతా ప్రమాణాలతో రూపొందించాలని సంబంధిత అధికారులను ఆదేశించారు. అదేవిధంగా జిల్లాలో సెన్సస్ కు సంబంధించి ఎన్యూమరేటర్లకు హానరోరియం కూడా అందజేయడం జరిగిందని తెలిపారు.

సమావేశంలో సిపిఓ హరికృష్ణ, జెడ్పి సీఈఓ యాదయ్య, ఇతర అధికారులు, తదితరులు పాల్గొన్నారు.

20/08/2026

తేది: 7-8-2026
వనపర్తి జిల్లా
*మహిళలు ఆర్థిక సాధికారత సాధించే లక్ష్యంతో అమలు చేస్తున్న శ్రీ నిధి పథకాన్ని సద్వినియోగం చేసుకోవాలి*

*శ్రీ నిధి ద్వారా తీసుకున్న రుణాలను సకాలంలో తిరిగి చెల్లించాలి, వసూలు చేసిన డబ్బులు బ్యాంకుకు కట్టకుండా దుర్వినియోగం చేసిన, మోసం చేసిన వారి నుండి రెవెన్యూ రికవరీ యాక్ట్ ద్వారా వసూలు చేయడం జరుగుతుంది*

*పాఠశాల విద్యార్థులకు ఆగస్టు 14 లోగా కనీసం ఒక జత ఏకరూప దుస్తులు అందజేయాలి - జిల్లా కలెక్టర్ ఆదర్శ్ సురభి*

స్వయం సహాయక సంఘాల మహిళలు ఆర్థిక సాధికారత సాధించేందుకు, వడ్డీ వ్యాపారాలను అరికట్టడానికి ప్రభుత్వం తక్కువ వడ్డీ తో శ్రీనిధి పథకం ద్వారా రుణాలను అందజేస్తుందని అందువల్ల వార్షిక రుణ ప్రణాళిక లక్ష్యం మేరకు రుణాలు అందించే విధంగా చర్యలు తీసుకోవాలని జిల్లా కలెక్టర్ ఆదర్శ్ సురభి జిల్లా గ్రామీణాభివృద్ధి శాఖ అధికారులను ఆదేశించారు.
శుక్రవారం ఐ.డి.ఓ సి సమావేశ మందిరంలో శ్రీ నిధి జోనల్ మేనేజర్ టి.వి.రవి కుమార్ ఆధ్వర్యంలో ఎ.పి.యం., గ్రామీణాభివృద్ధి శాఖ సిబ్బందితో ఏర్పాటు చేసిన
శ్రీనిధి సమీక్ష సమావేశానికి జిల్లా కలెక్టర్ హాజరయ్యారు.
ఈ సందర్భంగా కలెక్టర్ ఇప్పటి వరకు వనపర్తి జిల్లాలో ఎన్ని రుణాలు గ్రౌండింగ్ చేశారు, రికవరి ఎంత చేశారు అనే వివరాలను జోనల్ మేనేజర్ ద్వారా అడిగి తెలుసుకున్నారు.
జోనల్ మేనేజర్ రవి కుమార్ వవిరిస్తూ జిల్లాలో ఇప్పటి వరకు స్వయం సహాయక సంఘాల మహిళలకు, పురపాలికల్లోని మహిళా సంఘాల సభ్యులకు యూనిట్లు మంజూరు చేస్తూ రుణాలు మంజూరు చేయడం జరిగిందని కానీ మంజూరు చేసిన రుణాలు తిరిగి చెల్లించే విషయంలో వనపర్తి జిల్లా చాలా వెనుకబడి ఉన్నామని కలెక్టర్ దృష్టికి తీసుకువచ్చారు.

స్పందించిన కలెక్టర్ రుణాలు పొందిన స్వయం సహాయక సంఘాల నుండి డబ్బులు తిరిగి బ్యాంకుకు కట్టే విధంగా ఎ.పి.యం లు, వి.ఒ లు చర్యలు తీసుకోవాలని సూచించారు. రుణాలు మొండి బకాయిల కింద మారకుండా చూసుకునే బాధ్యత వి.ఓ లు తీసుకోవాలన్నారు.
స్వయం సహాయక సంఘంలో కొందరు మొండి బకాయిలు గా మారితే మిగతా సభ్యులకు బ్యాంకులు రుణాలు ఇవ్వరని అప్పుడు ఇతర మహిళలకు రుణాలు రాక ఇబ్బందులు ఎదుర్కొంటారని తెలియజేశారు.
కొందరు వి.ఓ లు స్వయం సహాయక సంఘాల సభ్యుల నుండి రుణాలు వసూలు చేసి బ్యాంకుకు చెల్లించకుండా దుర్వినియోగం చేసినారని కలెక్టర్ దృష్టికి తీసుకువచ్చారు. స్పందించిన కలెక్టర్ అలాంటి వారి పై రెవెన్యూ రికవరీ యాక్ట్ అమలు చేసి క్రిమినల్ కేసు పెట్టాలని సూచించారు.

ప్రభుత్వ పాఠశాలలో చదువుకుంటున్న విద్యార్థులకు ఏకరూప దుస్తులను ఆగస్టు 14 లోగా కనీసము ఒక జత అందజేసే విధంగా చర్యలు తీసుకోవాలని ఏటీఎంలను ఆదేశించారు. స్వయం సహాయక సంఘాల టైలర్లు కొంతమంది పాఠశాలకు వెళ్లి విద్యార్థులు బట్టల కొలతలు తీసుకోకుండానే కుట్టి పోస్తున్నట్లు తమ దృష్టికి వచ్చిందని అలా చేయడంవల్ల విద్యార్థులకు బట్టలు సరిపోక పోగా అవి నిరుపయోగంగా మారుతాయని చెప్పారు.
అందువల్ల టైలర్లు కచ్చితంగా పాఠశాలలకు వెళ్లి విద్యార్థుల కొలతలు తీసుకొని కొలతల ప
ప్రకారమే బట్టలు కుట్టాలని ఆదేశించారు.
ఈ సమావేశంలో అదనపు కలెక్టర్ లోకల్ బాడీస్ ఎన్ ఖీమ్య నాయక్, ఇంచార్జి పి.డి డి ఆర్ డి ఓ రామమహేశ్వర రెడ్డి, మహిళా సమాఖ్య అధ్యక్షురాలు ఇందిర, ఎపిడి సరోజ, ఎపియం లు తదితరులు పాల్గొన్నారు.

20/08/2026

తేదీ: 07-08-2026
వనపర్తి జిల్లా

*ఆయిల్‌పామ్ పంట ద్వారా రైతులకు దీర్ఘకాలికంగా అధిక ఆదాయం లభిస్తుంది*

*ఎల్‌నినో పరిస్థితుల్లో ప్రత్యామ్నాయ పంటల సాగుపై రైతులు దృష్టి సారించాలి – జిల్లా కలెక్టర్ ఆదర్శ్ సురభి*

*గోపాల్‌పేట మండలంలోని తాడిపర్తి గ్రామానికి చెందిన రైతు భాను పొలంలో ఆయిల్ పామ్ మొక్కలు నాటే కార్యక్రమానికి హాజరై మొక్క నాటిన కలెక్టర్*

జిల్లాలో ఎల్‌నినో ప్రభావం నేపథ్యంలో రైతులు వరికి బదులుగా ఆయిల్‌పామ్ వంటి అధిక ఆదాయాన్ని అందించే ప్రత్యామ్నాయ పంటల సాగుపై దృష్టి సారించాలని జిల్లా కలెక్టర్ ఆదర్శ్ సురభి సూచించారు.

శుక్రవారం గోపాల్‌పేట మండలంలోని తాడిపర్తి గ్రామానికి చెందిన రైతు భాను జిల్లా ఉద్యాన శాఖ సహకారంతో తన పొలంలో ఆయిల్‌పామ్ మొక్కల నాటే కార్యక్రమానికి శ్రీకారం చుట్టారు. ఈ క్రమంలో రైతు పొలంలో ఆయిల్ పామ్ మొక్కల నాటే కార్యక్రమానికి జిల్లా కలెక్టర్ హాజరయ్యారు. అనంతరం కలెక్టర్ ఆయిల్ పామ్ మొక్కను నాటి నీరు పోసి, రైతు భానుకు శుభాకాంక్షలు తెలిపారు.

ఈ సందర్భంగా రైతుతో మాట్లాడి ఎంత విస్తీర్ణంలో ఆయిల్‌పామ్ సాగు చేపడుతున్నారని, నీటి వసతి ఎలా ఉందని, సాగుకు అవసరమైన ఏర్పాట్లు పూర్తయ్యాయా అని అడిగి తెలుసుకున్నారు. మొత్తం నాలుగు ఎకరాల్లో ఆయిల్ పామ్ చేపడుతున్నట్లు, బోర్ నీటి ద్వారా సాగు చేయనున్నట్లు రైతు బదులిచారు.

ఈ సందర్భంగా కలెక్టర్ మాట్లాడుతూ, ప్రస్తుత ఎల్‌నినో పరిస్థితుల దృష్ట్యా నీటి లభ్యతకు అనుగుణంగా రైతులు ప్రత్యామ్నాయ పంటలను ఎంచుకోవడం అవసరమని తెలిపారు. ఆయిల్‌పామ్ రైతులకు దీర్ఘకాలికంగా అధిక ఆదాయాన్ని అందించే వాణిజ్య పంట అని పేర్కొన్నారు. ప్రభుత్వం అందిస్తున్న ప్రోత్సాహకాలు, సాంకేతిక సూచనలను రైతులు సద్వినియోగం చేసుకొని ఆయిల్‌పామ్ సాగును విస్తరించాలని సూచించారు. వ్యవసాయ అధికారులు గ్రామాల వారీగా రైతులకు అవగాహన కల్పిస్తూ ఆయిల్‌పామ్ సాగును మరింత ప్రోత్సహించాలని ఆదేశించారు.

అలాగే ఆయిల్‌పామ్ సాగు చేపట్టిన రైతు భానును అభినందించిన కలెక్టర్, తన అనుభవాలను ఇతర రైతులతో పంచుకుంటూ ఆయిల్‌పామ్ సాగు వల్ల కలిగే ప్రయోజనాలపై విస్తృతంగా అవగాహన కల్పించాలని సూచించారు. మరింత మంది రైతులు ఆయిల్‌పామ్ సాగు వైపు అడుగులు వేయేలా ప్రోత్సహించాలని ఆయన కోరారు.

ఈ సందర్భంగా రైతులు తమ వ్యవసాయ భూములకు వెళ్లే రహదారి సౌకర్యం కల్పించాలని కలెక్టర్‌ను కోరారు. దీనిపై స్పందించిన కలెక్టర్, బీవీజీ రామ్‌జీ పథకం కింద వ్యవసాయ రహదారి నిర్మాణానికి అవసరమైన ప్రతిపాదనలు సిద్ధం చేసి చర్యలు చేపట్టాలని సంబంధిత ఎంపీడీవోను ఆదేశించారు. రైతులకు అవసరమైన మౌలిక సదుపాయాల కల్పనకు అధికారులు ప్రత్యేక ప్రాధాన్యత ఇవ్వాలని సూచించారు.

డీ వై ఎస్ ఓ సుధీర్ రెడ్డి, డీ హెచ్ ఎస్ ఓ విజయ్ భాస్కర్, తహసీల్దార్, ఎంపీడీఓ, సర్పంచ్ లోకా రెడ్డి, ఇతర ప్రజా ప్రతినిధులు, అధికారులు పాల్గొన్నారు.

19/08/2026

మహిళలు, చిన్నారుల భద్రత అందరి బాధ్యత
- మానవ అక్రమ రవాణాపై సమాజమంతా అప్రమత్తం కావాలి
- బాధితులు వెంటనే హెల్ప్‌లైన్‌లను ఆశ్రయించాలి
- జిల్లా మహిళా శిశు సంక్షేమ శాఖ అధికారిణి సుధారాణి

మహిళలు, చిన్నారుల భద్రత ప్రతి ఒక్కరి బాధ్యత అని, మానవ అక్రమ రవాణాను అరికట్టేందుకు సమాజంలోని అన్ని వర్గాలు అప్రమత్తంగా ఉండాలని జిల్లా మహిళా, శిశు సంక్షేమ శాఖ అధికారిణి సుధారాణి పిలుపునిచ్చారు. గురువారం వనపర్తి జిల్లా ఐడీఓసీ సమావేశ మందిరంలో ప్రపంచ మానవ అక్రమ రవాణా వ్యతిరేక దినోత్సవం సందర్భంగా మహిళా, శిశు సంక్షేమ శాఖ ఆధ్వర్యంలో మిషన్ శక్తి మహిళా సాధికారత కేంద్రం అవగాహన కార్యక్రమం నిర్వహించారు. కార్యక్రమానికి జడ్పీ సీఈవో యాదయ్య ముఖ్య అతిథిగా హాజరయ్యారు. ఈ సందర్భంగా అధికారులు మాట్లాడుతూ.. మానవ అక్రమ రవాణా వల్ల మహిళలు, బాలికలు, చిన్నారులు ఎదుర్కొనే ప్రమాదాలు, రక్షణకు తీసుకోవాల్సిన జాగ్రత్తలపై అధికారులు అవగాహన కల్పించారు. ఉద్యోగాలు, విదేశీ ఉపాధి, విద్య పేరుతో తప్పుడు హామీలు ఇచ్చి మోసం చేయడం, సోషల్ మీడియా ద్వారా పరిచయాలు పెంచుకుని వల వేయడం, నకిలీ వివాహాలు, చిన్నారులను ప్రలోభపెట్టడం లేదా అపహరించడం వంటి మార్గాల ద్వారా అక్రమ రవాణా జరుగుతోందని వివరించారు. ఇలాంటి ముఠాల బారిన పడితే వ్యక్తిగత స్వేచ్ఛ కోల్పోవడం, శారీరక–మానసిక హింసకు గురికావడం, చదువు, భవిష్యత్తు దెబ్బతినడం, కుటుంబాలకు దూరమవడం వంటి తీవ్ర పరిణామాలు ఎదురవుతాయని హెచ్చరించారు. సోషల్ మీడియాలో పరిచయమయ్యే వ్యక్తులను గుడ్డిగా నమ్మవద్దని, వ్యక్తిగత ఫోటోలు, వీడియోలను పంచుకోవద్దని సూచించారు. అనుమానాస్పద వ్యక్తులు లేదా ఘటనలు కనిపించిన వెంటనే పోలీసులకు సమాచారం ఇవ్వాలని కోరారు. మానవ అక్రమ రవాణా నిర్మూలనలో ప్రభుత్వ శాఖలతో పాటు ప్రజల భాగస్వామ్యం అత్యంత కీలకమని అధికారులు పేర్కొన్నారు. అనంతరం అక్రమ రవాణాను అరికట్టేందుకు కట్టుబడి పనిచేస్తామని ప్రతిజ్ఞ చేయించారు. ఈ సందర్భంగా మోసపు ఉచ్చులో చిక్కుకున్న బాధితులు అత్యవసర సహాయం కోసం 112 (పోలీసు అత్యవసర సేవలు), 181 (మహిళల హెల్ప్‌లైన్), 1098 (బాలల హెల్ప్‌లైన్) నంబర్లను సంప్రదించాలని సూచించారు. కార్యక్రమంలో జడ్పీ డిప్యూటీ సీఈవో రామ మహేశ్వర్ రెడ్డి, హ్యూమన్ ట్రాఫికింగ్ ఎస్‌ఐ అంజాద్, జీసీడీఓ, ఏఎస్‌ఓ, సీడీపీఓలు, ఆర్‌డీఎస్ స్వచ్ఛంద సంస్థ అధ్యక్షురాలు చిన్నమ్మ థామస్, అంగన్‌వాడీ సూపర్‌వైజర్లు, డీహెచ్‌ఈడబ్ల్యూ స్టాఫ్, సఖి టీమ్, షీ టీమ్, భరోసా టీమ్, ఐసీపీఎస్ టీమ్, మహిళా పోలీసులు, అంగన్వాడీ టీచర్లు పాల్గొన్నారు.

19/08/2026

తేదీ: 06-08-2026
వనపర్తి జిల్లా

నవజాత శిశువుల ఆరోగ్యకరమైన ఎదుగుదలకు తల్లిపాలు ఎంతో కీలకమని జిల్లా కలెక్టర్ ఆదర్శ్ సురభి అన్నారు.

ప్రపంచ తల్లిపాల వారోత్సవాల సందర్భంగా గురువారం ఐడీఓసీలో తల్లిపాల ప్రాముఖ్యతపై అవగాహన కల్పించే వాల్ పోస్టర్‌ను జిల్లా కలెక్టర్ ఆవిష్కరించారు.

ఈ సందర్భంగా కలెక్టర్ మాట్లాడుతూ, పుట్టిన వెంటనే శిశువుకు తల్లిపాలు అందించడం ద్వారా శిశువు రోగనిరోధక శక్తి పెరగడంతో పాటు ఆరోగ్యవంతమైన ఎదుగుదలకు దోహదపడుతుందన్నారు. తొలి ఆరు నెలల పాటు శిశువుకు తల్లిపాలు మాత్రమే ఇవ్వాలని, అనంతరం వైద్యుల సూచనల మేరకు అనుబంధ ఆహారంతో పాటు తల్లిపాలను రెండేళ్ల వరకు కొనసాగించాలని సూచించారు.

తల్లిపాల ప్రాముఖ్యతపై ప్రతి గర్భిణి, బాలింతకు విస్తృతంగా అవగాహన కల్పించాలని సంబంధిత అధికారులను కలెక్టర్ ఆదేశించారు.

ఈ కార్యక్రమంలో జిల్లా మహిళా మరియు శిశు సంక్షేమ శాఖ అధికారి సుధారాణి, ఆర్డీఎస్ అధ్యక్షురాలు చిన్నమ్మ థామస్ సంబంధిత శాఖల అధికారులు పాల్గొన్నారు.

19/08/2026

తేదీ: 06-08-2026
వనపర్తి జిల్లా

*ఆగస్టు 15న స్వాతంత్ర్య దినోత్సవ వేడుకల నిర్వహణకు ఏర్పాట్లు ఘనంగా చేయాలి : జిల్లా కలెక్టర్ ఆదర్శ్ సురభి*

ఆగస్టు 15వ తేదీన దేశ స్వాతంత్ర్య దినోత్సవ వేడుకలను ఘనంగా నిర్వహించేందుకు పకడ్బందీగా ఏర్పాట్లు చేయాలని జిల్లా కలెక్టర్ ఆదర్శ్ సురభి ఆదేశించారు.

గురువారం జిల్లా కలెక్టర్ ఐడీఓసీ కాన్ఫరెన్స్ హాల్ లో స్వాతంత్ర్య దినోత్సవ వేడుకల ఏర్పాట్లపై జిల్లా అధికారులతో సమన్వయ సమావేశం నిర్వహించి, అధికారులకు పలు కీలక సూచనలు చేశారు.

ఈ సందర్భంగా కలెక్టర్ మాట్లాడుతూ ఆగస్టు 15వ తేదీన దేశ స్వాతంత్ర్య దినోత్సవం సందర్భంగా నిర్వహించే వేడుకలను ఘనంగా నిర్వహించేందుకు పకడ్బందీ ఏర్పాట్లు చేయాలన్నారు. ప్రజాప్రతినిధులు, ప్రముఖులకు, అధికారులకు, ఆహ్వానితులందరికీ ఆహ్వానాలు, అందేలా చర్యలు తీసుకోవాలని సూచించారు. వేడుకలకు వేదిక ఏర్పాట్లు సహా హాజరయ్యే ప్రజాప్రతినిధులు, అధికారులు, ప్రజలకు అవసరమైన సౌకర్యాలు పకడ్బందీగా కల్పించాలన్నారు. పోలీసు గౌరవ వందనంతో పాటు, బందోబస్తు కల్పించాలని పోలీసు అధికారులకు సూచించారు.

వేడుకల ప్రాంగణంలో తాగునీరు, పారిశుద్ధ్య ఏర్పాట్లు పకడ్బందీగా చేపట్టాలని ఆదేశించారు. నిరంతర విద్యుత్ సరఫరా ఉండేలా విద్యుత్ శాఖ అధికారులు చర్యలు తీసుకోవాలని సూచించారు. సంస్కృతి, సంప్రదాయాలను ప్రతిబింబించేలా సాంస్కృతిక కార్యక్రమాలు నిర్వహించాలని పేర్కొన్నారు. వివిధ సంక్షేమ, అభివృద్ధి కార్యక్రమాలు ప్రతిబింబించేలా వివిధ శాఖల స్టాళ్లను ఏర్పాటు చేయాలన్నారు. వేడుకల ఏర్పాట్లలో ఎక్కడ ఎలాంటి పొరపాట్లు జరగకుండా విజయవంతంగా నిర్వహించాలని సంబంధిత అధికారులకు కలెక్టర్ సూచించారు.

సమావేశంలో అదనపు కలెక్టర్ స్థానిక సంస్థలు ఖీమ్య నాయక్, అదనపు కలెక్టర్ రెవెన్యూ వినోద్ కుమార్, ఏఆర్ అదనపు ఎస్పీ వీరారెడ్డి, జెడ్పి సీఈవో యాదయ్య, సిపిఓ హరికృష్ణ, ఆర్డీవో సుబ్రహ్మణ్యం ఇతర అధికారులు తదితరులు పాల్గొన్నారు.

19/08/2026

తేదీ: 06-08-2026
వనపర్తి జిల్లా

*ప్రస్తుతం కురుస్తున్న చిన్నపాటి వర్షాలను చూసి రైతులు వరి పంట వేసి మోసపోకుండా వారికి ఎల్ నినో పరిస్థితులపై అవగాహన కల్పించాలి*

*వరి సాగుకు బదులుగా రైతులు వేరుశెనగ, ఆయిల్ పామ్, ఉల్లి, కూరగాయలు, కంది, మినుములు సాగు చేసేలా ప్రోత్సహించాలి*

*ఎల్‌నినో పరిస్థితులను దృష్టిలో ఉంచుకుని పంటల మార్పిడిపై ప్రత్యేక దృష్టి సారించాలి: జిల్లా కలెక్టర్ ఆదర్శ్ సురభి*

ఎల్‌నినో ప్రభావం నేపథ్యంలో వరికి ప్రత్యామ్నాయ పంటల సాగును విస్తృతంగా ప్రోత్సహించి, పంటల మార్పిడిని విజయవంతం చేయాలని జిల్లా కలెక్టర్ ఆదర్శ్ సురభి వ్యవసాయ, ఉద్యానవన శాఖ అధికారులను ఆదేశించారు.

గురువారం కలెక్టరేట్ సమావేశ మందిరంలో వ్యవసాయ, ఉద్యానవన శాఖ అధికారులతో ఎల్లినో ప్రభావం పై కలెక్టర్ సమీక్ష సమావేశం నిర్వహించారు.

కలెక్టర్ మాట్లాడుతూ ప్రస్తుతం కురుస్తున్న వర్షాలను నమ్ముకుని రైతులు పూర్తిగా వరి సాగుపైనే ఆధారపడకుండా వ్యవసాయ అధికారులు క్షేత్రస్థాయిలో విస్తృత అవగాహన కల్పించాలని సూచించారు. జిల్లాలోని ప్రతి మండల వ్యవసాయ అధికారి (MAO) పంటల మార్పిడిని తమ బాధ్యతగా తీసుకొని రైతులకు అవగాహన కల్పించాలని సూచించారు.

కొద్ది రోజులుగా వర్షాలు కురుస్తున్నాయని రైతులు వరి సాగుపై మొగ్గు చూపినా, రానున్న వాస్తవ పరిస్థితులను వారికి వివరించి ప్రత్యామ్నాయ పంటల సాగువైపు మళ్లించేలా కృషి చేయాలని అన్నారు. వాతావరణ శాఖ అంచనాల ప్రకారం రానున్న రోజుల్లో వర్షాభావ పరిస్థితులు ఏర్పడే అవకాశం ఉన్నందున ప్రత్యామ్నాయ పంటల సాగుపై రైతులను ప్రోత్సహించాలని తెలిపారు.

జూరాల ప్రాజెక్టు ప్రస్తుతం నిండిన నేపథ్యంలో దానిని నమ్ముకుని రైతులు వరి పంటకు వెళ్లడం సబబు కాదని, ఒకసారి ప్రాజెక్టు నిండడం ద్వారా కేవలం 10 శాతం ఆయకట్టుకు మాత్రమే సాగునీటి లభ్యత ఉంటుందని తెలిపారు.

ప్రస్తుత పరిస్థితుల్లో వరి సాగుకు బదులుగా వేరుశెనగ, ఆయిల్ పామ్, ఉల్లి, కూరగాయలు, కంది, మినుములు తదితర ప్రత్యామ్నాయ పంటలను రైతులు సాగు చేసేలా క్షేత్రస్థాయిలో చర్యలు చేపట్టాలన్నారు. ఈ సీజన్‌లో జిల్లాలో 30 వేల ఎకరాల్లో వేరుశెనగ సాగు లక్ష్యంగా నిర్దేశించినందున, ఆ లక్ష్యాన్ని తప్పనిసరిగా సాధించే దిశగా అధికారులు కృషి చేయాలని ఆదేశించారు.

మండల వ్యవసాయ అధికారులు, వ్యవసాయ విస్తరణ అధికారులు (AEOలు) నిర్దేశించిన లక్ష్యాలకు అనుగుణంగా పని చేసి, ప్రతిరోజూ పురోగతి నివేదికలను సమర్పించాలని కలెక్టర్ సూచించారు. ఈ అంశాలపై ప్రతి వారం సమీక్ష నిర్వహిస్తానని, లక్ష్య సాధనలో నిర్లక్ష్యం ఉండరాదని స్పష్టం చేశారు.

అదేవిధంగా, ప్రతి మండలంలో సాగుకు అనుకూలమైన ప్రత్యామ్నాయ పంటల జాబితాను వెంటనే సిద్ధం చేయాలని అధికారులను ఆదేశించారు. ఆ వివరాల ఆధారంగా రైతులకు ఎల్‌నినో ప్రభావం, ప్రత్యామ్నాయ పంటల సాగుపై అవగాహన కల్పించేందుకు ఏఐ వాయిస్ అసిస్టెంట్ ద్వారా ఫోన్ కాల్స్ పంపించనున్నట్లు తెలిపారు. రైతులకు శాస్త్రీయ సలహాలు అందించి, వాతావరణ పరిస్థితులకు అనుగుణంగా పంటల ఎంపిక చేయించేలా వ్యవసాయ, ఉద్యాన శాఖలు సమన్వయంతో పనిచేయాలని కలెక్టర్ అధికారులను ఆదేశించారు.

సమావేశంలో వ్యవసాయ శాఖ అధికారి ఆంజనేయులు, ఉద్యాన శాఖ అధికారి విజయభాస్కర్, ఎంఏవోలు, తదితరులు పాల్గొన్నారు.

DPRO Wanaparthy

20/08/2026

20/08/2026

20/08/2026

20/08/2026

20/08/2026

20/08/2026

19/08/2026

19/08/2026

19/08/2026

19/08/2026

Address

Website

Alerts

Shortcuts

Share

Category

Listing takedown request