Hrunamannahreppur er í uppsveitum Árnessýslu og búa þar um 900 manns. Hrunamannahreppur er einnig þekktur undir nöfnunum Gullhreppurinn og Ytri-hreppur. Tengjast þessi nöfn Stóru-Laxá sem skilur að Hrunamannahrepp og Skeiða-og Gnúpverjahrepp. Hvítá aðskilur svo hreppinn frá Bláskógabyggð. Í Hrunamannahreppi er blómleg byggð. Atvinnuvegir snúast aðallega um landbúnað og er ein mesta garðyrkja landsins stunduð í hreppnum. En auðvitað er einnig stundaður hefðbundinn búskapur eins og nautgripa-, sauðfjár- og hrossarækt. Ekki er minni áhersla lög á þær greinar. Þéttbýliskjarni Hrunamannahrepps heitir Flúðir og býr þar um helmingur íbúa hreppsins. Á Flúðum er eina sveppaverksmiðja landsins sem sér öllu Íslandi fyrir sveppum allan ársins hring. Á Flúðum er líka eina límtrésverksmiðja landsins. Félagslíf í hreppnum er gott og eru starfrækt ýmiskonar félög í hreppnum þar sem fólk kemur saman og skemmtir sér. Í hreppnum er alltaf eitthvað um að vera og er íþróttahúsið fullsetið alla daga allan veturinn. Margir kórar er í hreppnum og það telst nánast undantekning ef fólk er ekki í kór. Í Hrunamannahreppi er boðið uppá eiginlega alla helstu þjónustu sem þarf. Þar er skóli, leikskóli, sundlaug, vínbúð, félagsheimili, matvöruverslun, veitingarstaðir, golfvellir, bar, hótel og margt fleira. Í hreppnum er nóg af tækifærum því nóg er af landi, heitu og köldu vatni. Þekktustu náttúruperlur hreppsins eru án efa Gullfoss og Kerlingarfjöll en auðvitað er fullt af öðrum flottum stöðum sem færri vita um. Hrunamannahreppur er blómlegt og lifandi sveitarfélag sem hefur upp á margt að bjóða. Jafnframt er Hrunamannahreppur elsta ósameinaða sveitarfélag landsins yfir 1100 ára samkvæmt Landnámu. Heimasíða hreppsins er www.fludir.is og netfang [email protected]
Sími: 480-6600
Þessi síða er hugsuð til þess að fræða fólk um það sem er að gerast í hreppnum og svara spurningum um hann ef einhverjar eru. Umsjónarmaður síðurnar er Aldís Hafsteinsdóttir, sveitarstjóri.
