Innviðaráðuneytið

Frumvarp Eyjólfs Ármannssonar innviðaráðherra um breytingar á lögum um leigubifreiðaakstur var samþykkt á Alþingi í morgun. Meginbreytingin er sú að stöðvaskylda er endurvakin og að leigubifreiðastjórar eiga að vera skráðir hjá leigubifreiðastöð með gilt starfsleyfi.

Leigubifreiðastöðvum verður einnig gert skylt að skrá rafrænt allar ferðir, þ.m.t. upphafs- og endastöð, staðsetningu bifreiðar og akstursleið og greiðslur farþega. Loks eiga stöðvar að bjóða upp á einfalt og gagnsætt ferli fyrir kvartanir og ábendingar farþega.

„Það er fagnaðarefni að Alþingi hafi samþykkt nauðsynlegar breytingar á lögum um leigubifreiðaþjónustu. Stöðvaskylda hefur verið endurvakin og rafrænt eftirlit innleitt, sem tryggir aukið aðhald og öryggi í greininni. Ný reglugerð hefur nú lokið samráðsferli og verður ný námskrá kynnt fljótlega. Þetta er fyrsta skrefið í að leggja grunn að leigubifreiðamarkaði sem byggir á fagmennsku, öryggi og gagnsæi," segir Eyjólfur af þessu tilefni.

Hlekkur á frétt um málið er í fyrsta kommenti.

Stjórnvöld óska eftir ábendingum og úrbótatillögum um verkefni og regluverk sveitarfélaga um það hvernig einfalda megi regluverk um verkefni sveitarfélaga. Um er að ræða verkefni í ríflega 60 lögum sem heyra undir 11 ráðuneyti.

Greina á hvort og þá hvar lagðar eru óþarfar eða íþyngjandi kvaðir á sveitarfélög og/eða einstaklinga, fyrirtæki eða félagasamtök sem leita þurfa til sveitarfélaga. Ekki er spurt um reglur sem sveitarfélögin setja sér sjálf um framkvæmd verkefnanna.

Öll ráðuneyti í Stjórnarráðinu koma að verkefninu með tengingu við málaflokka sína en innviðaráðuneytið heldur utan um verkefnið. Allir eiga kost á því að senda inn tillögur og ábendingar í samráðsgátt stjórnvalda en frestur er til og með 10. mars nk.

Nánari upplýsingar:

Taktu þátt í að einfalda regluverk um verkefni sveitarfélaga Stjórnvöld óska eftir tillögum um hvernig megi einfalda regluverk um verkefni sveitarfélaga.

Við minnum á að enn er hægt að senda tillögur um hvernig megi einfalda regluverk og bæta þjónustu á vegum ráðuneytisins og stofnana þess. Allir eiga kost á því að senda inn tillögur í samráðsgátt stjórnvalda til og með 19. janúar nk.

Markmiðið er að bæta þjónustu hins opinbera með því að greina hvort og hvar lagðar eru óþarfar, flóknar eða óljósar byrðar á einstaklinga, fyrirtæki, sveitarfélög eða félagasamtök sem þurfa þjónustu eða leita erinda hjá ráðuneytinu eða stofnunum þess.

Ábendingar geta verið af ýmsum toga og geta snúið að óþarflega íþyngjandi reglum, skorti á leiðbeiningum eða upplýsingum, þjónustu sem mættu vera stafræn. Loks má koma með tillögur að þjónustu sem vantar eða hvar bæta megi þjónustu í takt við þróun samfélagsins.

Slóð á netkönnun:

Samráðsgátt - Mál: S-222/2025 Netkönnun þar sem óskað er eftir tillögum um hvernig megi bæta þjónustu og einfalda regluverk á vegum innviðaráðuneytisins og stofnana þess. Ekki er tekið á móti umsögnum í gegnum samráðsgáttina.

Innviðaráðuneytið og stofnanir þess óska eftir tillögum um hvernig megi einfalda regluverk og bæta þjónustu á vegum ráðuneytisins og stofnana þess. Allir eiga kost á því að senda inn tillögur í samráðsgátt stjórnvalda en frestur hefur verið lengdur til og með 19. janúar nk.

Markmiðið er að bæta þjónustu hins opinbera með því að greina hvort og hvar lagðar eru óþarfar, flóknar eða óljósar byrðar á einstaklinga, fyrirtæki, sveitarfélög eða félagasamtök sem þurfa þjónustu eða leita erinda hjá ráðuneytinu eða stofnunum þess.

Ábendingar geta verið af ýmsum toga og geta snúið að óþarflega íþyngjandi reglum, skorti á leiðbeiningum eða upplýsingum, þjónustu sem mættu vera stafræn. Loks má koma með tillögur að þjónustu sem vantar eða hvar bæta megi þjónustu í takt við þróun samfélagsins.

Hlekkur í samráðsgátt í fyrsta kommenti.

Nýr tvöfaldur vegarkafli á Reykjanesbraut var opnaður í dag fyrir umferð, á milli Krýsuvíkurvegar og Hvassahrauns. Þar með er Reykjanesbraut tvöföld alla leið frá Hafnarfirði til Reykjanesbæjar. Eyjólfur Ármannsson innviðaráðherra, Bergþóra Þorkelsdóttir, forstjóri Vegagerðarinnar, og Valdimar Víðisson, bæjarstjóri Hafnarfjarðar, klipptu á borða af þessu tilefni.

Umferðin á Reykjanesbraut hefur aukist jafnt og þétt undanfarna áratugi og því var mikilvægt að aðskilja akstursstefnur á veginum til að auka öryggi vegfarenda.

„Aðskilnaður akstursstefna á Reykjanesbraut hefur reynst afar mikilvæg aðgerð við að fækka slysum og auka umferðaröryggi. Tvöföldun brautarinnar greiðir einnig fyrir mikilli umferð á einum fjölfarnasta vegi landsins. Við munum áfram leggja mikla áhersla á að aðskilja akstursstefnur í fjölmörgum samgönguframkvæmdum sem framundan eru,“ segir Eyjólfur Ármannsson.

Framkvæmdir hafa gengið framar vonum og því er hægt að opna brautina fyrir umferð nú í desember. Lokafrágangur verður unninn í vetur og fram á vor. Verklok eru áætluð í júní 2026.

Eyjólfur Ármannsson innviðaráðherra hefur hrundið af stað átaksverkefni til að tryggja að á annan tug þéttbýlisstaða og byggðakjarna verði tvítengdir, þ.e. fái tvöfalda ljósleiðaratengingu. Öll fjarskipti á þessum stöðum fara nú um einn ljósleiðarastreng. Við rof á slíkum strengjum verða staðirnir sambandslausir sé ekkert varasamband fyrir hendi.

Samkomulag um átaksverkefnið var undirritað á Skagaströnd í dag þar sem verkefnið hófst í haust. Ríkisfyrirtækið Öryggisfjarskipti ehf. mun hafa umsjón með framkvæmdum í samvinnu við sveitarfélög og landeigendur o.fl. Átaksverkefnið er fjármagnað og tilkynnt verður á nýju ári hvar verður farið í úrbætur árið 2026.

„Góð og áfallaþolin fjarskipti eru ein af undirstöðum búsetu og atvinnulífs óháð því hvar fólk á heimili eða sækir atvinnu. Verði bilun á einum stað hættir þjónustan að virka nema að varaleið taki við. Tímabært var að huga að mótvægisaðgerðum við slíkar aðstæður enda brýnt að auka áfallaþol fjarskiptainnviða. Átaksverkefnið mun nýtast mörgum þéttbýlisstöðum og byggðakjörnum sem aðeins eru tengdir einum ljósleiðarastreng,“ segir Eyjólfur Ármannsson innviðaráðherra.

Þeir staðir sem verða skoðaðir á næstunni eru Bolungarvík, Borgarfjörður eystri, Grenivík, Hellissandur, Hnífsdalur, Hvammstangi, Kópasker, Patreksfjörður, Raufarhöfn, Rif og Suðureyri. Fleiri þéttbýlisstaðir eða byggðakjarnar kunna mögulega að bætast við síðar.

Á myndinni sjást Magnús Hauksson, framkvæmdastjóri Öryggisfjarskipta, Eyjólfur Ármannsson innviðaráðherra og Alexandra Jóhannesdóttir, sveitarstjóri Skagastrandar fyrir framan vinnuvélarnar á Skagaströnd. Þær hafa verið notaðar í vetur við að leggja ljósleiðara og tryggja tvítengingu fyrir svæðið á Skaga.

Ríkisstjórnin kynnti í morgun nýja samgönguáætlun fyrir árin 2026-2040 og stofnun innviðafélags um stærri samgönguframkvæmdir. Ný samgönguáætlun hefur það að meginmarkmiði að laga vegi, hefja stórframkvæmdir og byrja aftur að bora jarðgöng á Íslandi. Lögð er áhersla á kraftmiklar og arðsamar framkvæmdir um land allt sem efla umferðaröryggi, greiða fyrir umferð, stytta tengingar milli byggða og atvinnusvæða og bæta lífsgæði íbúa.

Þá er samkomulag í höfn um stofnun innviðafélags til að flýta stærri samgönguframkvæmdum. Hlutverk innviðafélags verður að hraða fjárfestingum í þjóðhagslega mikilvægum samgöngumannvirkjum, m.a. jarðgöngum, en stefnt er að því að undirbúningur við næstu jarðgöng hefjist árið 2026 og að byrjað verði að bora árið 2027. Félagið verður að fullu í eigu ríkisins og frumvarp um stofnun þess verður lagt fram á vorþingi.

„Þessi samgönguáætlun markar ákveðin tímamót. Við snúum vörn í sókn með sögulegum framkvæmdum, stórauknu viðhaldi og nýrri nálgun í fjármögnun. Við ætlum að rjúfa kyrrstöðuna og skila þjóðinni öruggara og samkeppnishæfara samgöngukerfi." sagði Eyjólfur Ármannsson á kynningarfundinum í dag.

„Það er mikið ánægjuefni að kynna á sama tíma nýja og fullfjármagnaða samgönguáætlun og stofnun innviðafélags. Samgönguáætlun er kjarninn í stefnumótun og fjármögnun í samgöngum. Innviðafélag bætir við nýrri vídd og veitir tækifæri til að ráðast í stór samgönguverkefni, einkum á landsbyggðinni. Nú getum við brett upp ermar, ræst vélarnar, byggt brýr, lagað vegi og borað göng."

Nánari upplýsingar á vef Stjórnarráðsins. Hlekkur í fyrsta kommenti.

Íslensku menntaverðlaunin 2025 voru veitt við hátíðlega athöfn á Bessastöðum 4. nóvember. Verðlaunin eru veitt í fimm flokkum; fyrir framúrskarandi skóla- eða menntaumbótastarf, kennslu, þróunarverkefni, iðn- og verkmenntun, auk sérstakra hvatningarverðlauna.

Skólahljómsveit Vesturbæjar og Miðbæjar fékk verðlaun fyrir framúrskarandi skólastarf eða menntaumbætur fyrir afar metnaðarfullt og árangursríkt starf. Markmið hennar er að búa til vettvang fyrir börn með áhuga á tónlist til að vinna saman að tónlistarsköpun og tónlistarflutningi. Halla Tómasdóttir forseti Íslands veitti verðlaunin.

Verðlaun fyrir framúrskarandi kennslu fékk að þessu sinni Örvar Rafn Hlíðdal, íþróttakennari við Flóaskóla, fyrir íþróttakennslu og árangur í starfi. Hann leggur áherslu á hollustu og heilbrigða lífshætti og sýnir í verki hversu mikils virði það er að að leggja sig fram fyrir hópinn og láta aldrei sitt eftir liggja við að aðstoða og hjálpa öðrum að ná markmiðum sínum. Guðmundur Ingi Kristinsson mennta- og barnamálaráðherra veitti verðlaunin.

Verkefnið Lítil skref á leið til læsis, samstarfsverkefni leikskólans Grænuvalla og Borgarhólsskóla á Húsavík um málörvun og læsi fékk verðlaun í flokki framúrskarandi þróunarverkefna. Verkefnið beinist annars vegar að auknu samráði kennara á báðum stigum um að efla málþroska og læsi og hins vegar að öflugri foreldrafræðslu til að styrkja samstarf skóla og heimila. Það kom í hlut Eyjólfs Ármannssonar innviðaráðherra að afhenda verðlaunin.

Framhaldsskólinn í Vestmannaeyjum hlaut verðlaun fyrir framúrskarandi iðn- eða verkmenntun en skólinn hefur á undanförnum árum markað sér sterka stöðu í kennslu málm- og vélstjórnargreina. Sérstaða námsins felst í því hvernig tekist hefur að umbreyta hefðbundnu námi í verkefnamiðað og atvinnulífstengt ferli þar sem nemendur vinna raunhæf verkefni sem endurspegla aðstæður í atvinnulífinu. Sigurður Hannesson forstjóri Samtaka iðnaðarins sá um að afhenda verðlaunin.

Starfsfólk Háaleitisskóla í Reykjanesbæ fékk hvatningarverðlaunin að þessu sinni. Í skólanum eru sjö af hverjum tíu nemendum af erlendum uppruna og í skólanum eru töluð um 30 tungumál. Í Háaleitisskóla hefur tekist að skapa einstaklega jákvæða skólamenningu, m.a. með því að líta á fjölmenninguna sem styrk skólans. Það kom í hlut Guðfinnu S. Bjarnadóttur formanni viðurkenningarráðs Íslensku menntaverðlaunanna að afhenda hvatningarverðlaunin

Markmið Íslensku menntaverðlaunanna er að vekja athygli samfélagsins á metnaðarfullu og vönduðu skóla- og frístundastarfi með börnum og unglingum. Að auki er veitt hvatning til einstaklings, hóps eða samtaka sem stuðlað hafa að menntaumbótum er þykja skara fram úr. Verðlaunin ná til leik-, grunn- og framhaldsskólastigs, sem og til listnáms og félags- og tómstundastarfs.

Fjórtán aðilar standa að verðlaununum undir verndarvæng embættis forseta Íslands. Mennta- og barnamálaráðuneytið, innviðaráðuneytið og Samtök iðnaðarins fjármagna verkefnið.

Við óskum Byggðastofnun innilega til hamingju með þennan merka áfanga og þökkum starfsfólki fyrir sitt góða starf.

✨ Byggðastofnun 40 ára ✨

Í dag, 1. október, eru liðin 40 ár frá því að Byggðastofnun var komið á legg með sérlögum.

Í gegnum árin hefur Byggðastofnun veitt fyrirtækjum í landsbyggðunum lán og fjármögnun, stutt við frumkvöðla og sprota og leitt samstarfsverkefni með sveitarfélögum og atvinnulífi.

Þá hefur stofnunin einnig tekið saman og greint gögn um byggðaþróun sem nýst hafa við stefnumótun stjórnvalda. Með þessu hefur stofnunin lagt sitt af mörkum til fjölbreyttari atvinnu, öflugri samfélaga og sterkari byggða um allt land.

🧡 Við erum stolt af því að hafa verið hluti af þessari vegferð síðustu 40 ár og hlökkum til að vinna áfram að blómstrandi byggðum og fjölbreyttu atvinnulífi í landsbyggðunum.

Á vef Samgöngustofu eru að finna gagnlegar upplýsingar varðandi réttindi flugfarþega. Við hvetjum fólk til að kynna sér réttindi sín.

Play hættir starfsemi | Samgöngustofa Play hefur lýst því yfir að félagið hafi hætt starfsemi.

Eyjólfur Ármannsson innviðaráðherra ávarpaði í gær ráðstefnu sem íslenska hæfnissetrið í netöryggi, Eyvör NCC-IS, stóð fyrir undir yfirskriftinni Netöryggi: Styrkir og sóknarfæri. Á ráðstefnunni var sjónum beint að lausnum, tækifærum og þeim styrkjamöguleikum sem eru í boði til að efla varnir þjóðarinnar.

Ráðherra sagði í ávarpi sínu að hann myndi sem ráðherra netöryggismála leggja áherslu á að málaflokkurinn verði áfram í forgangi. Netógnir væru ein af stærstu áskorunum samtímans og varði okkur öll.

„Sem lítið en lipurt samfélag höfum við einstakt tækifæri til að bregðast hratt við, nýta mannauðinn okkar og skapa lausnir sem gera Ísland að fyrirmynd á sviði netöryggis,“ sagði Eyjólfur.

Á myndinni eru Hrannar Ásgrímsson, verkefnastjóri Eyvarar NCC-IS, Luca Tagliaretti, framkvæmdastjóri ECCC. Eyjólfur Ármannsson innviðaráðherra og Hrafnkell Gíslason forstjóri Fjarskiptastofu.