Sveitarfélagið Vogar

15/10/2026

Kynningarfundur Kiwanis - í kvöld kl. 19:30.

💙 Vilt þú hafa jákvæð áhrif í þínu samfélagi?

📅 Kynningarfundur Kiwanis
📍 Álfagerði í Vogum
🕢 Fimmtudaginn 15. október kl. 19:30

🌍 Kiwanis eru alþjóðleg þjónustusamtök sjálfboðaliða sem hafa það að markmiði að bæta samfélagið, með sérstaka áherslu á velferð barna og ungmenna.

🤝 Með þátttöku í Kiwanis gefst einstaklingum tækifæri til að láta gott af sér leiða, efla tengslanet sitt, kynnast nýju fólki og taka þátt í fjölbreyttum og gefandi samfélagsverkefnum.

💙 Fundurinn er opinn öllum! Það kostar ekkert að mæta og kynna sér starfsemina.

✨ Við hvetjum áhugasama til að mæta og kynna sér þetta spennandi samfélagsstarf!

07/10/2026

Útboð á færanlegum húseiningum við Suðurvelli ✍️

Sjá nánar hér ⬇️
https://www.vogar.is/is/stjornsysla/vogar/frettir/utbod-a-faeranlegum-huseiningum-vid-sudurvelli

06/10/2026

📣 Opinn fundur um Uppbyggingarsjóð SSS , föstudaginn 9. október kl. 14:30 í Álfagerði.

Uppbyggingarsjóður Suðurnesja er samkeppnissjóður um menningar-, atvinnu- og nýsköpunarverkefni. Umsóknir eru auglýstar einu sinni á ári, að hausti.

Logi Gunnarsson, verkefnastjóri hjá SSS kynnir nýtt umsóknarumhverfi Rannís, Dagný Maggýar atvinnuráðgjafi hjá SSS kemur einnig og systurnar Oktavía og Helga Ragnarsdætur segja frá sinni reynslu.

Heitt á könnunni og allir velkomnir! ☕️

Inngangur Álfagerðis er frá Suðurgötu, til móts við leikskólann.

https://sss.is/verkefni/uppbyggingarsjodur/

06/10/2026

Safnahelgi á Suðurnesjum 17.-18. október 2026 🙌

Safnahelgi á Suðurnesjum er haldin árlega, uppfull af skemmtilegum uppákomum og viðburðum um allan Reykjanesskagann. Safnahelgi er samstarfsverkefni safna, setra og sýninga á Suðurnesjum sem opna dyrnar sínar fyrir íbúum og gestum svæðisins.

Dagskrá helgarinnar verður fjölbreytt og skemmtileg fyrir alla fjölskylduna. Frítt er á öll söfn sem taka þátt.

Hér í Sveitarfélaginu Vogum eru eftirfarandi viðburðir á dagskrá:

💫 Ratleikur um Vogana 💫
Minja- og sögufélag Vatnsleysustrandar í samstarfi við Félagsmiðstöðina Boruna verður með ratleik í Vogum á safnahelgi. Hægt verður að njóta alla helgina.
Ratleikurinn byrjar á Arahól og leiðir svo hver staður til þess næsta. Kort sem sýnir staðsetningar má nálgast í Íþróttamiðstöðinni í Vogum.
Fimm staði þarf að heimsækja í ratleiknum og leysa þar litla þraut. Þrautirnar gefa bókstafi sem raða þarf saman. Útkoman er orð sem tengist Vogum – verðlaun verða í boði fyrir þrjá fyrstu á laugardeginum.
Vinninga má nálgast í Borunni til kl. 15 á laugardeginum.

💫 Ljósmyndasýning í Kirkjuhvoli 💫
Í Kirkjuhvoli verður lifandi ljósmyndasýning af mannlífinu í Vogum til 1990. Eyjólfur Guðmundsson var duglegur að festa mannlífið í Vogum á filmu og verður afrakstur hans sýndur undir léttu kaffispjalli í Kirkjuhvoli á Vatnsleysuströnd.
Opið verður laugardag og sunnudag kl. 13 til 16.

💫 Skólaminjar í Norðurkoti 💫
Skólaminjasafnið í Norðurkoti verður opið laugardag og sunnudag kl. 13 til 16. Lögð er áhersla á upplifun barna og fræðslu til þeirra. Ýmiskonar fróðleikur og skemmtilegir leikir fyrir fjölskylduna að sameinast í. Í Norðurkoti eru allskonar gömul leikföng, skóladót og annað sem gleður augað. Ratleikir í boði fyrir þá allra áhugasömustu. Tilvalin fjölskyldusamvera.
Norðurkot er staðsett á Kálfatjörn á Vatnsleysuströnd.
Opið verður laugardag og sunnudag kl. 13 til 16.

Upplýsingar og dagskrá sem er í fullum undirbúningi eru hér á heimasíðu Safnahelgarinnar: https://www.safnahelgi.is/
Takið dagana 17.–18. október frá og njótið Safnahelgar á Suðurnesjum!

02/10/2026

✨ Markaðstorg í Álfagerði laugardaginn 3. október, kl. 13-17 ✨

Enn eru laus pláss fyrir söluaðila. Öll velkomin.

30/09/2026

Fimmtudagsfræðsla um netöryggi fyrir eldri borgara í Álfagerði ✨

⏱️ Fimmtudagur 1. október kl. 14:00
📍 Þjónustumiðstöðin Álfagerði, gengið er inn Suðurgötumegin til móts við leikskólann.

30/09/2026

Hjördís Kristinsdóttir ráðin sviðsstjóri fjölskyldusviðs

Bæjarráð Sveitarfélagsins Voga samþykkti á fundi sínum 29. september að ráða Hjördísi Kristinsdóttur í starf sviðsstjóra fjölskyldusviðs.

Hjördís hefur víðtæka reynslu af stjórnun og rekstri í mennta- og velferðarmálum. Hún var framkvæmdastjóri Hjálpræðishersins á Íslandi og sá þar um stefnumótun, rekstur, mannauðsmál og uppbyggingu þjónustu. Hún hefur einnig starfað í grunnskóla sem umsjónarkennari, sérkennari og deildarstjóri. Hjördís er með meistaragráðu í forystu og stjórnun frá Háskólanum á Bifröst, með áherslu á mannauðsstjórnun og verkefnastjórnun. Hún er einnig með B.Ed.-gráðu í grunnskólakennarafræðum frá Kennaraháskóla Íslands og diplómu í stjórnun menntastofnana frá Háskóla Íslands.

„Við höfum metnað fyrir þjónustu sem fylgir íbúum í gegnum lífið, allt frá leikskóla til málefna eldri borgara. Fjölskyldusvið gegnir þar lykilhlutverki og það eru mikil tækifæri til að efla samstarf og tengja þjónustuna betur saman. Með reynslu Hjördísar af skólastarfi, velferðarmálum og stjórnun fáum við öflugan liðsmann til að vinna með okkur að þeim verkefnum. Ég býð hana hjartanlega velkomna og hlakka mikið til samstarfsins,“ segir Björg Ásta Þórðardóttir, bæjarstjóri Sveitarfélagsins Voga.

Bæjarráð Sveitarfélagsins Voga samþykkti á fundi sínum 29. september að ráða Hjördísi Kristinsdóttur í starf sviðsstjóra fjölskyldusviðs.

29/09/2026

⚠️ Framkvæmdir við Stóru-Vogaskóla 🚸

Verið er að gera endurbætur við aðkomu að Stóru-Vogaskóla og verða tafir á næstu dögum. Unnið er hratt og örugglega, að teknu tilliti til veðurs.

Þeir sem aka í skólann eru beðnir um að fara sérstaklega varlega þar sem skólabörn eru bæði fótgangandi og á hjólum.

Við biðjum ykkur að sýna þolinmæði og tillitssemi á meðan framkvæmdum stendur.

🔸 Umhverfisdeild

28/09/2026

🛴 Hopp-hjólin eru komin í Voga!

Nú eru fimm Hopp-hjól komin í notkun í Vogum og bætist þar með við nýr og umhverfisvænn samgöngumöguleiki fyrir íbúa og gesti.

📍 Hjólin eru staðsett á þremur skilgreindum stoppistöðvum, við bæjarskrifstofurnar og við strætóskýlin beggja megin við Reykjanesbraut.

Staðsetningarnar við Reykjanesbraut eru sérstaklega valdar með það í huga að auðvelda tengingu við almenningssamgöngur og gera fólki kleift að nýta Hopp-hjólin til ferða milli strætóskýlanna og þéttbýlisins í Vogum.

Við minnum notendur á að fara varlega og sýna öðrum vegfarendum tillitssemi. Notið hjálm, aðlagið hraða að aðstæðum, gætið sérstaklega að gangandi vegfarendum og leggið hjólunum snyrtilega á merktar stoppistöðvar að ferð lokinni þannig að þau hindri ekki umferð eða aðgengi.

Hopp-hjólin eru skemmtileg viðbót við samgöngur í Vogum og vonum við að þjónustan nýtist vel.

Góða ferð og farið varlega!