19/06/2026
COMUNE DI SAMASSI
Policromie Festival – Acabbada sa Primu Editzioni
Est acabbada martis, su 16 de Làmpadas 2026, sa manifestatzioni “Policromie - Festival Internatzionali de sa literadura Melting pot” cumentzada cenàbara 12.
S’úrtima dí de s’eventu dda ant dedicada a su giornalismu, a sa narrativa cun disegnus, a is atóbius e a sa música.
Funt istétias cincu diis de cultura, cumpartzidura de ideas e esperiéntzias. Is partetzipantis ant arrexonau e si funt cunfrontaus cun is óspitis e is ispertus, ma fintzas intra issus etotu. Is atóbius funt istétius s’ocasioni po bisitai is edifítzius istóricus de sa bidda, cument’e Domu Pau, Domu Pittau, su plessu istóricu de s’Iscola Elementari, sa bibblioteca e sa pratza de Santu Millanu.
A s’organizatzioni de s’eventu, impari a su Comunu de Samassi e a s’Assòtziu de sa Terra Crua, ant partetzipau is assótzius de sa bidda chi ant donau un’agiudu mannu a apariciai is atóbius. Is piciocus de ASD Janas ant arriciu is óspitis, cuncordau is logus, e ant arregalau is produtus de s’ortu chi ant cultivau issus etotu. Radio Samassi at tentu a incuru sa comunicatzioni e sa pubbricidadi de s’eventu, e s’Assótziu Traggera imbecis at preparau liconias po totu is partetzipantis.
Protagonistas de custas diis funt fintzas istétius is piciocas e piciocus de su Servítziu Tzivili, chi òperant in sa bibblioteca, chi ant intraténniu su púbbricu cun unas cantu leturas e chi nos’ant contau càncua cosa de cust’esperiéntzia. Alessia, Francesca, Sara e Samuele ant lígiu tretus pigaus de is líbburus “Fuori Posto” de Margaryta Yakivenko, “Una bambina soldato” de China Keitetsi e “Baba” deMohamed Maael, chi ant isceberau is organizadoris poita ca fueddant de temàticas chi cuncordant cun cussa de s’afestamentu, est a narri s’integratzioni de is pópolus.
«Su púbbricu at aggradéssiu meda “Una bambina soldato”» nosi narat Francesca. «Imbecis a nosu est pràxiu meda Daman Singh», aciungit Sara, «poita ca at contau s’esperièntzia chi at fatu issu etotu po su chi pertocat s’immigratzioni». Is cuatru giòvunus funt totus de acórdiu candu narant ca a ligi in un’ocasioni diaici est istétia un’esperiéntzia de importu mannu. Sa tzitadinàntzia est abarrada prexada de assisti a is leturas insoru: su sàbudu e su domigu ddoi iat prus genti, ma fintzas is àteras diis, cun totu chi no fiant diis de festa, est aproliada genti meda e at ammostau interessu mannu. Is eventus ddus ant fatus in tres logus connotus de sa bidda, Domu Pau, Pratza Resistenza e sa pratza ananti de sa Crésia de Santu Millanu. In sa Domu Pau, una bella domu típica campidanesa, ant agatau un’atmosfera famigliari, in Pratza Resistenza ant agatau servítzius e comodidadis, imbecis Santu Millanu est una guarnissa istravanada e est fintzas s’immàgini símbulu de sa bidda. «Est istétia un’initziativa interessanti e nos’est pràxiu meda a partetzipai a custa primu editzioni. A dolu mannu fiant pagus is giòvunus, duncas s’ispera est chi in su benidori ndi acostint de prus. E, sigumenti anch’e nosu ddoi at duas comunidadis, una indiana e una africana, isperaus chi potzant cuncordai atóbius cun issus puru, po podi connosci e cumprendi su chi ant passau e is esperiéntzias insoru».
A ndi fai medas àteras e sèmpiri mellus!
***
MELLUS A CHISTIONAI! 2 - Progetu finantziau cun su dinai de sa Regione Autònoma de Sardigna cunformas a sa L. 482/99 e a sa L.R. 22/2018
