Confessions - اعترافات

عملت عزومة لنسايبي، وبنتهم اللي هي مرتي ما بتعرف تطبخ، فطلبت أكل جاهز من برا. وكمان عزمت إخواني وأخواتي. تعشّوا وكل شي كان تمام، ولما اجو يروحوا زوجتي عبّت 3 صحون جاج لأهلها، والأكل كله أعطتهم إياه، وما خلت لإخواني وأخواتي ولا إشي، مع إني دايمًا بعمل معها كل خير.

بعد ما راحوا، زعلت عليها وسألتها ليش عملت هيك، فقالتلي: “أنا ما بحبهم ولا بقبل ييجوا عندي”، مع إنهم عمرهم ما سكنوا معها ولا أذوها بأي طريقة.

بنفس الليلة وصلتها عند دار أهلها، وثاني يوم رحت على المحامي وقدمت طلاق، وتم الطلاق. وبعد أسبوع، مبارح بالليل، إجت هي وصاحبها على الحارة اللي ساكن فيها، مشغلين أغاني بصوت عالي ونازلين من السيارة يستعرضوا حالهم، وكل الجيران شافوهم. انحرجت كثير، بس بقول الحمد لله إني خلصت منها، مع إنه ضايقني إنها إجت قدام بيتي تعمل هالحركة.

بتدفع مهر بتحط اللي فوقك واللي تحتك وبالحقيقة انت بتكون عم تشتري النكد بذات نفسه عم تشتري المرض عم تشتري تقصير العمر والزل والتعتير عم تشتري المشاكل والقهر.. حدا بيشتري الهم والغم ؟ حدا بكامل قواه العقلية بكون آعد بكرامته عند أهله وبروح بيشتري ""وباء بيمشي على رجلين"" وبعيش معه ؟؟ حدا ببيع حريته وبيشتري جنازير وبربطها برقبته وبفوت بارادته عسجن أشغال شاقة ؟ حدا بيتخلى عن أحلامه وسعادته بسبيل التعاسة والعذاب ! أمر بحير شي عجيب غريب

مرّت أخوي إجت اليوم ضيفه، وجابتلنا لية الخروف تبعهم، لا خجل ولا حياء، وكانت ريحته طالعة. لما سألتها: “ليش جبتيه؟ شو بدنا نعمل فيه؟ لو ودّيتيه لأمك أحسن”، ردّت علي: “جبته إلك علّقيه فوق راسك عشان تتزوجي يا عانس”. عصّبت و شمطهتها كف خليت كل الحارة تسمع صوتها . هل أنا غلطانة ولا معي حق؟

سلام ايها الشعب العظيم
عندي رفيقة من برات سوريا (يمنيه) راح تنجن وتتجوز سوري آل شو بتعشق هذا الشعب كتتيير ومن وهي وزغيرة لهلأ بتحب تتابع كل شي بخص هالبلد من عادات وتقاليد واكل واخبار وكل شي (مابنسى اد إيه بكيت يوم التحرير وفرحت كانو بلده .. منشان هيك بدي اسأل انو اكتر بلد بسوريا معروف بطيبته وحنيته وبيقدر يتعايش مع وحده من برات سوريا ؟
وهاتولي لشوف هل في حدا بيعرف شب اتجوز بنت عربية من برات البلد وعايش مرتاح ومستقر ؟

ارهابي دخل على محل حيوانات اليفه، خبرهم معكم 5 دقايق
تخلو المحل قبل ما افجرو ا!
رفعت السلحفاة راسها ثم تنهدت و قالت :
يفضح عرضك على هالخبرية !!!

مرحبا يا جماعة، يعطيكم العافية جميعاً..
أنا اليوم جاي أحكيلكم عن كابوس حقيقي عايشين فيه كل يوم، وبتمنى من كل قلبي إذا حدا مرت عليه هالقاعدة، أو بيعرف ناس صار معهم نفس الإشي وقدروا يحلوا المشكلة، إنه يفيدني ويحكيلي كيف.
القصة بدت قبل 30 سنة بالسعودية.. والدي كان وقتها زلمة غني جداً، واسم معروف ومرموق. بيوم من الأيام، اتعرف على أشخاص من نيجيريا، وحكولوا "عنا طريقة نخلي فلوسك تتضاعف". أخذوه على بيتهم، وطلبوا منه مبلغ وحطوه بغرفة مغلقة.. بعد شوي دخلوا عليها، وبس فتحوا الباب والدي انصدم! الغرفة كانت مليانة فلوس وملايين مشفرة من الأرض للسقف!
ومن هون.. بلشت رحلة الضياع.
أعطاهم كل ثروته بالكامل، وطبعاً ما أخذ منهم غير السراب. رجعنا على الأردن وما معو إشي، بس يا ريت القصة خلصت هون.. هون بدت الكارثة الأكبر!
إلنا 28 سنة من وقت ما رجعنا على الأردن، والدي عايش بدوامة مش طبيعية.. بضل يوخذ فلوس من الناس، يركب على حاله ديون فوق طاقته، وكل قرش بطلّعه أو بيستقرضه، بروح بركض وبحوله فوراً لشبكة ممتدة بين (تركيا، السودان، ونيجيريا). ولما تحكيله ليش؟ بضل يحكي بيقين غريب: *"الملايين رح ترجع، هانت!"*
مش قادرين نوقفه ولا نعمل أي إشي.. الزلمة حرفياً زي المسحور، مسيّر بطريقة مش طبيعية ومخيفة، زي المبرمج اللي ما بسمع من كل الدنيا غير حكيهم هم وبس!
> **ملاحظة كتير مهمة:** إحنا من أول يوم ضد هالشغل كله، وحكينالو مليون مرة إنه هاد نصب واحتيال وبيع وهم، بس ما برد علينا بالمرة. هسا أنا وأخوي اللي بناكلها.. عم بنسد ورا الكوارث والديون اللي بركبها، وفي منهم قرايبنا، والوضع خلانا على الحديدة ودمر حياتنا.
>
بترجاكم، إذا حدا مرّت عليه هيك قصة، أو بيعرف كيف ممكن نتعامل مع شخص مغسول دماغه بهي الطريقة ونمنعه يحول فلوس، يحكيلي شو الحل.. فزعتكم يا جماعة لانو الوضع صاير فوق طاقتنا.

السلام عليكم .. انا شب عمري23سنة ..اهلي خطبولي بنت خالتي ، انا ساكن في الشام وهي في الريف ، لذلك ماكنت بعرفها ، البنت منيحة كتير واخلاقها منيحة ودينة وامورها كلها تمام ، بس عندي مشكلة من ناحية الشكل ماعجبتني بعد ماشفتها على طبيعتها ، مو عرفان شو اعمل ، فسخ الخطبة صعب بالنسبة اللي بسبب الصلة الاجتماعية والزواج منها اصعب لانو مو قدران اتقبل ، شو التصرف الصح ؟؟

ادمن ارجوك انشر بدون اسم مش ناقصنا فضايح .. مبارح كنت مروحة من عند اهلي اكتشفت انه زوجي بخوني مع مرت اخوه وهيه كبيره ومعها اولاد ولا تسألوني كيف عرفت شفتهم و انا بصف السيارة و هو طالع من شقتها و عم تودعوا بالاحضان و البوس .. مرت اخوه ساكنة مع اولادها عنا بالعمارة ( بيت العيلة ) و جوزها ساكن في دبي .. ممكن تساعدوني شو اعمل واكيد بدون مسخره

خالتي إجت عندي ضيفة، ورجعت بنفس اليوم. وهي بالطريق صار معها حادث وتوفيت، الله يرحمها. أول ما سمعت الخبر رحت على بيت العزاء، تخيلوا بناتها وقفوني وقالوا لي: “بسببك انقتلت”. مسكوني من إيدي وطلعوني قدام الناس. انحرجت كثير وما عرفت شو أعمل. حسبي الله ونعم الوكيل، شو ذنبي أنا؟