Государственное агентство лесного хозяйства

05.06.2026
ТОКОЙ КӨЧӨТТӨРҮН ӨСТҮРҮҮ ЖАНА ӨНҮКТҮРҮҮ БОЮНЧА ТАПШЫРМАЛАР БЕРИЛДИ
Токой кызматынын директорунун орун басары Талантбек Садыров Бишкек токой чарбасынын Аэропорт участогуна барып, көчөткананын ишмердүүлүгү менен жеринде таанышты.
Иш сапардын жүрүшүндө көчөттөрдү өстүрүү, багуу жана сапаттуу отургузуу боюнча жүргүзүлүп жаткан иштер каралып, адистер менен пикир алышуу болду. Ошондой эле көчөт өндүрүүнүн көлөмүн көбөйтүү жана токой чарбасын өнүктүрүү боюнча маселелер талкууланды.
Иш сапарынын соңунда иштердин натыйжалуулугун жогорулатуу, көчөттөрдүн сапатын жакшыртуу жана өндүрүш көлөмүн арттыруу боюнча бир катар тапшырмалар берилди.

ТАЛАС ОБЛУСУНДАГЫ БАКАЙ-АТА ТОКОЙ ЧАРБАСЫНЫН ДИРЕКТОРУНУН КАРМАЛЫШЫ БОЮНЧА ЫКЧАМ МААЛЫМАТ
Токой кызматы 2026-жылдын 3-июнунда АКИpress маалымат агенттигинде Талас облусундагы Бакай-Ата токой чарбасынын директору Касымов Эрзат Мухамбеталыевичтин Кыргыз Республикасынын Улуттук коопсуздук мамлекеттик комитети тарабынан кармалгандыгы тууралуу жарыяланган маалымат боюнча төмөнкүлөрдү билдирет.
Касымов Эрзат Мухамбеталыевич Токой кызматынын 2026-жылдын 15-апрелиндеги №2-5/43 буйругунун негизинде Бакай-Ата токой чарбасынын директору болуп дайындалган. Демек, ал аталган кызматта болгону бир жарым айга жакын убакыттан бери эмгектенип келген.
Алдын ала алынган маалыматтарга ылайык, Касымов Эрзат Мухамбеталыевичтин кармалышы анын буга чейинки эмгек ишмердүүлүгүнө байланыштуу. Тактап айтканда, ал Талас токой чарбасында токойду коргоо жана сактоо боюнча инженер болуп иштеген мезгилдеги иш-аракеттерине байланыштуу тергөө иш-чараларынын алкагында кармалгандыгы маалымдалууда.
Учурда тиешелүү мамлекеттик органдар тарабынан тергөө иштери жүргүзүлүүдө. Токой кызматы тергөөнүн жүрүшүнө кийлигишпестен, мыйзамдуулуктун жана ачык-айкындуулуктун принциптерин толук колдой тургандыгын билдирет.

ТОКОЙ КЫЗМАТЫНДА МЫЙЗАМ БУЗУУЛАРДЫН АЛДЫН АЛУУ ЖАНА ӨРТ КООПСУЗДУГУН КАМСЫЗДОО ИШТЕРИ КҮЧӨТҮЛДҮ

Өлкө аймагында өрт коркунучу мезгилинин башталышына байланыштуу Токой кызматы тарабынан мамлекеттик токой фондунун аймактарында укук бузуулардын алдын алуу, токой экосистемаларын коргоо жана өрт коопсуздугун камсыздоо боюнча иштер күчөтүлгөн тартипте жүргүзүлүүдө.

Бул багытта Ош жана Баткен облустарындагы токой чарбаларынын жооптуу адистерине жеринде практикалык жана усулдук жардам көрсөтүлүп жатат. Атап айтканда, укук бузуулар боюнча протоколдорду мыйзам талаптарына ылайык туура тариздөө, укук бузуулардын бирдиктүү реестрине өз убагында жана так каттоо, ошондой эле маалыматтарды туура жана сапаттуу жүктөө маселелери боюнча жекече түшүндүрүү жана практикалык окутуулар өткөрүлүүдө.

Токой чарба кызматкерлерине мамлекеттик токой фондунун аймагында мыйзамдуулукту камсыздоо, укук бузуулардын алдын алуу жана көзөмөлдү күчөтүү боюнча конкреттүү тапшырмалар берилди. Ошондой эле өрт коопсуздугун сактоо, токойлордо жана эс алуу жайларында таштандыларды, тиричилик калдыктарын калтырбоо, жарандар арасында түшүндүрүү жана эскертүү иштерин активдүү жүргүзүү боюнча көрсөтмөлөр жеткирилди.

Мындан тышкары, өрт коркунучу жогорулаган мезгилдин башталгандыгына байланыштуу токой чарбаларына алдын алуу иш-чараларын ыкчамдатуу, өрттүн келип чыгуу себептерин азайтуу, кооптуу тилкелерде көзөмөлдү күчөтүү жана калк арасында маалыматтык-түшүндүрүү иштерин кеңири жайылтуу боюнча кошумча эскертүүлөр берилүүдө.

Токой кызматы токой ресурстарын сактоо, экологиялык коопсуздукту камсыз кылуу жана жаратылыш байлыктарын келечек муундар үчүн коргоо мамлекеттик маанидеги артыкчылыктуу милдеттердин бири экендигин белгилейт. Ошого байланыштуу бардык жарандарды токойдо жүрүү эрежелерин так сактоого, өрт коопсуздугуна жоопкерчилик менен мамиле кылууга жана айлана-чөйрөнүн тазалыгын камсыздоого чакырат.

01.06.2026
ЖАШЫЛ МУРАС – КЕЛЕЧЕККЕ КАЛТЫРГАН МУРАС!
Ош токой чарбасынын Кара-Суу токойчулугуна караштуу Чыйырчык участкасында 2023-жылы “Жашыл Мурас” улуттук өнөктүгүнүн алкагында түзүлгөн экме токой аянтында көчөттөрдү толуктап отургузуу иштери жүргүзүлдү.
Иш-чаранын жүрүшүндө жабык тамыр системасында өстүрүлгөн 400 түп кызыл карагай көчөтү отургузулуп, экме токойдун айланасын кайрадан бекем тосуу иштери аткарылды.
Аталган иш-чарага Кыргыз Республикасынын Өзгөчө кырдаалдар министрлигинин Ош облусу боюнча башкармалыгынын Кара-Суу жана Алай райондорунун өзгөчө кырдаалдар бөлүмдөрүнүн өздүк курамы, ошондой эле Ош токой чарбасынын кызматкерлери активдүү катышышты.
Табиятты коргоо, токой аянттарын кеңейтүү жана жашыл мурастарды көбөйтүү — ар бирибиздин келечек алдындагы жоопкерчилигибиз.

25.05.2026
АК-ТАЛААДА ТОКОЙ ОТУРГУЗУУ ИШТЕРИ ЖҮРГҮЗҮЛДҮ
Ак-Талаа токой чарбасы Токой кызматынын буйругуна ылайык мамлекеттик токой фондунун жерлерине токой тилкелерин отургузуу боюнча тапшырма негизинде ири токой отургузуу иштерини жүргуздү.
Берилген тапшырманы аткаруу максатында Ак-Талаа районунда жалпы райондук ишембилик өткөрүлдү. Ишембиликке токой чарбасынын кызматкерлери, жергиликтүү тургундар жана мамлекеттик мекемелердин өкүлдөрү болуп жалпысынан 315 адам активдүү катышты.
Иш-чаранын алкагында мамлекеттик токой фондунун 21,0 гектар жерине 50 000 түп Тянь-Шань карагайынын көчөттөрү отургузулуп, кашаланды.
Бул иш-чара аймактагы токой аянттарын көбөйтүүгө, айлана-чөйрөнү коргоого жана келечек муундар үчүн жаратылыш байлыктарын сактоого багытталган.

20.05.2026
ОРТОК ТОКОЙ ЧАРБАСЫНДА ЭКМЕ ТОКОЙЛОРДУ КОРГОО ИШТЕРИ ЖҮРҮП ЖАНА ТЕХНИКАЛЫК КАМСЫЗДОО БОЛДУ
Орток токой чарбасында экме токойлорду сактоо жана алардын өсүп-өнүгүүсүн камсыз кылуу максатында токой аянттарында зыянкечтерге каршы дары себүү иштери жүргүзүлүп, көчөттөрдү күтүү иштери жүрдү.
Мындай иш-чаралар экме токойлордун сапатын жакшыртып, токой илдеттери менен зыянкечтеринин жайылышын алдын алууга шарт түзөт.
Мындан тышкары, талаа шартындагы ыкчам иштерди натыйжалуу жүргүзүү жана мыйзам бузуу фактыларынын алдын алуу максатында демөөрчүлөрдүн колдоосу менен 6 даана рация алынып берилди. Жаңы байланыш каражаттары 4 бөлүм башчыга жана 2 инженерге таратылып, кызматкерлердин өз ара байланышын чыңдоого шарт түзүлдү.