អគ្គ.ការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ CCF

អគ្គនាយកដ្ឋានកិច្ចការពារអ្នកប្រើប្រាស់ និងការប្រកួតប្រជែង «ក.ប.ប.» នៃក្រសួងពាណិជ្ជកម្ម សហការជាមួយសមាគមអ្នកប្រឹក្សាយោបល់គ្រឿងសម្អាង(CCA) និងធនាគារ MB Cambodia រៀបចំសិក្ខាសាលាស្តីពី «ការយល់ដឹងអំពីប្រព័ន្ធផ្លូវច្បាប់ក្នុងវិស័យគ្រឿងសម្អាង និងដំណោះស្រាយហិរញ្ញវត្ថុ» នៅរាជបណ្ឌិតសភាកម្ពុជា
-----------

(ភ្នំពេញ)៖ នៅថ្ងៃទី២៣ ខែឧសភា ឆ្នាំ២០២៦ អគ្គនាយកដ្ឋាន ក.ប.ប. នៃក្រសួងពាណិជ្ជកម្ម សហការជាមួយសមាគមអ្នកប្រឹក្សាយោបល់គ្រឿងសម្អាង(CCA) និង ធនាគារ MB Cambodia បានរៀបចំសិក្ខាសាលាស្តីពី«ការយល់ដឹងអំពីប្រព័ន្ធផ្លូវច្បាប់ក្នុងវិស័យគ្រឿងសម្អាង និងដំណោះស្រាយហិរញ្ញវត្ថុ» ក្រោមអធិបតីភាព ឯកឧត្តម គឹម មាសសុខសីហា អគ្គនាយក នៃអគ្គនាយកដ្ឋាន ក.ប.ប. និងលោក ហ៊ឹម ភីរម្យ នាយកប្រតិបត្តិសេវាកម្មធនាគារបុគ្គលដោយមានការធ្វើបទបង្ហាញដោយវាគ្មិនតំណាងអគ្គនាយកដ្ឋាន ក.ប.ប. សមាគមអ្នកប្រឹក្សាយោបល់គ្រឿងសម្អាង និង ធនាគារ MB Cambodia និងមានការចូលរួមដោយម្ចាស់អាជីវកម្មគ្រឿងសម្អាង និងបុគ្គលិក ធនាគារ MB Cambodia សរុបប្រមាណ ៧០រូប។

សិក្ខាសាលានេះ ត្រូវបានរៀបចំឡើងក្នុងគោលបំណងចែករំលែកនូវចំណេះដឹងផ្នែកច្បាប់ ដល់ម្ចាស់អាជីវកម្មក្នុងវិស័យគ្រឿងសម្អាង ដើម្បីអាចចៀសផុតនូវហានិភ័យនានា ក្នុងការបំពានច្បាប់ជាយថាហេតុណាមួយ និងការផ្តល់នូវដំណោះស្រាយហិរញ្ញវត្ថុ។ សិក្ខាសាលានេះ បានផ្តោតលើប្រធានបទចំនួន ៣ រួមមាន ១.ការយល់ដឹងអំពីច្បាប់និងបទប្បញ្ញត្តិពាក់ព័ន្ធនឹងកិច្ចការពារអ្នកប្រើប្រាស់ ២.ហានិភ័យក្នុងបំពាន និងវិធានការបង្ការ និង ៣.ដំណោះស្រាយហិរញ្ញវត្ថុ។

(ភ្នំពេញ)៖ នាព្រឹកថ្ងៃពុធ ៤កើត ខែជេស្ឋ ឆ្នាំមមី អដ្ឋស័ក ព.ស. ២៥៧០ ត្រូវនឹងថ្ងៃទី២០ ខែឧសភា ឆ្នាំ២០២៦ ឯកឧត្តម គឹម មាសសុខសីហា អគ្គនាយកកិច្ចការពារអ្នកប្រើប្រាស់ និងការប្រកួតប្រជែង នៃក្រសួងពាណិជ្ជកម្ម បានទទួលជួបពិភាក្សាការងារជាមួយសមាគមអ្នកប្រឹក្សាយោបល់គ្រឿងសម្អាង (CCA) ដែលដឹកនាំដោយលោកបណ្ឌិត តេង ប៊ុនថុន ព្រមទាំងសហការី។

ក្នុងជំនួបពិភាក្សាការងារនេះនេះ តំណាងសមាគមអ្នកប្រឹក្សាគ្រឿងសម្អាងបានរាយការណ៍ជូនអង្គប្រជុំ និងស្នើសុំនូវកិច្ចសហការបន្តផ្ដល់នូវវគ្គបណ្តុះបណ្ដាលដល់អាជីវករ និងប្រតិបត្តិករគ្រឿងសម្អាង ដើម្បីឱ្យអាជីវករ និងប្រតិបត្តិករទាំងនោះមានចំណេះដឹង និងទទួលបានភាពអនុលោមពាក់ព័ន្ធនឹងច្បាប់ និងបទប្បញ្ញត្តិនានា ដើម្បីឱ្យផលិតផលគ្រឿងសម្អាងដែលដាក់លក់លើទីផ្សារត្រូវគោរពតាមច្បាប់ និងលិខិតបទដ្ឋាគតិយុត្ត ដែលបានកំណត់។
ឆ្លើយតបនឹងការស្នើសុំរបស់តំណាងសមាគមអ្នកប្រឹក្សាគ្រឿងសម្អាង ឯកឧត្តម គឹម មាសសុខសីហា ទទួលយកសំណើ និងឯកភាពផ្ដល់នូវគ្រូបង្គោលដល់សមាគមន៍ដើម្បីធ្វើការបណ្ដុះបណ្ដាល។
ឆ្លៀតក្នុងឱកាសនេះ ឯកឧត្តមអគ្គនាយក បានណែនាំដល់ប្រតិបត្តិករគ្រឿងសម្អាង ឱ្យខិតខំបំពេញនូវកាតព្វកិច្ច និងការទទួលខុសត្រូវឱ្យបានច្បាស់លាស់ ដើម្បីផ្ដល់នូវទំនុកចិត្តដល់អ្នកប្រើប្រាស់ និងធុរកិច្ចកាន់ប្រសើរ។

មន្ត្រីរាជការស៊ីវិល និងមន្រ្តីជាប់កិច្ចសន្យារបស់អគ្គនាយកដ្ឋានកិច្ចការពារអ្នកប្រើប្រាស់ និងការប្រកួតប្រជែង នៃក្រសួងពាណិជ្ជកម្មបានធ្វើជំរឿនជាក់ស្ដែង
........
(ភ្នំពេញ)៖ នៅថ្ងៃចន្ទ-អង្គារ ២-៣កើត ខែជេស្ឋ ឆ្នាំមមី អដ្ឋស័ក ព.ស. ២៥៧០ ត្រូវនឹងថ្ងៃទី១៨-១៩ ខែឧសភា ឆ្នាំ២០២៦ មន្រ្តីរាជការស៊ីវិល និងមន្រ្តីជាប់កិច្ចសន្យា នៃអគ្គនាយកដ្ឋានកិច្ចការពារអ្នកប្រើប្រាស់ និងការប្រកួតប្រជែង នៃក្រសួងពាណិជ្ជកម្ម បានចូលរួមធ្វើជំរឿនជាក់ស្ដែងតាមរចនាសម្ព័ន្ធ ដោយយុទ្ធនាការនេះត្រូវបានរៀបចំ និងអនុវត្តយ៉ាងយកចិត្តទុកដាក់ដោយគណៈកម្មការធ្វើបច្ចុប្បន្នភាពរចនាសម្ព័ន្ធ និងជំរឿនមន្ត្រីជាក់ស្តែងនៃក្រសួងមុខងារសាធារណៈ។
ការចុះធ្វើជំរឿននេះ គឺជាការបោះជំហានដ៏សំខាន់មួយ ដើម្បីធានាបាននូវភាពសុក្រឹត តម្លាភាព និងប្រសិទ្ធភាពខ្ពស់ ក្នុងការគ្រប់គ្រងប្រព័ន្ធទិន្នន័យមន្ត្រីរាជការ ដែលស្របតាមអភិក្រមនៃការកែទម្រង់រដ្ឋបាលសាធារណៈយ៉ាងមុតស្រួចរបស់រាជរដ្ឋាភិបាលកម្ពុជា។
ក្នុងរយៈពេល ២ថ្ងៃកន្លងមក យើងសង្កេតឃើញថា យុទ្ធនាការនេះបានប្រព្រឹត្តទៅយ៉ាងរលូន មានរបៀបរៀបរយ។

សារលិខិតជូនពរគោរពជូន លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម ក្នុងឱកាសខួបកំណើតរបស់ លោកជំទាវរដ្ឋមន្ត្រី

យើងខ្ញុំទាំងអស់គ្នាជាថ្នាក់ដឹកនាំ និងមន្ត្រីរាជការទាំងអស់ នៃអគ្គនាយកដ្ឋានកិច្ចការពារអ្នកប្រើប្រាស់ និងការប្រកួតប្រជែង នៃក្រសួងពាណិជ្ជកម្ម សូមគោរពជូនពរ លោកជំទាវរដ្ឋមន្ត្រី និងក្រុមគ្រួសារ សូមទទួលបាននូវសុខភាពល្អបរិបូរណ៍ សុខសុភមង្គល ជោគជ័យគ្រប់ភារកិច្ច និងសមប្រកបនូវពុទ្ធពរទាំង៤ប្រការគឺ អាយុ វណ្ណៈ សុខៈ និង ពលៈ កុំបីឃ្លៀងឃ្លាតឡើយ។
ដោយសេចក្តីគោរពដ៏ខ្ពង់ខ្ពស់។🙏🙏🙏

នៅថ្ងៃពុធ ១២រោច ខែពិសាខ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី១៣ ខែឧសភា ឆ្នាំ២០២៦ នេះ មន្រ្តីសាខា ក.ប.ប. ខេត្តព្រះសីហនុ ខេត្តឧត្តរមានជ័យ ខេត្តកំពត និងខេត្តស្វាយរៀង បានបន្តសហការជាមួយមន្រ្តីនៃមន្ទីរពាណិជ្ជកម្ម ចុះត្រួតពិនិត្យគុណភាព សុវត្ថិភាពម្ហូបអាហារនៅតាមទីផ្សារគោលដៅសំខាន់ៗរួមមាន ផ្សារចំនួន ៤ផ្សារ និងផ្ទះ/តូបលក់ទំនិញនានាចំនួន ៣១ទីតាំង ដើម្បីធានាការពារនូវសុខុមាលភាពជូនអ្នកប្រើប្រាស់ ទប់ស្កាត់ផលិតផលទំនិញមិនសមស្រប ពិសេសផលិតផលម្ហូបអាហារដែលមិនអនុលោមតាមលក្ខខ័ណ្ឌតម្រូវផ្នែកបច្ចេកទេស ឬមានកត្តាជាគ្រោះណាមួយ ធ្វើឱ្យប៉ះពាល់សុខភាពអ្នកប្រើប្រាស់ជាយថាហេតុ។ សកម្មភាពត្រួតពិនិត្យ មន្រ្តីជំនាញបានធ្វើការស្រង់យកសំណាកគំរូផលិតផលមួយចំនួនមកធ្វើការវិភាគរកសារធាតុគីមីហាមឃាត់ ឬកត្តាហានិភ័យផ្សេងៗ ជាលទ្ធផលបង្ហាញនូវភាពអនុលោម និងមានសុវត្ថិភាពសមស្របសម្រាប់អ្នកប្រើប្រាស់។

ឆ្លៀតក្នុងឱកាសនោះដែរ មន្ត្រីសាខាក៏បានចែកជូនផ្ទាំងរូបភាពស្ដីពី «ការស្វែងយល់អំពីការជ្រើសរើសម្ហូបអាហារដែលមានសុវត្ថិភាព» មួយចំនួន ​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​ជូនអាជីវករ និងអ្នកប្រើប្រាស់ ដើម្បីចូលរួមស្វ័យត្រួតពិនិត្យលើស្លាកសញ្ញាផលិតផលវេចខ្ចប់ស្រេច ការទុកដាក់ទំនិញ លក្ខខណ្ឌអនាម័យ និងការចេះប្រុងប្រយ័ត្នលើកត្តាជាគ្រោះដែលអាចប៉ះពាល់ដល់សុខភាព និងសុវត្ថិភាព ជាយថាហេតុ ផងដែរ។

អគ្គនាយកដ្ឋាន ក.ប.ប. នៃក្រសួងពាណិជ្ជកម្ម បន្តផ្សព្វផ្សាយអំពីសុវត្ថិភាពម្ហូបអាហារដល់សិស្សានុសិស្សដែលជាទំពាំងស្នងឬស្សី

នៅថ្ងៃពុធ ១២រោច ខែពិសាខ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី១៣ ខែឧសភា ឆ្នាំ២០២៦ មន្រ្តីសាខា ក.ប.ប. ខេត្តកណ្ដាល បានបន្តនូវការសហការជាមួយមន្រ្តីនៃមន្ទីរពាណិជ្ជកម្ម និងមន្រ្តីនៃមន្ទីរអប់រំ យុវជន និងកីឡាខេត្ត បន្តចុះអប់រំផ្សព្វផ្សាយស្តីពីសុវត្ថិភាពម្ហូបអាហារ កិច្ចការពារអ្នកប្រើប្រាស់ កិច្ចការប្រកួតប្រជែង កម្មវិធី CCF Complaint App និងផលប៉ះពាល់នៃគ្រឿងញៀន ជូនដល់លោកគ្រូ អ្នកគ្រូសិស្សានុសិស្ស និងអាជីវករលក់ដូរនៅក្នុងសាលាអនុវិទ្យាល័យសៀមរាប ស្ថិតក្នុងឃុំសៀមរាប ស្រុកកណ្ដាលស្ទឹង ខេត្តកណ្ដាល ដែលមានអ្នកចូលរួមចំនួន សរុប២៥៤នាក់។

នៅក្នុងវគ្គអប់រំ ផ្សព្វផ្សាយនេះ មន្រ្តីជំនាញបានធ្វើការណែនាំអំពីការជ្រើសរើស ការពិនិត្យម្ហូបអាហារដែលមានសុវត្ថិភាព និងអាហារូបត្ថម្ភដែលមានគុណភាពល្អសម្រាប់បរិភោគប្រចាំថ្ងៃ ព្រមទាំងបានចែកផ្ទាំងរូបភាពផ្សព្វផ្សាយ (Poster) អំពីសុវត្ថិភាពម្ហូបអាហារចំនួន ១៧៥សន្លឹកផងដែរ។ សង្កត់ធ្ងន់ក្នុងពិធីនោះ មន្រ្តីជំនាញក៏បានធ្វើការណែនាំដល់សិស្សានុសិស្ស ឱ្យមានការប្រុងប្រយ័ត្នខ្ពស់ក្នុងការទទួលទាននូវភេសជ្ជៈដែលមានជាតិស្ករខ្ពស់ និងមានជាតិផ្អែមខ្លាំង ព្រោះបណ្ដាលឱ្យកើតជំងឺលើសសម្ពាធឈាម និងជំងឺទឹកនោមផ្អែម ជាយថាហេតុ។

ទន្ទឹមនឹងនោះ មន្ត្រីជំនាញក៏បានផ្សព្វផ្សាយបន្ថែមអំពីផលលំបាក និងគ្រោះថ្នាក់នៃការប្រើប្រាស់គ្រឿងញៀន, គ្រឿងញៀនជាគ្រោះថ្នាក់ធ្ងន់ធ្ងរដល់សង្គមជាតិទាំងមូល។

សេចក្តីជូនដំណឹងស្តីពីការធ្វើធុរកិច្ចមិនសុចរិតពាក់ព័ន្ធផលិតផលទំនិញស្ករស

អគ្គនាយកដ្ឋានកិច្ចការពារអ្នកប្រើប្រាស់ និងការប្រកួតប្រជែង «ក.ប.ប.» នៃក្រសួងពាណិជ្ជកម្ម សូមជម្រាបជូនសាធារណជនជ្រាបថា បន្ទាប់ពីមានបាតុភាពលើភាពមិនច្បាស់លាស់លើករណីទុរេនដាក់លក់នៅផ្សារ ភួ ពុយ ខេត្តបាត់ដំបង អគ្គនាយកដ្ឋាន ក.ប.ប. បានចាត់វិធានការជាបន្តបន្ទាប់ ដូចខាងក្រោម៖

១. នៅថ្ងៃទី៤ ខែឧសភា ឆ្នាំ២០២៦៖ អគ្គនាយកដ្ឋាន បានណែនាំឱ្យសាខា ក.ប.ប. ខេត្តបាត់ដំបង ចុះត្រួតពិនិត្យសម្ភាសន៍ផ្ទាល់ជាមួយអាជីវករចំនួន ៧ កន្លែងដែលដាក់លក់ទុរេន នៅផ្សារ ភួ ពុយ និងប្រមូលសំណាកគំរូទុរេនទាំងនោះ ដើម្បីបញ្ជូនមកមន្ទីរពិសោធន៍ ពិនិត្យរកសារធាតុគីមី ដែលអាចប៉ះពាល់ដល់សុខភាព សុវត្ថិភាពអ្នកប្រើប្រាស់។

២. នៅថ្ងៃទី៥ ខែឧសភា ឆ្នាំ២០២៦៖ អ្នកនាំពាក្យក្រសួងពាណិជ្ជកម្ម និងអគ្គនាយក នៃអគ្គនាយកដ្ឋាន ក.ប.ប. បានចុះទៅធ្វើការស៊ើបអង្កេតដល់ទីកន្លែងនៅខេត្តបាត់ដំបង និងរៀបចំកិច្ចប្រជុំរួមរវាងរដ្ឋបាលខេត្តបាត់ដំបងដែលមានការចូលរួមពីលោកអភិបាលរងខេត្តបាត់ដំបង ប្រធានមន្ទីរពាណិជ្ជកម្មខេត្តបាត់ដំបង ប្រធានមន្ទីរកសិកម្មខេត្តបាត់ដំបង ប្រធានសាខា ក.ប.ប. និងមន្ត្រីក្រោមឱវាទ ព្រមទាំងអាជីវករពាក់ព័ន្ធនៅផ្សារ ភួ ពុយ មួយចំនួនផងដែរ ដើម្បីស្ដាប់អំណះអំណាង និងស្វែងរកដំណោះស្រាយបន្ទាន់សម្រាប់ករណីនេះ។

៣. នៅថ្ងៃទី៦ ខែឧសភា ឆ្នាំ២០២៦៖ អគ្គនាយកដ្ឋាន ក.ប.ប. បានចេញលិខិតបង្គាប់ការលេខ ៤៤៣ អ.កបប ចុះថ្ងៃទី៦ ខែឧសភា ឆ្នាំ២០២៦ ដោយតម្រូវឱ្យលោក គឹម ប្រុស មកបំពេញការងារនៅនាយកដ្ឋានកិច្ចការប្រកួតប្រជែង នៃទីស្នាក់ការកណ្តាលអគ្គនាយកដ្ឋាន ក.ប.ប. ដើម្បីបន្តនីតិវិធីរបស់ក្រុមប្រឹក្សាវិន័យនៃក្រសួងពាណិជ្ជកម្ម ស្របតាមច្បាប់ស្តីពីសហលក្ខន្តិកៈមន្ត្រីរាជការស៊ីវិល នៃព្រះរាជាណាចក្រកម្ពុជា។

អគ្គនាយកដ្ឋានកិច្ចការពារអ្នកប្រើប្រាស់ និងការប្រកួតប្រជែង «ក.ប.ប.» នៃក្រសួងពាណិជ្ជកម្ម សហការជាមួយគណៈកម្មាធិការប្រកួតប្រជែង និងអ្នកប្រើប្រាស់អូស្ត្រាលី (ACCC) រៀបចំសិក្ខាសាលាស្តីពី «ការស៊ើបអង្កេតសកម្មភាពនៃការប្រើជំហរឧត្តមភាពលើទីផ្សារ» នៅសណ្ឋាគារ NOVOTEL Phnom Penh
-----------

(ភ្នំពេញ)៖ នៅថ្ងៃទី១២-១៣ ខែឧសភា ឆ្នាំ២០២៦ អគ្គនាយកដ្ឋាន ក.ប.ប. នៃក្រសួងពាណិជ្ជកម្ម បានសហការជាមួយគណៈកម្មាធិការប្រកួតប្រជែង និងអ្នកប្រើប្រាស់អូស្ត្រាលី (ACCC) រៀបចំសិក្ខាសាលាស្តីពី «ការស៊ើបអង្កេតសកម្មភាពនៃការប្រើជំហរឧត្តមភាពលើទីផ្សារ» នៅសណ្ឋាគារ NOVOTEL Phnom Penh ក្រោមអធិបតីភាព ឯកឧត្តម គឹម មាសសុខសីហា អគ្គនាយក នៃអគ្គនាយកដ្ឋាន ក.ប.ប. លោកស្រី កានូ នីគី លេខាទី១ កិច្ចសហប្រតិបត្តិការអភិវឌ្ឍន៏ ស្ថានទូតអូស្រា្តលីប្រចាំកម្ពុជា និងគ្រូឧទ្ទេសនាមមកពី ACCC ចំនួន៤រូប និងមានការអញ្ជើញចូលរួមពីសំណាក់ សមាជិកគណៈកម្មាធិការប្រកួតប្រជែងកម្ពុជាដែលជាបុគ្គលឯករាជ្យ និង មន្ត្រីស៊ើបអង្កេតនៃអគ្គនាយកដ្ឋាន​ ក.ប.ប. សរុបប្រមាណ ៤០រូប។

សិក្ខាសាលានេះ ត្រូវបានឧបត្ថម្ភគាំទ្រដោយគម្រោងភាពជាដៃគូរវាងរដ្ឋាភិបាលអូស្ត្រាលី និងអាស៊ីអាគ្នេយ៍ (SEA G2G - Cambodia) លើការអភិវឌ្ឍន៍គោលនយោបាយការពារអ្នកប្រើប្រាស់ និងការប្រកួតប្រជែង។ សិក្ខាសាលានេះ រៀបចំឡើងក្នុងគោលបំណងដើម្បីពង្រឹងសមត្ថភាព បង្កើនចំណេះដឹង និងជំនាញទាក់ទងនឹងការស៊ើបអង្កេតបទល្មើសនៃការប្រើជំហរឧត្តមភាពលើទីផ្សារ ក្រោមច្បាប់ស្តីពីការប្រកួតប្រជែង តាមរយៈការផ្តល់ឱ្យមន្ត្រីស៊ើបអង្កេត នៃអគ្គនាយកដ្ឋាន ក.ប.ប. បានសិក្សារៀនសូត្រពីបទពិសោធន៍កម្រិតអន្តរជាតិ ជាពិសេសដោយផ្អែកលើបរិបទនៃការអនុវត្តច្បាប់លើការប្រើជំហរឧត្តមភាពលើទីផ្សារ ជាក់ស្តែងក្នុងប្រទេសអូស្ត្រាលី និងការអនុវត្តជាសកល៕

អគ្គនាយកដ្ឋាន ក.ប.ប. នៃក្រសួងពាណិជ្ជកម្ម បន្តផ្សព្វផ្សាយអំពីសុវត្ថិភាពម្ហូបអាហារដល់សិស្សានុសិស្សដែលជាទំពាំងស្នងឬស្សី

នៅថ្ងៃចន្ទ ១០រោច ខែពិសាខ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី១១ ខែឧសភា ឆ្នាំ២០២៦ មន្រ្តីសាខា ក.ប.ប. ខេត្តរតនគិរី ខេត្តព្រះវិហារ និងខេត្តកោះកុង បានបន្តនូវការសហការជាមួយមន្រ្តីនៃមន្ទីរពាណិជ្ជកម្ម និងមន្រ្តីនៃមន្ទីរអប់រំ យុវជន និងកីឡាខេត្ត បន្តចុះអប់រំផ្សព្វផ្សាយស្តីពីសុវត្ថិភាពម្ហូបអាហារ កិច្ចការពារអ្នកប្រើប្រាស់ កិច្ចការប្រកួតប្រជែង កម្មវិធី CCF Complaint App និងផលប៉ះពាល់នៃគ្រឿងញៀន ជូនដល់លោកគ្រូ អ្នកគ្រូសិស្សានុសិស្ស និងអាជីវករលក់ដូរនៅក្នុងសាលាបឋមសិក្សាហ៊ុនសែនយក្សឡោម ស្ថិតក្នុងក្រុងបានលុង ខេត្តរតនគិរី ដែលមានអ្នកចូលរួមចំនួន ១១៥នាក់, សាលាវិទ្យាល័យម្លូរព្រៃ ស្ថិតក្នុងភូមិម្លូរព្រៃ ឃុំម្លូរព្រៃ ស្រុកឆែប ខេត្តព្រះវិហារ ដែលមានអ្នកចូលរួមចំនួន ៤៣៤នាក់, និងសាខា អនុវិទ្យាល័យកោះស្រឡៅនិងវត្តត្រពាំងរូង ស្ថិតក្នុងឃុំត្រពាំងរូង ស្រុកកោះកុង ខេត្តកោះកុង ដែលមានអ្នកចូលរួមចំនួន សរុប១២៩នាក់។

នៅក្នុងវគ្គអប់រំ ផ្សព្វផ្សាយនេះ មន្រ្តីជំនាញបានធ្វើការណែនាំអំពីការជ្រើសរើស ការពិនិត្យម្ហូបអាហារដែលមានសុវត្ថិភាព និងអាហារូបត្ថម្ភដែលមានគុណភាពល្អសម្រាប់បរិភោគប្រចាំថ្ងៃ ព្រមទាំងបានចែកផ្ទាំងរូបភាពផ្សព្វផ្សាយ (Poster) អំពីសុវត្ថិភាពម្ហូបអាហារ ប្រមាណជាង ៧៦០សន្លឹកផងដែរ។ សង្កត់ធ្ងន់ក្នុងពិធីនោះ មន្រ្តីជំនាញក៏បានធ្វើការណែនាំដល់សិស្សានុសិស្ស ឱ្យមានការប្រុងប្រយ័ត្នខ្ពស់ក្នុងការទទួលទាននូវភេសជ្ជៈដែលមានជាតិស្ករខ្ពស់ និងមានជាតិផ្អែមខ្លាំង ព្រោះបណ្ដាលឱ្យកើតជំងឺលើសសម្ពាធឈាម និងជំងឺទឹកនោមផ្អែម ជាយថាហេតុ។

ទន្ទឹមនឹងនោះ មន្ត្រីជំនាញក៏បានផ្សព្វផ្សាយបន្ថែមអំពីផលលំបាក និងគ្រោះថ្នាក់នៃការប្រើប្រាស់គ្រឿងញៀន, គ្រឿងញៀនជាគ្រោះថ្នាក់ធ្ងន់ធ្ងរដល់សង្គមជាតិទាំងមូល។