រួមគ្នាអភិវឌ្ឍឃុំមេព្រីង

សមាជិកសមាជិកាគណបក្សប្រជាជននៅមូលដ្ឋាន ឃុំ មេ ព្រីង ស្រុកបាធាយ ខេត្តកំពង់ចាម បានជួបជុំគ្នាអបអរសាទរជ័យជំនះនៅក្នុងការបោះឆ្នោតជ្រើសតាំងតំណាងរាស្ត្រនីតិកាលទី៧ និងពិភាក្សាពីការអភិវឌ្ឍនៅឃុំមេព្រីង
…………………
ឯកឧត្តម សួន វិជ្ជា ប្រធានក្រុមការងារថ្នាក់កណ្តាលទទួលបន្ទុកឃុំ មេ ព្រីង និង ឯកឧត្តម ម៉ុល វិបុល ប្រធានក្រុមការងារយុវជន បានចូលរួមជាមួយសមាជិកសមាជិកាគណបក្សប្រជាជនកម្ពុជានៅមូលដ្ឋានឃុំមេព្រីង ប្រកបដោយភាពស្និទ្ធស្នាល ក្រោមដំបូលសន្តិភាព ក្នុងឱកាសអបអរសាទរចំពោះជ័យជំនះជាប្រវត្តិសាស្ត្រដែលគណបក្សប្រជាជនកម្ពុជាទទួលបានសេចក្តីទុកចិត្តពីប្រជាពលរដ្ឋភាគច្រេីនតាមរយ:សម្លេងឆ្នោត ដេីម្បីបន្តដឹកនាំប្រទេសឲ្យមានសន្តិភាព ស្ថិរភាពនយោបាយក្នុងប្រទេស និងការអភិ វឌ្ឍប្រកបដោយបរិយាបន្ន និងចីរភាព។ ឯកឧត្តមប្រធានក្រុមការងារទាំងពីរបានថ្លែងអំណរគុណយ៉ាងជ្រាលជ្រៅបំផុតចំពោះការចូលរួមរបស់បងប្អូនសមាជិក សមាជិកាទាំងថ្នាក់កណ្តាល និងមូលដ្ឋាន នៅក្នុងយុទ្ធនាការឃោសនាបោះឆ្នោត ទាំងក្តៅ ទាំងភ្លៀង ដែលនេះបង្ហាញឲ្យឃេីញនូវវីរភាព ការតស៊ូ ការលះបង់មិនអាចកាត់ថ្លៃបាន និងសាមគ្គីភាពរបស់សមាជិកសមាជិកាបក្សដែលជាកត្តារួមចំណែកឲ្យគណបក្សប្រជាជនកម្ពុជាទទួលជ័យជំនះនៅក្នុងឃុំមេ ព្រីង និងនៅទូទាំងប្រទេស។ នាឱកាសនោះ មេ ភូមិ មេឃុំ ដែលជាសមាជិកសមាជិកាគណបក្សប្រជាជនកម្ពុជាបានបង្ហាញនូវការប្តេជ្ញាចិត្តខ្ពស់ក្នុងស្មារតីទទួលខុសត្រូវ នៅក្នុងការបង្កេីនល្បឿនអភិវឌ្ឍន៍ហេដ្ឋារចនាសម្ព័ន្ធមូលដ្ឋាន និងធ្វេីឲ្យប្រសេីរឡេីងនូវសេវាសាធារណ:ជូនប្រជាពលរដ្ឋនៅក្នុងឃុំមេព្រីង។ ទន្ទឹមនឹងនេះ សមាជិកសមាជិកាគណបក្សប្រជាជនកម្ពុជាទាំងអស់បានសម្តែងនូវការគាំទ្រយ៉ាងពេញទំហឹងចំពោះឯកឧត្តម បណ្ឌិត ហ៊ុន ម៉ាណែត ដែលនឹងក្លាយជានាយករដ្ឋមន្ត្រីរបស់កម្ពុជានាពេលដ៏ខ្លីខាងមុខនេះ។
ជាកិច្ចបញ្ចប់ សមាជិកសមាជិកាបានចូលរួមហូបអាហារសាមគ្គីជាមួយគ្នាក្នុងបរិយាកាសរីករាយ និងស្និទ្ធស្នាលបំផុត។

សម្លេងឆ្នោតរបស់គណបក្សប្រជាជនកម្ពុជានៅឃុំមេព្រីង មានការកើនឡើង បើធៀបនឹងសម្លេងឆ្នោតកាល ពីបោះឆ្នោតឃុំ សង្កាត់
………………
នៅថ្ងៃទី ២៣ ខែកក្កដា ឆ្នាំ ២០២៣ ឯកឧត្តម សួន វិជ្ជា ប្រធានក្រុមការងារគណបក្សចុះមូលដ្ឋាន ឃុំ មេ ព្រីង បានដឹកនាំសមាជិក សមាជិកា ថ្នាក់កណ្តាល ក្រុមការងារយុវជន សមាជិក សមាជិកាមូលដ្ឋាន តាមដាន និងពិនិត្យមើលសភាពការណ៍ផ្ទាល់នៅ ឃុំ មេ ព្រីង ។ ទោះបីមានភ្លៀងខ្លាំងយ៉ាងណាក៏ដោយ ក្រុមការងារបានត្រៀមលក្ខណៈយ៉ាងល្អនៅក្នុងការសម្របសម្រួលការដឹកជញ្ជូនសមាជិកសមាជិកាបក្សទៅបោះឆ្នោត។ ជាលទ្ធផលគណបក្សប្រជាជនកម្ពុជានៅឃុំមេព្រីង ទទួលបានសម្លេងឆ្នោតចំនួន ២២៩៩ ស្មើនឹង៦៧ភាគរយ បើធៀបនឹងសន្លឹកឆ្នោតបានការសរុប៣៤៤១។ បើធៀបទៅនឹងការបោះឆ្នោតឃុំ សម្លេងឆ្នោតគណបក្សប្រជាជននៅឃុំមេព្រីង មានការកើនឡើងចំនួន ៥២៤សន្លឹក។ ការកើនឡើងនូវសន្លឹកឆ្នោតនេះគឺជាសក្ខីភាពមួយដែលបង្ហាញឱ្យឃើញនូវជំនឿទុកចិត្តរបស់ប្រជាពលរដ្ឋនៅឃុំមេ ព្រីងកាន់តែច្រើនឡើងមកលេីការដឹកនាំរបស់គណបក្សប្រជាជនកម្ពុជា។ ជាមួយគ្នានេះ កំណើនសន្លឹកឆ្នោតក៏ឆ្លុះបញ្ចាំងឱ្យឃើញនូវលទ្ធផលជាផ្លែផ្កាដែលកើតចេញពីការលះបង់ពេលវេលា កម្លាំងកាយចិត្ត និងធនធានរបស់ក្រុមការងារបក្សចុះជួយមូលដ្ឋានឃុំមេព្រីងនៅក្នុងការចូលរួមអភិវឌ្ឍឃុំ មេ ព្រីង ឱ្យមានហេដ្ឋារចនាសម្ព័ន្តល្អ សេវាសាធារណៈល្អ និងការរក្សាបាននូវភូមិ ឃុំ មានសុវត្ថិភាព។

ក្បួនដង្ហែ បិទយុទ្ធនាការឃោសនា រកសម្លេងឆ្នោតជូន គណបក្សប្រជាជនកម្ពុជា នៅក្នុងស្រុកបាធាយ និងនៅក្នុងមូលដ្ឋានឃុំមេព្រីងបានបញ្ចប់ទៅក្នុងបរិយាកាសប្រកបដោយភាពរីករាយ ។
………………
នៅព្រឹកថ្ងៃទី ២១ ខែកក្កដា ឆ្នាំ ២០២៣ ឯកឧត្តម សួន វិជ្ជា ប្រធានក្រុមការងារគណបក្សចុះមូលដ្ឋាន ឃុំ មេ ព្រីង បានប្រគល់ទង់បក្សទៅកាន់ ប្រធានគណបក្ស ឃុំមេព្រីង និងបានដឹកនាំសមាជិក សមាជិកា ថ្នាក់កណ្តាល ក្រុមការងារយុវជន សមាជិក សមាជិកាមូលដ្ឋាន ចំនួន ៤០០នាក់ នៅក្នុងនោះមាន ឡានធំចំនួន ០៥ ឡានតូចចំនួន២១ និងម៉ូតូចំនួន ៧៥ ដើម្បីចូលរួមដង្ហែក្បួន បិទយុទ្ធនាការឃោសនា រកសម្លេងឆ្នោតជូន គណបក្សប្រជាជនកម្ពុជា នៅក្នុងស្រុកបាធាយ និងនៅក្នុងមូលដ្ឋានឃុំមេព្រីង ។
ឆ្លៀតក្នុងឱកាសនោះ ឯកឧត្តមប្រធានក្រុមការងារឃុំ មេ ព្រីង បានណែនាំឱ្យសមាជិក សមាជិកាទាំងអស់ត្រូវ ពង្រឹងស្មារតី សាមគ្គីភាព និងបន្តក្តាប់សភាពការណ៍ ឱ្យបានមត់ចត់ និងត្រូវអនុវត្តឱ្យបានខ្ជាប់ផ្ជួន តាមសេចក្តីណែនាំរបស់ គណកម្មាធិការជាតិ រៀបចំការបោះឆ្នោត។ ជាទីបញ្ចប់ ឯកឧត្តម សួន វិជ្ជា បានរំលឹកឱ្យ
សមាជិកសមាជិកាត្រូវប្រញាប់ប្រញាល់ទៅបោះឆ្នោតជូនគណបក្សប្រជាជនដែលមានលេខរៀងទី១៨ នៅថ្ងៃទី២៣ ខែ កក្កដា ឆ្នាំ២០២៣ និងរៀបចំសម្រួល មធ្យោបាយដឹកជញ្ជូនសមាជិកបក្សឱ្យទៅបោះឆ្នោតទាន់ ពេលវេលា។

នៅព្រឹកថ្ងៃទី 15 ខែកក្កដា ឆ្នាំ 2023 ឯកឧត្តម សួន វិជ្ជា ប្រធានក្រុមការងារគណបក្សចុះមូលដ្ឋាន ឃុំ មេ ព្រីង បានដឹកនាំសមាជិក សមាជិកាថ្នាក់កណ្តាល និងសមាជិក សមាជិកាមូលដ្ឋាន ដង្ហែក្បួនយុទ្ធនាការឃោសនារកសម្លេងឆ្នោតជូនគណបក្សប្រជាជនកម្ពុជា។ ឆ្លៀតក្នុងឱកាសនោះ ឯកឧត្តមបានផ្សព្វផ្សាយពីសមិទ្ធផលសំខាន់ៗរបស់រាជរដ្ឋាភិបាលកម្ពុជាដឹកនាំដោយគណបក្សប្រជាជន នៅក្នុងការស្វែងរកសន្តិភាព ការការពារសន្តិភាព និងការអភិវឌ្ឍសេដ្ឋកិច្ចជាតិជាង44ឆ្នាំកន្លងមកនេះ។ ឯកឧត្តមប្រធានក្រុមការងារក៏បានណែនាំឲ្យសមាជិក សមាជិកាទាំងអស់ត្រូវប្រកាន់ខ្ជាប់គោលការណ៍របស់គណ:កម្មាធិការជាតិរៀបចំការបោះឆ្នោតផងដែរ។

ការដង្ហែក្បួនយុទ្ធនាការព្រឹកនេះ មានអ្នកចូលរួមចំនួន 160 នាក់ នៅក្នុងនោះមានម៉ូតូចំនួន 25, ឡានតូច ចំនួន 16 , និងឡានធំចំនួន ០១។

នៅថ្ងៃទី ១៤ ខែកក្កដា ឆ្នាំ ២០២៣ ក្រុមការងារនាយកដ្ឋាន និងសមាជិកបក្សឃុំបន្តចុះឃោសនាតាមខ្នងផ្ទះ នៅភូមិព្រៃកោ ឃុំមេព្រីង

នៅព្រឹកថ្ងៃទី ១៣ ខែកក្កដា ឆ្នាំ ២០២៣ ឯកឧត្តម ងួន សុជាតិ បេក្ខជនតំណាងរាស្រ្តមណ្ឌលខេត្តកំពង់ចាម និង ឯកឧត្តម សួន វិជ្ជា ប្រធានក្រុមការងារគណបក្សចុះមូលដ្ឋាន ឃុំមេព្រីង បានដឹកនាំសមាជិក សមាជិកា ចុះផ្សព្វផ្សាយកម្មវិធីនយោបាយរបស់គណបក្សប្រជាជនកម្ពុជា និងណែនាំពីរបៀបគូសសន្លឹកឆ្នោតគាំទ្រគណបក្ស នៅក្នុងស្នាក់ការគណបក្ស ឃុំមេព្រីង ស្រុកបាធាយ ខេត្តកំពង់ចាម ក្នុងយុទ្ធនាការឃោសនាបោះឆ្នោតជ្រើសតាំងតំណាងរាស្ត្រ នីតិកាលទី៧ នៃរដ្ឋសភា ដែលសមាជិក សមាជិកា ចូលរួម ចំនួន ៣០០នាក់។

នៅថ្ងៃទី ១២ ខែកក្កដា ឆ្នាំ ២០២៣ ក្រុមការងារនាយកដ្ឋាន និងសមាជិកបក្សឃុំបន្តចុះឃោសនាតាមខ្នងផ្ទះ នៅភូមិតាំងថ្លើង ឃុំមេព្រីង

នៅព្រឹកថ្ងៃទី ១០ ខែកក្កដា ឆ្នាំ ២០២៣ ឯកឧត្តម សួន វិជ្ជា ប្រធានក្រុមការងារគណបក្សចុះមូលដ្ឋាន ឃុំមេព្រីង បានដឹកនាំសមាជិក សមាជិកាអមដំណេីរ ឯកឧត្តម ប៉ាន សូរស័ក្តិ ប្រធានក្រុមការងារគណបក្សចុះជួយស្រុកបាធាយ ចុះផ្សព្វផ្សាយកម្មវិធីនយោបាយ​របស់​គណបក្ស​​ប្រជាជនកម្ពុជា និងណែនាំ​ពី​របៀប​គូស​សន្លឹក​ឆ្នោតគាំទ្រគណ​បក្ស ក្នុងមូលដ្ឋានឃុំមេព្រីង ស្រុក​បាធាយ ខេត្ត​កំពង់​ចាម ក្នុងយុទ្ធនាការឃោសនាបោះឆ្នោតជ្រើសតាំងតំណាងរាស្ត្រ នីតិកាលទី៧ នៃរដ្ឋសភា ដែលសមាជិក សមាជិកា ចំនួន ៣១០នាក់។

នៅថ្ងៃទី 07 ខែកក្កដា ឆ្នាំ 2023 ក្រុមការងារនាយកដ្ឋាន និងសមាជិកបក្សឃុំបន្តចុះឃោសនាតាមខ្នងផ្ទះ នៅភូមិព្រៃកោ ឃុំមេព្រីង

នៅព្រឹកថ្ងៃទី 08 ខែកក្កដា ឆ្នាំ 2023 ឯកឧត្តម សួន វិជ្ជា ប្រធានក្រុមការងារគណបក្សចុះមូលដ្ឋាន បានដឹកនាំសមាជិក សមាជិកាចំនួន 205 នាក់ ដើម្បីដង្ហែក្បួនយុទ្ធនាការឃោសនាបោះឆ្នោតរបស់គណបក្សប្រជាជនកម្ពុជា នៅឃុំមេព្រីង ដែលមានចំនួន 5 ភូមិ។