សាលាដំបូងខេត្តកំពង់ឆ្នាំង

នារសៀល ថ្ងៃទី២ ខែមិថុនា ឆ្នាំ២០២៦ នេះ, ឯកឧត្តម កី ម៉ានេរ៉ា ប្រធានសាលាដំបូងខេត្តកំពង់ឆ្នាំង បានសំណេះសំណាលជាមួយលោក មាំង ហ៊ង ក្រឡាបញ្ជីនៃសាលាដំបូងខេត្តកំពង់ឆ្នាំង ក្នុងឱកាសដែលលោកក្រឡាបញ្ជីនឹងត្រូវចូលនិវត្ដន៍។

ជាមួយគ្នានេះ, ឯកឧត្តមប្រធាន ក៏បានថ្លែងនូវអំណរគុណដល់លោកក្រឡាបញ្ជី ដែលបានខិតខំបំពេញភារកិច្ចរបស់ខ្លួនប្រកបដោយស្មារតីទទួលខុសត្រូវខ្ពស់ជូនប្រជាពលរដ្ឋ ក្នុងរយៈពេលកន្លងមក។សូមជម្រាបជូនថា លោក មាំង ហ៊ង បានបំពេញមុខងារជាក្រឡាបញ្ជី ចាប់តាំងពីថ្ងៃទី១ ខែវិច្ឆិកា ឆ្នាំ១៩៨៦ ដែលដល់បច្ចុប្បន្ន មានរយៈពេលប្រមាណជា ៤០ ឆ្នាំ។

លិខិតជូនដំណឹង និងការប្រកាសជាសាធារណៈ

សាររំលែកមរណទុក្ខរបស់ឯកឧត្តម កី ម៉ានេរ៉ា ប្រធានសាលាដំបូងខេត្តកំពង់ឆ្នាំង និងឯកឧត្តម ឯក ស៊ុនរស្មី ព្រះរាជអាជ្ញានៃអយ្យការអមសាលាដំបូងខេត្តកំពង់ឆ្នាំង សូមគោរពជូន និងជូនចំពោះ ឯកឧត្តម​ ម៉ុង មុនីចរិយា ប្រធានសាលាឧទ្ធរណ៍ត្បូងឃ្មុំ និងលោកជំទាវ, លោក ម៉ុង មុនីសោភា ចៅក្រមសាលាឧទ្ធរណ៍បាត់ដំបង និងលោកស្រី ព្រមទាំងក្រុមគ្រួសារ ដោយមហាឧបាសកពុទ្ធសាសនូបត្ថម្ភក៍ នុត ម៉ុង ដែលត្រូវជាលោកឪពុកបង្កើតរបស់ ឯកឧត្តម និងលោកចៅក្រម បានទទួលមរណភាព កាលពីថ្ងៃពុធ ១១កើត ខែជេស្ឋ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី២៧ ខែឧសភា ឆ្នាំ២០២៦ វេលាម៉ោង១៥:១៨ នាទីរសៀល ក្នុងជន្មាយុ៨២ ឆ្នាំ ដោយជរាពាធ។

ថ្នាក់ដឹកនាំ និងចៅក្រមនៃសាលាដំបូងខេត្តកំពង់ឆ្នាំង បានទទួលស្វាគមន៍គណៈប្រតិភូសភាស៊ើបសួរ ដែលអញ្ជើញចុះធ្វើអធិការកិច្ចលើការងារនៅមន្ទីរស៊ើបសួរ។
=================

នាព្រឹក ថ្ងៃទី២៦ ខែឧសភា ឆ្នាំ២០២៦, ឯកឧត្តម កី ម៉ានេរ៉ា ប្រធានសាលាដំបូងខេត្តកំពង់ឆ្នាំង ព្រមទាំងលោកអនុប្រធាន លោក លោកស្រីចៅក្រម និងលោកប្រធានលេខាធិការដ្ឋានរដ្ឋបាល បានទទួលស្វាគមន៍គណៈប្រតិភូសភាស៊ើបសួរ ដែលដឹកនាំដោយឯកឧត្តម ឃុន លាងម៉េង អនុប្រធានសាលាឧទ្ធរណ៍ និងជាប្រធានសភាស៊ើបសួរ ដែលអញ្ជើញចុះធ្វើអធិការកិច្ចលើការងារនៅមន្ទីរស៊ើបសួរនៃសាលាដំបូងខេត្តកំពង់ឆ្នាំង ក្នុងគោលបំណងពង្រឹងការប្រតិបត្តិច្បាប់ និងអនុវត្តឱ្យបានពេញលេញ ស្របតាមតួនាទី និងភារកិច្ច ក្នុងការត្រួតពិនិត្យបញ្ជីប្រចាំត្រីមាសរបស់ចៅក្រមស៊ើបសួរ ក៏ដូចជាពិនិត្យលើស្ថិតិនៃចំណាត់ការរឿងតាមតម្រូវការ និងណែនាំកិច្ចការមួយចំនួន។

ឯកឧត្តម កី ម៉ានេរ៉ា ប្រធានសាលាដំបូងខេត្តកំពង់ឆ្នាំង និងឯកឧត្តម ឯក ស៊ុនរស្មី ព្រះរាជអាជ្ញានៃអយ្យការអមសាលាដំបូងខេត្តកំពង់ឆ្នាំង បានទទួលស្វាគមន៍គណៈប្រតិភូគណៈកម្មការនីតិកម្មនិងយុត្តិធម៌នៃរដ្ឋសភា ដឹកនាំដោយឯកឧត្តម អង្គ វង្ស វឌ្ឍានា ប្រធានគណៈកម្មការនីតិកម្មនិងយុត្តិធម៌ នៃរដ្ឋសភា ដើម្បីស្វែងយល់អំពីការអនុវត្តច្បាប់ និងវិស័យយុត្តិធម៌។
=====================

នាព្រឹក ថ្ងៃទី១៨ ខែឧសភា ឆ្នាំ២០២៦, ឯកឧត្តម អង្គ វង្ស វឌ្ឍានា ប្រធានគណៈកម្មការនីតិកម្ម និងយុត្តិធម៌ នៃរដ្ឋសភា និងជាតំណាងរាស្ត្រមណ្ឌលខេត្តបាត់ដំបង បានអញ្ជើញដឹកនាំគណៈប្រតិភូគណៈកម្មការ ដើម្បីជួបពិភាក្សាការងារជាមួយថ្នាក់ដឹកនាំ និងមន្ដ្រីរាជការនៃសាលាដំបូង និងអយ្យការអមសាលាដំបូងខេត្តកំពង់ឆ្នាំង ដោយមានឯកឧត្ដម កី ម៉ានេរ៉ា ប្រធានសាលាដំបូងខេត្តកំពង់ឆ្នាំង និងឯកឧត្តម ឯក ស៊ុនរស្មី ព្រះរាជអាជ្ញា នៃអយ្យការអមសាលាដំបូងខេត្តកំពង់ឆ្នាំង និងមានការចូលរួមពីលោកអនុប្រធានសាលាដំបូង លោក-លោកស្រីព្រះរាជអាជ្ញារង លោក-លោកស្រីចៅក្រម លោកប្រធានលេខាធិការដ្ឋាន និងលោក-លោកស្រីក្រទ្បាបញ្ជី។

ក្នុងជំនួបនេះ, អង្គប្រជុំបានផ្ដោតការពិភាក្សាលើចំណុចសំខាន់ៗ ដូចខាងក្រោម៖

១-វឌ្ឍនភាព និងបញ្ហាប្រឈមក្នុងការអនុវត្តច្បាប់ក្នុងដែនសមត្ថកិច្ចខេត្តកំពង់ឆ្នាំង

២-ស្ថានភាពទូទៅនៃវិស័យយុត្តិធម៌ និងការផ្ដល់សេវាយុត្តិធម៌ជូនប្រជាពលរដ្ឋ

៣-ការពង្រឹងកិច្ចសហប្រតិបត្តិការរវាងស្ថាប័ននីតិប្បញ្ញត្តិ និងស្ថាប័នតុលាការ ដើម្បីលើកកម្ពស់សិទ្ធិសេរីភាព និងយុត្តិធម៌សង្គម។

បន្ថែមលើនេះ, ឯកឧត្តមប្រធានគណៈប្រតិភូ ក៏បានផ្ដល់នូវអនុសាសន៍គន្លឹះៗក្នុងការបង្កើនប្រសិទ្ធភាពការងារតុលាការ ដើម្បីធានាបាននូវជំនឿទុកចិត្តពីសាធារណជន និងការអនុវត្តច្បាប់ឱ្យបានត្រឹមត្រូវ តម្លាភាព និងយុត្តិធម៌ ផងដែរ។

ក្នុងឱកាស​ដ៏​មហា​ននក្ខត្តឫក្សនៃព្រះរាជពិធីចម្រើនព្រះជន្មព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា សូមក្រាបបង្គំថ្វាយព្រះរាជសព្ទសាធុការពរជ័យ សិរីបវរមហាប្រសើរ ថ្វាយព្រះករុណាជាអម្ចាស់ជីវិតលើត្បូង សូមព្រះបារមីព្រះមហាស្វេតច្ឆត្រ និងវត្ថុស័ក្តិសិទិ្ធក្នុងលោក ប្រោសប្រទានពរជ័យ សិរីមង្គលថ្វាយ ព្រះករុណាជាអម្ចាស់ សូមមានព្រះជន្មាយុយឺនយូរជាងរយព្រះវស្សា ព្រះកាយពលមាំមួន និងព្រះរាជសុខភាពល្អបរិបូរណ៍ ដើម្បីគង់ប្រថាប់ជាម្លប់ដ៏ត្រជាក់ត្រជុំដល់ប្រជានុរាស្រ្តខ្មែរគ្រប់ៗរូប

សារថ្វាយព្រះពររបស់ ឯកឧត្តម កី ម៉ានេរ៉ា ប្រធានសាលាដំបូងខេត្តកំពង់ឆ្នាំង និងឯកឧត្តម ឯក ស៊ុនរស្មី ព្រះរាជអាជ្ញានៃអយ្យការអមសាលាដំបូងខេត្តកំពង់ឆ្នាំង សូមក្រាបបង្គំទូលថ្វាយ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ក្នុងឱកាសប្រកបដោយមហានក្ខត្តឫក្សដ៏វិសេសវិសាលបំផុតនៃព្រះរាជពិធីបុណ្យចម្រើនព្រះជន្មវស្សាគម្រប់ ៧៣ព្រះវស្សា យាងចូល ៧៤ព្រះវស្សា ដែលនឹងប្រព្រឹត្តទៅនៅថ្ងៃទី១៤ ខែឧសភា ឆ្នាំ២០២៦ ខាងមុខនេះ។

លិខិតជូនដំណឹងស្ដីពីការបញ្ជូនតាមការផ្សាយជាសាធារណៈ។