អង្គភាពច្រកចេញចូលតែមួយខេត្តកំពង់ឆ្នាំង

នៅព្រឹកថ្ងៃទី២៣ ខែឧសភា ឆ្នាំ២០២៦ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង រួមជាមួយលោកជំទាវ កែ ច័ន្ទមុនី ឯកឧត្ដមបណ្ឌិត ហ៊ឺ វីរៈ អ្នកតំណាងរាស្ត្រ សមាជិកក្រុមប្រឹក្សាខេត្ត អភិបាលរងខេត្ត និងក្រុមការងារ បានចុះដល់ទីតាំងកើតហេតុគ្រោះថ្នាក់ចរាចរណ៍រវាងរថយន្តកុងតឺន័រ និងរថយន្តដឹកកម្មកររោងចក្រ នៅលើផ្លូវជាតិ មុខសាលាបឋមសិក្សាសាលាលេខប្រាំ ស្រុកកំពង់ត្រឡាច និងបានជួបសួរសុខទុក្ខបងប្អូនកម្មករ កម្មការនីរងរបួសដែលកំពុងសម្រាកព្យាបាលនៅមន្ទីរពេទ្យ។

យើងខ្ញុំសូមចូលរួមរំលែកមរណទុក្ខយ៉ាងក្រៀមក្រំបំផុតចំពោះក្រុមគ្រួសារជនរងគ្រោះដែលបានទទួលមរណភាពក្នុងហេតុការណ៍ដ៏រន្ធត់នេះ សូមឧទ្ទិសបួងសួងដល់វិញ្ញានក្ខន្ធជនរងគ្រោះបានទៅកាន់សុគតិភពកុំបីឃ្លៀងឃ្លាត។

សូមជូនពរបងប្អូនដែលរងរបួស សូមឆាប់បានជាសះស្បើយ🙏🙏🙏

សេចក្តីប្រកាសព័ត៌មាន ស្តីពី ពិធីប្រកាសដាក់ឱ្យប្រើប្រាស់ជាផ្លូវការបណ្ណបើកបរឌីជីថល ដែលអាចផ្ទៀងផ្ទាត់ភាពត្រឹមត្រូវតាមថ្នាលផ្ទៀងផ្ទាត់ឯកសារ verify.gov.kh។

នៅថ្ងៃទី១២ ខែឧសភា ឆ្នាំ២០២៦ លោកហ៊ូ ប៊ុនថន ប្រធានអង្គភាពច្រកចេញចូលតែមួយ រួមជាមួយលោកប៊ុន សម្បត្តិអនុប្រធានអង្គភាព និងមន្ត្រីជួរមុខនៃអង្គភាពច្រកចេញចូលតែមួយ ចូលរួមជាអធិបតីវគ្គបណ្តុះបណ្តាលអំពីការប្រើប្រាស់កម្មវិធីព័ត៌មានវិទ្យាសម្រាប់ទទួលពាក្យស្នើសុំ និងផ្តល់សេវារដ្ឋបាលតាមប្រព័ន្ធអនឡាញនៅអង្គភាពច្រកចេញចូលតែមួយក្រោមអធិបតីភាព ឯកឧត្តម បួន ហេង អគ្គនាយករង នៃអគ្គនាយកដ្ឋានរដ្ឋបាលក្រសួងមហាផ្ទៃ និងជាអគ្គលេខាធិការរង នៃអគ្គលេខាធិការដ្ឋាននៃគណៈកម្មាធិការគ្រប់គ្រងសំរាម សំណល់រឹងទីប្រជុំជន និងលោក ឈឹម វុទ្ធា អភិបាលរងខេត្ត តំណាងឯកឧត្តម ស៊ុន សុវណ្ណារិទ្ធិ អភិបាល នៃគណៈអភិបាលខេត្តកំពង់ឆ្នាំង នៅសាលប្រជុំ«គ៧»សាលាខេត្តកំពង់ឆ្នាំង។

វគ្គបណ្ដុះបណ្ដាលនោះ ក៏មានការអញ្ជើញចូលរួមពី លោក លោកស្រី ប្រតិភូអមដំណើរ នាយក/នាយករងរដ្ឋបាលសាលារាជធានី ខេត្ត ប្រធាន អនុប្រធាន និងមន្ត្រីជួរមុខនៃអង្គភាពច្រកចេញចូលតែមួយរាជធានី ខេត្ដ រជ្ជទេយ្យករចំណូលនៃទីចាត់ការហិរញ្ញវត្ថុសាលារាជធានី ខេត្តនិងមន្រ្តីពាក់ព័ន្ធរបស់ សរុបចំនួន១៣៧ នាក់។

វគ្គបណ្តុះបណ្តាលនេះ រៀបចំឡើងក្នុងគោលបំណង ដើម្បីបង្កើនសមត្ថភាព និងការយល់ដឹងជូនមន្ត្រីពាក់ព័ន្ធរបស់អង្គភាពច្រកចេញចូលតែមួយរាជធានី ខេត្ត អំពីការប្រើប្រាស់កម្មវិធីព័ត៌មានវិទ្យាសម្រាប់ទទួលពាក្យស្នើសុំ និងផ្ដល់សេវារដ្ឋបាលតាមប្រព័ន្ធអនឡាញ ការទទួល និងការពិនិត្យលើពាក្យស្នើសុំសេវាដែលបានទទួលពីការស្នើសុំសេវាតាមប្រព័ន្ធអនឡាញ។

ការស្នើសុំសេវារដ្ឋបាលតាមប្រព័ន្ធអនឡាញនៅអង្គភាពច្រកចេញចូលតែមួយ ធ្វើឡើងតាមរយៈគេហទំព័រ៖ http://online.owso.gov.kh ។

រសៀលថ្ងៃទី៨ ខែឧសភា ឆ្នាំ២០២៦ លោក ឈឹម វុទ្ធា អភិបាលរងខេត្ត បានអញ្ជើញដឹកនាំកិច្ចប្រជុំប្រចាំត្រីមាសទី១ ឆ្នាំ២០២៦ និងលើកទិសដៅអនុវត្តបន្តរបស់អង្គភាពច្រកចេញចូលតែមួយ និងកិច្ចប្រជុំពិភាក្សាការងារ ស្ដីពីការប្រមូលចំណូល និងគ្រប់គ្រងចំណូលការផ្តល់សេវារដ្ឋបាលសម្រាប់មុខសេវាការចេញវិញ្ញាបនបត្របញ្ជាក់សុខភាព(លិខិតបញ្ជាក់កាយសម្បទាសម្រាប់ប្រឡងយកបណ្ណបើកបរគ្រប់ប្រភេទ) នៃវិស័យសុខាភិបាល ។

ដោយមានការអញ្ជើញចូលរួមពីប្រធានការិយាល័យប្រជាពលរដ្ឋខេត្ត តំណាងមន្ទីរសុខាភិបាលនៃរដ្ឋបាលខេត្ត តំណាងមន្ទីរពេទ្យបង្អែកខេត្ត ប្រធានផ្នែកទាំងពីរនៃការិយាល័យប្រជាពលរដ្ឋខេត្ត ថ្នាក់ដឹកនាំ និង មន្ត្រីប្រចាំការអង្គភាពច្រកចេញចូលតែមួយ នៃរដ្ឋបាលខេត្ដ នៅសាលប្រជុំសាលាខេត្ត។

លោកហ៊ូ ប៊ុនថន ប្រធានអង្គភាពច្រកចេញចូលតែមួយ បានធ្វើបទបង្ហាញអំពីវឌ្ឍនភាពការងារសម្រេចបានត្រីមាសទី១ បញ្ហាប្រឈមនានា និងសំណូមពរផងដែរ។ ជាមួយគ្នានោះ ពាក់ព័ន្ធប្រឈមនៃវិស័យសុខាភិបាល ជាលទ្ធផលអង្គប្រជុំ សម្រេចអនុវត្តតាមឧបសម្ព័ន្ធប្រកាសរួមស្ដីពីការផ្ដល់ការសេវាសធារណ:វិស័យសុខាភិបាល និងតម្រូវឱ្យប្រជាពលរដ្ឋបង់សេវានៅអង្គភាពច្រកចេញចូលតែមួយ បន្ទាប់មកយកបង្កាន់បង់ប្រាក់ទៅមន្ទីរពេទ្យបង្អែកខេត្តដើម្បីពិនិត្យផ្នែកបច្ចេកទេសចេញលិខិតបញ្ជាក់សម្បទាសម្រាប់ជាឯកសារភ្ជាប់នៃដំណើរការនីតិវិធីស្នើសុំប្រឡងយកបណ្ណបើកបរប្រភេទក និងប្រភេទខ និងស្នើសុំប្ដូរសុពលភាពប័ណ្ណបើកបរប្រភេទក និងប្រភេទខ នៅអង្គភាពច្រកចេញចូលតែមួយ។

លោកឈឹម វុទ្ធា អភិបាលរងខេត្ត និងជាប្រធានអង្គប្រជុំ បានវាយតម្លៃខ្ពស់ និងកោតសរសើរចំពោះថ្នាក់ដឹកនាំ ក៏ដូចជាមន្ត្រីពាក់ព័ន្ធនៃអង្គភាពច្រកចេញតែមួយ និងស្ថាប័នជំនាញពាក់ព័ន្ធ ដែលបានយកចិត្តទុកដាក់បំពេញការងារតាមតួនាទី ភារកិច្ច និងការទទួលខុសត្រូវរបស់ខ្លួន ទទួលបានលទ្ធផលគួរឱ្យកត់សម្គាល់។ ទន្ទឹមនឹងលទ្ធផលគួរឱ្យកត់សម្គាល់នេះ ក៏នៅមានបញ្ហាប្រឈម និងចំណុចខ្វះខាតបន្តិចបន្តួចទាមទារឱ្យមានការជួបប្រជុំពិភាក្សារកដំណោះស្រាយ និងកែលំអជាពិសេសឥរិយាបថនៃការផ្ដល់សេវា សំដៅធានាថាការផ្ដល់សេវារដ្ឋបាលជូនប្រជាពលរដ្ឋជាអតិថិជនប្រកបដោយតម្លាភាព រហ័ស និងជឿទុកចិត្ត។

គោរពជូនពរលោកហ៊ូ ប៊ុនថន ប្រធានអង្គភាពច្រកចេញចូលតែមួយមន្ត្រីផ្នែកជួរមុខ និងផ្នែកជួរក្រោយ ក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ ឆ្នាំមមី អដ្ឋស័ក ព.ស.២៥៧០ គ.ស២០២៦ សូមមានសុខភាពល្អ សុភមង្គលក្នុងក្រុមគ្រួសារ ជោគជ័យគ្រប់ភារកិច្ច និងប្រកបដោយពុទ្ធពរបួនប្រការគឺអាយុ វណ្ណៈ សុខៈ និងពលៈកុំបីឃ្លៀងឃ្លាតឡើយ។

នៅព្រឹកថ្ងៃទី ០៨ ខែមេសា ឆ្នាំ ២០២៦ លោកប៊ុន សម្បត្តិ អនុប្រធានអង្គភាពច្រកចេញតែមួយខេត្ត តំណាងលោកហ៊ូ ប៊ុនថន ប្រធានអង្គភាព និងក្នុងនាមលេខាធិការដ្ឋានគ្រប់គ្រងគ្រោះមហន្តរាយខេត្ត បានសហការជាមួយការិយាល័យដឹកជញ្ជូនផ្លូវទឹក និងកំពង់ផែនៃមន្ទីរសាធារណការ និងដឹកជញ្ជូន ខេត្ត និងមានការចូលរួមពីកម្លាំងនគរបាលចរាចរណ៍ផ្លូវទឹកខេត្ត បានចុះអប់រំផ្សព្វផ្សាយច្បាប់ស្តីពីការដឹកជញ្ជូនតាមផ្លូវទឹក ធ្វើការណែនាំដល់ម្ចាស់នាវា ម្ចាស់ដរចម្លង និងអ្នកបើកបរនាវាឱ្យគោរពច្បាប់ដឹកជញ្ជូនផ្លូវទឹក និងបទបញ្ញត្តិពាក់ព័ន្ធ ដើម្បីធានាបានសេចក្តីសុខ សុវត្ថិភាព អ្នកដំណើរតាមផ្លូវទឹក ក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរខាងមុខនេះ នៅទីតាំងភូមិ ចុងកោះ សង្កាត់ ផ្សារឆ្នាំង ក្រុងកំពង់ឆ្នាំង ខេត្តកំពង់ឆ្នាំង ។

ក្នុងពេលនោះដែរក្រុមការងារ ក៏បានពន្យល់ ណែនាំ និងផ្សព្វផ្សាយច្បាប់ស្តីពីការដឹកញ្ជូនផ្លូវទឹកដល់ពួកគាត់ ឱ្យចេះគោរពច្បាប់ចរាចរណ៍ផ្លូវទឹក និងបានណែនាំពួកគាត់នូវចំនុចសំខាន់ៗមួយចំនួន ៨ ចំនុចគឺ៖
១. ត្រូវធ្វើការតាមដានការព្យាករណ៍អាកាសធាតុជាប្រចាំ។ ក្នុងករណីមានខ្យល់កន្ត្រាក់ ឬរលកធំៗ ត្រូវផ្អាកការចេញដំណើរជាបណ្តោះអាសន្ន ឬស្វែងរកជម្រកសុវត្ថិភាពជាបន្ទាន់
២.ហាមបើកបរក្នុងស្ថានភាពស្រវឹង
៣. ត្រូវត្រួតពិនិត្យនាវារបស់ខ្លួនឱ្យបានហ្មត់ចត់មុនពេលចេញដំណើរ ដើម្បីប្រាដកថានាវាមានសុវត្ថិភាពជានិច្ច
៤.ត្រូវរៀបចំ ពិនិត្យ និងផ្ទៀងផ្ទាត់ សម្ភារសម្រាប់ប្រើប្រាស់ និងឧបករណ៍សង្គ្រោះដែលមានដូចជា អាវពោង ពោងកង បំពង់ពន្លត់អគ្គិភ័យ ខ្សែពួរ និងសម្ភារចាំបាច់ផ្សេងទៀតអោយគ្រប់គ្រាន់ស្របតាមទំហំឬស្ថានភាពនាវា និងចំនួនអ្នកដំណើរ
៥.មិនត្រូវដាក់សម្ភារផ្សេងៗ ឬមនុស្ស លើសចំណុះ
៦.គ្រប់អាជីវកម្មដឹកអ្នកដំណើរទាំងអស់ត្រូវបញ្ឈប់ជាបន្ទាន់ ប្រើប្រាស់នាវាខុសលក្ខណៈបច្ចេកទេស
៧.ត្រូវណែនាំឱ្យអ្នកដំណើរអង្គុយ ឬឈរតាមកន្លែងសមស្របដែលអាចរក្សាលំនឹងរបស់នាវា-ទូក ។
៨.ប្រភេទទូក-នាវាលក្ខណ:អាជីវកម្មដែលធ្វើចរាចរណ៍លើផ្ទៃទឹកត្រូវស្នើសុំចុះបញ្ជីឱ្យបានត្រឹមត្រូវនៅអង្គភាពច្រកចេញចូលតែមួយ ខេត្ត(ចំណុះផ្ទុក ៤០ តោនចុះក្រោម ឬ ៥០ កៅអីចុះក្រោម) ។ ដោយឡែក ទូក-នាវា មានចំណុះផ្ទុកលើសពី៤០តោន ត្រូវស្នើសុំចុះបញ្ជី និងលិខិតអនុញ្ញាតអាជីវកម្ម នៅមន្ទីរសាធារណការ និងដឹកជញ្ជូនខេត្ត។