វិទ្យាល័យ ហ៊ុនសែនកំពង់លែង

នាព្រឹកថ្ងៃចន្ទ ១រោច ខែជេស្ឋ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី១ ខែមិថុនា ឆ្នាំ២០២៦ លោក ឡោ សាលីម សមាជិកក្រុមប្រឹក្សាស្រុក លោក ឆេង ផល្លា អភិបាលរងស្រុក តំណាងដ៏ខ្ពង់ខ្ពស់លោក យ៉ែម លក្ខិណា អភិបាលនៃគណៈអភិបាលស្រុក បានអញ្ជើញចូលរួមក្នុងពិធីអបអរសាទរខួបលើកទី៧៧ ទិវាកុមារអន្តរជាតិ ១ មិថុនា, ខួបលើកទី២៥ ទិវាពិភពលោកប្រឆាំងពលកម្មកុមារ ១២ មិថុនា និងទិវាកុមារកម្ពុជា ឆ្នាំ២០២៦។ ពិធីនេះប្រព្រឹត្តទៅនៅវិទ្យាល័យ ហ៊ុនសែន កំពង់លែង ដោយមានការចូលរួមពីកងកម្លាំងប្រដាប់អាវុធទាំងបីប្រភេទ តំណាងសហគមន៍ ថ្នាក់ដឹកនាំការិយាល័យអប់រំ នាយិកា នាយក នាយករង លោកគ្រូ អ្នកគ្រូ វិទ្យាល័យ បឋម និងមត្តេយ្យព្រមទាំងសិស្សានុសិស្សសរុបប្រមាណ ៩៥៩នាក់ ស្រី ៥១២នាក់។
​ពិធីនេះក៏បានបញ្ចប់ទៅដោយបរិយាកាសរីករាយតាមរយៈការសម្តែងរឿងខ្លី ការចែកអំណោយជូនដល់សិស្សានុសិស្សដែលមានជីវភាពខ្វះខាត និងការផ្តល់រង្វាន់លើកទឹកចិត្តដល់សិស្សពូកែ ដើម្បីជាការលើកកម្ពស់ការសិក្សា និងសុខុមាលភាពរបស់កុមារនៅក្នុងមូលដ្ឋាន។

៚នៅព្រឹកថ្ងៃអាទិត្យ ១៥កើត ខែជេស្ឋ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី៣១ ខែឧសភា ឆ្នាំ២០២៦ លោក ស៊ឹម ប្រឹម ប្រធានមន្ទីរអប់រំ យុវជន និងកីឡា ខេត្តកំពង់ឆ្នាំង បានអញ្ជើញពិនិត្យដំណើរការរៀនបំប៉ន Live Teaching របស់ប្អូនៗសិស្សានុសិស្សថ្នាក់ទី១២វិទ្យាសាស្ត្រ និងវិទ្យាសាស្ត្រសង្គម នៅសាលាវិទ្យាល័យ ហ៊ុន សែន កំពង់លែង។ ទន្ទឹមនឹងនេះ លោកប្រធាន បានផ្ដល់អនុសាសន៍ដល់គណៈគ្រប់គ្រងសាលាបន្ថែមការជម្រុញ និងលើកទឹកចិត្តសិស្សថ្នាក់ទី១២ ទាំងអស់បានចូលរៀនវគ្គបំប៉ននេះគ្រប់ៗគ្នាទាំងនៅទីតាំងប្រមូលផ្ដុំនៅសាលារៀនផ្ទាល់ ក៏ដូចជាទីតាំងប្រមូលផ្ដុំតាមផ្ទះ ដើម្បីធានាថាប្អូនទទួលបានចំណេះដឹងជាមូលដ្ឋានសម្រាប់ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ១០ សីហា ២០២៦ នាពេលខាងមុខ។

៚គណៈគ្រប់គ្រងសាលា គណៈកម្មការគ្រប់គ្រងសាលារៀន លោកគ្រូ អ្នកគ្រូ ព្រមទាំងសិស្សានុសិស្សទាំងអស់នៃវិទ្យាល័យ ហ៊ុន សែន កំពង់លែង សូមគោរពថ្លែងអំណរគុណយ៉ាងជ្រាលជ្រៅ ចំពោះអ្នកគ្រូ ជិន ស្រីឡឹង គ្រូបង្រៀននៅសាលាបឋមសិក្សាថ្មរៀង ជាអតីតសិស្សវិទ្យាល័យ ហ៊ុន សែន កំពង់លែង បានឧបត្ថម្ភសៀវភៅភៅឈុតគណិតវិទ្យានិទ្ទេសA ថ្នាក់ទី១២ វិទ្យាសាស្ត្រ ១ឈុតប្រគល់ជូនវិទ្យាល័យ សម្រាប់ដាក់ឲ្យប្រើប្រាស់ក្នុងបណ្ណាល័យ។

យើងខ្ញុំទាំងអស់គ្នាសូមប្រសិទ្ធិពរជ័យ សិរីសួស្តី ជ័យមង្គល វិបុលសុខ គ្រប់ប្រការ កើតមានដល់អ្នកគ្រូ និងក្រុមគ្រួសារកុំបីឃ្លៀងឃ្លាតឡើយ។

ថ្ងៃចន្ទ ៩កើត ខែជេស្ឋ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី២៥ ខែឧសភា ឆ្នាំ២០២៦ លោក ឡុង រក្សា នាយករងវិទ្យាល័យហ៊ុនសែនកំពង់លែង និងលោក រ៉ន រស្មី គ្រូបង្វឹកយុវជនជជែកដេញដោល បានដឹកនាំប្អូនៗបេក្ខជនប្រកួតជជែកដេញដោលរបស់វិទ្យាល័យ ចូលរួមវគ្គបណ្ដុះបណ្ដាលស្ដីពី «នីតិវិធី និងយុទ្ធសាស្ត្រតស៊ូមតិ» នៃកម្មវិធីជជែកដេញដោលយុវជនថ្នាក់ខេត្តឆ្នាំ២០២៦ នៅមន្ទីរអប់រំ យុវជន និងកីឡាខេត្តកំពង់ឆ្នាំង។

ជូនពរប្អូនៗទទួលបានជោគជ័យ🎉💪

តើអ្នកដឹងទេថា ប៉ូលីសកោសល្យវិច័យកំណត់ម៉ោងស្លាប់ដោយរបៀបណា? 🤔
មិនមែនស្មានៗទេ គឺគេប្រើ 'សមីការឌីផេរ៉ង់ស្យែល' តាមច្បាប់ចុះត្រជាក់របស់ញូតុន! 🌡️💀
គណិតវិទ្យាគឺជាសាក្សីដែលមិនចេះកុហក និងជួយរកយុត្តិធម៌ក្នុងរឿងក្ដីឃាតកម្ម។ 🔍⚖️
#គណិតវិទ្យាក្នុងជីវិត

៚សារថ្វាយព្រះពររបស់គណៈគ្រប់គ្រងសាលា លោកគ្រូអ្នកគ្រូ ព្រមទាំងសិស្សានុសិស្សនៃវិទ្យាល័យ ហ៊ុន សែន កំពង់លែង

🙏សូមក្រាបថ្វាយព្រះពរ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ក្នុងព្រះរាជពិធីបុណ្យចម្រើនព្រះជន្មគម្រប់ ៧៣ យាងចូល ៧៤ ព្រះវស្សា

ព្រឹកថ្ងៃព្រហស្បតិ៍ ៦រោច ខែពិសាខ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី៧ ខែឧសភា ឆ្នាំ២០២៦ នៅសាលាវិទ្យាល័យហ៊ុនសែនកំពង់លែងបានរៀបចំកិច្ចប្រជុំផ្សព្វផ្សាយអំពីច្បាប់ចរាចរណ៍ផ្លូវគោក ផល់ប៉ះពាល់នៃគ្រឿងញៀន ការឆបោកតាមអនឡាញ បញ្ហាគ្រោះអគ្គីភ័យ ការរំលោភបំពានសេពសន្ថវៈ ទទួលរងការពិន័យ និងជាប់ទោសតាមផ្លូវច្បាប់ ដល់សិស្សានុសិស្សគ្រប់កម្រិតថ្នាក់ បញ្ហាសិស្សដែលគេចម៉ោងមិនចូលរៀន និងបញ្ហាក្មេងទំនើង។
សមាសភាពចូលរួមមានសរុប ១២៩៣នាក់ ស្រីសរុប ៧៣០នាក់ ក្នុងនោះ៖
- គណៈអភិបាលស្រុក ១រូប ស្រី០
- អធិការរងនៃអធិការនគរបាលស្រុក ៤រូប ស្រី០
- ប៉ុស្តិ៍រដ្ឋបាលនគរបាលឃុំ ៤រូប ស្រី០
- ក្រុមប្រឹក្សាឃុំ ២នាក់ ស្រី០
- សឹករងស្រុក ១នាក់ ស្រី០
- លោកស្រីនាយិកា នាយករង លោកគ្រូ-អ្នកគ្រូ ៥២នាក់ ស្រី ២៥នាក់
- សិស្សានុសិស្ស ១២២៩នាក់ ស្រី ៧០៥នាក់
ក្នុងនោះដែល លោក យ៉ែម លក្ខិណា អភិបាលនៃគណៈអភិបាលស្រុកកំពង់លែង ក៏បានលើកសរសើរដល់កិច្ចខិតខំប្រឹងប្រែងរបស់លោកស្រីនាយិកា ដែលបានតាមដាន និងកែប្រែសិស្សទំនើងគេចសិស្សមិនចូលរៀន ឱ្យនៅមានកម្រិតទាប និងបានថ្លែងអំណអរគុណចំពោះ កងកម្លាំងមានសមត្ថកិច្ចទាំងបីអង្គភាពតាមជំនាញដែលបានធ្វើបទបង្ហាញរបស់ខ្លួនរំលឹកណែនាំដល់សិស្សានុសិស្សអំពីបញ្ហា គ្រោះថ្នាក់ និងត្រូវជៀសវាងឆ្ងាយឱ្យបាន និងត្រូវឆ្លើយថាទេចំពោះគ្រឿងញៀន និងបានប្រមូលសិស្សប្រុសមានសក់វែងមកធ្វើការណែនាំឲ្យកាត់សក់ឲ្យបានសមរម្យ។ លោកអភិបាលសង្ឃឹមថាសិស្សានុសិស្សនឹងចូលរួមកែប្រែ និងខិតខំបន្តប្រឹងប្រែងការរៀនសូត្របន្ថែមឱ្យអស់ពីសមត្ថភាព ដែលជាទំពាំងស្នងឫស្សីជួយអភិវឌ្ឍន៍ប្រទេសជាតិឱ្យបានរីកចម្រើន។

នាព្រឹកថ្ងៃទី៣០ ខែមេសា ឆ្នាំ២០២៦ នៅវិទ្យាល័យ ហ៊ុន សែន កំពង់លែង បានបើកនូវការប្រជុំជាមួយមាតាបិតា អ្នកអាណាព្យាបាលសិស្សថ្នាក់ទី១២ ព្រមទាំងសិស្សានុសិស្សថ្នាក់ទី១២ទាំងអស់ ដើម្បីធ្វើការពិភាក្សារៀបចំបើកវគ្គបំប៉នសមត្ថភាពសិស្ស លើមុខវិជ្ជាគោលសម្រាប់ត្រៀមប្រឡងសញ្ញាបត្រមធ្យមសិក្សាទុតិយភូមិឆ្នាំ២០២៦ ក្រោមអធិបតីភាព លោក សែម សុខន ប្រធានការិយាល័យអប់រំ យុវជន និងកីឡាស្រុកកំពង់លែង។