មន្ទីរពេទ្យខេត្តកំពង់ឆ្នាំង

វគ្គបណ្តុះបណ្តាលបច្ចេកទេសប្រមូលសំណាក និងការដឹកជញ្ជូន នៅមន្ទីរពេទ្យខេត្តកំពង់ឆ្នាំង
———————————
ពិធីបើក និងមតិស្វាគមន៍៖ ថ្លែងដោយ លោកវេជ្ជបណ្ឌិត ទុំ សម្បត្តិ ប្រធានមន្ទីរពេទ្យខេត្តកំពង់ឆ្នាំង និងលោកសាស្ត្រាចារ្យរងជំនួយ អ៊ុក សារ៉ម នាយករងមន្ទីរពេទ្យមិត្តភាពកម្ពុជា-ចិន ព្រះកុសុមៈ ដែលជាតំណាងដ៏ខ្ពង់ខ្ពស់របស់ ឯកឧត្តមសាស្ត្រាចារ្យ តាន់ សុគុន នាយកមន្ទីរពេទ្យ។ ថ្នាក់ដឹកនាំទាំងពីរបានសង្កត់ធ្ងន់លើសារៈ សំខាន់មិនអាចខ្វះបាននៃបច្ចេកទេសមុនការវិភាគ (Pre-analytical phase) ក្នុងការបណ្តុះមេរោគ (Culture) ដើម្បីធានាបាននូវការវិនិច្ឆ័យរោគដ៏ត្រឹមត្រូវ ច្បាស់លាស់ និងការជ្រើសរើសឱសថប្រឆាំងមេរោគចំគោលដៅ (Antimicrobial Stewardship) ។ បទបង្ហាញបច្ចេកទេស៖ សម្របសម្រួល និងឧទ្ទេសនាមដោយ លោកស្រីឱសថការី សឿន ម៉ាលីន ប្រធានផ្នែកមន្ទីរពិសោធន៍ និងក្រុមការងារដោយបានផ្តោតលើ៖
1-នីតិវិធីស្តង់ដារ និងបច្ចេកទេសសុវត្ថិភាពក្នុងការប្រមូលសំណាកសម្រាប់ការបណ្តុះមេរោគ (Culture)។
2-ការរៀបចំទុកដាក់ ការវេចខ្ចប់តាមស្តង់ដារបច្ចេកទេស និងការបិទស្លាកសញ្ញាសម្គាល់សំណាក។
3-ខ្សែសង្វាក់នៃការដឹកជញ្ជូនសំណាកប្រកបដោយសុវត្ថិភាព និងការរក្សាសីតុណ្ហភាពឱ្យបានត្រឹមត្រូវដើម្បីកុំ ឱ្យប៉ះពាល់ដល់គុណភាពសំណាក។
#លទ្ធផលទទួលបាន បុគ្គលិកថែទាំសុខភាព និងមន្ត្រីមន្ទីរពិសោធន៍នៃមន្ទីរពេទ្យខេត្តកំពង់ឆ្នាំង ទទួលបាននូវចំណេះដឹង និងការអនុវត្តផ្ទាល់លើការប្រមូល និងដឹកជញ្ជូនសំណាកត្រឹមត្រូវតាមបទដ្ឋានបច្ចេកទេស។
ពង្រឹងកិច្ចសហប្រតិបត្តិការ និងការគាំទ្រផ្នែកបច្ចេកទេសរវាងមន្ទីរពេទ្យថ្នាក់ជាតិ (CCFKH) និងមន្ទីរពេទ្យថ្នាក់ក្រោមជាតិ (សម្ព័ន្ធមេត្រី) ក្នុងការលើកកម្ពស់គុណភាពសេវាវិនិច្ឆ័យមន្ទីរពិសោធន៍ និងការថែទាំអ្នកជំងឺអោយបានត្រឹមត្រូវ។

លោកវេជ្ជបណ្ឌិត ទុំ សម្បតិ្ត ប្រធានមន្ទីរពេទ្យខេត្ត និងថ្នាក់ដឹកនាំ ព្រមទាំងមន្រ្តីរាជការគ្រប់លំដាប់ថ្នាក់ទាំងអស់ សូមថ្លែងអំណរអរគុណ និងសូមគោរពជូនចំពោះលោកសាស្ត្រាចារ្យរងជំនួយ អ៊ុក សារ៉ម, តំណាងដ៏ខ្ពង់ខ្ពស់របស់ឯកឧត្តមសាស្ត្រាចារ្យ តាន់ សុគុន នាយកមន្ទីរពេទ្យ ព្រមទាំងសហការីទាំងអស់ ក្នុងការចុះមកបណ្តុះបណ្តាល បង្កើនសមត្ថភាពដល់បុគ្គលិកមន្ទីរពេទ្យខេត្តកំពង់ឆ្នាំង គឺពិតជាស្តែងឱ្យឃើញពីស្មារតីសាមគ្គីភាព និងការរួមចំណែកយ៉ាងធំធេងក្នុងការលើកកម្ពស់វិស័យសុខាភិបាល និងការថែទាំសុខភាពជូនប្រជាពលរដ្ឋ។
សូមបួងសួង និងជូនពរដល់ ឯកឧត្តម លោកសាស្ត្រាចារ្យ លោកគ្រូ-អ្នកគ្រូពេទ្យ និងសហការីទាំងអស់ ឱ្យទទួលបាននូវពុទ្ធពរទាំង ៤ ប្រការ គឺ អាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ ដើម្បីបន្តបេសកកម្មដ៏ឧត្តុង្គឧត្តមក្នុងការជួយសង្គ្រោះ និងថែរក្សាសុខុមាលភាពរបស់ប្រជាជនកម្ពុជាជារៀងរហូតទៅ។

ថ្ងៃសុក្រ ៦កើត ខែជេស្ឋ ឆ្នាំមមី អដ្ឋស័ក ពុទ្ធសករាជ ២៥៧០
ត្រូវនឹងថ្ងៃទី២២ ខែឧសភា ឆ្នាំ២០២៦
May 22, 2026

[សកម្មភាពពង្រឹងការងារបង្ការ និងគ្រប់គ្រងការចម្លងរោគ (IPC) នៅមន្ទីរពេទ្យបង្អែកខេត្តកំពង់ឆ្នាំង]
———————————
នាព្រឹកថ្ងៃសុក្រ ១៤រោច​ ខែពិសាខ ឆ្នាំមមី អដ្ឋស័ក ព.ស ២៥៧០ ត្រូវនឹងថ្ងៃទី១៥ ខែឧសភា ឆ្នាំ២០២៦ គណៈកម្មការបង្ការ និងគ្រប់គ្រងការចម្លងរោគ (IPC) នៃមន្ទីរពេទ្យបង្អែកខេត្តកំពង់ឆ្នាំង បានរៀបចំកិច្ចប្រជុំដ៏មានសារៈសំខាន់មួយ ក្នុងគោលបំណងពង្រឹងមុខងារ និងប្រសិទ្ធភាពការងាររបស់គណៈកម្មការឱ្យកាន់តែប្រសើរឡើង។

កិច្ចប្រជុំនេះបានប្រព្រឹត្តទៅក្រោមអធិបតីភាពលោកស្រីវេជ្ជបណ្ឌិត អ៊ុក ម៉ូលីវណ្ណ អនុប្រធានមន្ទីរពេទ្យបង្អែកខេត្តកំពង់ឆ្នាំង និងមានការសម្របសម្រួលដោយ កញ្ញា ថេង ផានិត មន្ត្រីបង្គោលការងារ IPC។ ក្នុងឱកាសនោះដែរ លោកវេជ្ជបណ្ឌិត យៀប គង់ ប្រធានការិយាល័យបច្ចេកទេស បានធ្វើបទបង្ហាញយ៉ាងលម្អិតទៅលើចំណុចគន្លឹះសំខាន់ៗរួមមាន៖

១. ការរំលឹកឡើងវិញនូវតួនាទី និងភារកិច្ចស្នូលរបស់សមាជិកគណៈកម្មការ IPC ដើម្បីធានាបាននូវការអនុវត្តការងារប្រកបដោយវិជ្ជាជីវៈ។
២. បទបង្ហាញស្តីពីលទ្ធផលនៃការតាមដានអនាម័យដៃ (Hand Hygiene Monitoring) ចាប់តាំងពីខែមេសា ឆ្នាំ២០២៣ រហូតដល់ខែមីនា ឆ្នាំ២០២៦។
៣. ការដាក់ឱ្យប្រើប្រាស់នូវ «ឧបករណ៍តាមដានអនាម័យដៃថ្មី» ដើម្បីបង្កើនភាពសុក្រឹត និងភាពងាយស្រួលក្នុងការគ្រប់គ្រងទិន្នន័យ។

ថ្នាក់ដឹកនាំ និងបុគ្គលិកនៃមន្ទីរពេទ្យបង្អែកខេត្តកំពង់ឆ្នាំង តែងតែយកចិត្តទុកដាក់ខ្ពស់លើការកែលម្អគុណភាពសេវាសុខាភិបាល ជាពិសេសការបង្ការការចម្លងរោគ ដើម្បីធានាបាននូវសុវត្ថិភាពខ្ពស់បំផុតជូនដល់អ្នកជំងឺ និងសាធារណជនដែលមកទទួលសេវាព្យាបាលនៅក្នុងមន្ទីរពេទ្យរបស់យើង។

#មន្ទីរពេទ្យបង្អែកខេត្តកំពង់ឆ្នាំង #សុវត្ថិភាពអ្នកជំងឺ #អនាម័យដៃ #គុណភាពសេវាសុខាភិបាល

សូមព្រះបរមរាជានុញ្ញាតសម្តែងនូវព្រះពរជ័យ សិរីវឌ្ឍនា បរវមហាប្រសើរថ្វាយ ព្រះករុណាព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ក្នុងព្រះរាជពិធីចម្រើនព្រះជន្មាយុ គម្រប់ខួប ៧៣ ព្រះវស្សា យាងចូល ៧៤ ព្រះវស្សា (១៤ ឧសភា ១៩៥៣ - ១៤ ឧសភា ២០២៦)

#ហ៊ុនម៉ាណែត #កម្ពុជា #សន្តិភាពនៅកម្ពុជា

លោកវេជ្ជបណ្ឌិត ទុំ សម្បត្តិ ប្រធានមន្ទីរពេទ្យខេត្តកំពង់ឆ្នាំង និងថ្នាក់ដឹកនាំ ព្រមទាំងមន្ត្រីរាជការបុគ្គលិកសុខាភិបាលគ្រប់លំដាប់ថ្នាក់ទាំងអស់ នៃមន្ទីរពេទ្យខេត្តកំពង់ឆ្នាំង សូមសម្តែងនូវគាវរភក្តី និងកតញ្ញូកតវេទិតាធម៌យ៉ាងជ្រាលជ្រៅបំផុត ជូនចំពោះ៖

ឯកឧត្តមវេជ្ជបណ្ឌិតឯកទេស តាន់ សុគុន នាយកមន្ទីរពេទ្យមិត្តភាពកម្ពុជា ចិនព្រះកុសុមៈ ព្រមទាំងថ្នាក់ដឹកនាំ និងក្រុមការងារបច្ចេកទេសនៃមន្ទីរពេទ្យមិត្តភាពកម្ពុជា ចិនព្រះកុសុមៈទាំងអស់ ដែលបានផ្តល់នូវសប្បុរសធម៌ដ៏ថ្លៃថ្លា តាមរយៈការឧបត្ថម្ភ ម៉ាស៊ីន (Celioscopy) ដល់មន្ទីរពេទ្យខេត្តកំពង់ឆ្នាំង ដើម្បីបម្រើដល់ការពិនិត្យ និងព្យាបាលជូនប្រជាពលរដ្ឋ។

"អំណោយដ៏មានតម្លៃនេះ គឺជាការរួមចំណែកយ៉ាងសំខាន់ក្នុងការលើកកម្ពស់សមត្ថភាពបច្ចេកទេសវេជ្ជសាស្ត្រ និងគុណភាពនៃសេវាថែទាំព្យាបាលឱ្យកាន់តែប្រសើរឡើង ងាយស្រួលដល់ការវះកាត់ដោយប្រើបច្ចេកវិទ្យាទំនើប និងកាត់បន្ថយការឈឺចាប់ជូនអ្នកជំងឺក្នុងខេត្តកំពង់ឆ្នាំង។"

សូមទទួលនូវការគោរព និងអំណរគុណដ៏ជ្រាលជ្រៅអំពីយើងខ្ញុំដែលជាថ្នាក់ដឹកនាំ ព្រមទាំងមន្ត្រីរាជការបុគ្គលិកសុខាភិបាលគ្រប់លំដាប់ថ្នាក់ទាំងអស់ នៃមន្ទីរពេទ្យខេត្តកំពង់ឆ្នាំង សូមគោរពជូនពរ ឯកឧត្តមវេជ្ជបណ្ឌិតឯកទេស និងសហការីទាំងអស់ សូមជួបតែសេចក្តីសុខ សេចក្តីចម្រើន និងទទួលបានជោគជ័យគ្រប់ភារកិច្ច ព្រមទាំងប្រកបដោយពុទ្ធពរទាំងបួនប្រការគឺ៖ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។

ថ្ងៃពុធ ១២រោច ខែពិសាខ ឆ្នាំមមី អដ្ឋស័ក ពុទ្ធសករាជ ២៥៧០
ត្រូវនឹងថ្ងៃទី១៣ ខែឧសភា ឆ្នាំ២០២៦
May 13, 2026

កិច្ចប្រជុំគណៈកម្មការព័ត៌មានត្រលប់​ ជាដំណេីរការការងារអទិភាព​ ដេីម្បីកែលម្អបទពិសោធន៍អតិថិជន​ដែលអញ្ជេីញមកទទួលសេវានៅមន្ទីរពេទ្យខេត្តកំពង់ឆ្នាំង។

ថ្ងៃពុធ​ ១២រោច​ ខែពិសាខ​ ឆ្នាំមមី​ អដ្ឋស័ក​ ព.ស​ ២៥៧០​ ត្រូវនឹងថ្ងៃទី១៣​ ខែឧសភា​ ឆ្នាំ២០២៦​ គណៈកម្មការទទួលព័ត៌មានត្រលប់បានរៀបចំកិច្ចប្រជុំប្រចាំត្រីមាស​ ក្រោមអធិបតីភាពលោកវេជ្ជបណ្ឌិត​ យៀប​ គង់​ អនុប្រធានគណៈកម្មការទទួលព័ត៌មានត្រលប់​ ដែលមានរបៀបវារៈ​ ១.​ ការពិនិត្យវឌ្ឍនភាពត្រីមាសមុន​ ២.​ បទបង្ហាញស្តីពីពិន្ទុនៃការពេញចិត្តរបស់អតិថិជន​ ៣.​ ការណែនាំពីប្រព័ន្ធទទួលព័ត៌មានត្រលប់ឌីជីថលថ្មី។

សមាជិកគណៈកម្មការទាំងអស់មានការពេញចិត្តនឹងប្រព័ន្ធឌីជីថលថ្មី​នេះណាស់​ ដោយវានឹងនាំមកនូវភាពងាយស្រួលក្នុងការប្រេីប្រាស់​ កាត់បន្ថយបន្ទុកការងារ​បុគ្គលិក​ ទទួលបានព័ត៌មានទាន់ពេលវេលា​ និងអាចធ្វេីសកម្មភាពឆ្លេីយតបបានភ្លាមៗ​។

អបអរសាទរ ទិវាគិលានុបដ្ឌាក ១២ ឧសភា ២០២៦.

🎉 អបអរសាទរ ទិវាគិលានុបដ្ឋាកអន្តរជាតិ ឆ្នាំ២០២៦ 🎉
🩺 International Nurses Day 2026

ក្រោមប្រធានបទអន្តរជាតិ៖
✨ «គិលានុបដ្ឋាក គឺជាអនាគតរបស់យើង ផ្តល់ការគាំទ្រដល់គិលានុបដ្ឋាក គឺសង្គ្រោះជីវិត»
“Our Nurses. Our Future. Empowered Nurses Save Lives”

និងប្រធានបទថ្នាក់ជាតិ៖
🇰🇭 «ផ្តល់ការគាំទ្រដើម្បីការពារ ដឹកនាំ និងផ្លាស់ប្តូរ៖ គិលានុបដ្ឋាកកម្ពុជាក្នុងសកម្មភាព»
“Empowered to Protect, Lead, and Transform: Cambodian Nurses in Action”

💙 គិលានុបដ្ឋាក មិនត្រឹមតែជាអ្នកថែទាំអ្នកជំងឺប៉ុណ្ណោះទេ
ប៉ុន្តែជាកម្លាំងស្នូលនៃប្រព័ន្ធសុខាភិបាលដែលបំពេញភារកិច្ចដោយការលះបង់ មនុស្សធម៌ និងវិជ្ជាជីវៈខ្ពស់ ដើម្បីសុខុមាល ភាពប្រជាជន។

🙏 សូមថ្លែងអំណរគុណ និងកោតសរសើរចំពោះគិលានុបដ្ឋាកទាំងអស់ដែលបានខិតខំបម្រើសេវាថែទាំសុខភាពជូនប្រជាពល រដ្ឋដោយមិនខ្លាចនឿយហត់។




for Peace
#គិលានុបដ្ឋាកកម្ពុជា