គន់ គីម Kun Kim

ថ្ងៃច័ន្ទនេះ ខ្ញុំ បានបន្តចុះមកពិនិត្យការតបណ្តាញទឹកស្អាតទៅតាមខ្នងផ្ទះរបស់ប្រជាពលរដ្ឋភៀសសឹកស្នាក់នៅផ្ទះបណ្តោះអាសន្នរបស់សមាគមអតីតយុទ្ធជន និងនិវត្តជនកម្ពុជា ស្ថិតក្នុងស្រុកចុងកាល់ ខេត្តឧត្តរមានជ័យ។

ខ្ញុំ សូមកោតសរសើរក្រុមការងារដែលបានខិតខំពន្លឿនការតភ្ជាប់បណ្តាញទឹកស្អាតជូនប្រជាពលរដ្ឋក្នុងឱកាសចូលឆ្នាំប្រពៃណីខ្មែរ និងបានបន្តមកដល់ថ្ងៃនេះ ដែលសម្រេចលទ្ធផលបានប្រមាណ៩៥ភាគរយ។

ផ្ទះបណ្តោះអាសន្ន ត្រូវបានរាជរដ្ឋាភិបាលយកចិត្តទុកដាក់ខ្ពស់ពីការរៀបចំហេដ្ឋារចនាសម្ព័ន្ធ ផ្លូវ ទឹក ភ្លើង សាលារៀន និងរៀបចំដីកសិកម្មសម្រាប់ជំរុញសកម្មភាពកសិកម្មទាំងលក្ខណៈគ្រួសារ និងសហគមន៍ ដើម្បីបង្កើតឱកាសការងារ និងប្រាក់ចំណូល ព្រមទាំងអាចគាំទ្រដល់ជីវភាពរស់នៅប្រចាំថ្ងៃ។

ឆ្លៀតក្នុងឱកាសនេះ ខ្ញុំ បានជួបសំណេះសំណាលជាមួយប្រជាពលរដ្ឋភៀសសឹក ដើម្បីនាំយកការផ្តាំផ្ញើសាកសួរសុខទុក្ខពីប្រមុខរាជរដ្ឋាភិបាល និងសំណូមពរដល់ប្រជាពលរដ្ឋភៀសសឹក ក្នុងករណីមានតម្រូវការបន្ទាន់ សូមរាយការណ៍ទៅកាន់អាជ្ញាធរ និងសមត្ថកិច្ច៕

រសៀលថ្ងៃអាទិត្យនេះ ខ្ញុំ បានចុះជួបបងប្អូនប្រជាពលរដ្ឋភៀសសឹកតាមខ្នងផ្ទះបណ្តោះអាសន្នរបស់សមាគមអតីតយុទ្ធជន និងនិវត្តជនកម្ពុជា បន្ទាប់ពីប៉ុន្មានថ្ងៃមុននេះមានភ្លៀង និងខ្យល់កន្រ្តាក់ ក្នុងខេត្តបន្ទាយមានជ័យ។

ការប្រែប្រួលអាកាសធាតុ ដោយសារខ្យល់កន្រ្តាក់បានប៉ះពាល់ផ្ទះប្រជាពលរដ្ឋក្នុងមូលដ្ឋានភូមិ-ឃុំ ស្រុក ក្នុងខេត្តបន្ទាយមានជ័យ។ ដោយឡែក ចំពោះផ្ទះបងប្អូនប្រជាពលរដ្ឋភៀសសឹកមានមួយចំនួនតូច ក៏មានការប៉ះពាល់ទៅលើដំបូល និងជញ្ជាំងស្របពេលក្រុមការងារកំពុងពន្លឿនសកម្មភាពការងារសាងសង់។ ពាក់ព័ន្ធនឹងបញ្ហានេះ ខ្ញុំ បានឲ្យអាជ្ញាធរខេត្ត និងក្រុមការងារចុះពិនិត្យជូនប្រជាពលរដ្ឋ។

តាមរយៈការចុះជួបផ្ទាល់ជាមួយបងប្អូនភៀសសឹក ខ្ញុំសូមសម្តែងការអរគុណ ចំពោះការយោគយល់របស់បងប្អូនភៀសសឹក និងតែងតែផ្តល់ព័ត៌មាន និងរាយការណ៍ទៅកាន់អាជ្ញាធរមូលដ្ឋាន ដើម្បីអន្តរាគមន៍ដោះស្រាយបញ្ហាបានទាន់ពេលវេលា។

បន្ទាប់ពីចុះជួបប្រជាពលរដ្ឋភៀសសឹក ខ្ញុំបានចុះពិនិត្យ និងជំរុញសកម្មភាពការងារខួងអណ្តូងទឹកសម្រាប់ប្រជាពលរដ្ឋភៀសសឹកប្រើប្រាស់ឲ្យបានឆាប់រហ័សផងដែរ៕

ទូលព្រះបង្គំទាំងអស់គ្នា ជាថ្នាក់ដឹកនាំ សមាជិក សមាជិកា ទាំងអស់ នៃសមាគមអតីតយុទ្ធជន និងនិវត្តជនកម្ពុជា សូមសម្តែងនូវក្ដីបារម្ភក្រោយពីទទួលព័ត៌មានថា ព្រះរោគមហារីកក្រពេញប្រូស្តាត (prostate cancer) របស់ ព្រះករុណា ជាអម្ចាស់ជីវិតលើត្បូងជាទីគោរពសក្ការៈដ៏ខ្ពង់ខ្ពស់បំផុតតម្រូវឱ្យព្រះអង្គ ទទួលការព្យាបាលដោយការវះកាត់តាមវេជ្ជ បញ្ហានៅមន្ទីរពេទ្យនារដ្ឋធានីប៉េកាំង នៃសាធារណរដ្ឋប្រជាមានិតចិន និងបន្តគង់ប្រថាប់នៅទីនោះមួយរយៈពេល ដើម្បី តាមដាន ត្រួតពិនិត្យ និងព្យាបាលព្រះរោគ ចាប់ពីថ្ងៃទី១៨ ខែមេសា ឆ្នាំ២០២៦នេះ។

តាងនាមថ្នាក់ដឹកនាំ សមាជិក សមាជិកា ទាំងអស់នៃសមាគមអតីតយុទ្ធជន និងនិវត្តជនកម្ពុជា សូមព្រះបរមរាជានុញ្ញាតលើកហត្ថប្រណម្យបួងសួងដល់គុណបុណ្យ ព្រះរតនត្រ័យ វត្ថុស័ក្តិ សិទ្ធិនានាក្នុងលោក ទេវតាថែរក្សាព្រះមហាស្វេតច្ឆត្រ ទេវតាថែរក្សាឆ្នាំថ្មី ព្រះបារមីព្រះវិញ្ញាណក្ខន្ធ អតីតព្រះមហាក្សត្រ ព្រះមហាក្សត្រីយានីគ្រប់ព្រះអង្គ សូមជួយអភិបាលគ្រងរក្សា និងប្រោសប្រទានព្រះរាជសព្ទសាធុការពរជ័យថ្វាយចំពោះ ព្រះករុណា ជាអម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុត សូមព្រះអង្គទទួលបាននូវជោគជ័យបំផុតក្នុងដំណើរការនៃការវះកាត់ព្រះរោគ និងសូមថ្វាយព្រះពរ ព្រះករុណា ជាអម្ចាស់ជីវិតលើត្បូង ជាទីគោរព សក្ការៈដ៏ខ្ពង់ខ្ពស់ បំផុត សូមព្រះអង្គមានព្រះរាជកាយពលមាំមួន ព្រះរាជសុខភាពពេញបរិបូរណ៍ ព្រះជន្មាយុយឺនយូរជាងរយព្រះវស្សា ព្រះរាជ បញ្ញាញាណវាងវៃភ្លឺថ្លាជាដរាប ដើម្បីកូនចៅ ចៅទូតរបស់ព្រះអង្គទាំងអស់បានជ្រូក កោនក្រោមម្លប់ព្រះបារមីជានិច្ចនិរន្តន៍ តរៀងទៅ៕

បន្ទាប់ពីពិធីបុណ្យចូលឆ្នាំប្រពៃណីខ្មែររយៈពេល៣ថ្ងៃបញ្ចប់ រសៀលនេះ ខ្ញុំ បានដឹកនាំកិច្ចប្រជុំពិនិត្យលើស្ថិតិប្រជាពលរដ្ឋភៀសសឹកដែលនឹងបន្តចូលស្នាក់នៅផ្ទះបណ្តោះអាសន្នរបស់សមាគមអតីតយុទ្ធជន និងនិវត្តជនកម្ពុជា។

កិច្ចប្រជុំនេះមានការចូលរួមពីតំណាងក្រសួងមហាផ្ទៃ, លោកអភិបាលរងខេត្ត តំណាងអភិបាលខេត្ត, លោកអធិការស្រុក -តំណាងរដ្ឋបាលស្រុក និងអាជ្ញាធរមូលដ្ឋាន៕

សូមបងប្អូនមេត្តាអធ្យាស្រ័យ ចំពោះខ្ញុំដែលប្រើវ៉ែនតាខ្មៅ ព្រោះមានបញ្ហាភ្នែក!

ក្នុងឱកាសថ្ងៃទី២នៃពិធីបុណ្យចូលឆ្នាំខ្មែរ ខ្ញុំ បានចុះជួបសំណេះសំណាលជាមួយបងប្អូនភៀសសឹក ព្រមទាំងពិនិត្យការតភ្ជាប់ទឹកស្អាត និងស៊ីទែនទឹក ដើម្បីផ្គត់ផ្គង់តាមខ្នងផ្ទះរបស់ប្រជាពលរដ្ឋភៀសសឹក ដែលរាជរដ្ឋាភិបាលរៀបចំឲ្យស្នាក់នៅផ្ទះបណ្តោះអាសន្នរបស់សមាគមអតីតយុទ្ធជន និងនិវត្តជនកម្ពុជា ក្នុងខេត្តបន្ទាយមានជ័យ

ក្នុងនាមសេនាធិការជូនរាជរដ្ឋាភិបាល បងប្អូនប្រជាពលរដ្ឋភៀសសឹក ដែលបន្តចូលស្នាក់នៅផ្ទះបណ្តោះអាសន្ន ត្រូវបានយកចិត្តទុកដាក់ខ្ពស់ពីការរៀបចំហេដ្ឋារចនាសម្ព័ន្ធ ផ្លូវ ទឹក ភ្លើង សាលារៀន និងរៀបចំដីកសិកម្មសម្រាប់ជំរុញសកម្មភាពកសិកម្មទាំងលក្ខណៈគ្រួសារ និងសហគមន៍ ដើម្បីបង្កើតឱកាសការងារ និងប្រាក់ចំណូល ព្រមទាំងអាចគាំទ្រដល់ជីវភាពរស់នៅប្រចាំថ្ងៃ៕

ក្នុងឱកាសថ្ងៃទី១ចូលឆ្នាំប្រពៃណីខ្មែរ គឺជាពេលវេលាបងប្អូនប្រជាពលរដ្ឋខ្មែរគ្រប់ទីកន្លែងជួបជុំគ្នា, ផ្ទុយទៅវិញ សុខទុក្ខពលរដ្ឋភៀសសឹករឹតតែសំខាន់!

ខ្ញុំ បានចុះដោះស្រាយបញ្ហាទឹកស្អាត និងទទួលទេវតាឆ្នាំថ្មីជាមួយប្រជាពលរដ្ឋភៀសសឹកនៅផ្ទះបណ្តោះអាសន្នរបស់សមាគមអតីតយុទ្ធជន និងនិវត្តជនកម្ពុជា។

ខ្ញុំ សូមថ្លែងអំណរគុណយ៉ាងជ្រាលជ្រៅជូនចំពោះសម្តេចមហាបវរធិបតី ហ៊ុន ម៉ាណែត និងថ្នាក់ដឹកនាំក្រសួងពាក់ព័ន្ធ ក្នុងការអន្តរាគមន៍ដោះស្រាយបញ្ហាចំពោះមុខរបស់ប្រជាពលរដ្ឋដែលចូលមកស្នាក់នៅផ្ទះបណ្តោះអាសន្នក្នុងឱកាសចូលឆ្នាំប្រពៃណីខ្មែរ។

ព្រឹកនេះ មុនធ្វើដំណើរទៅចុះសួរសុខទុក្ខ និងដោះស្រាយនូវតម្រូវការចាំបាច់ជូនប្រជាពលរដ្ឋភៀសសឹក!

សូមជូនពរបងប្អូនជនរួមជាតិ និងបងប្អូនអតីតយុទ្ធជន និងនិវត្តជនទាំងអស់ ក្នុងឱកាសឆ្នាំថ្មីប្រពៃណីជាតិខ្មែរ ឆ្នាំមមី អដ្ឋស័ក ពុទ្ធសករាជ ២៥៦៩-២៥៧០ សូមទេវតាឆ្នាំថ្មី ព្រះនាម រាក្យសាទេវី ប្រសិទ្ធពរជ័យ សិរីមង្គល វិបុលសុខ មហាប្រសើរ សូមទទួលបាននូវសុខភាពល្អបរិបូរណ៍ កម្លាំងមាំមួន អាយុយឺនយូរ និងជួបប្រទះតែនឹងពុទ្ធពរទាំង៤ប្រការ គឺអាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។

ឆ្លៀតក្នុងឱកាសនេះ ខ្ញុំ សូមថ្លែងអំណរគុណយ៉ាងជ្រាលជ្រៅជូនចំពោះប្រមុខរាជរដ្ឋាភិបាល ដែលបានអន្តរាគមន៍ទៅលើសេចក្តីត្រូវការ ទាំងទឹក និងអគ្គិសនី ជូនប្រជាពលរដ្ឋភៀសសឹក ដែលបានបន្តចូលស្នាក់នៅផ្ទះបណ្តោះអាសន្នរបស់សមាគមអតីតយុទ្ធជន និងនិវត្តជនកម្ពុជា៕

ព្រឹកនេះ ខ្ញុំ បានចុះពិនិត្យការសាងសង់ផ្ទះរបស់សមាគមអតីតយុទ្ធជន និងនិវត្តជនកម្ពុជា ព្រមទាំងការតភ្ជាប់បណ្តាញទឹកស្អាត និងការរៀបចំស្នាក់ការភូមិ និងប៉ុស្ត៍នគរបាលប្រចាំការ នៅទីតាំងដែលត្រូវបានរាជរដ្ឋាភិបាលរៀបចំសម្រាប់ប្រជាពលរដ្ឋភៀសសឹកស្នាក់នៅបណ្តោះអាសន្ន ក្នុងស្រុកគូលែន ខេត្តព្រះវិហារ

ខ្ញុំ សូមកោតសរសើរដល់ក្រុមការងារពាក់ព័ន្ធដែលបានខិតខំប្រឹងប្រែង ក្នុងការពន្លឿនការងាររបស់ខ្លួន ដើម្បីឱ្យប្រជាពលរដ្ឋភៀសសឹកឆាប់បានចូលស្នាក់នៅផ្ទះបណ្តោះអាសន្នរបស់អតីតយុទ្ធជន។

ឆ្លៀតក្នុងឱកាសនេះ ខ្ញុំ បានណែនាំដល់រដ្ឋបាលខេត្តអំពីការរៀបចំស្នាក់ការភូមិ និងប៉ុស្តិ៍រដ្ឋបាល ព្រមទាំងប៉ុស្ត៍សុខភាពរបស់មណ្ឌលសុខភាពតាមខ្នងផ្ទះរបស់សមាគមអតីតយុទ្ធជន និងនិវត្តជនកម្ពុជា ដើម្បីមានមន្រ្តី និងក្រុមការងារប្រចាំការ ក្នុងការជួយរៀបចំសន្តិសុខសណ្តាប់ធ្នាប់ និងជួយលើតម្រូវការណាមួយរបស់ប្រជាពលរដ្ឋផងដែរ៕