មន្ទីរសេដ្ឋកិច្ច និងហិរញ្ញវត្ថុខេត្តកែប

ថ្ងៃសុក្រ ៩កើត ខែចេត្រ ឆ្នាំម្សាញ់ សន្តស័ក ព.ស ២៥៦៩ ត្រូវនឹងថ្ងៃទី២៧ ខែមីនា ឆ្នាំ២០២៦

នៅសណ្ឌាគារ និងរមណីយដ្ឋានឆ្នេរសុខា ខេត្តព្រះសីហនុ៖ លោក កែវ ហុង ប្រធានមន្ទីរសេដ្ឋកិច្ច និងហិរញ្ញវត្ថុខេត្តកែប អមដោយមន្ដ្រីជំនាញ បានចូលរួមសិក្ខាសាលាផ្សព្វផ្សាយ “ផែនការគោលស្តីពីការគ្រប់គ្រងទ្រព្យសម្បតិ្តរដ្ឋ ឆ្នាំ ២០២៥‌‌-២០៣៥” ក្រោមអធិបតីភាព ឯកឧត្តម ឈន សុភាព រដ្ឋលេខាធីការ ក្រសួងសេដ្ឋកិច្ចនិងហិរញ្ញវត្តុ តំណាងដ៏ខ្ពង់ខ្ពស់ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ។

ខេត្តកែប៖ នាព្រឹកថ្ងៃព្រហស្បតិ៍ ៨កើត ខែចេត្រ ឆ្នាំរោង ឆស័ក ព.ស.២៥៦៩ ត្រូវនឹងថ្ងៃទី២៦ ខែមីនា ឆ្នាំ២០២៦ មន្ទីរសេដ្ឋកិច្ច និងហិរញ្ញវត្ថុខេត្តកែប បានរៀបចំ កិច្ចប្រជុំផ្សព្វផ្សាយណែនាំពីបែបបទ នីតិវិធី ពាក់ព័ន្ធនឹងការគ្រប់គ្រង និងរៀបចំបញ្ជីសារពើភណ្ឌទ្រព្យសម្បត្តិរដ្ឋ ព្រមទាំងជំរុញការរៀបចំតារាងកើនឡើង និងថយចុះទ្រព្យសម្បត្តិរដ្ឋប្រចាំឆ្នាំ២០២៥។

កិច្ចប្រជុំនេះបានប្រព្រឹត្តទៅក្រោមអធិបតីភាព លោក កែវ ហុង ប្រធានមន្ទីរសេដ្ឋកិច្ច និងហិរញ្ញវត្ថុខេត្តកែប ដោយមានការចូលរួមពីតំណាងមន្ទីរ អង្គភាពជំនាញជុំវិញខេត្ត និងរដ្ឋបាលថ្នាក់ក្រោមជាតិ សរុបប្រមាណ ៨០រូប។

គោលបំណងនៃកិច្ចប្រជុំ៖
១. ការពង្រឹងការយល់ដឹង៖ បញ្រ្ជាបអំពីបែបបទ និងនីតិវិធី ក្នុងការគ្រប់គ្រងទ្រព្យសម្បត្តិរដ្ឋ ឱ្យស្របតាមច្បាប់ និងបទដ្ឋានគតិយុត្តជាធរមាន។
២. ការរៀបចំបញ្ជីសារពើភណ្ឌ៖ ណែនាំអំពីរបៀបរៀបចំបញ្ជីសារពើភណ្ឌឱ្យមានភាពច្បាស់លាស់ និងត្រឹមត្រូវ។
៣. ជំរុញការរៀបចំបញ្ជីសារពើភណ្ឌ៖ ពន្លឿនការរៀបចំតារាងកើនឡើង និងថយចុះនៃទ្រព្យសម្បត្តិរដ្ឋ ឆ្នាំ២០២៥ ដើម្បីធានាបាននូវការបិទបញ្ជីបានទាន់ពេលវេលា។

ក្នុងឱកាសនោះ លោក កែវ ហុង បានមានប្រសាសន៍សង្កត់ធ្ងន់ថា ការគ្រប់គ្រងទ្រព្យសម្បត្តិរដ្ឋគឺជាភារកិច្ចដ៏សំខាន់របស់មន្ទីរ-អង្គភាពនីមួយៗ។ លោកបានជំរុញឱ្យមន្ត្រីទទួលបន្ទុកទាំងអស់ ត្រូវយកចិត្តទុកដាក់ខ្ពស់លើការកត់ត្រា និងការធ្វើបច្ចុប្បន្នភាពទិន្នន័យទ្រព្យសម្បត្តិ ទាំងចលនទ្រព្យ និងអចលនទ្រព្យ ដើម្បីបង្កើនប្រសិទ្ធភាពក្នុងការប្រើប្រាស់ និងថែរក្សាទ្រព្យសម្បត្តិរបស់រដ្ឋឱ្យបានគង់វង្ស។

កិច្ចប្រជុំក៏បានបើកឱ្យមានការពិភាក្សា និងឆ្លើយឆ្លងនូវរាល់ចម្ងល់ពាក់ព័ន្ធនឹងបញ្ហាបច្ចេកទេស ដើម្បីដោះស្រាយបញ្ហាប្រឈមដែលអង្គភាពនីមួយៗជួបប្រទះ ក្នុងការអនុវត្តការងារកន្លងមកផងដែរ។

ថ្ងៃអង្គារ ពុធ ១៤-១៥ រោច ខែផល្គុន ឆ្នាំម្សាញ់ សប្ដស័ក ព.ស. ២៥៦៩ ត្រូវនឹងថ្ងៃទី១៧-១៨ ខែមីនា ឆ្នាំ២០២៦

នៅអគារអគ្គនាយកដ្ឋានពន្ធដារ (GDT Tower)៖ លោក កែវ ហុង ប្រធានមន្ទីរសេដ្ឋកិច្ច និងហិរញ្ញវត្ថុខេត្តកែប និងមន្ត្រីជំនាញ បានចូលរួមកិច្ចប្រជុំត្រួតពិនិត្យប្រចាំឆ្នាំ២០២៥ នៃការអនុវត្តកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ដំណាក់កាលទី៤ «គណនេយ្យភាពសមិទ្ធកម្ម» ក្រោមអធិបតីភាពដ៏ខ្ពង់ខ្ពស់ឯកឧត្ដមអគ្គបណ្ឌិតសភាចារ្យ ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ និងជាប្រធានគណៈកម្មាធិការដឹកនាំការងារកែទម្រង់ការគ្រប់គ្រងហិរញ្ញវត្ថុសាធារណៈ។

កិច្ចប្រជុំនេះ មានការអញ្ជើញចូលរួមពីសំណាក់ ឯកឧត្ដម លោកជំទាវ ជាថ្នាក់ដឹកនាំក្រសួង-ស្ថាប័ន, អង្គភាពក្រោមឱវាទក្រសួងសេដ្ឋកិច្ចនិងហិរញ្ញវត្ថុ (កសហវ.) រួមទាំងមន្ទីរ សហវ. រាជធានី-ខេត្ត, រដ្ឋបាលរាជធានី-ខេត្ត និងបណ្តាតំណាងដៃគូអភិវឌ្ឍ សរុបប្រមាណ ៥០០រូប។

នាព្រឹកថ្ងៃអង្គារ ៧រោច ខែផល្គុន ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី១០ ខែមីនា ឆ្នាំ២០២៦

នៅសណ្ឋាគារសុខាភ្នំពេញ៖ លោក កែវ ហុង ប្រធានមន្ទីរសេដ្ឋកិច្ច និងហិរញ្ញវត្ថុខេត្តកែប អមដោយមន្ដ្រីជំនាញ បានចូលរួមកិច្ចប្រជុំគណៈកម្មការអន្តរក្រសួង ស្ដីពី ការបច្ចុប្បន្នភាពទីតាំងដីរដ្ឋ ដែលបានចុះក្នុងបញ្ជីសារពើភណ្ឌទ្រព្យសម្បត្តិរដ្ឋរបស់ក្រសួង-ស្ថាប័ន និងរដ្ឋបាលថ្នាក់ក្រោមជាតិ ដើម្បីរៀបចំវិញ្ញាបនបត្រសម្គាល់ម្ចាស់អចលនវត្ថុ ក្រោមអធិបតីភាពឯកឧត្តមបណ្ឌិត ឈន សុភាព រដ្ឋលេខាធិការ នៃ ក្រសួងសេដ្ឋកិច្ច និងហិរញ្ញវត្ថុ។

កិច្ចប្រជុំនេះត្រូវបានរៀបចំឡើងក្នុងគោលបំណង (១) បូកសរុបវឌ្ឍនភាព និងបញ្ហាប្រឈមនៃការធ្វើប័ណ្ណកម្មសិទ្ធិដីរដ្ឋ ដែលបានចុះក្នុងបញ្ជីសារពើភណ្ឌទ្រព្យសម្បត្តិរដ្ឋ ក្នុងក្របខ័ណ្ឌគណៈកម្មការអន្តរក្រសួង, (២) ពិនិត្យ និងពិភាក្សាលើតម្រូវការនៃការប្រមូលផ្ដុំទិន្នន័យលម្អិត និងព័ត៌មានជាក់លាក់ពាក់ព័ន្ធនឹងទីតាំងដីរដ្ឋ ដែលមិនទាន់មានប័ណ្ណកម្មសិទ្ធិ ដើម្បីជាមូលដ្ឋានក្នុងការសម្របសម្រួល ពិនិត្យ និងលើកស្នើជាដំណោះស្រាយ និង (៣) ពិភាក្សា និងដាក់ចេញជាផែនការសកម្មភាពរបស់ក្រុមការងារ របស់គណៈកម្មការអន្តរក្រសួង និងផែនការសកម្មភាពរបស់គណៈកម្មការចំពោះកិច្ចតាមរាជធានី-ខេត្ត ដើម្បីដឹកនាំសម្របសម្រួល គាំទ្រ និងតាមដាន ការរៀបចំវិញ្ញាបនបត្រសម្គាល់ម្ចាស់អចលនវត្ថុ សម្រាប់ដីរដ្ឋ ដែលបានចុះក្នុងបញ្ជីសារពើភណ្ឌទ្រព្យសម្បត្តិរដ្ឋរបស់មន្ទីរ អង្គភាព ក្រុង ស្រុក ឃុំ សង្កាត់។

កិច្ចប្រជុំមានការអញ្ជើញចូលរួមពី ឯកឧត្តម លោកជំទាវ លោក លោកស្រី តំណាងក្រសួង-ស្ថាប័ន និងអភិបាលរង នៃគណៈអភិបាលរាជធានី-ខេត្ត និង លោក លោកស្រីប្រធាន អនុប្រធាន និងមន្ត្រីជំនាញ នៃមន្ទីរសេដ្ឋកិច្ចនិងហិរញ្ញវត្ថុ និងមន្ទីររៀបចំដែនដី នគរូបនីយកម្ម សំណង់ និងសុរិយោដីរាជធានី-ខេត្ត សរុបប្រមាណ ២៥០ នាក់។

សេចក្ដីជូនដំណឹង
ស្ដីពីការអញ្ជើញចូលរួមពិគ្រោះថ្លៃការផ្គត់ផ្គង់ប្រេងឥន្ទនៈប្រចាំឆ្នាំ២០២៦

ថ្ងៃព្រហស្បតិ៍ ១៤កើត ខែមិគសិរ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី៤ ខែធ្នូ ឆ្នាំ២០២៥

ខេត្តកំពត÷ លោក កែវ ហុង ប្រធានមន្ទីរសេដ្ឋកិច្ច និងហិរញ្ញវត្ថុខេត្តកែប អមដោយមន្ដ្រីជំនាញ បានចូលរួមកិច្ចប្រជុំស្ដីពីការត្រួតពិនិត្យនិងវាយតម្លៃសមិទ្ធកម្មឆ្នាំ២០២៥ និងពិធីចុះហត្ថលេខាលើកិច្ចព្រមព្រៀងសមិទ្ធកម្មឆ្នាំ២០២៦ របស់មន្ទីរសេដ្ឋកិច្ចនិងហិរញ្ញវត្ថុរាជធានី ខេត្ត ក្រោមកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ក្រោមអធិបតីភាពឯកឧត្ដមបណ្ឌិត យ៉េត វីណែល អនុរដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ និងជាអគ្គលេខាធិការរង នៃ អគ្គលេខាធិការដ្ឋានគណៈកម្មាធិការដឹកនាំការងារកែទម្រង់ការគ្រប់គ្រងហិរញ្ញវត្ថុសាធារណៈហិរញ្ញវត្ថុ។

កិច្ចប្រជុំត្រូវបានរៀបចំឡើងក្នុងគោលបំណង (ទី១) ពិនិត្យ និងតាមដានវឌ្ឍនភាពនៃការអនុវត្តផែនការសកម្មភាពឆ្នាំ២០២៥ ដើម្បីពិភាក្សា និងជំរុញការងារដែលនៅសេសសល់ ឱ្យសម្រេចបានតាមផែនការប្រចាំឆ្នាំ និង(ទី២) ពិនិត្យលើក្របខ័ណ្ឌសមិទ្ធកម្មឆ្នាំ២០២៦ និងចុះហត្ថលេខាលើកិច្ចព្រមព្រៀងសមិទ្ធកម្មឆ្នាំ២០២៦ របស់មន្ទីរសេដ្ឋកិច្ចនិងហិរញ្ញវត្ថុ ក្រោមកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ។ ផ្អែកលើក្របខ័ណ្ឌសមិទ្ធកម្មឆ្នាំ២០២៦ ក្រោមកម្មវិធីកែទម្រង់ការគ្រប់គ្រង់ហិរញ្ញវត្ថុសាធារណៈ, មន្ទីរសេដ្ឋកិច្ចនិងហិរញ្ញវត្ថុនឹងបន្តផ្តោតលើអាទិភាពចំនួន ៤ ក្រោមការសម្រេចដ៏ខ្ពង់ខ្ពស់របស់ ឯកឧត្តមអគ្គបណ្ឌិតសភាចារ្យ ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ និងជាប្រធានគណៈកម្មាធិការដឹកនាំការងារកែទម្រង់ការគ្រប់គ្រងហិរញ្ញវត្ថុសាធារណៈ រួមមាន (១) ការពង្រឹងការប្រមូលចំណូលមិនមែនសារពើពន្ធនៅថ្នាក់ក្រោមជាតិ, (២) ការជំរុញបញ្ចប់ការធ្វើប័ណ្ណកម្មសិទ្ធិដីរដ្ឋនៅថ្នាក់មូលដ្ឋាន និងថ្នាក់ក្រោមជាតិ, (២) ការពង្រឹងការគ្រប់គ្រងបញ្ជីសារពើភណ្ឌទ្រព្យសម្បត្តិរដ្ឋ និង (៤) ការលើកកម្ពស់តម្លាភាពថវិកា និងការអភិវឌ្ឍសេដ្ឋកិច្ចមូលដ្ឋាន។

កិច្ចប្រជុំមានការចូលរួមពីលោក លោកស្រី ប្រធាន អនុប្រធាន និងមន្ត្រីបច្ចេកទេស នៃមន្ទីរសេដ្ឋកិច្ចនិងហិរញ្ញវត្ថុរាជធានី-ខេត្ត ទាំង ២៥។

ថ្ងៃព្រហស្បតិ៍ ២កើត ខែកត្ដិក ឆ្នាំម្សាញ់ សប្ដស័ក ព.ស ២៥៦៩ ត្រូវនឹង ថ្ងៃទី២៣ ខែតុលា ឆ្នាំ២០២៥
-------------
មន្ទីរសេដ្ឋកិច្ច និងហិរញ្ញវត្ថុខេត្តកែប បានសហការជាមួយរដ្ឋបាលខេត្តកែប រៀបចំកិច្ចប្រជុំផ្សព្វផ្សាយ សារាចរណែនាំលេខ ០១៣ សហវ.ស.អ.អ.ថ ស្តីពីការបិទបញ្ជីចំណូល ចំណាយថវិកា និងការធ្វើរបាយការណ៍បូកសរុបការអនុវត្តចំណូល ចំណាយចវិកាថ្នាក់ជាតិ។

កិច្ចប្រជុំនេះប្រព្រឹត្តទៅក្រោមអធិបតី លោក អ៉ឹម បញ្ញារិទ្ធិ អភិបាលរងខេត្ត និងលោក កែវ ហុង ប្រធានមន្ទីរសេដ្ឋកិច្ច និងហិរញ្ញវត្ថុខេត្ត ព្រមទាំងមានការអញ្ជើញចូលរួមពីលោកប្រធានមន្ទីរ អង្គភាពជំនាញលោក លោកស្រីអនុប្រធានមន្ទីរ អមដោយមន្ដ្រីជំនាញដែលជា គណនេយ្យករ រជ្ជទេយ្យករ ប្រមាណ ៦០រូប។

សេចក្ដីជូនដំណឹង
ស្ដីពីការដាក់ឱ្យដេញថ្លៃភាស៊ីគ្រប់ប្រភេទ សម្រាប់ធ្វើអាជីវកម្ម ឆ្នាំ២០២៦ ក្នុងខេត្តកែប។

ថ្ងៃអង្គារ ១៥ កើត ខែអស្សុជ ឆ្នាំម្សាញ់ សប្តស័ក ព.ស. ២៥៦៩ ត្រូវនឹងថ្ងៃទី៧ ខែតុលា ឆ្នាំ២០២៥

នៅសណ្ឋាគារសុខាអង្គរ ខេត្តសៀមរាប៖ លោក សេន សិទ្ធិថា ប្រធានការិយាល័យនៃមន្ទីរសេដ្ឋកិច្ច និងហិរញ្ញវត្ថុខេត្តកែប បានចូលរួមកិច្ចប្រជុំប្រមូលធាតុចូលបន្ថែមសម្រាប់ការរៀបចំរបាយការណ៍វឌ្ឍនភាពប្រចាំឆ្នាំ២០២៥ នៃការអនុវត្តកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ដំណាក់កាលទី៤ «គណនេយ្យភាពសមិទ្ធកម្ម» ក្រោមអធិបតីភាព ឯកឧត្ដមបណ្ឌិត យ៉េត វីណែល អនុរដ្ឋលេខាធិការ នៃក្រសួងសេដ្ឋកិច្ចនិងហិរញ្ញវត្ថុ និងជាអគ្គលេខាធិការរង នៃអគ្គលេខាធិការដ្ឋានគណៈកម្មាធិការដឹកនាំការងារកែទម្រង់ការគ្រប់គ្រងហិរញ្ញវត្ថុសាធារណៈ។ កិច្ចប្រជុំនេះមានការចូលរួមពីរដ្ឋបាលខេត្តសៀមរាប, រដ្ឋបាលក្រុង-ស្រុកក្នុងខេត្តសៀមរាបទាំង ១៣, ព្រមទាំង មន្ទីរ សហវ. ទាំង ២៥ រាជធានី-ខេត្ត។

ក្នុងកិច្ចប្រជុំនេះ ផ្ដោតសំខាន់លើប្រធានបទចំនួន ៥ ត្រូវបានលើកយកមកពិភាក្សាលម្អិត រួមមាន៖ (១) ការរៀបចំផែនការយុទ្ធសាស្រ្ដថវិការាជធានី-ខេត្ត, (២) ការរៀបចំកិច្ចបញ្ជិកាគណនេយ្យ នៅរដ្ឋបាលថ្នាក់ក្រោមជាតិ, (៣) ការប្រមូលចំណូលមិនមែនសារពើពន្ធ ជាពិសេសតាមច្រកចេញចូលតែមួយ, (៤) ការអនុវត្តប្រព័ន្ធបច្ចេកវិទ្យាព័ត៌មានសម្រាប់ការគ្រប់គ្រងហិរញ្ញវត្ថុសាធារណៈ (FMIS) និង (៥) ការអនុវត្តមុខងារទាំង ៥៥ ដែលបានផ្ទេរជូនពីរដ្ឋបាលថ្នាក់ជាតិ ទៅរដ្ឋបាលក្រុង-ស្រុក-ខណ្ឌ។