បេឡាជាតិសន្តិសុខសង្គម

សម្រាប់សមាជិក ប.ស.ស. ជាបុគ្គលស្វ័យនិយោជន៍ និងអ្នកក្នុងបន្ទុកសមាជិក ប.ស.ស. ទាំងអស់ អាចបង់ភាគទានមក ប.ស.ស. ចាប់ពីថ្ងៃទី១ ដល់ថ្ងៃទី១៥ នៃរៀងរាល់ខែ តាមរយៈធនាគារដៃគូ ប.ស.ស. ដែលរួមមាន ៖

👉 ធនាគារ អេស៊ីលីដា ភីអិលស៊ី (ACLEDA BANK PLC. )
👉 ធនាគារ វឌ្ឍនៈអាស៊ីចំកាត់ (ABA BANK)
👉 ធនាគារ កាណាឌីយ៉ា ក.អ (CANADIA BANK PLC.)
👉 ធនាគារ ពាណិជ្ជកម្មក្រៅប្រទេស នៃកម្ពុជា (FTB Bank Cambodia)
👉 ធនាគារ ភ្នំពេញ ពាណិជ្ជ (PPCBank)

✍️ ចំណាំ៖ សម្រាប់ការបង់ភាគទាន មក ប.ស.ស. គឺធ្វើឡើងតាមរយៈកម្មវិធីទូរសព្ទដៃ ធនាគារដៃគូ ខាងលើ ឬអញ្ជើញទៅកាន់ធនាគារដៃគូខាងលើដោយផ្ទាល់។

⚠️ សូមប្រយ័ត្ន៖ ចំពោះការបង់ភាគទានតាមរយៈ QR CODE ឬតាមរយៈវិធីផ្សេងៗ ដែលមានឈ្មោះបុគ្គល គឺជាករណីឆបោក សូមបងប្អូនមេត្តាប្រុងប្រយត្នឱ្យបានខ្ពស់ ជៀសវាងខាតបង់ថវិកាផ្ទាល់ខ្លួន។

ℹ️ សម្រាប់ព័ត៌មានបន្ថែម សូមទំនាក់ទំនងមកកាន់លេខ ១២៨៦ ឬតាមរយៈប្រព័ន្ធផ្សព្វផ្សាយបណ្តាញសង្គមរបស់យើង!

លក្ខខណ្ឌផ្សេងៗត្រូវបានអនុវត្ត
#បសស

អបអរសាទរ ទិវាកុមារអន្តរជាតិ
ថ្ងៃទី០១ ខែមិថុនា ឆ្នាំ២០២៦
#បសស

ឯកឧត្តម គឹម កែវរស្មី ការពង្រឹងអធិការកិច្ចសន្តិសុខសង្គម និងការតាមដានការបង់ភាគទាន ជាកត្តាគន្លឹះដើម្បីការពារអត្ថប្រយោជន៍របស់សមាជិក ប.ស.ស.
---------
(ព្រះវិហារ)៖ ដើម្បីធានាបាននូវការការពារសិទ្ធិ និងអត្ថប្រយោជន៍ជូនដល់បងប្អូនកម្មករនិយោជិត ការពង្រឹងអធិការកិច្ចសន្តិសុខសង្គម និងការតាមដានការបង់ភាគទានពីសំណាក់សហគ្រាស ក្រុមហ៊ុន រោងចក្រ គឺជាការងារអាទិភាពបំផុតដែលមិនអាចខ្វះបាន។ នេះជាការលើកឡើងរបស់ ឯកឧត្តម គឹម កែវរស្មី អគ្គនាយករង ប.ស.ស. តំណាង ឯកឧត្តម ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. នៃក្រសួងការងារ និងបណ្តុះបណ្តាលវិជ្ជាជីវៈ នាព្រឹកថ្ងៃទី៣១ ខែឧសភា ឆ្នាំ២០២៦ ក្នុងឱកាសជួបសំណេះសំណាលជាមួយថ្នាក់ដឹកនាំ មន្ត្រី និងបុគ្គលិក សាខា ប.ស.ស. ខេត្តព្រះវិហារ និងនាំយកពាក្យផ្ដាំផ្ញើសួរសុខទុក្ខរបស់ ឯកឧត្តមប្រតិភូរាជរដ្ឋាភិបាល ព្រមទាំងដោះស្រាយបញ្ហាប្រឈមមួយចំនួន ដែលសាខាជួបប្រទះក្នុងការអនុវត្តការងារប្រចាំថ្ងៃ។

ក្នុងឱកាសនេះដែរ ឯកឧត្តមអគ្គនាយករង ប.ស.ស. បានជំរុញបន្ថែមដល់ថ្នាក់ដឹកនាំសាខាខេត្តព្រះវិហារ ត្រូវបន្តពង្រឹងប្រសិទ្ធភាពការងារចុះអធិការកិច្ចសន្តិសុខសង្គមឱ្យបានហ្មត់ចត់ និងជាប្រចាំ ជាពិសេសត្រូវយកចិត្តទុកដាក់ដោះស្រាយរាល់ករណីល្មើសទាំងឡាយដែលពាក់ព័ន្ធនឹងការចុះបញ្ជិកា និងការបង់ភាគទានរបស់និយោជកតាមសហគ្រាស ក្រុមហ៊ុន រោងចក្រនានា នៅក្នុងដែនសមត្ថកិច្ចរបស់ខ្លួនឱ្យមានប្រសិទ្ធភាពខ្ពស់។

ជាមួយគ្នានោះ ឯកឧត្តមអគ្គនាយករង ក៏បានណែនាំឱ្យមន្ត្រី និងបុគ្គលិកសាខាខេត្តព្រះវិហារទាំងអស់ បន្តយកចិត្តទុកដាក់បម្រើសេវាជូនសមាជិកឱ្យបានឆាប់រហ័ស ប្រកបដោយក្រមសីលធម៌វិជ្ជាជីវៈខ្ពស់ ព្រមទាំងជំរុញការប្រើប្រាស់ប្រព័ន្ធឌីជីថល ក្នុងការចុះបញ្ជីសហគ្រាស ក្រុមហ៊ុន រោងចក្រថ្មីៗឱ្យកាន់តែមានប្រសិទ្ធភាព។

ឆ្លៀតក្នុងឱកាសនោះដែរ ឯកឧត្តមអគ្គនាយករង ក៏បានអញ្ជើញចុះត្រួតពិនិត្យទីកន្លែងបំពេញការងារ នៅតាមជាន់នីមួយៗ រួមទាំងសម្ភារបរិក្ខារ និងឧបករណ៍អេឡិចត្រូនិកដែលប្រើប្រាស់ប្រចាំថ្ងៃ ដើម្បីធានាថាសម្ភារទាំងអស់ស្ថិតក្នុងស្ថានភាពល្អ មានគុណភាព និងអាចប្រើប្រាស់បានយ៉ាងមានប្រសិទ្ធភាព ក្នុងការគាំទ្រដល់ដំណើរការការងាររបស់មន្ត្រី និងបុគ្គលិក ឱ្យមានភាពរលូន និងឆ្លើយតបទៅនឹងតម្រូវការការងារបច្ចុប្បន្ន៕

អបអរសាទរ ខួបលើកទី៣៩ ទិវាពិភពលោកគ្មានថ្នាំជក់🚭
(៣១ ឧសភា ១៩៨៧ - ៣១ ឧសភា ២០២៦)

#បសស

ឯកឧត្តម គឹម កែវរស្មី អញ្ជើញជួបសំណេះសំណាលជាមួយថ្នាក់ដឹកនាំ មន្ត្រី និងបុគ្គលិក នៅសាខា ប.ស.ស. ខេត្តឧត្តរមា​នជ័យ
-----------
(ឧត្ដរមានជ័យ)៖ នាព្រឹកថ្ងៃទី៣០ ខែឧសភា ឆ្នាំ២០២៦ ឯកឧត្តម គឹម កែវរស្មី អគ្គនាយករង ប.ស.ស. តំណាង ឯកឧត្តម ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. នៃក្រសួងការងារ និងបណ្តុះបណ្តាលវិជ្ជាជីវៈ បានបន្ដអញ្ជើញជួបសំណេះសំណាល ជាមួយថ្នាក់ដឹកនាំ មន្ត្រី និងបុគ្គលិក សាខា ប.ស.ស. ខេត្តឧត្ដរមានជ័យ និងនាំយកពាក្យផ្ដាំផ្ញើសួរសុខទុក្ខរបស់ ឯកឧត្តមប្រតិភូរាជរដ្ឋាភិបាល ព្រមទាំងដោះស្រាយបញ្ហាប្រឈមមួយចំនួន ដែលសាខាជួបប្រទះក្នុងការអនុវត្តការងារប្រចាំថ្ងៃ។

ក្នុងឱកាសជួបសំណេះសំណាលនេះ ឯកឧត្តមអគ្គនាយករង បានជំរុញបន្ថែមដល់ថ្នាក់ដឹកនាំសាខាខេត្ត ក្នុងការពង្រឹងការងារចុះអធិការកិច្ចសន្តិសុខសង្គម និងដោះស្រាយរាល់ករណីល្មើសទាំងអស់ពាក់ព័ន្ធនឹងការចុះបញ្ជី ព្រមទាំងការបង់ភាគទានរបស់និយោជកតាមសហគ្រាស គ្រឹះស្ថាន នៅក្នុងមូលដ្ឋានរបស់ខ្លួន ដើម្បីធានាឱ្យបាននូវប្រព័ន្ធសន្តិសុខសង្គមមានភាពរឹងមាំ។ ជាពិសេសត្រូវសហការជាមួយតំណាងសហគ្រាស គ្រឹះស្ថាន និងអង្គភាពពាក់ព័ន្ធដើម្បីផ្សព្វផ្សាយឱ្យបានយល់ដឹងកាន់តែច្បាស់អំពីបែបបទ នីតិវិធីថ្មីៗ ដែលជាវិធីសាស្រ្តដ៏ល្អមួយអាចជំរុញការងារកាន់តែមានប្រសិទ្ធភាព។

ជាមួយគ្នានេះ ឯកឧត្តមអគ្គនាយករង ក៏បានផ្ដល់អនុសាសន៍ណែនាំ ដល់ថ្នាក់ដឹកនាំសាខា មន្រ្ដី និងបុគ្គលិក ប.ស.ស. ទាំងអស់ នៃសាខាខេត្ត ត្រូវរួមសហការគ្នាប្រកបដោយសាមគ្គីភាព និងបន្តខិតខំប្រឹងប្រែងផ្តល់សេវាជូនដល់សមាជិក ឱ្យបានកាន់តែឆាប់រហ័ស ប្រកបដោយភាពទន់ភ្លន់ ស្មោះត្រង់ យុត្តិធម៌ និងវិជ្ជាជីវៈខ្ពស់។

ឆ្លៀតក្នុងឱកាសនោះដែរ ឯកឧត្តមអគ្គនាយករង ក៏បានអញ្ជើញចុះពិនិត្យការងារផ្ទាល់ក្នុងអគារ និងពិនិត្យតាមជាន់នីមួយៗ នូវសម្ភារបរិក្ខារ និងឧបករណ៍អេឡិចត្រូនិកប្រើប្រាស់ប្រចាំថ្ងៃ ដើម្បីធានាថា សម្ភារបរិក្ខារទាំងអស់ស្ថិតក្នុងស្ថានភាពប្រសើរ មានគុណភាព និងអាចប្រើប្រាស់បាន ក្នុងការគាំទ្រដល់ការអនុវត្តការងាររបស់មន្ត្រី និងបុគ្គលិកឱ្យដំណើរការរលូន ឆ្លើយតបទៅនឹងតម្រូវការការងារបច្ចុប្បន្ន៕

ឯកឧត្តម ម៉េង ហុង អញ្ជើញអមដំណើរឯកឧត្តមរដ្ឋមន្ត្រី ហេង សួរ ចុះពិនិត្យមើលខ្សែច្រវាក់ផលិតកម្មរបស់ក្រុមហ៊ុន THACO AGRI ក្នុងខេត្តក្រចេះ
---------------------------------
(ក្រចេះ)៖ នាថ្ងៃសៅរ៍ ទី៣០ ខែឧសភា ឆ្នាំ២០២៦ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ដោយមានការអញ្ជើញអមដំណើរពី ឯកឧត្តម ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយកបេឡាជាតិសន្តិសុខសង្គម (ប.ស.ស.) រួមទាំងថ្នាក់ដឹកនាំក្រសួង បានអញ្ជើញចុះពិនិត្យមើលខ្សែច្រវាក់ផលិតកម្មរបស់ក្រុមហ៊ុន THACO AGRI និងចុះសួរសុខទុក្ខ សំណេះសំណាលផ្ទាល់ និងធានាថាបងប្អូនកម្មករ (រួមទាំងអតីតពលករមកពីថៃ) ទទួលបានប្រាក់ឈ្នួលសមរម្យ អត្ថប្រយោជន៍គាំពារសង្គម (ប.ស.ស.) ព្រមទាំងការរស់នៅ សេវាសុខភាព និងការអប់រំកូនចៅប្រកបដោយភាពកក់ក្តៅ នៅតំបន់ពហុកសិកម្មស្នួល ស្ថិតក្នុងស្រុកស្នួល ខេត្តក្រចេះ ពិសេសជួយរកដំណោះស្រាយជូនក្រុមហ៊ុនដែលកំពុងត្រូវការកម្លាំងពលកម្មបន្ថែមប្រមាណ ៧ពាន់នាក់ទៀតក្នុងឆ្នាំនេះ តាមរយៈការណែនាំឱ្យសហការជាមួយទីភ្នាក់ងារជាតិមុខរបរ និងការងារ (NEA) ដើម្បីផ្សព្វផ្សាយជ្រើសរើសកម្មករ (ជាពិសេសផ្តោតលើខេត្តត្បូងឃ្មុំ)។

ក្នុងឱកាសនោះ តំណាងក្រុមហ៊ុនខាងលើបានបញ្ជាក់ឱ្យដឹងថា រាល់ពេលចូលបម្រើការងារ កម្មករនិយោជិតទាំងអស់ត្រូវបានក្រុមហ៊ុនចុះឈ្មោះចូលជាសមាជិក ប.ស.ស. និងបង់ភាគទានជូនពួកគេពេញលេញ រួមមាន៖ ផ្នែកថែទាំសុខភាព ផ្នែកហានិភ័យការងារ និងផ្នែកប្រាក់សោធន ដើម្បីធានាបាននូវការគាំពារសង្គម និងកាត់បន្ថយកង្វល់លើបញ្ហាសេវាសុខភាពរបស់កម្មករនិយោជិតទាំងអស់។

ជាការឆ្លើយតប និងដើម្បីបង្កលក្ខណៈកាន់តែងាយស្រួលបន្ថែមទៀតដល់បងប្អូនកម្មករនិយោជិត ឯកឧត្តម ហេង សួរ បានណែនាំឱ្យថ្នាក់ដឹកនាំ ប.ស.ស. ចុះជួបជាមួយកម្មករផ្ទាល់នៅតាមកសិដ្ឋាន ដើម្បីរៀបចំធ្វើប័ណ្ណសមាជិក ប.ស.ស. ជូនពួកគេឱ្យបានទាន់ពេលវេលា និងកាន់តែមានប្រសិទ្ធភាពខ្ពស់ ពិសេសបងប្អូនកម្មករនិយោជិតដែលជាអតីតពលករទើបត្រឡប់មកពីប្រទេសថៃ៕

ឯកឧត្តម ឃុន ចាន់ណារិទ្ធ ដឹកនាំកិច្ចប្រជុំបូកសរុបលទ្ធផលការងារសម្រេចបានប្រចាំខែឧសភា និងដាក់ទិសដៅបន្តសម្រាប់នាយកដ្ឋានសេវាមូលដ្ឋានសុខាភិបាល និងនាយកដ្ឋានបច្ចេកវិទ្យាព័ត៌មាន នៃ ប.ស.ស.
................
(ភ្នំពេញ)៖ នាព្រឹកថ្ងៃទី២៩ ខែឧសភា ឆ្នាំ២០២៦ នេះ ឯកឧត្តម ឃុន ចាន់ណារិទ្ធ អគ្គនាយករង បេឡាជាតិសន្តិសុខសង្គម នៃក្រសួងការងារ និងបណ្តុះបណ្តាលវិជ្ជាជីវៈ បានអញ្ជើញដឹកនាំកិច្ចប្រជុំបូកសរុបលទ្ធផលការងារសម្រេចបានប្រចាំខែឧសភា និងពិនិត្យទិសដៅអនុវត្តការងារបន្ត របស់នាយកដ្ឋានចំនួន២ រួមមាន៖ ១. នាយកដ្ឋានសេវាមូលដ្ឋានសុខាភិបាល និង ២.នាយកដ្ឋានបច្ចេកវិទ្យាព័ត៌មាន នៃ ប.ស.ស.។

បន្ទាប់ពីបានស្តាប់នូវការរាយការណ៍លទ្ធផលការងារ និងបញ្ហាប្រឈមរបស់នាយកដ្ឋានទាំងពីរ ឯកឧត្តមអគ្គនាយករង ប.ស.ស. បានផ្តល់ការណែនាំគន្លឹះ និងធ្វើការដោះស្រាយការងារមួយចំនួនរបស់នាយកដ្ឋាននីមួយៗ ដោយក្នុងនោះ ឯកឧត្តមបានណែនាំដល់ នាយកដ្ឋានសេវាមូលដ្ឋានសុខាភិបាល ត្រូវផ្តោតលើចំណុចសំខាន់ៗ រួមមាន៖ តារាងបញ្ជីឱសថ ការគ្រប់គ្រងទិន្នន័យ និងការធ្វើទំនើបកម្មតាមរយៈម៉ាស៊ីនស្វ័យសេវានៅតាមមន្ទីរពេទ្យ ដើម្បីធានាថា សមាជិក ប.ស.ស. ទទួលបានការផ្តល់សេវាប្រកបដោយភាពងាយស្រួល និងឆាប់រហ័ស។

ដោយឡែក នាយកដ្ឋានបច្ចេកវិទ្យាព័ត៌មាន ឯកឧត្តមអគ្គនាយករង បានសង្កត់ធ្ងន់ និងជំរុញឱ្យពន្លឿនការងារដែលនៅសេសសល់ ដើម្បីធ្វើទំនើបកម្មប្រព័ន្ធបច្ចេកវិទ្យាឌីជីថលនៅក្នុង ប.ស.ស. និងនៅតាមមន្ទីរពេទ្យដៃគូ ប.ស.ស. ឱ្យកាន់តែមានប្រសិទ្ធភាពខ្ពស់។

ឆ្លៀតក្នុងឱកាសនោះ ឯកឧត្តមអគ្គនាយករង បានសម្តែងនូវការកោតសរសើរ និងវាយតម្លៃខ្ពស់ចំពោះនាយកដ្ឋានជំនាញទាំងពីរ ដែលបានសហការគ្នាយ៉ាងជិតស្និទ្ធ និងខិតខំបំពេញភារកិច្ចយ៉ាងសកម្មជាមួយមន្ទីរពេទ្យដៃគូ ប.ស.ស. ជាពិសេសការសម្រេចបាននូវការតភ្ជាប់ និងថ្ពក់ទិន្នន័យព័ត៌មានអ្នកប្រើប្រាស់សមាជិក ប.ស.ស. នៅមន្ទីរពេទ្យមិត្តភាពកម្ពុជា-ចិន ព្រះកុសុមៈ ប្រកបដោយជោគជ័យ។

សូមបញ្ជាក់ថា កិច្ចប្រជុំខាងលើនេះ ប្រព្រឹត្តទៅនៅស្នាក់ការកណ្តាល ប.ស.ស. រាជធានីភ្នំពេញ ដោយមានការចូលរួមពី លោកប្រធាននាយកដ្ឋាន លោក លោកស្រី អនុប្រធាននាយកដ្ឋាន លោក លោកស្រី ទីប្រឹក្សាបច្ចេកទេសជាន់ខ្ពស់ និងលោក លោកស្រីប្រធាន អនុប្រធានការិយាល័យ នៃនាយកដ្ឋានទាំង២ សរុបប្រមាណជាង ៤០រូប៕

សេចក្តីជូនដំណឹង ស្តីពី ការលើកថ្ងៃបង់ភាគទាន និងការផ្តល់របាយការណ៍កម្មករនិយោជិតមកកាន់ បេឡាជាតិសន្តិសុខសង្គម (ប.ស.ស.) សម្រាប់ខែឧសភា ឆ្នាំ២០២៦

#បសស

ប.ស.ស. បន្តចុះផ្សព្វផ្សាយស្តីពីការអនុវត្តរបបសន្ដិសុខសង្គមផ្នែកហានិភ័យការងារ និងផ្នែកថែទាំសុខភាព ជូនដល់ថ្នាក់ដឹកនាំ និងមន្ត្រីរាជការក្រោមឱវាទរដ្ឋបាលខេត្តស្វាយរៀង
------------------------
(ស្វាយរៀង)៖ នាព្រឹកថ្ងៃសុក្រ ទី២៩ ខែឧសភា ឆ្នាំ២០២៦ នេះ ឯកឧត្តមបណ្ឌិត ហេង សុផាន់ណារិទ្ធ អគ្គនាយករង ប.ស.ស. តំណាងឯកឧត្តម ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. នៃក្រសួងការងារ និងបណ្តុះបណ្តាលវិជ្ជាជីវៈ បានអញ្ជើញជាសហអធិបតីក្នុងពិធីបើកសិក្ខាសាលាផ្សព្វផ្សាយស្ដីពី ការអនុវត្តរបបសន្ដិសុខសង្គមផ្នែកហានិភ័យការងារ និងផ្នែកថែទាំសុខភាពសម្រាប់មន្ត្រីសាធារណៈ ជូនដល់ថ្នាក់ដឹកនាំ និងមន្ត្រីរាជការក្រោមឱវាទរដ្ឋបាលខេត្តស្វាយរៀង សរុបប្រមាណ ២៥០នាក់ នៅសាលប្រជុំសាលាខេត្តស្វាយរៀង។

ឯកឧត្តមបណ្ឌិតអគ្គនាយករង ប.ស.ស. បានលើកឡើងថា ប.ស.ស. បានបន្តរៀបចំសិក្ខាសាលាផ្សព្វផ្សាយនេះឡើង ក្នុងគោលបំណងផ្តល់ឱកាសឱ្យមន្ត្រីរាជការថ្នាក់ក្រោមជាតិ អាចស្វែងយល់ឱ្យកាន់តែច្បាស់អំពីវឌ្ឍនភាព នៃការអនុវត្ត និងអត្ថប្រយោជន៍នានា នៃរបបសន្តិសុខសង្គម ដើម្បីយកទៅផ្សព្វផ្សាយបន្តឱ្យកាន់តែទូលំទូលាយ និងមានប្រសិទ្ធភាពដល់មន្ត្រីរាជការនៅតាមមូលដ្ឋាន។

ឯកឧត្តមបណ្ឌិតអគ្គនាយករង បានបន្តទៀតថា រាជរដ្ឋាភិបាលកម្ពុជា បានដាក់ចេញនូវ ក្របខណ្ឌគោលនយោបាយជាតិគាំពារសង្គម ឆ្នាំ២០២៤–២០៣៥ ក្នុងគោលបំណងបន្តអភិវឌ្ឍប្រព័ន្ធគាំពារសង្គមឱ្យកាន់តែរឹងមាំ មានភាពធន់ និងអាចឆ្លើយតបបានល្អប្រសើរចំពោះការប្រែប្រួលអាកាសធាតុ គ្រោះអាសន្ន និងវិបត្តិនានា ព្រមទាំងឆ្លើយតបនឹងហានិភ័យនៃវដ្តជីវិតរបស់មនុស្ស ចាប់ពីដំណាក់កាលមាតុភាព កុមារភាព ជរាភាព រហូតដល់មរណភាព។

ក្នុងនោះ រាជរដ្ឋាភិបាលបានប្រគល់ភារកិច្ចដល់ បេឡាជាតិសន្តិសុខសង្គម (ប.ស.ស.) ជាប្រតិបត្តិករតែមួយគត់ក្នុងការអនុវត្តរបបសន្តិសុខសង្គម រួមមាន ផ្នែកហានិភ័យការងារ ផ្នែកថែទាំសុខភាព ផ្នែកប្រាក់សោធន និងផ្នែកនិកម្មភាពការងារ។

ក្នុងឱកាសជាមួយគ្នានោះដែរ ឯកឧត្តម ម៉ែន អេង អភិបាលរង នៃគណៈអភិបាលខេត្តស្វាយរៀង បានមានមតិសំណេះសំណាល សម្តែងនូវការកោតសរសើរ និងថ្លែងអំណរគុណយ៉ាងជ្រាលជ្រៅចំពោះថ្នាក់ដឹកនាំ ប.ស.ស. ព្រមទាំងបានផ្តាំផ្ញើ និងជំរុញដល់អង្គសិក្ខាសាលាទាំងអស់ ត្រូវយកចិត្តទុកដាក់ស្តាប់បទបង្ហាញពីមន្ត្រីជំនាញ ដើម្បីទទួលបានចំណេះដឹងច្បាស់លាស់ អាចផ្សព្វផ្សាយបន្តទៅកាន់មន្ត្រីក្រោមឱវាទ ពិសេសមន្ត្រីរាជការ ដែលមានសហព័ទ្ធ (ប្ដី ឬប្រពន្ធ) និងកូនក្នុងបន្ទុក ត្រូវទៅចុះឈ្មោះជាសមាជិក ប.ស.ស. នៅសាខាដែលនៅជិតបំផុត ដើម្បីទទួលបានការគាំពារសុខុមាលភាព និងអត្ថប្រយោជន៍នានាស្របតាមបទប្បញ្ញត្តិជាធរមាន។