មន្ទីរសាធារណការ និងដឹកជញ្ជូនខេត្តព្រះវិហារ

មន្ត្រីជំនាញមន្ទីរសាធារណការ និងដឹកជញ្ជូនខេត្តព្រះវិហារ សហការជាមួយមន្ត្រីច្រកចេញចូលតែមួយរដ្ឋបាលខេត្ត ចុះធ្វើបច្ចុប្បន្នភាព យានដ្ឋានជួសជុល និងកែឆ្នៃរថយន្ត ជាមួយនឹងការជំរុញម្ចាស់យានដ្ឋានចុះបញ្ជីថ្មី និងបន្តសុពលភាពលិខិតអនុញ្ញាតិធ្វើអាជីវកម្មស្របតាមច្បាប់

រយះពេល៣ថ្ងៃ ចាប់ពីថ្ងៃទី០១ ដល់ថ្ងៃទី០៣ ខែមិថុនា ឆ្នាំ២០២៦ មន្ត្រីជំនាញនៃមន្ទីរសាធារណការ និងដឹកជញ្ជូនខេត្តព្រះវិហារ ចំនួន ០៤រូប បានសហការជាមួយមន្ត្រីអង្គភាពច្រកចេញចូលតែមួយរដ្ឋបាលខេត្ត ចុះអនុវត្តការងារធ្វើបច្ចុប្បន្នភាពទិន្នន័យយានដ្ឋានជួសជុល និងយានដ្ឋានកែច្នៃដំឡើងរថយន្ត នៅស្រុកជាំក្សាន្ត ស្រុកគូលែន និង ក្រុងព្រះវិហារ ខេត្តព្រះវិហារ។

ក្នុងឱកាសនោះ ក្រុមការងារបានចុះផ្សព្វផ្សាយ និងជំរុញម្ចាស់យានដ្ឋានឱ្យអនុវត្តនីតិវិធីចុះបញ្ជីថ្មី និងបន្តសុពលភាពលិខិតអនុញ្ញាតធ្វើអាជីវកម្មយានដ្ឋានជួសជុល និងកែច្នៃដំឡើងរថយន្ត ស្របតាមបទប្បញ្ញត្តិជាធរមាន ដោយអញ្ជើញម្ចាស់អាជីវកម្មមកដាក់ពាក្យស្នើសុំតាមរយៈយន្តការច្រកចេញចូលតែមួយរដ្ឋបាលខេត្ត។

ជាមួយគ្នានេះ ក្រុមការងារក៏បានចែកជូនស្ទីកឃ័រអប់រំសុវត្ថិភាពចរាចរណ៍ក្រោមប្រធានបទ «ថ្ងៃនេះ ថ្ងៃស្អែក កុំឱ្យមានគ្រោះថ្នាក់ចរាចរណ៍» សៀវភៅច្បាប់ស្តីពីចរាចរណ៍ផ្លូវគោក និងផ្ទាំងកំណត់ទំហំទ្រុងរថយន្ត ដើម្បីលើកកម្ពស់ការយល់ដឹង និងការអនុវត្តច្បាប់ចរាចរណ៍ឱ្យកាន់តែមានប្រសិទ្ធភាព៕
#ខេត្តព្រះវិហារ #មន្ទីរសាធារណការនិងដឹកជញ្ជូនខេត្តព្រះវិហារ

សារលិខិតជូនពរ គោរពជូនចំពោះ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ ក្នុងឱកាសដ៏មហានក្ខត្តឫក្សនៃខួបកំណើតគម្រប់ខួប៤៥ ឈានចូល ៤៦ឆ្នាំ ដែលនឹងប្រព្រឹត្តទៅនៅថ្ងៃទី៤ ខែមិថុនា ឆ្នាំ២០២៦ នេះ ពីឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន និងភរិយា ព្រមទាំងថ្នាក់ដឹកនាំ និងមន្ត្រីរាជការនៃក្រសួងសាធារណការ និងដឹកជញ្ជូន។

តើឯកសារចុះបញ្ជីផ្លាកលេខពិសេសផ្ទាល់ខ្លួនរថយន្តសម្រាប់ជនជាតិខ្មែរមានអ្វីខ្លះ?

» ឯកសារចុះបញ្ជីផ្លាកលេខពិសេសផ្ទាល់ខ្លួនរថយន្តសម្រាប់ជនជាតិខ្មែរមាន៖
- អត្តសញ្ញាណប័ណ្ណសញ្ជាតិខ្មែរ (ច្បាប់ចម្លងដែលមានបញ្ជាក់ពីអាជ្ញាធរមានសមត្ថកិច្ច)
(ឬ អត្តសញ្ញាណប័ណ្ណសញ្ជាតិខ្មែរថតចម្លងដោយត្រូវផ្ដិតស្នាមខ្ចៅដៃសាមីខ្លួនដោយផ្ទាល់នៅចំពោះមុខមន្ត្រីទទួលបន្ទុកផ្ដល់សេវា និងត្រូវភ្ជាប់មកជាមួយនូវអត្តសញ្ញាណប័ណ្ណសញ្ជាតិខ្មែរច្បាប់ដើមសម្រាប់មន្ត្រីទទួលបន្ទុកធ្វើការពិនិត្យ និងផ្ទៀងផ្ទាត់)
(ឬ លិខិតបញ្ជាក់អត្តសញ្ញាណបុគ្គលច្បាប់ដើមដែលចេញដោយអគ្គនាយកដ្ឋានអត្តសញ្ញាណកម្ម)
(ឬ លិខិតបញ្ជាក់ភាពត្រឹមត្រូវនៃទិន្នន័យអត្តសញ្ញាណបុគ្គលដែលចេញដោយអគ្គនាយកដ្ឋានអត្តសញ្ញាណកម្ម)
- បង្កាន់ដៃពន្ធយានយន្ត (ច្បាប់ដើម)
- វិញ្ញាបនបត្រត្រួតពិនិត្យលក្ខណៈបច្ចេកទេសយានជំនិះ (ឆៀក)
- លិខិតទិញ ឬលក់រថយន្ត

ដកស្រង់ចេញពីប្រកាសលេខ ១៤១១ សហវ.ប្រក ចុះថ្ងៃទី២៨ ខែធ្នូ ឆ្នាំ២០១៩ ស្តីពីការលក់លេខចុះបញ្ជីពិសេសផ្ទាល់ខ្លួនរថយន្ត។

::: សម្រាប់ព័ត៌មានលម្អិត (Hotline)៖ 1275

សារលិខិតចូលរួមរំលែកទុក្ខពី ឯកឧត្តម ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន និងភរិយា​ ព្រមទាំងថ្នាក់ដឹកនាំ និងមន្ត្រីរាជការ គោរពជូន លោកជំទាវ គង់ សុគិត និងក្រុមគ្រួសារ ចំពោះមរណភាពរបស់ ឯកឧត្តម ញ៉ែម សារ៉ន អនុរដ្ឋលេខាធិការក្រសួងសាធារណការ និងដឹកជញ្ជូន ត្រូវជាឧត្តមស្វាមីរបស់ លោកជំទាវ បានទទួលមរណភាព នៅថ្ងៃអង្គារ ២រោច ខែជេស្ឋ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី២ ខែមិថុនា ឆ្នាំ២០២៦​ វេលាម៉ោង ១១:២០ នាទីព្រឹក ក្នុងជន្មាយុ ៧៧ឆ្នាំ ដោយរោគាពាធ។