សាលាជាតិគយ - Customs National School

ដោយមានការគាំទ្រក្រោមកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ កាលពីថ្ងៃព្រហស្បតិ៍ ៨កើត ខែចេត្រ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី២៦ ខែមីនា ឆ្នាំ២០២៦ អគ្គនាយកដ្ឋានគយនិងរដ្ឋាករកម្ពុជា បានរៀបចំសិក្ខាសាលាផ្សព្វផ្សាយកម្មវិធីប្រតិបត្តិករសេដ្ឋកិច្ចបានទទួលការអនុញ្ញាត (Authorized Economic Operator Program) ក្រោមប្រធានបទ “បច្ចុប្បន្នភាពនិងដំណើរឆ្ពោះទៅមុខនៃកម្មវិធីប្រតិបត្តិករសេដ្ឋកិច្ចបានទទួលការអនុញ្ញាតដើម្បីភាពរីកចម្រើសម្រាប់វិស័យឯកជន” រយៈពេលពេញមួយថ្ងៃ នៅសាលាជាតិគយ ។
សិក្ខាសាលានេះ ទទួលបានការអញ្ជើញជាអធិបតីក្នុងពិធីបើកដោយ លោក ផា អេងវ៉េង អគ្គ-នាយករងនៃអគ្គនាយកដ្ឋានគយនិងរដ្ឋាករកម្ពុជា តំណាងដ៏ខ្ពង់ខ្ពស់របស់ឯកឧត្តមបណ្ឌិត គុណ ញឹម រដ្ឋមន្រ្តីប្រតិភូអមនាយករដ្ឋមន្ត្រី អគ្គនាយកនៃអគ្គនាយកដ្ឋានគយនិងរដ្ឋាករកម្ពុជា និងមានការអញ្ជើញចូលរួមពីតំណាង ក្រុមហ៊ុនជាសមាជិកនៃកម្មវិធីប្រតិបត្តិករសេដ្ឋកិច្ចបានទទួលការអនុញ្ញាត (AEO Companies) ក្រុមហ៊ុនធុរជនល្អបំផុត (Best Traders Group Membership) ក្រុមហ៊ុនជើងសាគយ ក្រុមហ៊ុននាំចេញ-នាំចូល និងធុរជនពាក់ព័ន្ធនានាផ្សេងទៀតដែលមានចំនួនសរុបប្រមាណ ១២០ រូប។
គោលបំណងនៃសិក្ខាសាលា គឺបន្តផ្សព្វផ្សាយលើកកម្ពស់ការយល់ដឹងបន្ថែមអំពីការអនុវត្តកម្មវិធីប្រតិបត្តិករសេដ្ឋកិច្ចបានទទួលការអនុញ្ញាត ជូនដល់ធុរជនដែលមានបំណងស្នើសុំវិញ្ញាបនបត្រប្រតិបត្តិករសេដ្ឋកិច្ចបានទទួលការអនុញ្ញាត (AEO Certificate) រួមមាន អត្ថប្រយោជន៍និងលក្ខណៈវិនិច្ឆ័យនៃការស្នើសុំវិញ្ញាបនបត្រប្រតិបត្តិករសេដ្ឋកិច្ចបានទទួលការអនុញ្ញាត ព្រមទាំងបែបបទនិងនីតិវិធីនៃការស្នើសុំវិញ្ញាបនបត្រតាមប្រព័ន្ធបញ្ជរតែមួយជាតិ (National Single Window)។
កម្មវិធីប្រតិបត្តិករសេដ្ឋកិច្ចបានទទួលការអនុញ្ញាត គឺជាកម្មវិធីមួយផ្តល់ការលើកទឹកចិត្តតាមរយៈកិច្ចសម្រួលពាណិជ្ជកម្មផ្សេងៗ ជូនដល់ធុរជនពាក់ព័ន្ធនានាដែលបានបង្ហាញនូវអនុលោមភាពច្បាប់និងបទប្បញ្ញត្តិ ដែលមានស្តង់ដារសន្តិសុខនិងសុវត្ថិភាពនៃខ្សែច្រវាក់ផ្គត់ផ្គង់សាកល ស្របតាមច្បាប់និងបទប្បញ្ញត្តិជាធរមាន ជាពិសេស ស្តង់ដារសន្តិសុខនិងសុវត្ថិភាពរបស់អង្គការគយពិភពលោក (WCO SAFE Frameworks of Standards)។ កិច្ចសម្រួលពាណិជ្ជកម្មបន្ថែម ដែលប្រតិបត្តិករសេដ្ឋកិច្ចបានទទួលការអនុញ្ញាតបានទទួលពីអគ្គនាយកដ្ឋានគយនិងរដ្ឋាករកម្ពុជា រួមមាន៖ អាទិភាពក្នុងការបំពេញបែបបទបញ្ចេញទំនិញពីគយ ការកាត់បន្ថយការត្រួតពិនិត្យរូបវន្ត ការកាត់បន្ថយឯកសារតម្រូវ ការប្រើប្រាស់និមិត្តសញ្ញា AEO ការយកទំនិញចេញពីគយមុនពេលបង់ពន្ធនិងអាករ ការទទួលបានការលើកទឹកចិត្តក្នុងឋានៈជាសមាជិក AEO នៅប្រទេសដៃគូផ្សេងទៀតដែលប្រទេសកម្ពុជាបានចុះហត្ថលេខាព្រមព្រៀងជាមួយ (Mutual Recognition Arrangement- MRA) រួមទាំងអត្ថប្រយោជន៍ជាច្រើនផ្សេងទៀត។
សិក្ខាសាលានេះ នឹងក្លាយជាឧបករណ៍ជំរុញការស្ម័គ្រចិត្តចូលឱ្យកាន់តែច្រើនពីវិស័យឯកជនក្នុងការចូលរួមអនុវត្តកម្មវិធីប្រតិបត្តិករសេដ្ឋកិច្ចបានទទួលការអនុញ្ញាតនៅកម្ពុជា ដែលនឹងបានបង្ហាញឱ្យឃើញនូវការប្ដេជ្ញាចិត្តរបស់កម្ពុជា ក្នុងការអនុវត្តតាមកិច្ចព្រមព្រៀងរបស់អង្គការពាណិជ្ជកម្មពិភពលោកស្តីពីកិច្ចសម្រួលពាណិជ្ជកម្ម (WTO Trade Facilitation Agreement) និងលើកកម្ពស់ការប្រកួតប្រជែង និងកិច្ចសម្រួលពាណិជ្ជកម្មនៅកម្ពុជាកាន់តែមានប្រសិទ្ធភាព។
សិក្ខាសាលានេះ ត្រូវបានប្រព្រឹត្តទៅដោយជោគជ័យនិងផ្លែផ្កា ដោយមានការពិភាក្សាយ៉ាងផុសផុលលើប្រធានបទដែលវាគ្មិនបានធ្វើបទបង្ហាញ ដែលបង្ហាញឱ្យឃើញពីការចាប់អារម្មណ៍និងការស្ម័គ្រចិត្តចូលរួមពីផ្នែកឯកជនក្នុងការស្នើសុំការទទួលស្គាល់ជាប្រតិបត្តិករសេដ្ឋកិច្ចបានទទួលការអនុញ្ញាត។

អគ្គនាយកដ្ឋានគយនិងរដ្ឋាករកម្ពុជា (អគរ) សហការជាមួយទីភ្នាក់ងារសហប្រតិបត្តិការអន្តរជាតិជប៉ុន (JICA) បានរៀបចំវគ្គបណ្តុះបណ្តាលក្រោមគម្រោងស្តីពីការពង្រឹងប្រសិទ្ធភាពការងារគយសម្រាប់ជំរុញការតភ្ជាប់ក្នុងតំបន់មេគង្គ នាថ្ងៃទី២៤ និងថ្ងៃទី២៥ ខែមីនា ឆ្នាំ២០២៦ នៅសាលាជាតិគយ ដោយមានការចូលរួម ពីមន្ត្រីគយនិងរដ្ឋាករចំនួន ៣០ រូប។ វគ្គបណ្តុះបណ្តាលនេះ មានគោលបំណងពង្រឹងសមត្ថភាពដល់មន្ត្រីគយ និងរដ្ឋាករនៅថ្នាក់កណ្តាល និងការិយាល័យគយនិងរដ្ឋាករនៅច្រកព្រំដែនគោលដៅ លើកិច្ចសម្រួលពាណិជ្ជកម្ម និងការគ្រប់គ្រងព្រំដែន តាមរយៈការលើកកម្ពស់ការយល់ដឹងពីកិច្ចព្រមព្រៀងអន្តរជាតិសំខាន់ៗ និងយន្តការអធិការកិច្ចរួមគ្នាតែមួយលើក និងទីលានត្រួតពិនិត្យគយរួមគ្នា។
ពិធីបើកវគ្គបណ្តុះបណ្តាល បានប្រព្រឹត្តទៅក្រោមអធិបតីភាពរបស់លោក សែ សុឃន អគ្គនាយករង នៃ អគរ ជាតំណាងដ៏ខ្ពង់ខ្ពស់របស់ ឯកឧត្តមបណ្ឌិត គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយកនៃ អគរ និង លោកស្រី Miura Yoshiko តំណាងជាន់ខ្ពស់នៃការិយាល័យ JICA ប្រចាំកម្ពុជា។ ថ្លែងក្នុងពីធីបើក លោកអគ្គនាយករង បានគូសបញ្ជាក់ថា ជាការគ្រោងទុកដំបូង គម្រោងនេះ ផ្តោតការអនុវត្តលើច្រកព្រំដែនសាកល្បងតែមួយគឺច្រកព្រំដែនប៉ោយប៉ែត/ស្ទឹងបត់ ក្នុងគោលបំណងជំរុញការតភ្ជាប់ជាមួយរដ្ឋបាលគយប្រទេសជាប់ព្រំដែន។ ដោយយោងលើកាលៈទេសៈបច្ចុប្បន្ន ព្រំដែនកម្ពុជា-ថៃ ត្រូវបានបិទចាប់ពីខែមិថុនា ឆ្នាំ២០២៥ គម្រោងនេះ ត្រូវបានកែសម្រួលដោយផ្តោតទៅលើការកសាងសមត្ថភាពលើកិច្ចសម្រួលពាណិជ្ជកម្ម និងកិច្ចសហប្រតិបត្តិការគយ ហើយពង្រីកវិសាលភាពពីច្រកព្រំដែនសាកល្បងតែមួយ ទៅច្រកព្រំដែនគោលដៅ ចំនួនបីគឺ៖ ប៉ោយប៉ែត/ស្ទឹងបត់, បាវិត, និងកំពង់ផែអន្តរជាតិក្រុងព្រះសីហនុ។
ជាមួយនេះ លោកស្រី Miura Yoshiko បានសម្តែងនូវសេចក្តីសោមនស្សរីករាយនិងថ្លៃងអំណរគុណដល់ រដ្ឋបាលគយកម្ពុជា ដែលបានសហការរៀបចំវគ្គបណ្តុះបណ្តាលនេះឡើង។ លោកស្រី សង្ឃឹមថាវគ្គបណ្តុះបណ្តាល ដែលផ្តល់ជូនដោយក្រុមអ្នកជំនាញការនាឱកាសនេះ នឹងរួមចំណែកលើកកម្ពស់ដល់ប្រតិបត្តិការគយនៅតាមច្រកព្រំដែន ជាពិសេសច្រកព្រំដែនបាវិត និងកំពង់ផែអន្តរជាតិក្រុងព្រះសីហនុ ដែលនាពេលថ្មីៗទំហំឡូជីស្ទិក បានកើនឡើងគួរឱ្យកត់សម្គាល់។
វគ្គបណ្តុះបណ្តាលរយៈពេល ២ថ្ងៃនេះ មន្ត្រីគយនិងរដ្ឋាករបានសិក្សាលើប្រធានបទសំខាន់ៗដូចជា៖ កិច្ចសហប្រតិបត្តិការរវាងទីភ្នាក់ងារព្រំដែន កិច្ចសហប្រតិបត្តិការគយ ក្រោមកិច្ចព្រមព្រៀងស្តីពីកិច្ចសម្រួលពាណិជ្ជកម្ម និងករណីសិក្សាពាក់ព័ន្ធ, ការសម្របសម្រួលការគ្រប់គ្រងព្រំដែន និងករណីសិក្សាស្តីពីអធិការកិច្ចរួមគ្នាតែមួយលើក និងទីលានត្រួតពិនិត្យគយរួមគ្នា ជាដើម។ លើសពីនេះ វគ្គបណ្តុះបណ្តាល បានគ្របដណ្តប់លើកិច្ចសហប្រតិបត្តិការគយអាស៊ាន, កិច្ចសហប្រតិបត្តិការការដឹកជញ្ជូនក្នុងអាស៊ាន និងកិច្ចព្រមព្រៀងសម្របសម្រួលការដឹកជញ្ជូនឆ្លងកាត់ព្រំដែនក្នុងមហាអនុតំបន់មេគង្គ ព្រមទាំងផែនការនិងគោលនយោបាយពាក់ព័ន្ធសម្រាប់កម្ពុជា។
លោកអគ្គនាយករង បានលើកទឹកចិត្តដល់មន្ត្រីគយនិងរដ្ឋាករទាំងអស់ ឱ្យយកចិត្តទុកដាក់ត្រងត្រាប់ស្ដាប់ ស្វែងយល់ ក៏ដូចជាចូលរួមឱ្យបានផុលផុសក្នុងការពិភាក្សា និងចែករំលែកបទពិសោធន៍ល្អៗ ព្រមទាំងឆ្លៀតឱកាសដ៏មានតម្លៃនេះក្រេបយកចំណេះដឹងថ្មីពីអ្នកជំនាញការ ដោយជឿជាក់ថាចំណេះដឹងទទួលបានពី វគ្គបណ្ដុះបណ្ដាលនេះ នឹងរួមចំណែកយ៉ាងសំខាន់ដល់ការអនុវត្តការងារប្រចាំថ្ងៃ ក៏ដូចជាពង្រឹងកិច្ចសហ-ប្រតិបត្តិការនៅមាត់ច្រកព្រំដែនឱ្យកាន់តែប្រសើរឡើង។

នាថ្ងៃទី១៦ ខែមីនា ឆ្នាំ២០២៦ នៅសាលាជាតិគយ អគ្គនាយកដ្ឋានគយនិងរដ្ឋាករកម្ពុជា(អគរ) បានរៀបចំវេទិកាស្តីពីការចែករំលែកបទពិសោធន៍ និងជំរុញការប្រើប្រាស់មុខងារទូទាត់តាមមធ្យោបាយអេឡិចត្រូនិក (e-Payment) ក្រោមអធិបតីភាពលោក សែ សុឃន អគ្គនាយករងនៃអគ្គនាយកដ្ឋានគយនិងរដ្ឋាករកម្ពុជា តំណាងដ៏ខ្ពង់ខ្ពស់ ឯកឧត្តមបណ្ឌិត គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយកនៃអគ្គនាយកដ្ឋានគយនិងរដ្ឋាករកម្ពុជា ដោយមានការអញ្ជើញចូលរួមពីឯកឧត្តម លោកជំទាវ អ្នកឧកញ៉ា ឧកញ៉ា លោក លោកស្រី ជាថ្នាក់ដឹកនាំ និងជាតំណាងសមាគម ក្រុមហ៊ុន ធុរជន នីតិបុគ្គលជើងសាគយ តំណាងធនាគារពាណិជ្ជដៃគូ និងមន្រ្តីគយនិងរដ្ឋាករ សរុបប្រមាណ ១៨០ រូប។
វេទិកានេះ រៀបចំឡើងក្នុងគោលបំណង តាមដានវឌ្ឍនភាពការអនុវត្តកន្លងមក និងបន្តផ្សព្វផ្សាយ បញ្ជ្រាបការយល់ដឹងបន្ថែមទៀតជូនដល់ភាគីពាក់ព័ន្ធទាំងអស់ នូវមុខងារ e-Payment របស់ អគរ ដើម្បីជំរុញការប្រើប្រាស់មុខងារនេះ ឱ្យកាន់តែទូលំទូលាយ ពេញលេញ និងបង្កើនប្រសិទ្ធភាពនៃការគ្រប់គ្រងការងារប្រមូលចំណូលគយនិងរដ្ឋាករ។
មានមតិក្នុងកម្មវិធី លោកអគ្គនាយករង សែ សុឃន បានគូសបញ្ជាក់ថា ការបង់ពន្ធគយតាមមុខងារ e-Payment បានផ្តល់អត្ថប្រយោជន៍ដល់ធុរជន អ្នកនាំចេញនាំចូល និងនីតិបុគ្គលជើងសាគយ មានភាពងាយស្រួល ឆាប់រហ័ស ត្រឹមត្រូវ និងចៀសវាងបាននូវការភាន់ច្រឡំចំនួនប្រាក់ពន្ធ ឬគណនីធនាគារចំណូលគយជាយថាហេតុ នៅពេលធ្វើប្រតិបត្តិការបង់ពន្ធ។ សម្រាប់មន្រ្តីគយនិងរដ្ឋាករ ក៏មានភាពងាយស្រួលក្នុងការគ្រប់គ្រង ពិនិត្យតាមដានប្រតិបត្តិការបង់ប្រាក់ រៀបចំរបាយការណ៍ និងបង្វែរចំណូលថវិកាជាតិបានទាន់ពេលវេលា។ មុខងារនេះត្រូវបានបង្កើតឡើង សម្រាប់ឆ្លើយតបនឹងការវិវត្តន៍ និងការរីកចម្រើនឥតឈប់ឈរនៃសេដ្ឋកិច្ច-សង្គម ដើម្បីចូលរួមលើកកម្ពស់កិច្ចសម្រួលពាណិជ្ជកម្ម និងរួមចំណែកគាំទ្រដល់កម្មវិធីកែទម្រង់ និងយុទ្ធសាស្រ្តនានារបស់រាជរដ្ឋាភិបាលកម្ពុជាក្នុងនីតិកាលទី៧។
ចាប់ពីឆ្នាំ២០១៣ មកដល់ដើមឆ្នាំ២០២៦ មានធនាគារពាណិជ្ជចំនួន ១៣ បានចុះអនុស្សរណៈនៃការយោគយល់គ្នា ជាមួយក្រសួងសេដ្ឋកិច្ចនិងហិរញ្ញវត្ថុ ក្នុងការផ្តល់សេវាកម្មប្រមូលចំណូលគយនិងរដ្ឋាករ។ ក្នុងចំណោមនោះ មានធនាគារពាណិជ្ជចំនួន ១០ (CANADIA BANK, ACLEDA BANK, VATTANAC BANK, FTB BANK, J TRUST ROYAL BANK, ABA BANK, WING BANK, SATHAPANA BANK, CAMBODIA POST BANK, និង CHIP MONG BANK) បាននិងកំពុងដាក់ឱ្យអនុវត្តមុខងារ e-Payment ជាមួយប្រព័ន្ធស្វ័យប្រវត្តិកម្មគយ (ASYCUDA និង e-Customs)។ រីឯធនាគារពាណិជ្ជចំនួន ៣ទៀត កំពុងរៀបចំនីតិវិធី និងត្រៀមដាក់ឱ្យអនុវត្តមុខងារ e-Payment នាពេលឆាប់ៗនេះ។
គួរបញ្ជាក់ផងដែរថា មកដល់ត្រីមាសទី១ ឆ្នាំ២០២៦ ការបង់ចំណូលគយតាមមុខងារ e-Payment បានកើនដល់ ៩២% ធៀបនឹងចំណូលសរុប។ នេះជាលទ្ធផលដ៏ល្អប្រសើរ ដែលកើតចេញពីការគាំទ្ររបស់ថ្នាក់ដឹកនាំ និងការចូលរួមយ៉ាងសកម្មពីវិស័យឯកជន និងធនាគារពាណិជ្ជដៃគូទាំងអស់ ដែលតែងតែផ្តល់ទំនុកចិត្ត និងកិច្ចសហការយ៉ាងជិតស្និទ្ធជាមួយ អគរ ក្នុងការអនុវត្តកិច្ចការងារនេះប្រកបដោយផ្លែផ្កា។
ជាចុងក្រោយ លោកអគ្គនាយករងបានអំពាវនាវដល់ឯកឧត្តម លោកជំទាវ អ្នកឧកញ៉ា ឧកញ៉ា លោក លោកស្រី ជាថ្នាក់ដឹកនាំ និងជាតំណាង សមាគម ក្រុមហ៊ុន ធុរជន នីតិបុគ្គលជើងសាគយ តំណាងធនាគារពាណិជ្ជដៃគូ និងមន្រ្តីគយនិងរដ្ឋាករ បន្តជំរុញការប្រើប្រាស់មុខងារ e-Payment ក្នុងការបង់ពន្ធគយឱ្យអស់លទ្ធភាព ជាពិសេសបណ្តាក្រុមហ៊ុនដែលពុំទាន់បានចូលរួមអនុវត្តមុខងារ e-Payment ឬអនុវត្តពុំទាន់ពេញលេញ សូមមេត្តាចូលរួមអនុវត្តឱ្យបានពេញលេញទាំងអស់គ្នាចាប់ពីពេលនេះតទៅ។
វេទិកាផ្សព្វផ្សាយនាថ្ងៃនេះ មានការធ្វើបទបង្ហាញពីក្រុមការងារ អគរ, បទបង្ហាញរបស់ធនាគារពាណិជ្ជដៃគូអំពីសេវាកម្មនិងមុខងារ e-Payment និងមានការចូលរួមចែករំលែកបទពិសោធន៍របស់វិស័យឯកជនអំពីអត្ថប្រយោជន៍នៃការប្រើប្រាស់មុខងារ e-Payment សម្រាប់ទូទាត់ប្រាក់ពន្ធអាករ និងកម្រៃផ្សេងៗ និងបន្តដោយកម្មវិធីសំណួរ-ចម្លើយ បានបង្កើតជាវេទិកាដ៏មានសារៈសំខាន់ គួរឱ្យចាប់អារម្មណ៍ និងមានអត្ថប្រយោជន៍។ វេទិកាបានបិទបញ្ចប់ប្រកបដោយបរិយាកាសរីករាយ ស្និទ្ធស្នាល ព្រមទាំងទទួលបានផ្លែផ្កាគួរឱ្យកត់សម្គាល់។

អបអរសាទរខួបលើកទី១១៥ ទិវាអន្តរជាតិនារី ៨ មីនា ក្រោមប្រធានបទ “សន្តិភាព និងសន្តិសុខសម្រាប់ស្ត្រី និងគ្រួសារ”

ចាប់ពីថ្ងៃទី២ ដល់ថ្ងៃទី៥ ខែធ្នូ ឆ្នាំ២០២៥ នៅសាលាជាតិគយបានរៀបចំសិក្ខាសាលាស្តីពីការបណ្តុះ- បណ្តាលគ្រូបង្គោល Training of Trainers ជូនមន្ត្រីគយនិងរដ្ឋាករដែលជាគ្រូបន្តវេន ក្រោមកិច្ចសហការរវាងអគ្គនាយកដ្ឋានគយនិងរដ្ឋាករកម្ពុជា(អគរ), ទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) និង រដ្ឋបាលគយជប៉ុន។ សិក្ខាសាលានេះត្រូវបានរៀបចំឡើងដើម្បីលើកកម្ពស់សមត្ថភាពចំណេះដឹង ផ្នែកបច្ចេកទេស និងវិធីសាស្រ្តបង្រៀន ចិត្តសាស្រ្ត និងគរុកោសល្យក្នុងការអប់រំជូនដល់ មន្ត្រីគយនិងរដ្ឋាករកម្ពុជាដែលជាគ្រូបង្គោល និងគ្រូជំនួយប្រចាំនៅ អគរ ចំនួន៦០រូប។
ក្នុងនាមឯកឧត្តមបណ្ឌិត គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយកនៃអគ្គនាយដ្ឋានគយនិងរដ្ឋាករកម្ពុជា លោក ផា អេងវ៉េង អគ្គនាយករង នៃ អគរ បានគូសបញ្ជាក់អំពីសារៈសំខាន់នៃការរៀបចំសិក្ខាសាលាបណ្តុះបណ្តាលគ្រូបន្តវេនលើកនេះដែលមានគោលដៅចម្បងគឺការជួយបណ្តុះបណ្តាល នូវប្រភពធនធានមនុស្សជំនាន់ក្រោយដែលពោរពេញដោយចំណេះដឹង សមត្ថភាពជំនាញ និងវិជ្ជាជីវៈច្បាស់លាស់ដើម្បីបន្តអនុវត្តនូវបេសកកម្មចម្បងរបស់ អគរ ឱ្យកាន់តែមានប្រសិទ្ធភាព និងទាន់សម័យ ឆ្ពោះទៅសម្រេចបាននូវចក្ខុវិស័យរបស់ខ្លួន។ លោកអគ្គនាយករងបានលើកទឹកចិត្តដល់មន្រ្តីគយដែលជាសិក្ខាកាមទាំងអស់ឱ្យយកចិត្តទុកដាក់ឱ្យបានម៉ត់ចត់ក្នុងការក្រេបយកចំណេះដឹង បទពិសោធន៍បន្ថែមទៀត ពីគ្រូឧទ្ទេសជាតិ និងអន្តរជាតិដែលសុទ្ធតែរៀមច្បងមានបទពិសោធន៍ជ្រៅជ្រះ ព្រមទាំងចូលរួមយ៉ាងសកម្មក្នុងកិច្ចពិភាក្សាជាក្រុម ហើយបន្តចែករំលែកចំណេះដឹងដែលទទួលបានក្នុងអំឡុងពេលសិក្សាទៅចែករំលែកដល់សហការី និងអង្គភាព ដើម្បីយកទៅអនុវត្តក្នុងការងារប្រចាំថ្ងៃរបស់ខ្លួនឆ្ពោះទៅរកការកែលម្អប្រតិបត្តិការ និងសម្រេចបានគោលដៅអភិវឌ្ឍន៍ធនធានមនុស្សរបស់ អគរ។
សិក្ខាសាលារយៈពេល ៤ ថ្ងៃនេះ បានបង្ហាញពីមាតិកាវិជ្ជាជីវៈសំខាន់ៗ ដែលពាក់ព័ន្ធនឹងការអភិវឌ្ឍគ្រូឧទ្ទេសផ្ទៃក្នុងរបស់ អគរ ដូចជា វិធីសាស្រ្តបង្រៀនសម័យថ្មី ការវិភាគអំពីតម្រូវការបណ្តុះបណ្តាល ការរៀបចំកម្មវិធីបណ្តុះបណ្តាល ការគ្រប់គ្រងថ្នាក់រៀន ការសិក្សាអំពីបច្ចេកទេសនៃការធ្វើបទបង្ហាញ វិធីសាស្រ្តសិក្សានិងការបង្រៀនសម្រាប់មនុស្សពេញវ័យ, ការសិក្សាអំពីចិត្តវិជ្ជានិងចិត្តសាស្រ្តគរុកោសល្យក្នុងការអប់រំ របស់គ្រូគរុកោសល្យថ្នាក់ជាតិ និងគ្រូឧទ្ទេសអន្តរជាតិមកពី វិទ្យាស្ថានជាតិអប់រំ វិទ្យាស្ថានភាសាបរទេស នៃសាកលវិទ្យាល័យ ភូមិន្ទភ្នំពេញ និងជំនាញការគយជប៉ុន។
ក្នុងនាមរដ្ឋបាលគយកម្ពុជា លោកអគ្គនាយករង អគរ បានវាយតម្លៃខ្ពស់ចំពោះការគាំទ្រ និងការចូលរួម យ៉ាងសកម្មពីរដ្ឋបាលគយជប៉ុន និង JICA ក្នុងការរៀបចំសិក្ខាសាលា Training of Trainers (TOT) ដ៏មានសារៈសំខាន់នេះ។ ការចែករំលែកបទពិសោធន៍ និងជំនាញវិជ្ជាជីវៈពីគ្រូគរុកោសល្យថ្នាក់ជាតិ និងពីជំនាញការ គយជប៉ុន បានផ្ដល់អត្ថប្រយោជន៍យ៉ាងច្រើនដល់មន្ត្រីគយចូលរួមក្នុងការកែលម្អជំនាញបង្រៀន និងបង្កើនសមត្ថភាពបណ្តុះបណ្តាលផ្ទៃក្នុងរបស់ អគរ។ ទន្ទឹមនេះ ចំណេះដឹង និងបទពិសោធដែលទទួលបានពីសិក្ខាសាលា នេះ នឹងមានតម្លៃយ៉ាងខ្លាំងក្នុងការរៀបចំប្រព័ន្ធបណ្តុះបណ្តាលរបស់ អគរ ប្រចាំឆ្នាំឱ្យកាន់តែមានប្រសិទ្ធភាព ដើម្បីជួយគាំទ្រដល់ការអភិវឌ្ឍធនធានមនុស្សឱ្យកាន់តែរឹងមាំថែមទៀត។

អគ្គនាយកដ្ឋាន​គយ​និង​រដ្ឋាករ​កម្ពុជា​ សូម​ផ្សព្វផ្សាយ​លទ្ធផល​នៃ​ការ​ប្រឡង​បញ្ចប់​វគ្គ​បណ្តុះបណ្តាលវិជ្ជាជីវៈជេីងសាគយ​ ជំនាន់ទី១២​ សម័យប្រឡង​ ថ្ងៃទី២៩​ ខែ​វិច្ឆិកា​ ឆ្នាំ២០២៥​ នៅសាលាជាតិគយ។

នាព្រឹក ថ្ងៃអង្គារ ៥កើត ខែមិគសិរ ឆ្នាំម្សាញ់ សប្តស័ក ព.ស. ២៥៦៩ ត្រូវនឹងថ្ងៃទី២៥ ខែវិច្ឆិកា ឆ្នាំ២០២៥ នៅសាលាជាតិគយ អគ្គនាយកដ្ឋានគយនិងរដ្ឋាករកម្ពុជា (អគរ) បានរៀបចំសិក្ខាសាលាផ្សព្វផ្សាយពី “មុខងារប្រព័ន្ធស្នើសុំវិធានបញ្ជាក់ជាមុន ជូនដល់វិស័យឯកជន” ក្រោមអធិបតីភាព លោក សុខ សុវិទ្យា អគ្គនាយករងនៃអគ្គនាយកដ្ឋានគយនិងរដ្ឋាករកម្ពុជា តំណាងដ៏ខ្ពង់ខ្ពស់ ឯកឧត្តមបណ្ឌិត គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយក នៃអគ្គនាយកដ្ឋានគយនិងរដ្ឋាករកម្ពុជា ដោយមានការចូលរួមដោយផ្ទាល់ពីលោកប្រធានសមាគមភស្តុភារកម្មកម្ពុជា (CLA), តំណាងសភាពាណិជ្ជកម្មកម្ពុជា, និងលោក លោកស្រី ជាតំណាងសមាគម ពាណិជ្ជកម្មអឺរ៉ុប (EUROCHAM), តំណាងសភាពាណិជ្ជកម្មចិនប្រចាំនៅកម្ពុជា (CCCC), តំណាងសមាគមន៍ ធុរកិច្ចជប៉ុននៅកម្ពុជា (JBAC), តំណាងសមាគមន៍អេឡិចត្រូនិចនិងបច្ចេកវិទ្យាកម្ពុជា (CETA) ព្រមទាំងលោក លោកស្រី ជាប្រធានក្រុមហ៊ុននាំចេញ នាំចូល ឬតំណាង ធុរជន និងជើងសាគយ សរុបប្រមាណ១០០ រូប។
ថ្លែងក្នុងពិធីបើក លោកអគ្គនាយករង សុខ សុវិទ្យា បានជម្រាបជូនអង្គសិក្ខាសាលាអំពីសមិទ្ធផលសំខាន់ៗ របស់ អគរ នាពេលកន្លងមកថ្មីៗនេះ លើការធ្វើទំនើបកម្មស្ថាប័ន និងកិច្ចសម្រួលពាណិជ្ជកម្ម តាមរយៈការធ្វើស្វ័យប្រវត្តិកម្មពេញលេញនូវនីតិវិធីផ្ទៀងផ្ទាត់តម្លៃគិតពន្ធគយ និងដើមកំណើតទំនិញ ព្រមទាំងនីតិវិធីបំពេញបែបបទ បញ្ចេញទំនិញពីគយ, ការដាក់ឱ្យអនុវត្តការប្រកាសគយដោយអ្នកដំណើរឆ្លងកាត់ព្រំដែនតាមប្រព័ន្ធអេឡិចត្រូនិច (e-Arrival Card), ការដាក់ឱ្យអនុវត្តនីតិវិធីបំពេញបែបបទគយមុនពេលទំនិញមកដល់ (Pre-arrival Processing), ការធ្វើស្វ័យប្រវត្តិកម្មប្រព័ន្ធបញ្ជរតែមួយជាតិ(NSW) សម្រាប់ការស្នើសុំលិខិតអនុញ្ញាតនាំចេញ-នាំចូល និងការពង្រីកវិសាលភាពការប្រើប្រាស់ e-Payment ជាដើម។ លោកអគ្គនាយករងបានបញ្ជាក់បន្ថែមថា វិធានបញ្ជាក់ជាមុន គឺផ្នែកមួយនៃនីតិវិធីមុនពេលបំពេញបែបបទគយ ដែលផ្តល់អត្ថប្រយោជន៍ជាច្រើនដល់ធុរជន ដូចជា ការបំពេញកាតព្វកិច្ចពន្ធអាករបានត្រឹមត្រូវ, ពន្លឿនរយៈពេលនៃការបំពេញបែបបទបញ្ចេញទំនិញពីគយ និងបញ្ចៀស បាននូវកំហុសនានា ព្រោះវាជាសេចក្តីសម្រេចដែលមានតម្លៃជាគតិយុត្ត។ សិក្ខាសាលានាថ្ងៃនេះ ជាតឹកតាងនៃវឌ្ឍនភាពថ្មីបន្ថែមទៀតរបស់ អគរ សម្រាប់ការលើកកម្ពស់កិច្ចសម្រួលពាណិជ្ជកម្មមួយកម្រិតទៀត គឺការអភិវឌ្ឍ និងដាក់ឱ្យអនុវត្តមុខងារប្រព័ន្ធស្នើសុំវិធានបញ្ជាក់ជាមុនផ្នែកចំណាត់ថ្នាក់ទំនិញ តម្លៃគិតពន្ធគយ និងវិធានដើមកំណើតទំនិញ ដែលអនុញ្ញាតឱ្យធុរជន ឬតំណាង ទោះនៅទីណាក៏អាចដាក់ពាក្យស្នើសុំ និងតាមដានដំណើរការពិនិត្យ រហូតដល់ទទួលបានសេចក្តីសម្រេចវិធានបញ្ជាក់ជាមុន។ ដូច្នេះ អគរ លើកទឹកចិត្តដល់គ្រប់ភាគីពាក់ព័ន្ធខិតខំស្វែងយល់ពីវិធានបញ្ជាក់ជាមុន ដើម្បីទាញយកផលប្រយោជន៍ឱ្យបានជាអតិបរមា និងចូលរួមអនុវត្តឱ្យមានប្រសិទ្ធភាពខ្ពស់ចាប់ពីថ្ងៃដាក់ឱ្យដំណើរការនូវមុខងារនេះជាផ្លូវការនាថ្ងៃទី០១ ខែធ្នូ ឆ្នាំ២០២៥ តទៅ។
សិក្ខាសាលាត្រូវបានប្រព្រឹត្តទៅប្រកបដោយលទ្ធផលផ្លែផ្កា ដោយមានការចូលរួមចែករំលែកបទពិសោធន៍ ល្អៗពីសិក្ខាកាមសម្រាប់ជាធាតុចូលបន្ថែមក្នុងការអនុវត្ត និងកែលម្អបន្ថែម ជាពិសេសបានលើកជាសំណួរ-ចម្លើយ យ៉ាងផុលផុស ដើម្បីត្រៀមអនុវត្តប្រព័ន្ធមុខងារស្នើសុំវិធានបញ្ជាក់ជាមុន នាពេលឆាប់ៗខាងមុខនេះ៕

នាថ្ងៃអង្គារ ៥កើត ខែមិគសិរ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី២៥ ខែវិច្ឆិកា ឆ្នាំ២០២៥ នៅសាលាជាតិគយ នៃអគ្គនាយកដ្ឋានគយនិងរដ្ឋាករកម្ពុជា មានរៀបចំសិក្ខាសាលាផ្សព្វផ្សាយស្ដីពី “ការគ្រប់គ្រងការលើកទឹកចិត្តពន្ធនិងអាករ” ក្រោមអធិបតីភាពលោកអគ្គនាយករង ផា អេងវ៉េង តំណាងដ៏ខ្ពង់ខ្ពស់របស់ ឯកឧត្តមបណ្ឌិត គុណ ញឹម រដ្ឋមន្រ្តីប្រតិភូអមនាយករដ្ឋមន្រ្តី អគ្គនាយកនៃអគ្គនាយកដ្ឋានគយនិងរដ្ឋាករកម្ពុជា។ សិក្ខាសាលានេះ រៀបចំឡើងជាលើកទី២ ប្រចាំឆ្នាំ២០២៥ អនុលោមតាមផែនការសកម្មភាព ឆ្នាំ២០២៥ របស់អគ្គនាយកដ្ឋានគយនិងរដ្ឋាករកម្ពុជា ក្រោមកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ (PFM) ដំណាក់កាលទី៤ សម្រាប់មន្រ្តីគយនិងរដ្ឋាករដែលកំពុងបម្រើការងារនៅទីចាត់ការកណ្តាល និងអង្គភាពគយនិងរដ្ឋាករមូលដ្ឋាននៃអគ្គនាយកដ្ឋានគយនិងរដ្ឋាករកម្ពុជា សរុបប្រមាណជាង ១០០ រូប ដើម្បីផ្សព្វផ្សាយនូវបទប្បញ្ញត្តិថ្មីៗពាក់ព័ន្ធនឹងការលើកទឹកចិត្តផ្នែកគយសម្រាប់គម្រោងវិនិយោគមានលក្ខណៈសម្បត្តិគ្រប់គ្រាន់ និងសហគ្រាសធុនតូចនិងមធ្យម ស្របតាមច្បាប់និងបទប្បញ្ញត្តិជាធរមាន។
ថ្លែងក្នុងពិធីបើកសិក្ខាសាលា លោកអគ្គនាយករង ផា អេងវ៉េង បានជម្រាបជូនអង្គសិក្ខាសាលាទំាងមូលអំពីវឌ្ឍនភាពថ្មីៗ ពាក់ព័ន្ធនឹងការផ្តល់ការលើកទឹកចិត្តសម្រាប់គម្រោងវិនិយោគ ស្របតាមច្បាប់និងបទប្បញ្ញត្តិពាក់ព័ន្ធនឹងការវិនិយោគ ដែលបានជំរុញកំណើនសេដ្ឋកិច្ចជាតិ និងបង្កើននូវចំណូលសម្រាប់ប្រជាពលរដ្ឋជាពលករ និងកម្មករក្នុងវិស័យទាំងនេះ។ អគ្គនាយកដ្ឋានគយនិងរដ្ឋាករកម្ពុជា បានចូលរួមយ៉ាងសកម្មក្នុងការពិនិត្យនិងផ្តល់យោបល់លើការស្នើសុំការលើកទឹកចិត្តពន្ធនិងអាករនេះ នៅគ្រប់ដំណាក់កាល សម្រាប់គម្រោងវិនិយោគ និងសហគ្រាសធុនតូចនិងមធ្យម។ ទន្ទឹមនឹងការវិវត្តយ៉ាងលឿននៃបច្ចេកវិទ្យាព័ត៌មាន អគ្គនាយកដ្ឋានគយនិងរដ្ឋាករកម្ពុជា បានបន្តអភិវឌ្ឍនិងដាក់ឱ្យអនុវត្តនូវប្រព័ន្ធបច្ចេកវិទ្យាព័ត៌មាន និងបទប្បញ្ញត្តិពាក់ព័ន្ធ សម្រាប់គាំទ្រកិច្ចដំណើរការបំពេញបែបបទបញ្ចេញទំនិញពីគយ ឱ្យកាន់តែមានភាពទុកចិត្តបាន រហ័ស សុវត្ថិភាព និងមិនមានបន្ទុកដល់វិស័យឯកជន ក្នុងគោលដៅពង្រឹងប្រសិទ្ធភាពការងារ និងកិច្ចសហប្រតិបត្តិការ ដើម្បីលើកកម្ពស់កិច្ចសម្រួលពាណិជ្ជកម្ម, កាត់បន្ថយចំណាយឡូជីស្ទីក, កែលម្អបរិយាកាសធុរកិច្ច និងវិនិយោគនៅកម្ពុជា ក្រោមការដឹកនាំប្រកបដោយថាមពល របស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្នុងការអភិវឌ្ឍសេដ្ឋកិច្ចនិងសង្គមជាតិ។
សិក្ខាកាមនៃអង្គសិក្ខាសាលា នឹងបានទទួលនូវចំណេះបន្ថែមលើប្រធានបទសំខាន់ៗដូចជា៖ ការលើកទឹកចិត្តផ្នែកគយសម្រាប់គម្រោងវិនិយោគក្រោមក្របខ័ណ្ឌច្បាប់វិនិយោគ និងអនុក្រឹត្យពាក់ព័ន្ធនឹងការអនុវត្តច្បាប់វិនិយោគ, ការត្រួតពិនិត្យបញ្ជីមេមុខទំនិញស្នើសុំរបស់គម្រោងវិនិយោគ, កិច្ចដំណើរការស្នើសុំលិខិតអនុញ្ញាតតាមប្រព័ន្ធបញ្ជរតែមួយជាតិ, យន្តការគ្រប់គ្រងការលើកទឹកចិត្តពន្ធគយ នៅក្របខ័ណ្ឌអនុគណៈកម្មាធិការវិនិយោគរាជធានី-ខេត្ត, ការលើកទឹកចិត្តសម្រាប់ការវិនិយោគនៅខេត្តព្រះសីហនុ និងការវិនិយោគកនៅភូមិភាគឦសាន, និងការលើកទឹកចិត្តផ្នែកគយសម្រាប់សហគ្រាសធុនតូចនិងមធ្យមជាដើម។ ចំណេះដឹងនាពេលនេះ នឹងក្លាយជាមូលដ្ឋានគ្រឹះដ៏សំខាន់បន្ថែមទៀតសម្រាប់មន្រ្តីគយនិងរដ្ឋាករមានសមត្ថកិច្ច ប្រើប្រាស់និងអនុវត្តក្នុងការពង្រឹងប្រសិទ្ធភាពនៃការគ្រប់គ្រងការលើកទឹកចិត្តពន្ធនិងអាករ, ការកៀរគរចំណូលជូនរដ្ឋ និងបង្កើនកិច្ចសម្រួលពាណិជ្ជកម្ម ដោយធានាបាននូវតុល្យភាព និងភាពស្មើគ្នាក្នុងការធ្វើធុរកិច្ច វិនិយោគនៅកម្ពុជា។
ជាចុងបញ្ចប់ លោកអគ្គនាយករង បានផ្តាំផ្ញើ និងលើកទឹកចិត្តឱ្យសិក្ខាកាមទាំងអស់ ខិតខំត្រងត្រាប់ស្តាប់ សាកសួរដោយផុលផុស និងចែករំលែកបទពិសោធន៍ការងារថ្មីៗជាក់ស្តែង ពាក់ព័ន្ធនឹងការពង្រឹងការគ្រប់គ្រងការលើកទឹកចិត្តពន្ធនិងអាករ នៅគ្រប់ដំណាក់កាល រួមទាំងការអនុវត្តកិច្ចដំណើរការស្នើសុំនៅកម្រិតអនុគណៈកម្មាធិការវិនិយោគរាជធានី-ខេត្តផងដែរ។

សារលិខិតគោរពជូនពរ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្នុងឱកាសដ៏មហានក្ខត្តឫក្សនៃខួបកំណើតគម្រប់ ៤៨ឆ្នាំ ឈានចូល ៤៩ឆ្នាំ ដែលនឹងចូលមកដល់ នៅថ្ងៃទី២០ ខែតុលា ឆ្នាំ២០២៥ ខាងមុខនេះ ពីអគ្គនាយកដ្ឋានគយ​និង​រដ្ឋារករកម្ពុជា។

សារលិខិតគោរពជូនពរ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្នុងឱកាសដ៏មហានក្ខត្តឫក្សនៃខួបកំណើតគម្រប់ ៤៨ឆ្នាំ ឈានចូល ៤៩ឆ្នាំ ដែលនឹងចូលមកដល់ នៅថ្ងៃទី២០ ខែតុលា ឆ្នាំ២០២៥ ខាងមុខនេះ ពីអគ្គនាយកដ្ឋានគយ​និង​រដ្ឋាករកម្ពុជា។