ក្រសួងសង្គមកិច្ច អតីតយុទ្ធជន និងយុវនីតិសម្បទា

សារលិខិត សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងជាប្រធានកិត្តិយសក្រុមប្រឹក្សាជាតិកម្ពុជាដើម្បីកុមារ ក្នុងឱកាសខួបលើកទី៧៧ ទិវាកុមារអន្តរជាតិ ១មិថុនា ខួបលើកទី២៥ ទិវាពិភលោក ប្រឆាំងពលកម្មកុមារ ១២មិថុនា និងទិវាកុមារកម្ពុជាឆ្នាំ២០២៦

សារាចរ ស្តីពី ការរៀបចំខួបលើកទី៧៧ ទិវាកុមារអន្តរជាតិ ១មិថុនា ខួបលើកទី២៥ ទិវាពិភពលោកប្រឆាំងពលកម្មកុមារ ១២មិថុនា និងទិវាកុមារកម្ពុជាឆ្នាំ២០២៦

នាព្រឹក ថ្ងៃទី២៩ ខែឧសភា ឆ្នាំ២០២៦ ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា លោកជំទាវ ប្រុក ម៉ៃកន្និដ្ឋា បានចូលរួមកិច្ចប្រជុំផ្ទៃក្នុងរបស់គណៈកម្មាធិការជាតិលើកកម្ពស់សីលធម៌សង្គម តម្លៃស្ត្រី និងគ្រួសារខ្មែរ ហៅកាត់ថា (គ.ជ.ស.ស.ខ.) នៅទីស្ដីការក្រសួងកិច្ចការនារីចាស់ ក្រោមអធិបតីភាព លោកជំទាវ ហ៊ូ និរមិត្តា អនុប្រធានអចិន្ត្រៃយ៍ គ.ជ.ស.ស.ខ. និងជាតំណាងដ៏ខ្ពង់ខ្ពស់ លោកជំទាវកិត្តិបណ្ឌិត អុឹង កន្ថាផាវី រដ្ឋមន្ត្រីក្រសួងកិច្ចការនារី និងជាប្រធានគណៈកម្មាធិការជាតិលើកកម្ពស់សីលធម៌សង្គម តម្លៃស្ត្រី និងគ្រួសារខ្មែរ។
ក្នុងគោលបំណង៖
១. ពិនិត្យសម្រេចចុងក្រោយ ដើម្បីបោះពុម្ពរបាយការណ៍សកម្មភាពការងារឆ្នាំ២០២៤-២០២៥ និងលើកទិសដៅការងារបន្តសម្រាប់ឆ្នាំ២០២៦-២០២៧
២. ពិនិត្យផែនការយុទ្ធសាស្ត្រ និងអនុសាសន៍ទាំង ៨ចំណុច របស់លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត
៣. ពិភាក្សាជ្រើសរើសចំណងជើងឈ្មោះគណៈកម្មាធិការជាតិលើកកម្ពស់សីលធម៌សង្គម តម្លៃស្ត្រី និងគ្រួសារខ្មែរ ជាភាសាអង់គ្លេស ដើម្បីប្រើប្រាស់ជាផ្លូវការ។
កិច្ចប្រជុំនេះ មានការអញ្ជើញចូលរួមពី លោកជំទាវ សមាជិក សមាជិកា នៃគណៈកម្មាធិការទាំងថ្នាក់ជាតិ និងក្រោមជាតិ និងក្រុមការងារបច្ចេកទេស នៃលេខាធិការដ្ឋានគណៈកម្មាធិការជាតិ និងមន្ត្រីជំនាញពាក់ពន្ធ័ផងដែរ។

ពិធីផ្សព្វផ្សាយ និងប្រកាសដាក់ឱ្យប្រើប្រាស់ជាផ្លូវការនូវគោលការណ៍ណែនាំស្តីពី«ការកំណត់អត្តសញ្ញាណកម្មពិការភាព តាមគំរូសង្គម និងសិទ្ធិជាមូលដ្ឋាន»

ទីស្តីការក្រសួង៖ ថ្ងៃសុក្រ ១៣កើត ខែជេស្ឋ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី២៩ ខែឧសភា ឆ្នាំ២០២៦ ដោយទទួលបានការអនុញ្ញាតដ៏ខ្ពងខ្ពស់ពី ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា ឯកឧត្តម សែម សុខា រដ្ឋលេខាធិការ អញ្ជើញជាអធិបតី ក្នុងពិធីផ្សព្វផ្សាយ និងប្រកាសដាក់ឱ្យប្រើប្រាស់ជាផ្លូវការនូវគោលការណ៍ណែនាំស្តីពី« ការកំណត់អត្តសញ្ញាណកម្ម ពិការភាព តាមគំរូសង្គម និងសិទ្ធិជាមូលដ្ឋាន» ដែលមានការអញ្ជើញចូលរួមពី ឯកឧត្តម លោកជំទាវ ថា្នក់ដឹកនាំក្រសួងសង្គមកិច្ច តំណាងក្រសួង ស្ថាប័ន ពាក់ព័ន្ធ ឯកឧត្តម លោកជំទាវ អភិបាលរង នៃគណៈអភិបាល រាជធានី ខេត្ត មន្ទីរស.អ.យ. រាជធានី ខេត្ត អង្គការដៃគូ ពាក់ព័ន្ធសរុបប្រមាណចំនួន ១៤០នាក់។

គោលបំណងនៃកម្មវិធីនេះ គឺដើម្បីផ្សព្វផ្សាយ និងប្រកាសដាក់ឱ្យប្រើប្រាស់ជាផ្លូវការនូវគោលការណ៍ណែនាំស្តីពីការកំណត់អត្តសញ្ញាណកម្មពិការភាពតាមគំរូសង្គម និងសិទ្ធិជាមូលដ្ឋានថ្មីដែលបានធ្វើបច្ចុប្បន្នភាព ក្នុងការធានាថាការរៀបចំ និងគ្រប់គ្រងប្រព័ន្ធទិន្នន័យអត្តសញ្ញាណពិការភាព មានបទដ្ឋានរួមមួយ ប្រកបដោយសង្គតិភាព និងប្រសិទ្ធភាព ក្នុងដំណើរការគ្រប់គ្រងប្រព័ន្ធបច្ចេកវិទ្យាគ្រប់គ្រងព័ត៌មានសម្រាប់គ្រប់គ្រងពិការភាព ការកំណត់អត្តសញ្ញាណកម្មពិការភាព និងការផ្តល់បណ្ណសំគាល់ជនពិការភាព ក្នុងការបង្កលក្ខណៈងាយស្រួលដល់ជនមានពិការភាពក្នុងការទទួលបានអត្ថប្រយោជន៍ពីប្រព័ន្ធគាំពារសង្គម និងសេវាសង្គមផ្សេងៗ ប្រកបដោយសមធម៌ និងបរិយាបន្ន ស្របតាមគោលនយោបាយរបស់រាជរដ្ឋាភិបាល។

កិច្ចប្រជុំត្រួតពិនិត្យវឌ្ឍនភាពការងារ បញ្ហាប្រឈម និងលើកទិសដៅបន្ដ ប្រចាំត្រីមាសទី១ របស់នាយកដ្ឋានហិរញ្ញវត្ថុ និងផ្គត់ផ្គង់ នៃអគ្គនាយកដ្ឋានរដ្ឋបាល និងហិរញ្ញវត្ថុ

នៅទីស្ដីការក្រសួង ស.អ.យ រសៀល ថ្ងៃទី២៨ ខែឧសភា ឆ្នាំ២០២៦ ឯកឧត្តម ប្រាក់ សុខយូរ រដ្ឋលេខាធិការប្រចាំការ បានអញ្ជើញជាអធិបតីដឹកនាំកិច្ចប្រជុំត្រួតពិនិត្យវឌ្ឍនភាពការងារ បញ្ហាប្រឈម និងលើកទិសដៅបន្ដ ប្រចាំត្រីមាសទី១ របស់នាយកដ្ឋានហិរញ្ញវត្ថុ និងផ្គត់ផ្គង់ នៃអគ្គនាយកដ្ឋានរដ្ឋបាល និងហិរញ្ញវត្ថុ ដែលមានរបៀបវារៈដូចខាងក្រោម :

១-ត្រួតពិនិត្យវឌ្ឍនភាពការងារ បញ្ហាប្រឈម និងលើកទិសដៅបន្ដ ប្រចាំត្រីមាសទី១ របស់នាយកដ្ឋានហិរញ្ញវត្ថុ និងផ្គត់ផ្គង់
២-កិច្ចពិភាក្សា និងមតិចូលរួម

ខេត្តព្រះសីហនុ៖ នាព្រឹកថ្ងៃទី២៨ ខែឧសភា ឆ្នាំ២០២៦ បន្ទាប់ពីទទួលបានការអនុញ្ញាតដ៏ខ្ពង់ខ្ពស់ពី ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា ឯកឧត្តម ជា ហុងណា អនុរដ្ឋលេខាធិការ បានដឹកនាំក្រុមការងារក្រសួង ទទួលជួបសម្ដែងការគួរសម និងពិភាក្សាការងារជាមួយគណៈប្រតិភូក្រសួងនគរបាល នៃសាធារណរដ្ឋសង្គមនិយមវៀតណាម ដែលអញ្ជើញមកទស្សនកិច្ចនៅមជ្ឈមណ្ឌលជាតិព្យាបាល និងស្តារនីតិសម្បទាអ្នកញៀនគ្រឿងញៀនដោយស្ម័គ្រចិត្ត និងផ្អែកលើសហគមន៍(កែវផុស)។

ជំនួបនេះក៏មានការអញ្ជើញចូលរួមពីសំណាក់ ឯកឧត្តម លោកជំទាវ លោក លោកស្រី តំណាងអាជ្ញាធរជាតិប្រយុទ្ធប្រឆាំងគ្រឿងញៀន លោកអគ្គនាយករងស្តារសម្បទា លោកប្រធាននាយកដ្ឋានគាំពារអ្នកញៀនគ្រឿងញៀន និងក្រុមការងារមជ្ឈមណ្ឌលជាតិព្យាបាល និងស្តារនីតិសម្បទាអ្នកញៀនគ្រឿងញៀនដោយស្ម័គ្រចិត្ត និងផ្អែកលើសហគមន៍ផងដែរ។

វិទ្យាស្ថានជាតិសង្គមកិច្ច និងនាយកដ្ឋានសុខុមាលភាពជនពិការ ចូលរួមក្នុងគណៈប្រតិភូជាន់ខ្ពស់កម្ពុជា នៅសាធារណរដ្ឋកូរ៉េ ដើម្បីពង្រឹងកិច្ចសហប្រតិបត្តិការអភិវឌ្ឍវិស័យបណ្តុះបណ្តាលអ្នកថែទាំមនុស្សចាស់ និងជនមានពិការភាព

សាធារណរដ្ឋកូរ៉េ, ថ្ងៃទី១៨-២២ ខែឧសភា ឆ្នាំ២០២៦ – ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា, ឯកឧត្តម សរ បូរីរក្ស នាយកវិទ្យាស្ថានជាតិសង្គមកិច្ច អមដំណើរដោយលោក សាន់ រតនា ប្រធាននាយកដ្ឋានសុខុមាលភាពជនពិការ បានអញ្ជើញចូលរួមក្នុងគណៈប្រតិភូជាន់ខ្ពស់កម្ពុជា ដើម្បីចូលរួមក្នុងកម្មវិធីយុទ្ធសាស្ត្រ “Haewon Sangsaeng in Action 2026: Cambodia-Jungwon International Forum and Study Visit” ចាប់ពីថ្ងៃទី១៨ ដល់ថ្ងៃទី២២ ខែឧសភា ឆ្នាំ២០២៦ នៅខេត្តឈុងឆុងប៊ុកដូ សាធារណរដ្ឋកូរ៉េ។

គណៈប្រតិភូជាន់ខ្ពស់កម្ពុជាដែលមានសមាសភាពប្រមាណ ២០រូប ត្រូវបានដឹកនាំដោយ ឯកឧត្តម សុខ ពុទ្ធិវុធ រដ្ឋលេខាធិការក្រសួងប្រៃសណីយ៍និងទូរគមនាគមន៍ រួមជាមួយថ្នាក់ដឹកនាំជាន់ខ្ពស់មកពីក្រសួងកិច្ចការនារី, គណៈកម្មាធិការជាតិសម្រាប់ការសិក្សាពេញមួយជីវិត, សាកលវិទ្យាល័យភូមិន្ទភ្នំពេញ (RUPP), សាកលវិទ្យាល័យភូមិន្ទកសិកម្ម (RUA), សាកលវិទ្យាល័យពាណិជ្ជសាស្ត្រអេស៊ីលីដា និងខុទ្ទកាល័យនាយករដ្ឋមន្ត្រី។

កម្មវិធីនេះរៀបចំឡើងដោយសាកលវិទ្យាល័យជុងវ៉ុន (Jungwon University) ក្នុងគោលបំណងភ្ជាប់កិច្ចសហប្រតិបត្តិការរវាងស្ថាប័នរដ្ឋ និងសាកលវិទ្យាល័យនៃប្រទេសទាំងពីរ ទៅនឹងការអនុវត្តគម្រោងជាក់ស្តែង។ នៅក្នុងឱកាសនៃវេទិកាពិភាក្សានេះ ក្នុងនាមតំណាងក្រសួងសង្គមកិច្ចកម្ពុជា វិទ្យាស្ថានជាតិសង្គមកិច្ច បានលើកឡើងនូវសំណើកិច្ចសហប្រតិបត្តិការយ៉ាងជាក់លាក់ និងចំគោលដៅ លើការងារបណ្តុះបណ្តាលអ្នកថែទាំមនុស្សចាស់ អ្នកគាំទ្រជនមានពិការភាព និងការរួមគ្នាអភិវឌ្ឍ គំរូសេវាថែទាំក្នុងសហគមន៍ ដើម្បីឆ្លើយតបទៅនឹងការប្រែប្រួលរចនាសម្ព័ន្ធប្រជាសាស្ត្រ និងតម្រូវការជាក់ស្តែងក្នុងសង្គមកម្ពុជា ស្របពេលដែលសាកលវិទ្យាល័យដៃគូនានារបស់កម្ពុជាបានស្នើគម្រោងពាក់ព័ន្ធនឹងកសិកម្មឆ្លាតវៃ (Smart Farm), កម្មវិធីសញ្ញាបត្ររួម និងការបណ្តុះបណ្តាលបច្ចេកវិទ្យា AI ផងដែរ។

ជាលទ្ធផលផ្លូវការដ៏ត្រចះត្រចង់ ភាគីកម្ពុជា និងសាកលវិទ្យាល័យជុងវ៉ុន ក៏បានអញ្ជើញចុះហត្ថលេខាលើ អនុស្សរណៈនៃការយោគយល់ (MoU) ក្នុងគោលបំណងពង្រឹងកិច្ចសហប្រតិបត្តិការលើវិស័យអប់រំ ការផ្លាស់ប្តូរព័ត៌មាន និងការជំរុញទំនាក់ទំនងរវាងស្ថាប័ននៃភាគីទាំងពីរ ក្រោមអធិបតីភាពដ៏ខ្ពង់ខ្ពស់របស់ ឯកឧត្តម ឃួន ផុនរតនៈ ឯកអគ្គរាជទូតវិសាមញ្ញនិងពេញសមត្ថភាពនៃព្រះរាជាណាចក្រកម្ពុជា ប្រចាំសាធារណរដ្ឋកូរ៉េ។

ខេត្តបន្ទាយមានជ័យ៖​ នៅព្រឹកថ្ងៃទី២៨ ខែឧសភា ឆ្នាំ២០២៦ ដោយទទួលបានការអនុញ្ញាតដ៏ខ្ពង់ខ្ពស់ពីឯកឧត្តមរដ្ឋមន្ត្រី ឯកឧត្តម អ៊ុំ សុផាន់ណារ៉ា អគ្គនាយកសេវាសង្គមកិច្ច តំណាងឯកឧត្តម លុយ សុន រដ្ឋលេខាធិការ ក្រសួងសង្គមកិច្ច អតីតយុទ្ធជន និងយុវនីតិសម្បទា បានសហការ និងកៀគរជំនួយពីអង្គការដៃកម្ពុជា ARM ដោយមានការអញ្ជើញចូលរួមពី លោកអភិបាលស្រុកអូជ្រៅ តំណាង ឯកឧត្តម អ៊ុំ រាត្រី អភិបាលខេត្តបន្ទាយមានជ័យ ប្រធាននាយកដ្ឋានគាំពារជនរងគ្រោះ ប្រធានមន្ទីរ ស.អ.យ ខេត្តបន្ទាយមានជ័យ ប្រធានអង្គការដៃកម្ពុជា ARM និងសហការី ព្រមទាំង អាជ្ញាធរមូលដ្ឋាន បានចុះសួរសុខទុក្ខ និង ពិនិត្យស្ថានភាពជំរុំ និង ចែកអំណោយដល់ជនភៀសសឹក ដោយសង្គ្រាមតាមព្រំដែន កម្ពុជា -ថៃ នៅភូមិកំពុងស្វាយ ឃុំសឹង្ហ ស្រុកអូជ្រៅ ខេត្តបន្ទាយមានជ័យ មានចំនួន ៤០០គ្រួសារ ដែលក្នុងមួយគ្រួសារទទួលបានៈ ( អង្ករ មីជាតិ ទឹកត្រី ទឹកស៉ីវអ៉ីវ អំបិល និង ម្សៅទឹកដោះ ) ។
ឆ្លៀតឳកាសនេះ ឯកឧត្តមអគ្គនាយកសេវាសង្គមកិច្ច បានពាំនាំការផ្តាំផ្ញើសួរសុខទុក្ខពីសំណាក់ឯកឧត្តម ជា សុមេធី រដ្ឋមន្ត្រីក្រសួង ស.អ.យ និងលោកជំទាវ ជា ផល្គុន ព្រមទាំងថ្នាក់ដឹកនាំក្រសួង ជូនដល់បងប្អូនជនភៀសសឹកផងដែរ ។ទន្ទឹមនឹងកិច្ចការងារខាងលើនេះ ឯកឧត្តមអគ្គនាយក បានចុះពិនិត្យកន្លែងស្តង់សង្គមកិច្ច សម្រាប់ផ្តល់សេវាសង្គមកិច្ច ដែលស្ថិតនៅឃុំស្លរក្រាម ស្រុកស្វាយចេក ខេត្តបន្ទាយមានជ័យ ។

វគ្គបណ្តុះបណ្តាលស្តីពីបទដ្ឋានអង្គការសុវត្ថិភាពកុមារ

រាជធានីភ្នំពេញ៖ កាលពីថ្ងៃពុធ ១១កើត ខែជេស្ឋ ឆ្នាំមមី អដ្ឋស័ក ព.ស.២៥៧០ ត្រូវនិងថ្ងៃទី២៧ ខែឧសភា ឆ្នាំ២០២៦ ដោយទទួលបាន​ការ​អនុញ្ញាត​ដ៏ខ្ពង់ខ្ពស់ពីឯកឧត្តម ជា សុមេធី រដ្ឋមន្រ្តី ក្រសួងសង្គមកិច្ច អតីតយុទ្ធជន និងយុវនីតិសម្បទា ឯកឧត្តម អ៊ុំ សុផាន់ណារ៉ា អគ្គនាយកសេវាសង្គមកិច្ច បាន អញ្ជើញចូលរួមជាអធិបតីបើក ក្នុង​វគ្គបណ្តុះបណ្តាល​ស្តីពីប​ទ​ដ្ឋា​នអង្គការ​សុវត្ថិភាពកុមារ ជូនដល់បុគ្គលិកអង្គការកុមារកំព្រា​នៃសេចក្តី​សន្យា​ដំណឹ​ង​ល្អ​ទាំង​បួន ដែលមាន​សិក្ខាកាមចូលរួម ចំនួនសរុបប្រមាណ ៣៩នាក់ ស្រី ៨នាក់៕

វគ្គបណ្តុះបណ្តាលនេះ បានប្រព្រឹត្តទៅរយៈពេល៣ថ្ងៃពេញ ក្នុងគោលបំណងដើម្បីផ្តល់ចំណេះដឹងដល់បុគ្គលិកអង្គការដៃគូដែលផ្តល់សេវា និងធ្វើការដោយផ្ទាល់ និងដោយប្រយោលជាមួយកុមារ ដើម្បីធានាថាកុមាររួចផុត ពីការរំលោភបំពាននិងការកេងប្រវ័ញ្ចគ្រប់រូបភាព ពីគ្រប់ទីកន្លែង។

គណៈប្រតិភូក្រសួងសង្គមកិច្ច កម្ពុជា ចូលរួមចែករំលែកបទពិសោធន៍ និងស្វែងរកដំណោះស្រាយបច្ចេកវិទ្យា AI ក្នុងវិស័យសុខុមាលភាពសង្គម និងការកាត់បន្ថយហានិភ័យគ្រោះមហន្តរាយ នៅទីក្រុងតូក្យូ ប្រទេសជប៉ុន

ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តមរដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា, គណៈប្រតិភូកម្ពុជាដឹកនាំដោយឯកឧត្តម សរ បូរីរក្ស នាយកវិទ្យាស្ថានជាតិសង្គមកិច្ច រួមជាមួយលោក ភី ណូ ប្រធាននាយកដ្ឋានកិច្ចការពារកុមារនៃអគ្គនាយកដ្ឋានសេវាសង្គមកិច្ច បានអញ្ជើញចូលរួមក្នុង «វេទិកាពិភាក្សាអន្តរជាតិ ស្តីពីសុខុមាលភាពសង្គមឆ្នាំ២០២៦» ដែលបានប្រព្រឹត្តទៅចាប់ពីថ្ងៃទី១២ ដល់ថ្ងៃទី១៦ ខែឧសភា ឆ្នាំ២០២៦ នៅទីក្រុងតូក្យូ ប្រទេសជប៉ុន ក្រោមអធិបតីភាពរបស់ លោកបណ្ឌិត Masahiro FUJIWARA ប្រធានស្ថាប័ន FWEAP (Foundation for the Welfare and Education of the Asian People ) ដោយមានការចូលរួមពីតំណាងប្រទេសចំនួន៦ ក្នុងតំបន់រួមមាន៖ កម្ពុជា ឥណ្ឌូនេស៊ី ម៉ុងហ្គោលី ហ្វីលីពីន តៃវ៉ាន់ និងប្រទេសថៃ។

វេទិកានេះមានគោលបំណងផ្លាស់ប្តូរការអនុវត្តល្អៗ និងស្វែងរកដំណោះស្រាយប្រកបដោយនវានុវត្តន៍ ដើម្បីកាត់បន្ថយហានិភ័យពីគ្រោះមហន្តរាយធម្មជាតិ សម្រាប់ជនរងគ្រោះ និងក្រុមជនងាយរងគ្រោះ។

ជាលទ្ធផល គណៈប្រតិភូកម្ពុជាបានធ្វើបទបង្ហាញយ៉ាងលេចធ្លោអំពីរបាយការណ៍ប្រចាំប្រទេស ដោយបានចែករំលែកអំពីយុទ្ធសាស្ត្រ និងបទពិសោធន៍ជោគជ័យរបស់រាជរដ្ឋាភិបាលកម្ពុជា ក្នុងការប្រើប្រាស់ «ប្រព័ន្ធគាំពារសង្គម តាមរយៈកម្មវិធីជំនួយសង្គមសាច់ប្រាក់សង្គ្រោះបន្ទាន់» ដើម្បីជួយជ្រោមជ្រែងដល់ក្រុមគ្រួសាររងគ្រោះ និងងាយរងគ្រោះបំផុត ដូចជា កុមារ ជនចាស់ជរា និងជនមានពិការភាព ឱ្យមានភាពស៊ាំទៅនឹងវិបត្តិគ្រោះមហន្តរាយធម្មជាតិ។ ទន្ទឹមនឹងនេះ គណៈប្រតិភូក៏បានអញ្ជើញទៅទស្សនកិច្ចសិក្សាដោយផ្ទាល់នៅមជ្ឈមណ្ឌល/ទីកន្លែងបណ្តោះអាសន្នសម្រាប់ផ្តល់សេវាសង្គ្រោះដល់ពលរដ្ឋរងគ្រោះនៅប្រទេសជប៉ុនផងដែរ។ កិច្ចសហប្រតិបត្តិការនេះ បានបើកឱកាសក្នុងការបង្កើតបណ្តាញការងារជាមួយបណ្តាប្រទេសក្នុងតំបន់អាស៊ី ដើម្បីបន្តអភិវឌ្ឍប្រព័ន្ធសុខុមាលភាពសង្គមឱ្យកាន់តែរឹងមាំ និងមានបរិយាបន្នខ្ពស់នាពេលអនាគត។