25/02/2021
យោងតាមរបាយការណ៍របស់រដ្ឋាភិបាលបានបង្ហាញថា កម្ពុជាទទួលបានទុនវិនិយោគពីវិស័យសំណង់ទូទាំងប្រទេស ចំនួនប្រមាណ៦០,៨៧ពាន់លានដុល្លារអាមេរិក ចាប់តាំងពីឆ្នាំ២០០០ ដល់ដំណាច់ឆ្នាំ២០២០ ខណៈគម្រោងសាងសង់សរុបទូទាំងប្រទេសមានចំនួន៥៣ ២៨៧គម្រោង នៅលើផ្ទៃក្រឡាសរុបចំនួន១៥៣,៦២លានម៉ែត្រក្រឡា។
របាយការណ៍របស់ក្រសួងរៀបចំដែនដី នគរូបនីយកម្ម និងសំណង់បានឲ្យដឹងទៀតថា គម្រោងអគារខ្ពស់ៗចាប់ពី ៥ជាន់ឡើង នៅទូទាំងប្រទេសមានចំនួន២ ១៨០អគារ ក្នុងនោះខេត្តព្រះសីហនុ មាន៦១៥អគារ។
អគារខ្ពស់ៗចាប់ពី៥ជាន់ ដល់៩ជាន់ មានចំនួន១ ១៧៦អគារ ហើយអគារចាប់ពី១០ជាន់ ទៅ១៩ជាន់ មានចំនួន៦២៥អគារ អគារកំពស់ពី២០ជាន់ ដល់២៩ជាន់ មានចំនួន២០៧អគារ កំពស់ពី៣០ជាន់ ដល់៣៩ជាន់ មាន១២២អគារ និងអគារកំពស់ចាប់ពី៤០ជាន់ឡើង មានចំនួន៥០អគារ។
ដោយឡែកគិតចាប់ពីឆ្នាំ២០០៨ ដល់ដំណាច់ឆ្នាំ២០២០ សំណង់សណ្ឋាគារវិញមានចំនួន១ ៩៣៧គម្រោង សំណង់អគារពាណិជ្ជកម្មមានចំនួន ២ ៦៥១គម្រោង សំណង់អគាររោងចក្រមានចំនួន១០ ៤២២គម្រោង និងសំណង់អគារពហុមុខងារ មានចំនួន២០៧គម្រោង។
ក្រៅពីសំណង់អគារខ្ពស់ៗ កម្ពុជាក៏មានការវិនិយោគច្រើនទៅលើបុរីលំនៅឋានផងដែរ ដោយក្នុងនោះ គម្រោងបុរីលំនៅឋាន និងបណ្ដុំលំនៅឋានមានលក្ខណៈជាបុរីមានចំនួន៣៩៣គម្រោង៕
ប្រភព៖ construction-property
22/02/2021
តម្លៃដីធ្លីក្រុងភ្នំពេញ សីហនុ និងសៀមរាបប្រែប្រួលយ៉ាងណាដែរក្នុងឆ្នាំ ២០២០?
---------------
ជារួម ចំនួនការទិញលក់អចលនទ្រព្យនៅកម្ពុជាទាំងមូលសម្រាប់ឆ្នាំ ២០២០ ថមថយប្រមាណពី ១៥% ទៅ ២០% ក្ដី ក្នុងឆ្នាំ ២០២០ តម្លៃដីធ្លីជាមធ្យមនៅតែរក្សាជំហររឹងមាំ ឬធ្លាក់ចុះបន្ដិតបន្ដួចទៅតាមតំបន់។
សម្រាប់ឆមាសទី ២ ឆ្នាំ ២០២០ តម្លៃដីធ្លីនៅខេត្តសៀមរាប និងខេត្តព្រះសីហនុជាមធ្យមបានធ្លាក់ចុះប្រមាណ ១១,២% និង ៧,២%។
តម្លៃដីទាំង ១៤ ខណ្ឌនៃរាជធានីភ្នំពេញ ឃើញថានៅតែរក្សាលំនឹង ពោលគឺជាមធ្យមកើនឡើងបន្តិចបន្តួចប្រមាណ ៤,៤% ទោះបើមានការរីករាលដាលនៃជំងឺកូវីដ ១៩ ក្ដី ។
#ក្រុងភ្នំពេញ
សម្រាប់រាជធានីភ្នំពេញតម្លៃដីក្នុងខណ្ឌដង្កោកើនឡើងខ្ពស់ជាងគេគឺ ប្រមាណ ១៧,៩%។
ខណ្ឌដែលតម្លៃដីកើនឡើងខ្ពស់បន្ទាប់គឺខណ្ឌកំបូល ខណ្ឌសែនសុខ និងខណ្ឌព្រែកព្នៅ ដែលតម្លៃបានកើនឡើង ៨% ៧,៣% និង ៦,៥%។
ឆ្នាំ ២០២០ ចាត់ទុកថាឆ្នាំដំបូងក្នុងរយៈពេល ៥ ឆ្នាំចុងក្រោយនេះ ដែលតម្លៃដីធ្លីនៅក្នុងក្រុងដូចជានៅក្នុងខណ្ឌដូនពេញ ខណ្ឌ ៧ មករា និងខណ្ឌចំការមន មិនឡើងថ្លៃ។ ទោះយ៉ាងណាតម្លៃដីនៅក្នុងខណ្ឌទាំងនេះ គឺនៅតែមានតម្លៃខ្ពស់បំផុតបើប្រៀបធៀបទៅនឹងខណ្ឌផ្សេងៗទៀត ពោលគឺចន្លោះពី ៤០០០ ទៅ ៥០០០ ដុល្លារក្នុងមួយម៉ែត្រការ៉េ។
#ខេត្តព្រះសីហនុ
ដោយឡែកសម្រាប់ខេត្តព្រះសីហនុវិញ តម្លៃដីក៏បានធ្លាក់ចុះជាមធ្យម ៧,២% ដោយសង្កាត់ ៤ មានការថយចុះខ្លាំងជាងគេប្រមាណ ១៦,៧% បន្ទាប់មកគឺសង្កាត់ ១ និងសង្កាត់ ២។
បើតាមអ្នកជំនាញការធ្លាក់ចុះនៃតម្លៃដីធ្លីនៅខេត្តព្រះសីហនុគឺមិនមែនបណ្តាលមកពីវិបត្តិកូវីដតែមួយមុខទេ តែមួយចំណែកធំបណ្ដាលមកពីឥទ្ធិពលនៃការការបិទល្បែងអនឡាញកាលពីនៅឆ្នាំ ២០១៩ កន្លងមកនេះ ។
#ខេត្តសៀមរាប
តម្លៃដីធ្លីនៅខេត្តសៀមរាបគឺធ្លាក់ចុះខ្លាំងជាងគេបើប្រៀបធៀបទៅនឹងរាជធានីភ្នំពេញនិងខេត្តព្រះសីហនុ ដែលមួយផ្នែកធំគឺដោយសារតែការថមថយនៃវិស័យទេសចរណ៍។
តម្លៃដីនៅតំបន់ E បានធ្លាក់ចុះយ៉ាងខ្លាំងដល់ទៅ ១៤,៣% ក្នុងឆមានទី ២ នៃឆ្នាំ ២០២០ បើប្រៀបធៀបនឹងរយៈពេលដូចគ្នានៃឆ្នាំ ២០១៩ ។
មានតែតម្លៃដីនៅតំបន់ A និងតំបន់ B ទេ ដែលនៅស្ថេរ ខណៈតំបន់ផ្សេងៗទៀតធ្លាក់ចុះចន្លោះពី ០,៨៣% ទៅ ១៤,៣៩% ។
ប្រភព៖ construction-property
