កងទ័ពជើងគោកនៃកងយោធពលខេមរភូមិន្ទ Royal Cambodian Army

សមយុទ្ធពហុភាគី EX-PRAGATI 2026 នៅសាធារណរដ្ឋឥណ្ឌា បានបិទបញ្ចប់

ឧត្តមសេនិយ៍ទោ ហេង មករា ទទួលបានការអនុញ្ញាតតំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ ម៉ៅ សុផាន់ អគ្គមេបញ្ជាការរង មេបញ្ជាការកងទ័ពជើងគោក ចូលរួមជាកម្មវិធីបិទ EX-PRAGATI 2026 នៅប្រទេសឥណ្ឌា មានប្រទេសចូលរួមចំនួន១៣ ប្រទេស ក្នុងនោះកងទ័ពជើងគោកនៃកងយោធពលខេមរភូមិន្ទបានបញ្ជូនកម្លាំងចូលរួម៣២នាក់ចូលរួម ។

PRAGATI 2026 ធ្វើឡើងពីថ្ងៃទី១៨-៣១ ឧសភា ២០២៦ នៅប្រទេសឥណ្ឌា ក្នុងស្មារតីភាពជាដៃគូ សមភាព និងគោលបំណងចែករំលែក លំហាត់ប្រាណផ្តល់នូវវេទិកាដ៏មានតម្លៃសម្រាប់ការផ្លាស់ប្តូរវិជ្ជាជីវៈ ការផ្លាស់ប្តូរការអនុវត្តល្អបំផុត និងការពង្រឹងចំណងយោធាទៅយោធាក្នុងបរិយាកាសសន្តិសុខស្មុគស្មាញកាន់តែកើនឡើង
និងចែករំលែកបទពិសោធន៍ ការប្តេជ្ញាចិត្តនៃការចូលរួម ឆ្ពោះទៅរកស្ថិរភាពតំបន់ កិច្ចសហប្រតិបត្តិការការពារជាតិ និងតំបន់មហាសមុទ្រឥណ្ឌាមានសុវត្ថិភាព។

‎បញ្ជាការដ្ឋានតំបន់ប្រតិបត្តិការសឹករងកំពង់ធំ បើកកិច្ចប្រជុំបូកសរុបលទ្ធផលការងារ ឆមាសទី១ ឆ្នាំ ២០២៦ ប្រកាសកែសម្រួលសមាសភាព និងពង្រឹងតួនាទីភារកិច្ច ក្រុមការងារយេនឌ័រ
‎
‎ខេត្តកំពង់ធំ៖ នៅព្រឹកថ្ងៃទី១ ខែមិថុនា ឆ្នាំ២០២៦ នៅទីបញ្ជាការតំបន់ប្រតិបត្តិការសឹករងកំពង់ធំ យោធភូមិភាគទិ៤ បានបើកកិច្ចប្រជុំ បូកសរុបលទ្ធផលការងារបញ្ជ្រាបយេនឌ័រ ឆមាសទី១ និងដាក់ចេញនូវទិសដៅអនុវត្តបន្ត ឆមាសទី២ ឆ្នាំ២០២៦ ព្រមទាំងបានប្រកាសកែសម្រួលសមាសភាពថ្នាក់ដឹកនាំ និងក្រុមការងារមួយចំនួន សំដៅពង្រឹងតួនាទីភារកិច្ចរបស់ការងារបញ្ជ្រាបយេនឌ័រ ឱ្យមានប្រសិទ្ធភាព ។ កិច្ចប្រជុំនេះប្រព្រឹត្តទៅទៅស្ថិតក្រោមអធិបតីភាព ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ ។
‎
‎លោកស្រីវរសេនីយ៍ត្រី អ៊ុត លក្ខិណា ជំនួយការគិលានដ្ឋាននៃបញ្ជាការដ្ឋានតំបន់ប្រតិបត្តិការសឹករងកំពង់ធំ និងជាសមាជិកក្រុមការងារបញ្ជ្រាបយេនឌ័រ បានឡើងអានរបាយការណ៍ស្ដីអំពីលទ្ធផលការងារបញ្ជ្រាបយេនឌ័រ ដែលសម្រេចបាន​ ក្នុងធមាសទី១ ឆ្នាំ ២០២៦ កន្លងទៅ និង​ដោយបានគូសបញ្ជាក់អំពីចំណុចខ្លាំង ចំណុចខ្វះខាត និងបញ្ហាប្រឈមមួយចំនួន ដែលត្រូវរួមគ្នាបន្តដោះស្រាយ ដើម្បីការងារបញ្ជ្រាបយេនឌ័រ ទទួលបានជោគជ័យនៅធមាសទី២ ឆ្នាំ ២០២៦ ខាងមុខនេះ បន្ថែមទៀត ។
‎
‎លោកស្រី វរសេនីយ៍ទោ យូ មុន្នីរ័ត្ន នាយសេនាធិការរង ប្រធានក្រុមការងារបញ្ច្រាបយេនឌ័រ ដែលទើបបានកែសម្រួលថ្មី និងជាប្រធានយោធិននារី នៃបញ្ជាការដ្ឋានតំបន់ប្រតិបត្តិការសឹកររងកំពង់ធំ បានឡើងអានសេចក្តីសម្រេចស្តីពីកាកែសម្រួល សមាសភាព និងតួនាទីភារកិច្ច របស់ក្រុមការងារបញ្ជ្រាបយេនឌ័រ និងក្រុម ការងារស្ត្រីនៃបញ្ជាការដ្ឋានតំបន់ប្រតិបត្តិការសឹករងកំពង់ធំ ដែលត្រូវបានសម្រេចកែសម្រួលថ្មី និងអនុវត្តចាប់ពីថ្ងៃដែលបានប្រកាសនេះតទៅ ។
‎
‎ឧត្តមសេនីយ៍ទោ សោម ស៊ុន បានថ្លែងនូវការកោតសរសើរ ចំពោះយោធិននារី រួមជាមួយថ្នាក់ដឹកនាំគ្រប់លំដាប់ថ្នាក់ មេបញ្ជាការគ្រប់បណ្ដាកងឯកភាព នាយការិយាល័យ និងស្ថាប័នចំណុះ ព្រមទាំងនាយទាហាន នាយទាហានរង និងពលទាហានទាំងអស់ នៃបញ្ជាការដ្ឋានតំបន់ប្រតិបត្តិការសឹករងកំពង់ធំ ដែលបានសហការ រួមគ្នា ក្នុងការបំពេញតួនាទីភារកិច្ចការងារបញ្ជ្រាបយេនឌ័រនៅក្នុងអង្គភាព និងគ្រួសារយោធិនគ្រប់រូបបានយ៉ាងល្អប្រសើរ។ ជាមួយនោះដែរ យោធិននារីនៃបញ្ជាការដ្ឋានតំបន់ប្រតិបត្តិការសឹករងកំពង់ធំ ក៏បានចូលរួមចំណែកយ៉ាងសកម្ម ក្នុងការងារសង្គម ក៏ដូចជាការងារសមាគមអតីតយុទ្ធជននិងនិវត្តន៍កម្ពុជានៅខេត្តកំពង់ធំ នាពេល​កន្លង​ទៅ​ផងដែរ។
‎
‎ឧត្តមសេនីយ៍ទោ សោម ស៊ុន បានប្រគល់ភារកិច្ចសំខាន់ៗមួយចំនួនចំពោះសមាសភាពថ្នាក់ដឹកនាំក្រុមការងារយេនឌ័រ ដែលទើបកែសម្រួលថ្មី ត្រូវយកចិត្តទុកដាក់បំពេញភារកិច្ចប្រកបដោយស្មារតីទទួលខុសត្រូវខ្ពស់ ។ ជាមួយនោះដែរ ត្រូវចាត់តាំងអនុវត្តរបៀបរបរការងារឲ្យបានច្បាស់លាស់ ។ ត្រូវ​មានរបាយការណ៍ និងរបបប្រជុំឱ្យបានទៀងទាត់ ។ ហើយត្រូវចេះសាមគ្គីភាព ឯកភាពគ្នាក្នុងការបំពេញភារកិច្ច ស្របតាមច្បាប់ស្ដីពីលក្ខន្តិកៈ
‎ទូទៅរបស់កងយោធពលខេមរភូមិន្ទ។
‎នៅក្នុងឱកាសនេះដែរ ឧត្តមសេនីយ៍ទោ សោម ស៊ុន ក៏បានអំពាវនាវដល់ថ្នាក់ដឹកនាំ ដែលមានលទ្ធភាព សូមមេត្តាជួយឧបត្ថម្ភគាំទ្រជាថវិកា និងសម្ភារៈ គ្រឿងឧបភោគបរិភោគ តាមលទ្ធភាព ដែលអាចធ្វើទៅបាន ដេីម្បីជួយដល់ក្រុមការងារយេនឌ័រ ឲ្យ​មានលទ្ធភាពគ្រប់គ្រាន់ក្នុងការធ្វើសកម្មភាពមនុស្សធម៌ ជួយដល់ជនរងគ្រោះជាស្ត្រី ឬក្រុមគ្រួសារកងទ័ព ឬប្រជាពលរដ្ឋ ជួប​គ្រោះ​មហន្តរាយ​ផ្សេងៗ​ និងអតីតយុទ្ធជន ដែលមានជីវភាពលំបាកខ្វះខាត នៅ​តាម​មូលដ្ឋាន​នានា​ នៅក្នុង​ខេត្ត​កំពង់​ធំ​យេីងផងដែរ ។

ឧត្តមសេនីយ៍ទោ សេង ធារិន នាំយកការឧបត្ថម្ភរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ជាស្បៀងអាហារ និងថវិកា ដល់សាលាពលទាហានទី៥

(បាត់ដំបង)៖ ថ្ងៃចន្ទ ទី១ ខែមិថុនា ឆ្នាំ២០២៦ ឧត្តមសេនីយ៍ទោ សេង ធារិន មេបញ្ជាការរង នាយសេនាធិការ យោធភូមិភាគទី៥ បាននាំយកអំណោយដ៏ថ្លៃថ្លារបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី រួមមាន អង្ករ គ្រឿងឧបភោគបរិភោគ និង ថវិកា សម្រាប់ទ្រទ្រង់ការងារសាលា យោធាចារ្យ និង គ្រូគ្រប់គ្រង នៅសាលាពលទាហានទី៥ យោធភូមិភាគទី៥។

ការឧបត្ថម្ភនេះ ជាការយកចិត្តទុកដាក់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ដល់ខឿនការពារជាតិដែលជាថ្នាលដ៏សំខាន់ក្នុងការជួយអភិវឌ្ឍបណ្តុះបណ្តាល និងលើកកម្ពស់សមត្ថភាពយោធិន នៃកងយោធពលខេមរភូមិន្ទ។

លោកឧត្ដមសេនីយ៍ត្រី ឌុច ដួន នាយកសាលាពលទាហានទី៥ ព្រមទាំងនាយទាហាន នាយទាហានរង ពលទាហានទាំងអស់ សូមគោរពថ្លែងអំណរគុណយ៉ាងជ្រាលជ្រៅ និងសូមគោរពជូនពរ សម្ដេចមហាបវរធិបតី នាយករដ្ឋមន្រ្តី នៃព្រះរាជាណាចក្រកម្ពុជា និងលោកជំទាវបណ្ឌិត ព្រមទាំងមេបញ្ជាការរង នាយសេនាធិការ យោធភូមិភាគទី៥ សូមមានសុខភាពល្អ បវរសួស្តី ជ័យជំនះគ្រប់ភារកិច្ច និងសូមសមប្រកបដោយពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕

ឧត្ដមសេនីយ៍ត្រី អ៊ុំ សុភា នាំយករទេះរុញអំណោយសម្តេចធិបតី និង លោកជំទាវ ឧបត្ថម្ភដល់គ្រួសារអតីតយុទ្ធជនពិការ

ខេត្តកំពង់ឆ្នាំង៖ ដោយមើលឃើញពីទុក្ខលំបាករបស់ប្រជាពលរដ្ឋឈ្មោះ អ៊ុក មួន ភេទស្រី អាយុ ៨៧ឆ្នាំ ជាភរិយារបស់អតីតយុទ្ធជន ឈ្មោះ ហេង ហុង អាយុ ៨១ឆ្នាំ រស់នៅភូមិធម្មយុត្តិ សង្កាត់ប្អេរ ក្រុងកំពង់ឆ្នាំង ខេត្តកំពង់ឆ្នាំង ដែលពិការជើងទាំងសងខាង ត្រូវធ្វើដំណើរដោយវារនឹងដៃរហូត នៅព្រឹកថ្ងៃចន្ទ ទី០១ ខែមិថុនា ឆ្នាំ២០២៦ ឧត្តមសេនីយ៍ត្រី អ៊ុំ សុភា មេបញ្ជាការ តំបន់ប្រតិបត្តិការសឹករងកំពង់ឆ្នាំង និងជាអនុប្រធានប្រចាំការ សមាគមអតីតយុទ្ធជន និង និវត្តជន កម្ពុជា ខេត្តកំពង់ឆ្នាំង បានដឹកនាំនាយទាហាន មួយចំនួន នាំយក រទេះរុញសម្រាប់ជនពិការ ០១គ្រឿង អង្ករ ៣០គីឡូក្រាម គ្រឿងឧបភោគបរិភោគ រួមនឹងថវិកាមួយចំនួន ដែលជាអំណោយដ៏ថ្លៃថ្លារបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និង លោកជំទាវបណ្ឌិត ពេជ ច័ន្ទមុនី ឧបត្ថម្ភដល់ពួកគាត់ ដើម្បីជួយសម្រួល និង ផ្តល់ភាពងាយស្រួលដល់ការធ្វើដំណើរប្រចាំថ្ងៃ ដោយពុំចាំបាច់វារបន្តទៀតទេ ។

លោកយាយ អ៊ុក មួន និងគ្រួសារ មានការសប្បាយរីករាយជាខ្លាំង ដែលបានទទួលរទេះរុញថ្មី និង សូមថ្លែងអំណរគុណយ៉ាងជ្រាលជ្រៅជូនចំពោះសម្តេចធិបតី និង លោកជំទាវបណ្ឌិត និង សូមប្រសិទ្ធិពរជ័យ បវរមហាប្រសើរ ជូនដល់ សម្តេច និងលោកជំទាវ សូមមានសុខភាពល្អបរិបូណ៌ កម្លាំងខ្លាំងក្លា ជន្មាយុយឺនយូរ និង សូមជួបនូវពុទ្ធពរ ទាំង៤ប្រការ គឺ អាយុ វណ្ណៈ សុខៈពលៈ កុំបីឃ្លៀងឃ្លាតឡើយ ។

ឧត្ដមសេនីយ៍ត្រី ហុក ចន្តា មេបញ្ជាការ តំបន់ប្រត្តិបត្តិការសឹក កំពត អញ្ជើញ ជាអធិបតីផ្សព្វផ្សាយ អប់រំចិត្តសាស្ត្រ ពី សភាពការណ៍ ជាតិ អន្តរជាតិ និងក្នុងតំបន់

កំពត៖ ថ្ងៃទី២៨ ខែឧសភា ឆ្នាំ២០២៦ លោកឧត្ដមសេនីយ៍ត្រី ហុក ចន្ថា មេបញ្ជាការ តំបន់ប្រតិបត្តិការសឹករងកំពត បានផ្សព្វផ្សាយ អប់រំចិត្តសាស្ត្រ ពីសភាពការណ៍ថ្មីៗ ផ្ទៃក្នុងប្រទេស សភាពការណ៍ផ្ទៃក្នុងតំបន់ ពិសេសផ្សព្វផ្សាយពីសភាពការណ៍ជម្លោះព្រំដែនរវាងកម្ពុជា-ថៃ ដែលភាគីថៃនៅតែបន្តបំពានមកលើកម្ពុជាឥតឈប់ឈរ និងបានផ្សព្វផ្សាយពីគោលនយោបាយឈ្នះ ឈ្នះ របស់សម្ដេចអគ្គមហាសេនាតេជោ ហ៊ុន សែន ដែលជាបីតាស្ថាបនិកនៃសន្តិភាព ដល់នាយទាហាន នាយទាហានរង និងពលទាហាន យល់ដឹងកាន់តែច្បាស់ពីតម្លៃសន្តិភាព ពីតួនាទី ភារកិច្ច និងលើកទឹកចិត្តឲ្យយោធិនគ្រប់រូបត្រូវហានលះបង់ធ្វើពលីកម្មគ្រប់បែបយ៉ាងក្នុងភារកិច្ចការពារជាតិ ការពារបូរណៈភាពទឹកដីមិនឲ្យខ្មាំងសត្រូវណា មកឈ្លានពានលើដឹកដីយើងបានជាដាច់ខាត ។

ក្នុងឱកាស នោះដែរលោកមេបញ្ជាការ តំបន់ប្រតិបត្តិការសឹករងកំពត ក៏បានលើកឡើងពីសារៈសំខាន់នៃនយោបាយឈ្នះ ឈ្នះ ដែលអង្គភាពបានចូលរួមរៀបចំពិព័រណ៌ប្រវត្តិសាស្ត្រយោធានិងសមិទ្ធផលនានាក្រោយកម្ពុជាទទួលបានសុខសន្តិភាពពេញលេញ របស់អង្គភាពក្នុងពិធីសម្ភោធដាក់ឲ្យប្រើប្រាស់ជាផ្លូវការស្តូបអនុស្សាវរីយ៍នយោបាយ ឈ្នះ ឈ្នះ កោះកុង នាថ្ងៃទី ៣០-៣១ ខាងមុខ ដល់នាយទាហាន នាយទាហានរង និងពលទាហានផងដែរ ។ និងជំរុញនាយទាហាន នាយទាហានរង និងពលទាហានតំបន់ប្រតិបត្តិការសឹករង កំពត ទាំងអស់យកចិត្តទុកដាក់រួមចំណែកផ្សព្វផ្យាយដល់ក្រុមគ្រួសារ មហាជន ពីការចូលរួមអនុវត្តច្បាប់កាតព្វកិច្ចយោធា ជាមួយរាជរដ្ឋាភិបាលឱ្យបានជោគជ័យ ដើម្បីការពារអធិបតេយ្យទឹកដី៕

គណៈបញ្ជាការស្រាលបង្ក្រាបបទល្មើសនេសាទខុសច្បាប់ ខេត្តកំពង់ធំ វាយតម្លៃអំពីជោគជ័យនៃការបង្ក្រាបបទល្មើសនេសាទ នៅក្នុង៖ ភូមិសាស្ត្រខេត្ត មានការថយចុះពី ៧០ ទៅ ៨០ ភាគរយ

ខេត្តកំពង់ធំ៖ នៅព្រឹកថ្ងៃទី ៣១ ខែ ឧសភា ឆ្នាំ ២០២៦ នៅទីបញ្ជាការតំបន់ប្រតិបត្តិការសឹករងកំពង់ធំ បានបើកកិច្ចប្រជុំ បូកសរុបវាយតម្លៃ អំពីលទ្ធផលការងារការពារ ទប់ស្កាត់ និងបង្ក្រាបបទល្មើសនេសាទ ក្នុងរដូវបើកនេសាទ ឆ្នាំ​២០២៥-២០២៦​ នាពេលកន្លងទៅ និងដាក់ចេញនូវវិធានការបន្ត​ នាពេលរដូវបិទនេសាទឆ្នាំ ២០២៦ ដែលនឹងឈានមកដល់នៅថ្ងៃទី ០១ ខែ មិថុនា ដល់ថ្ងៃទី ៣០ ខែកញ្ញា ឆ្នាំ២០២៦ខាងមុខនេះ ។ ដែលកិច្ចប្រជុំនេះ ស្ថិតក្រោមអធិបតីភាព ឯកឧត្តម អ៊ុង វុទ្ធី អភិបាលរងខេត្ត ប្រធានគណៈបញ្ជាការស្រាលបង្ក្រាបបទល្មើសនេសាទខុសច្បាប់ នៅតំបន់បឹងទន្លេសាប ខេត្ត​កំពង់ធំ​ និងឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង និងជាអនុប្រធានអចិន្ត្រៃយ៍ នៃគណៈកម្មការការពារ ទប់ស្កាត់ និងបង្ក្រាបបទល្មើសធនធានធម្មជាតិខេត្ត​ ព្រម​ទាំង​ដោយមានការចូលរួមពី ប្រធានមន្ទីរបរិស្ថានខេត្ត អនុប្រធានមន្ទីរកសិកម្ម រុក្ខាប្រមាញ់ និងនេសាទខេត្ត អាជ្ញាធរស្រុក ឃុំ និងបណ្ដាមន្ត្រីជំនាញពាក់ព័ន្ធ ចូលរួមតាមការអញ្ជើញផងដែរ។

ឧត្តមសេនីយ៍ទោ សោម ស៊ុន ក្នុងនាមអនុប្រធានអចិន្ត្រៃយ៍នៃគណៈកម្មការ ការពារ ទប់ស្កាត់ និងបង្ក្រាបបទល្មើសធនធានធម្មជាតិ ខេត្តកំពង់ធំ បានឡើងរាយការណ៍អំពីលទ្ធផលសំខាន់ៗមួយចំនួន ដែលកងកម្លាំងចម្រុះ ក្នុងគណៈបញ្ជាការស្រាល បង្ក្រាបបទល្មើសនេសាទ នៅតំបន់បឹងទន្លេសាប ក្នុងភូមិសាស្ត្រឃុំផាត់សណ្ដាយ និងឃុំពាមបាង ស្រុកស្ទោង ខេត្តកំពង់ធំ ព្រមទាំងបណ្ដាតំបន់មួយចំនួនទៀត នៅក្នុងខេត្តកំពង់ធំ ដែលកងកម្លាំងចម្រុះ​ បាន​សហការ​ជាមួយ​បណ្ដា​អង្គភាព​មិត្ត​នៃ​គណៈ​បញ្ជា​ការ​ឯកភាព​បង្ក្រាប​បទ​ល្មើស​នេសាទ​ខុស​ច្បាប់​ក្នុង​តំបន់​បឹង​ទន្លេ​សាប​ បាន​រួមគ្នា ធ្វើសកម្មភាពក្នុងការបង្ក្រាបបទល្មើសនេសាទ​ទទួលបានលទ្ធផលជោគជ័យគួរជាទីមោទនៈ ។ ដែលបច្ចុប្បន្ននេះ មជ្ឈដ្ឋានទូទៅមានការកោតសរសើរ ដោយផលត្រីបានសម្បូរឡើងវិញជាបណ្ដើរៗ ។

លោក ជិន ស៊ីថា នាយខណ្ឌរដ្ឋបាលជលផលខេត្តកំពង់ធំ បានឡើងថ្លែងអំណរគុណចំពោះកងកម្លាំងចម្រុះទាំងអស់ ដែលបានខិតខំរួមគ្នា ក្នុងការបំពេញភារកិច្ចប្រកបដោយស្មារតីទទួលខុសត្រូវខ្ពស់ ចូលរួមជាមួយជំនាញជលផលក្នុងការការពារ ទប់ស្កាត់ និងបង្ក្រាបបទល្មើសនេសាទ ទទួលបានលទ្ធផលល្អ ដើម្បីផលប្រយោជន៍ជាតិ និងប្រជាជនកម្ពុជាទាំងអស់គ្នា។ ជាមួយនេះដែរ លោកនាយខណ្ឌជលផល ក៏បានគូសបញ្ជាក់អំពីសេចក្តីជូនដំណឹងស្ដីពី រដូវបិទនេសាទឆ្នាំ ២០២៦ ដែលនឹងឈានចូលមកដល់នៅថ្ងៃស្អែក ទី០១ ខែមិថុនា រហូតដល់ថ្ងៃទី៣០ ខែកញ្ញា ឆ្នាំ២០២៦ និងសំណូមពរដល់កងកម្លាំងចម្រុះ សូមបន្តរួមគ្នា អនុវត្តឱ្យបានជោគជ័យជាថ្មីទៀត ។

បន្ទាប់មកអង្គប្រជុំ ដែលមានមេឃុំផាត់សណ្ដាយ ស្រុកកំពង់ស្វាយ មេឃុំពាមបាង ស្រុកស្ទោង និងអាជ្ញាធរដែនដីស្រុកទាំងពីរ ព្រមទាំងមន្ត្រីជំនាញ រួមជាមួយកងកម្លាំងប្រដាប់អាវុធទាំងបី និងមន្ត្រី ដែលមានការពាក់ព័ន្ធ ក្នុងគណៈបញ្ជាការស្រាលបង្ក្រាបបទល្មើសនេសាទខុសច្បាប់ បានពិភាក្សា និងវាយតម្លៃយ៉ាងម៉ត់ចត់ អំពីលទ្ធផលការពារ ទប់ស្កាត់ និងបង្ក្រាបបទល្មើសនេសាទខុសច្បាប់ ក្នុងរដូវបើកនេសាទ ឆ្នាំ២០២៥ - ឆ្នាំ២០២៦កន្លងទៅ ដោយបានឯកភាពវាយតម្លៃអំពីមោទនភាពជោគជ័យ ដោយបានធ្វើឱ្យបទល្មើសនេសាទមានការថយចុះប្រមាណពី ៧០ ទៅ ៨០ ភាគរយ ។ ហើយក៏បានលើកឡើងនូវបញ្ហាប្រឈមមួយចំនួន ដែលចាំបាច់ត្រូវរួមគ្នាដោះស្រាយឱ្យបានល្អនៅពេលខាងមុខ ។

ឯកឧត្តម អ៊ុង វុទ្ធី អភិបាលរងខេត្ត ប្រធានគណៈបញ្ជាការស្រាលបង្ក្រាបទល្មើសនេសាទខុសច្បាប់ ក្នុងភូមិសាស្ត្រស្រុកស្ទោង និងស្រុកកំពង់ស្វាយ នៅតំបន់បឹងទន្លេសាប បានថ្លែងនូវការកោតសរសើរ ចំពោះឧត្តមសេនីយ៍ទោ សោម ស៊ុន ក្នុងនាមអនុប្រធានអចិន្ត្រៃយ៍នៃគណៈកម្មការ ការពារ ទប់ស្កាត់ និងបង្ក្រាបទល្មើសធនធានធម្មជាតិ ខេត្តកំពង់ធំ ព្រមទាំងមន្ត្រីបណ្ដាមន្ទីរជំនាញ និងស្ថាប័នពាក់ព័ន្ធ រួមជាមួយកងកម្លាំងប្រដាប់អាវុធទាំងបី ដែលបានរួមគ្នា អនុវត្តតាមបទបញ្ជារបស់ឯកឧត្តម នួន ផារ័ត្ន អភិបាលខេត្ត ប្រធានគណៈបញ្ជាការឯកភាពរដ្ឋបាលខេត្តកំពង់ធំ ទទួលបានជោគជ័យគួរជាទីមោទនភាព ។ជាមួយនេះដែរ ឯកឧត្តម អ៊ុង វុទ្ធី ក៍បានឯកភាពលើការវាយតម្លៃ លទ្ធផលនៃការបង្ក្រាបបទល្មើសនេសាទខុសច្បាប់ ទទួលបានជោគជ័យដោយបទល្មេីសមានការថយចុះពី ៧០ ទៅ ៨០ ភាគរយ និងបានដាក់ចេញនូវទិសដៅ និងវិធានការចាំបាច់នានាមួយចំនួន ដែលត្រូវរួមគ្នាជាមួយស្ថាប័ន និងអង្គភាពពាក់ព័ន្ធផ្សេងទៀត ដើម្បីដោះស្រាយបញ្ហាប្រឈម ស្របតាមសំណូមពររបស់ប្រជាពលរដ្ឋ និងការអនុវត្តច្បាប់ស្ដីពីជលផល រួមជាមួយបទបញ្ជានានា ឱ្យមានប្រសិទ្ធភាព ដើម្បីសង្គមជាតិ និងដើម្បីប្រជាជនកម្ពុជាយេីង​ទាំងអស់គ្នា​ ។

មេបញ្ជាការ តំបន់ប្រតិបត្តិការសឹករងកំពង់ឆ្នាំង នាំយកអំណោយសម្តេចធិបតី និង លោកជំទាវ ឧបត្ថម្ភដល់ប្រជាពលរដ្ឋជួបការលំបាក

ខេត្តកំពង់ឆ្នាំង៖ នៅព្រឹកថ្ងៃសៅរ៍ ទី៣០ ខែឧសភា ឆ្នាំ២០២៦ ឧត្តមសេនីយ៍ត្រី អ៊ុំ សុភា មេបញ្ជាការ តំបន់ប្រតិបត្តិការសឹករងកំពង់ឆ្នាំង រួមជាមួយ លោកស្រី ង៉ែត វារីផល សមាជិកក្រុមប្រឹក្សាក្រុង និងជាប្រធាន គណៈកម្មការពិគ្រោះយោបល់កិច្ចការស្រ្តី និង កុមារ ក្រុងកំពង់ឆ្នាំង ដែលត្រូវជាភរិយារបស់ ឯកឧត្តម មេបញ្ជាការ បានដឹកនាំនាយទាហាន មួយចំនួន នាំយកស័ង្កសីចំនួន ៥០សន្លឹក អង្ករ ៣០គីឡូក្រាម គ្រឿងឧបភោគបរិភោគ រួមនឹងថវិកាមួយចំនួន ដែលជាអំណោយដ៏ថ្លៃថ្លារបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និង លោកជំទាវបណ្ឌិត ពេជ ច័ន្ទមុនី ឧបត្ថម្ភដល់កុមារី ឈ្មោះ ជា លីណា អាយុ ១៣ឆ្នាំ រស់នៅភូមិដំណាក់ពពូល សង្កាត់កំពង់ឆ្នាំង ក្រុងកំពង់ឆ្នាំង ដែលជួបការលំបាក និង ត្រូវចិញ្ចឹមប្អូនប្រុសតូចអាយុ ២ឆ្នាំ ដោយសារឪពុកម្តាយ និង បងប្រុស កំពុងជាប់ក្នុងពន្ធធនាគារ ។ ក្នុងនោះ លោកស្រី ង៉ែត វារីផល ក៏បានចូលរួមឧបត្ថម្ភថវិកាផ្ទាល់ខ្លួនចំនួន ១០ម៉ឺនរៀល រួមនឹងថវិការបស់ នាយទាហាន មួយចំនួនទៀត ជូនដល់កុមារី ជា លីណា ផងដែរ ។

កុមារី ជា លីណា សូមថ្លែងអំណរគុណយ៉ាងជ្រាលជ្រៅជូនចំពោះសម្តេចធិបតី និង លោកជំទាវបណ្ឌិត និង សូមប្រសិទ្ធិពរជ័យ បវរមហាប្រសើរ ជូនដល់ សម្តេច និងលោកជំទាវ សូមមានសុខភាពល្អបរិបូណ៌ កម្លាំងខ្លាំងក្លា ជន្មាយុយឺនយូរ និង សូមជួបនូវពុទ្ធពរ ទាំង៤ប្រការ គឺ អាយុ វណ្ណៈ សុខៈពលៈ កុំបីឃ្លៀងឃ្លាតឡើយ ។