នាយកដ្ឋានអភិវឌ្ឍន៍ដំណាំរយៈពេលវែង DPCD GDA

នៅថ្ងៃទី២៥-២៩ ខែឧសភា ឆ្នាំ២០២៦ ក្រុមការងារបច្ចេកទេសនាយកដ្ឋានអភិវឌ្ឍន៍ដំណាំរយៈពេលវែង បានចុះទៅបើកវគ្គបណ្ដុះបណ្ដាលបច្ចេកទេសដាំដុះ និងថែទាំដំណាំដំឡូងមីដល់ប្រជាកសិករជាសមាជិកសហគមន៍កសិកម្មចំនួន៧នៅខេត្តព្រះវិហារ ដែលរួមមាន៖
(១). សហគមន៍កសិកម្មរំដួលសាមគ្គីមានជ័យម្លូរព្រៃពីរ
(២). សហគមន៍កសិកម្មអភិវឌ្ឍន៍សាមគ្គីសង្កែពីរ
(៣). សហគមន៍កសិកម្មកោងយោងជួបជុំ
(៤). សហគមន៍កសិកម្មជាំក្សាន្តជាយដែនមានជ័យ
(៥). សហគមន៍កសិកម្មស្ដៅអភិវឌ្ឍន៍
(៦). សហគមន៍កសិកម្មត្បែងពីរសាមគ្គីរីកចំរើន
(៧). សហគមន៍កសិកម្មក្របៅព្រហ្មទេព។

វគ្គបណ្ដុះបណ្ដាលនេះផ្ដោតសំខាន់ទៅលើការជ្រើសរើសពូជ ការរៀបចំដី ការដាំដុះ ការគ្រប់គ្រងស្មៅ និងប្រើប្រាស់ជី។ ក្នុងនោះ ក្រុមការងារបានធ្វើការអនុវត្ត ក៏ដូចជាបង្ហាញពីបច្ចេកទេសផ្ទាល់ទៅដល់កសិករនៅចម្ការរបស់ពួកគាត់ផងដែរ។

នាថ្ងៃទី២៥-២៨ ខែឧសភា ឆ្នាំ២០២៦ ក្រុមការងារនាយកដ្ឋានអភិវឌ្ឍន៍ដំណាំរយៈពេលវែង បានចុះទៅដាំដំឡូងមីធ្វើពិសោធន៍នៅឯកសិដ្ឋានផលិតពូជដំណាំតំបន់ដីខ្ពស់ចម្ការលើ ដែលមានទីតាំងស្ថិតនៅឃុំបុសខ្នុរ ស្រុកចំការលើ ខេត្តកំពង់ចាម ដោយសកម្មភាពនេះស្ថិតក្រោមកិច្ចសហការរវាងអគ្គនាយកដ្ឋានក្សេត្រសាស្ត្រ ជាមួយនឹងអង្គការ CIAT។

ការធ្វើពិសោធន៍នោះគឺដើម្បី៖
- ដាំពិសោធន៍ពូជដំឡូងមីថ្មីចំនួន៧ពូជ ដើម្បីតាមដាននិងវាយតម្លៃរកពូជដែលធន់នឹងជំងឺកញ្ចុំស្លឹក ទទួលបានទិន្នផលនិងមានកម្រិតជាតិម្សៅខ្ពស់
- ដាំដំឡូងមីពិសោធន៍ដើម្បីប្រៀបធៀបលើប្រសិទ្ធភាពនៃការប្រើប្រាស់ថ្នាំស្មៅ
- ដាំពិសោធន៍លើការដាំដំណាំឆ្លាស់រវាងដំណាំដំឡូងមី ជាមួយសណ្តែកបាយ សណ្តែកដី និងចង្ក្រងស្វា។

នាថ្ងៃទី២៧ ខែឧសភា ឆ្នាំ២០២៦ នេះ ក្រុមការងារនៃនាយកដ្ឋានអភិវឌ្ឍន៍ដំណាំរយៈពេលវែង បានចុះពិនិត្យស្ថានភាពចម្ការ និងចែករំលែកបទពិសោធន៍បច្ចេកទេសថ្មីៗលើដំណាំស្វាយចន្ទី ជូនដល់បងប្អូនកសិករផ្ទាល់ នៅភូមិអន្លង់ត្រាច ឃុំថ្មពួក ស្រុកថ្មពួក ខេត្តបន្ទាយមានជ័យ។
ក្នុងបេសកកម្មនេះ ក្រុមការងារយើងបានផ្តោតសំខាន់លើ៖
✅ ណែនាំលម្អិតអំពីពេលវេលាសមស្របក្នុងការដាក់ជីលើកទី១ បន្ទាប់ពីបញ្ចប់រដូវប្រមូលផលរួច។
✅ ចុះពិនិត្យ និងវាយតម្លៃផ្ទាល់លើដើមចន្ទី ដែលបានតាក់តែងមែករួចរាល់ ដើម្បីធានាដល់ការលូតលាស់ល្អ។
✅ ពន្យល់ និងចែករំលែកចំណេះដឹងបន្ថែម អំពីការតាមដាន បង្ការជំងឺ និងទប់ស្កាត់ការបំផ្លាញពីសមាសភាពចង្រៃផ្សេងៗ។
ក្រុមការងារយើង តែងតែបន្តចុះជាប់ជាមួយកសិករ ដើម្បីជំរុញទិន្នផល និងគុណភាពកសិផលយើងឱ្យកាន់តែប្រសើរ!

នាថ្ងៃទី២៦ ខែឧសភា ឆ្នាំ២០២៦ ក្រុមការងារនៃនាយកដ្ឋានអភិវឌ្ឍន៍ដំណាំរយៈពេលវែង បានចុះទៅផ្ទេរបច្ចេកទេសលើដំណាំពោតក្រហម ដល់ក្រុមកសិករនៅភូមិកូនខ្លែង ឃុំប៉ោយចារ ស្រុកភ្នំស្រុក ខេត្តបន្ទាយមានជ័យ ដោយមានការអញ្ជើញចូលរួមពីសំណាក់មន្ទីរកសិកម្ម រុក្ខាប្រមាញ់ និងនេសាទខេត្តបន្ទាយមានជ័យផងដែរ។
ក្រុមការងារបានចែករំលែកចំណេះដឹង និងបច្ចេកទេសសំខាន់ៗមួយចំនួនលើដំណាំពោតក្រហម ដែលមានដូចជា:
១/ ការរៀបចំដី និងការជ្រើសរើសពូជ
២/ ការប្រើប្រាស់ជី
៣/ ការគ្រប់គ្រងសមាសភាពចង្រៃ
៤/ ការប្រមូលផល និងស្តុកទុក
ក្នុងនោះផងដែរ ក្រុមការងារក៏បានរៀបចំដីសម្រាប់ធ្វើចម្ការបង្ហាញដំណាំពោតក្រហម ចំនួន២ទីតាំង ដើម្បីឱ្យកសិករក្នុងភូមិនោះ អាចអនុវត្តបច្ចេកទេសជាក់ស្តែងផងដែរ។

ទី២១ ខែឧសភា ឆ្នាំ២០២៦ ក្រុមការងារនៃនាយកដ្ឋានអភិវឌ្ឍន៍ដំណាំរយៈពេលវែង បានសហការជាមួយមន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ធំ ដើម្បីអនុវត្តកាងារគម្រោងគជ់ (PEARL) គាំទ្រដោយអង្គការស្បៀងអាហារ និងកសិកម្ម នៃសហប្រជាជាតិ (FAO)។ ក្រុមការងារបានចុះជ្រើសរើសកសិករបង្គោល ជាម្ចាស់ចម្ការស្វាយចន្ទីដែលមានសក្តានុពល និងមានឆន្ទៈខ្ពស់ក្នុងការចូលរួមអនុវត្តកម្មវិធីសាលារៀនស្រែកសិករ ឬចម្ការកសិករស្តីពីផលិតកម្មដំណាំស្វាយចន្ទី និងពិនិត្យទីតាំងចម្ការដែលសមស្របតាមលក្ខខណ្ឌតម្រូវ សរុបចំនួន១២ ចម្ការ ស្ថិតក្នុងស្រុកសន្ទុក ស្រុកប្រាសាទបាល័ង្ក ស្រុកប្រាសាទសំបូរ និងស្រុកសណ្ដាន់ខេត្តកំពង់ធំ។

នាថ្ងៃទី១៩-២០ ខែឧសភា ឆ្នាំ២០២៦ ក្រុមការងារបច្ចេកទេសនាយកដ្ឋានអភិវឌ្ឍន៍ដំណាំរយៈពេលវែងនៃអគ្គនាយកដ្ឋានក្សេត្រសាស្រ្ត បានបើកវគ្គបណ្តុះបណ្តាលស្តីពីបច្ចេកទេសដាំដុះ និងថែទាំដំណាំដំឡូងមីដល់កសិករជាសមាជិកសហគមន៍កសិកម្មនៅខេត្តត្បូងឃ្មុំចំនួន០៣ រួមមាន៖
១). សហគមន៍កសិកម្មបៃតងគោកស្រុក
២). សហគមន៍កសិកម្មក្ដីសង្ឃឹមកសិករ
៣). សហគមន៍អភិវឌ្ឍន៍កសិកម្មដំណាំម្រេចដារមេមត់។

វគ្គបណ្ដុះបណ្ដាលនេះផ្ដោតសំខាន់ទៅលើការជ្រើសរើសពូជ ការរៀបចំដី ការដាំដុះ ការគ្រប់គ្រងស្មៅ និងការប្រើប្រាស់ជី ដោយមានការធ្វើបង្ហាញដោយផ្ទាល់នៅនឹងចម្ការដំណាំដំឡូងមីផងដែរ។

នាថ្ងៃទី២១ ខែឧសភា ឆ្នាំ២០២៦ ក្រុមការងារនាយកដ្ឋានអភិវឌ្ឍន៍ដំណាំរយៈពេលវែង បានចុះបំពេញបេសកកម្មត្រួតពិនិត្យវឌ្ឍនភាពការងារ លើការធ្វើបង្ហាញ និងអភិរក្សពូជម្រេចកំចាយ (ពូជក្នុងស្រុកស្លឹកតូច) និងពូជស្វាយចន្ទីអ៊ឹម-២៣ (M-23) ព្រមទាំងកែលម្អហេដ្ឋារចនាសម្ព័ន្ធ នៅស្ថានីយពិសោធន៍កសិកម្មវាលរេញ ដែលស្ថិតក្នុងភូមិត្រពាំងគា ឃុំជើងគោ ស្រុកព្រៃនប់ ខេត្តព្រះសីហនុ។
ក្នុងបេសកកម្មនេះ ក្រុមការងារបានបង្ហាញពីការអនុវត្តបច្ចេកទេសតាក់តែងមែក ការថែទាំ និងការប្រើប្រាស់ជីកសិកម្មតាមលក្ខណៈស្តង់ដារ លើបច្ចេកទេសដុះដំណាំម្រេច និងស្វាយចន្ទី។ ធ្វើការជួសជុលសោរ ព្រមទាំងផ្តល់បំពាក់ប្រព័ន្ធបំភ្លឺផ្លូវដោយថាមពលព្រះអាទិត្យចំនួន៤សម្រាប់បំភ្លី អគារ និងឃ្លាំង និងផ្តល់តុចំនួន៥ ទៅឱ្យស្ថានីយសម្រាប់ទុកប្រើប្រាស់ប្រចាំថ្ងៃផងដែរ។

សូមជូនប័ណ្ណពត៌មានសម្រាប់ដំណាំអតិភាព
2026 #
@-DPCD/GDA/MAFF

នៅរសៀលថ្ងៃទី១៩ ខែឧសភា ឆ្នាំ២០២៦ លោក យិន ច័ន្ទសុធី អគ្គនាយករង នៃអគ្គនាយកដ្ឋានក្សេត្រសាស្ត្របានដឹកនាំប្រជុំស្ដីពីការលើកផែនការសកម្មភាពការងារប្រចាំឆ្នាំ២០២៧ ដោយមានការចូលរួមពី លោក អ៊ុត សំអាល់ និងថ្នាក់ដឹកនាំទាំងអស់នៃនាយកដ្ឋានអភិវឌ្ឍន៍ដំណាំរយៈពេលវែង។
កិច្ចប្រជុំនេះត្រូវបានរៀបចំឡើងដោយផ្តោតសំខាន់លើចំណុចអាទិភាពដូចជា៖
១) ការវាយតម្លៃលទ្ធផលការងារ៖ ពិនិត្យមើលឡើងវិញនូវសមិទ្ធផល និងវឌ្ឍនភាពការងារកន្លងមក ដើម្បីដកស្រង់បទពិសោធន៍ និងកែលម្អចំណុចខ្វះខាតនានា។
២) ការកំណត់ទិសដៅយុទ្ធសាស្ត្រឆ្នាំ២០២៧៖ រៀបចំផែនការសកម្មភាពឱ្យមានភាពច្បាស់លាស់ ស្របតាមគោលនយោបាយអភិវឌ្ឍន៍វិស័យកសិកម្មរបស់ក្រសួងកសិកម្ម រុក្ខាប្រម៉ាញ់ និនេសាទ។
៣) ការពង្រឹងប្រសិទ្ធភាពការងារ៖ ជំរុញការស្រាវជ្រាវ ការចុះប្រមូលទិន្នន័យ និងការអភិវឌ្ឍបច្ចេកទេសដើម្បីជួយលើកកម្ពស់ផលិតភាព និងជីវភាពរបស់បងប្អូនប្រជាកសិករ។

នាថ្ងៃទី១៥ ខែឧសភា ឆ្នាំ២០២៦ ដោយមានការចង្អុរបង្ហាញពីលោកប្រធាននាយកដ្ឋាន លោក ជីណូរុំ ប្រធានការិយាល័យផ្តល់ម្សៅ និងស្ករ នៃនាយកដ្ឋានអភិវឌ្ឍន៍ដំណាំរយៈពេលវែង បានចុះទៅកសិដ្ឋានផលិតពូជដំណាំតំបន់ដីខ្ពស់ចម្ការលើ ខេត្តកំពង់ចាម ដើម្បីពិនិត្យវឌ្ឍនភាពការងារភ្ជួររាស់ រៀបចំដី សម្រាប់ត្រៀមដាំរក្សាពូជដំណាំកប្បាស សណ្តែកបាយ សណ្តែកសៀង ថែទាំចន្ទីនិងផលិតដើមពូជដំឡូងមីដែលធន់នឹងជំងឺម៉ូសាអ៊ិក ក៏ដូចជាការបង្ហាញជូននូវបច្ចេកទេសថ្មីៗជូនកសិករក្នុងតំបន់ តាមរយៈការអនុវត្តថវិកាគម្រោងកម្មវិធីរបស់ ក្រសួងកសិកម្ម រុក្ខាប្រមាញ់ និងនេសាទ។